Thumna Makai | KTZ

    KTZ
    Dotna & Dawnna

    Dongtu: Upa N Tualzathang, EBCC Bungmual
    Dawngtu: Rev K Kamchinkhup, Director of Missions

    Mark 2:25,26 David leh a lawmte a gilkial lai ua Siampu-lian Abiathar in Siampute kia neksiang David sang a pia.

    1 Samuel 21:1-6 David leh a lawmte a gilkial lai ua Siampute kia nek siang sang Siampu Ahimelek in David kiang ah a pia.

    Dotna 1: Siampu Abiathar leh Siampu Ahimelek mi kibang hia?
    Dawnna: Hiai gel mi kibang hilou in, pata hi ding uhi. 1 Samuel 23:6 ah “Ahimelek’ tapa Abiathar” kichi hi.

    Dotna 2: Kua Siampu pen in David sang pia ahia?
    Dawnna: 1 Samuel 21:1-6 kikal a kigen bang in Siampu Ahimelek in David nek ding pia hi ding hi. Mark 2:25,26 a Jesu’n Abiathar Siampu-lianpen a gen toh kikalh a bat man in, hiai dotna Laisiangthou sutmite’n na sut in, genchetna tuamtuam na bawl uhi.
    Bible sung ah min kibang leh min khat sang a tamzaw nei a tam mahmah man in, min gelhdan thu ahi chi leng om hi. Mosi sungpa min Reuel (Ex 2:18) leh Jethro (Ex 3:1) in kigelh tuak hi. Kumpi Jotham pa min Kumpi Uzzia (Mt 1:9, 2 Kum 15:32) leh Azaria (1 Kro 3:12, 2 Kum 15:7) in kigelh tuak hi. Tua i dotna thu ah leng 1 Samuel 23:6 toh kibanglou in, 2 Samuel 8:17 ah “Abiathar’ tapa Ahimelekh siampi” kichi ahihman in min gelhdan toh kisai ahi ding chih ngaihdan nei pawl leng a om uhi. (Matt Slick).
    Ahi a, hiai dotna toh kisai liauliau ah, Mark bung 2 a Jesu gen pen a thu kigelh dan velna apan a chiang thei a om hi. Hiai a “Abiathar Siampu lianpen a hihlai” (BSI-OV) kichi a thumal kizang “epi” ahi a, “a hihlai” chih sang in “Siampulian Abiathar hun lai” (Parallel Bible, Zokam) chi in gen chiangzaw a bang hi. BI ah “Siampulian Abiathar dam laiin”. Hiai pen Abiathar Siampulian ahihlai a thiltung genna hilou in, amah omta mahleh a pa Ahimelek Siampulian hihlai a thiltung hi ding hi. Siampulian Ahimelek leh Siampu dangte Kumpi Saul in a thah lai a, David kiang ah tai in, a tapa Abiathar kia suakta a (1 Samuel 22:18-20), Siampulian hong hi hi. ‘Kumpi David belam a chin lai in’ chi a kumpi a pan ma a leng, ‘kumpi’ i chih bang a Abiathar Siampulian ahihma a leng theihsiam sa a koih a, amah omta/a damlai ahihman a huai bang a kizang hikha ding hi. Nasepte 11:28 leh Hebrew-te 1:2 ah leng hiai bang in kizang hi. (Gleason L. Archer, Norman Geisler, Thomas Howe).

    Dotna 3: Mi kibanglou ahihleh i Laisiangthou a gelh dik a hoihmai diam?
    Dawnna: I Laisiangthou neih khenkhat ah a theihsiam nuam zaw a kigelh hi in i thei hi (Parallel, Zokam leh BI ah). A thugelh dan bawllem a theih nuam zaw ding a omkha ding a, himahleh, min kigelh bawldik ding om di’n gin huailou hi.

    Dongtu: H Sangzachin, Jordan EBCC
    Dawngtu: Rev S Vung Minthang, Director of Ministries

    Dotna: Tukum i thupi “Kemtu Muanhuai” (1Kor 4:1,2) chih ahi a sawltak Paul in kepsak a om pen ‘Pathian Thuguk’ ahi, a chi hi. Hiai thuguk a chih bang pentak ahi di?
    Dawnna: Sawltak Paul in ‘thuguk’ a chih tuh tomchik a gen in Tanchin Hoih ahi. Jesu Khrist mikhialte tan ding a Khros tung a hong si a, a thohnawnna thu ahi. Paul in hiai Tanchin Hoih thuguk (thukisel) a chihna ziak bel Jesu Khrist hongpai mateng Pathian lungtang a ana om ahihziak ahi. Paul in “Mit a muh ngeilouh, bil a zak ngeilouh Pathian in Amah itte adia abawl” ana chi hi (1Kor 2:9) Jesu hongpai a Nungzuite leh Paul kiang ah tua tanchin latsak in om hi. Hiai thuguk toh kisai Bible gendan en zek lai leng:
    1. Mikhial hotdam ding Pathian in khovel om ma pek a ana gelkholhsa thuguk ahi (1Kor 2:6-9).
    2. Hiai hotdamna tanchin hoih lamdang chikmah a ana kipuangkhe ngeinailou, tua Thukhunthak hun a Jesu sihna ziak in hihlat a om ahi (Kol 1:26).
    3. Huai thuguk agenchetna “Pathian sa a muhtheih a latsak in aom” chih ahi (1Tim 3:16).
    4. Nungzui 12 te kiang a hiai thuguk pulak masak a om ahi (Mk 4:11; Lk 8:10; Mat 13:11).
    5. Sawltak Paul pen Jesu nungzuite lakah tel kei mahleh tua thuguk tangtaka amah kianga latsaka om ahihziak ahi (Gal 1:15-17).
    6. Hiai thuguk kisel tuh zawlneiten leng ana suisui uh, kia hilou in Angelte nasan in avel nop uh ahi (1Pet 1:12).

    Hiai theichian mahmah laphuaktu khat in “Endih Kalvari mualtung ah, selguk thugil a puakzak. Pathian itna leh lainatna a luangzak kiman lawm lawm” ana chi hi.

    KTZ
    Dotna & Dawnna

    Dongtu: L/Upa Tunzathang Tombing, V. Munhoih
    Dawngtu: Rev S Vung Minthang, Director of Ministries

    Dotna: Mark 2:21-22 Kuamah in puanlui puan tuikhai nailouh them in a thuap ngeikei uh; thuap le uh, a thuap bitna ding in a kaikek ding, huan kuamah in uain thak savun thawl lui ah a thun ngeikei uh, thun le uh uain in savun thawl lui phukham ding. (1) Alui tuh alui mah a thuap ding (2) Athak tuh athak mah a thuap ding.
    Hiai Bible chang nih in zi leh pasal kitenna ut leh dah a i neih uh hon genna hi in ka ngaihtuah a, Nungak siangthou virgin bang in Pathawi sum hau khong nei zialzial, huchimah bang a Tangval siangthou in le numei kam nei Nuthawi khawng nei zialzial a siangthou leh siangthou, a thawi leh thawi kiteng leng hon chidan ahi diam?

    Dawnna: Hiai a etsakna thu kigen Judate’ dotna a dawnna a Toupa Jesu gen ahi. Judate dotnate: Khatna: Bang dia siahkhon mite leh mikhialte kiang a ne a dawn na hi ua? Nihna: Bang dia Johan leh Pharisaite’ nungzuite’ hihdan a na nungzuite’n an ngawllou uh ahia? Judate khanggui dan Toupa Jesu sinsakna toh kibang lou hi chih i Toupa’n pilvangtak a a genchetna ahi.
    Judate sinsakna in society a mi pawlkhat a nekzonna uleh a hindan uh pansan in tuamkoih (segregate) in ten bawl uhi. Huchih dungzui in, mi pawlkhat amau kia dik kisa midangte musit om uhi (Lk. 18:9; 16:15; Pau. 30:12). Sahkho mite’n mikhial chi a a nawlkhinte uh kisik ding a sam ding in Toupa Jesu hong pai hi (Mat. 11:9; Lk. 7:34; 19:10). Ngeina dan a an ngolh hiam, sep ding (duty) sepkhiakna lel ah Toupa Jesu a lungkim kei a lungsim a itna leh chihtakna a deih zaw hi (1Sam. 15:22; Mat. 23:24-28). Judate sahkhua leh Thukhun thak nasepna “puan thak leh puan lui” hiam “uain thak” leh “uain lui” a kibatlouh bang a kibang lou ahi. Hiai tegel gawm teitei louh ding ahi, a chihna ahi. Hiai thu a kigelhna munte (Mat. 9:14-17; Mk. 2:18-22; Lk. 5:33-38). Hiai in a gen zi leh pasal kineih dingdan hilou ahi.

    KTZ
    Dotna & Dawnna

    Dongtu: Dr. T. Pumzathang, Central Lamka
    Dawngtu: Rev Gin Malsawm, Director, SD.

    “Adam khelhna ziak in kei meidil ah ka lut kei dia, kei mahmah khelhna ziak in meidil ah ka lut ding. Adam khelhna kisik ding in Pathian in hon chikei a, kei mahmah khelhna kisik a tawpsan ding leh Jesu gingta ding in hon chizaw hi”

    Dotna 1na:
    Hiai thugen (Version) Bible dan in adik thei diam?

    Dawnna 1na:
    Dik zoulou deuh in i thei hi cf. Rom 3:23, 5:12,17,18,21; I Kor.15:22; Sam 51:5; 58:3; Isai 64:6.

    Dotna 2na:
    Eite (EBC) thugin (doctrine) toh a kituak thei diam?

    Dawnna 2na:
    A tung a Laisiangthou changte pansan in EBC thugin toh kituaklou deuh i sa hi. Pelagian sinsakna lam awn deuh abang hi.

    Dotna 3na:
    Toupa Jesu’n thugen a pat tung a, “Kisik un Vangam anaita” a chih bang kisikna (bang khelhna) ahi ding? Adam khelhna/eimah mah khelhna?

    Dawnna 3na:
    A nih a gen ut hi in i thei hi. Eimah khelhna ban ah Adam khelhna ziak a lam haihtate Khrist, Pathian Belamnou khovel khelhna lamangpa lam nga dia chialna hi in i thei hi, Johan 1:29; Matt.3:2; 4:17.

    Hiai hun a Judate theihsiam dan in kisik (metanoeaw) in mihingte’n Pathian toh kisai a ngaihdan khekna lam gen hi. Huai in khelh kipuanna, poisakna leh khelhna tawpsannate tunkhawm vek hi.

    Dotna4na:
    “Nang khelhna kuaman ngaihdam hon ngetsak theilou mawng mawng ding ahi” chih toh kisai, “Amaute ngaidam in, a thilhih uh a theikei ua ahi” (Jesu); “Toupa hiai a khelhna uh a tung uah moh posak ken” (Stephen) chih toh kikokalh lou hia? Dik thei mah ding a diam?

    Dawnna 4na:
    Na Laisiangthou zat, Luka 23:34 leh Nasepte 7:60 apan in midang in leng ngaihdam hon ngetsak thei chih i mu hi. Himahleh, ngaihdam a om ding in ngetsak a ompen in ngaidamtu kiang a a kik poimoh hi cf.Lk.15:20.