1. NIPINI: October kha hon zangzousak a, November kha honpikai i biak Pathian kiang kipahthu gen in, November kha gahsuah leh manphatak a i zat chiat theihna ding in thum ni.

2. SEPPATNI: October kha sung in EBC Division chih in khawmpi lohchingtak in nei zou chiatta uh, Pathian kiang a kipahthu gen in, Division level committee member dia telchingthak te leh kumnawn khawmpi Ulian dia telching thakte ziak a kipahthu gen in, thumpih ni.

3. SEPNAWNNI: November 4, 2020 in CEC meeting omding, Pathian deihna bang a thupukna lak ahihna ding in memberte Khasiangthou polhna ngen in thumpih ni.

4. NILAINI: November 4-8 sung Khuga Sadar Presbytarian, G Mualkawi in chialpi neiding a, Evan. T Damkhothang thugenpi in pang ding, thumna ah phawk ni.

5. NINGANI: EBC Headquarters, Division leh local saptuam chih a sum saite ziak a kipahthu gen in, Pathian deihna bang a lamzangtak a honsaizom zel theihna ding un thumpih ni.

6. SINTAWPNI: Saptuam chawm leh mimal kisen a Bible zil i neihlelte ziak in kipahthu gen ni. Amauten lockdown ziak in class ngeina latheilou in, online a sinpawl om uhi. Lohchingtak a a sinlai chiat uh hon zohna ding un thumpih ni.

7. KIGINNI: Mizoram Division a sem, Rev Dr V Ginsianthang, DS leh a seppih office staffte, Division sunga Pastorte leh school a sem teacher-te ziak a kipahthu gen in, amauten Pathian deihna bang a honsepzomzel theihna ding un thumpih ni.

8. NIPINI: Tukum sung a Pastor retire, Pastor S Thangchinlun, Pastor E Paukhanlian leh Pastor K Vumzathang te ziak a kipahthu gen in, pension nung a leng gahsuahsem thei ding in Pathian ompihna ngen in thumpih ni.

9. SEPPATNI: Global Missions adia Missionary tamsem i sawlkhiak theihna ding in, Toupa’n gamte hon honsak a, Amah pina toh tuailai tamsem huai dia kisa a, saptuamte leng huai ding a kiman a i omtheihna ding in thum ni.

10. SEPNAWNNI: November 10-14 sung NTBC Tuibuang in pasal Camp neiding a, Evan. T Damkhothang in thutak gending, thumna ah phawk ni.

11. NILAINI: Tukum EBC Kumsim Khawmpi 72na manpha leh lohchingtak a zat ahihtheihna ding in Pathian kiang ah ngen in thum ni.

12. NINGANI: Missions Fieldte a saptuam intuanna i neihna ah- KAEBC te tuankheta ua, NEBC abul ah dinglai, MEBC huai dia lemgelna omlel ahihna ah thumna in phawk ni.

13. SINTAWPNI: November 14 in Rev Paukhanmang Guite, General Secretary, EBC in Imphal Division ah “EBC Saptuam Kivaipuak dan leh Saptuam Paidante kisinsakna” Seminar nei in sinsakna peding, thumna ah phawk ni.

14. KIGINNI: Pathian ompihna toh Missions sumlut hoih zel, kipahthu gen in, petuten Pathian vualzawlna tamsem adonna ding un thumpih ni.

15. NIPINI: LRRC a semtute kipiakzohna leh awlmohna ziak a Pathian kianga kipahthu gen in, kep a omte itnatak toh hon kepzomzel theihna ding un thumpih ni.

16. SEPPATNI: Thanlon Division a sem Rev M Zalian Guite, DS, Office a semte, Pastorte leh division sunga school a semte ziak a kipahthu gen in, maban ah Pathian ompihna leh kepna ngen in thumpih ni.

17. SEPNAWNNI: Rev L Kamzamang leh a seppihten Home Fellowship Movement tungtawn in India leh gam tuamtuam ah member nei in semlel uh, Training of Trainers tungtawn a Pastor leh missionary tamsem training piak ahihna ding leh a tapa Mr Chinsanglal (cancer survivor) hong damsiangna ding in thumpih ni.

18. NILAINI: Division chih a BDF, BYF, BCD leh DWC vaipothak ding telzoh in omta, telchingthak a omte leh OB ten maban a Pathian deihna bang a hon makaihna ding uah Pathian ompihna leh makaihna ngen in thumpih ni.

19. NINGANI: November 19-22 sung EBCC Hebron in chialpi neiding a, Evan. T Damkhothang thugenpi in pang ding, Pathian Kha pawlna ngen in thumpih ni.

20. SINTAWPNI: Missions Tuailai-2020 a team Antioch malakna in online sermon leh interview tuam tuam paizom theizel, kipahthu gen in, maban a hong lamzan semna ding un thumpih ni.

21. KIGINNI: Covid-19 hipileng kawmkal ah, mission field a i sepna in masawnzel a, missionary-te tungtawn a khamangthang mat a omzelte ziak in Pathian kiang ah kipahthu gen in, ginna a hong pichinna ding un thumpih ni.

22. NIPINI: Khopi saptuam kemtu Pastorte leh Upate ziak a kipahthu gen in, amaute Khasiangthou thopna leh makaihna ngen in thumpih ni.

23. SEPPATNI: Missions Tuailai-2020 a team Barnabas malakna in tuailai missionary a lunglut mi tamtak musuah in, missionary lunglut mi 22 te WEC heutute tungtawn in nipikal 6 sung Missions Perspective Orientation lohchingtak in neihpih hita uhi. Pathian kiang kipahthu gen ni.

24. SEPNAWNNI: November 24-28 sung EBCC Dorcas Veng in Papila Camp neiding a, Evan. T Damkhothang leh Evan. Lianding Guite thugenpi in pang ding uh, Khasiangthou vehna ngen in thumpih ni.

25. NILAINI: Missions Tuailai-2020 a team Timothy malakna in khamtheih sal a tangte kaikhawm in, “Love your neighbour” thupi pansan in houlimpihna neilel uhi. Amaute giahna ding leh nekding ngaihtuahsak a khalam suahtakna honneihna ding ua panlakna ahihman in thumna ah phawk ni.

26. NINGANI: Covid-19 a kipan hon vengbit theitu Pathian kia ahihdan chiang semsem in i theithei hi. Tunitan dam a i omtheih lai leng Amah ziak kia ahihman in kipahthu gen in a venbitna ngen ni.

27. SINTAWPNI: Covid-19 douna a matawng Doctor leh Nurse semtute nakpitak in thumsak lai ni. Mipite damna ding a Pathian khut zat ahihna ding un leh amaute damtheihna mahmah kepbit a hihna ding in thumsak ni.

28. KIGINNI: Niteng nektawm zong a khosa, natna hipi leng nuai a leng khawl theih hilou, sih leh hin kal a nek zong nupi leh papi tamtak omte thumna in phawk ni.

29. NIPINI: Mipi kipunkhawm a Pathian biakna nei thei nawnlou i suakta a, Pathian kilakna Amah ngai mahmah leh poimoh kisa mite kiang kia a om deuhdeuhta ding a bang hi. Michih in Pathian i naih theihna ding in thum ni.

30. SEPPATNI: Pathian hoihna ziak kia in tuni kha beini mu nawn a kipak in Toupa min i phat hi. I chitlouhna tampite ngaihdam ngen kawm in maban ah a honpina ngen in thum ni.