Thumna Makai | KTZ

    KTZ
    Thumna Makai

    Thumna Makai | August 2020

    1. KIGINNI: Khathak hon musak i biak Pathian kiang ah kipahthu gen in, tukha a Saptuam milip in khalam leh salam vualzawlna i tan nading in thum ni.

    2. NIPINI: I gam leh nam Makai tuamtuamten Toupa sehna leh deihna bang a, mipite hon makaih zel theihna ding un tunglam pilna ngen in thumpih ni.

    3. SEPPATNI: COVID-19 ziak a khosakna buai tamtakte adia thum in, hiai hipi apan Toupa kepbitna ngen ni.

    4. SEPNAWNNI: Online Sermon tungtawn a pianthakna ngah, kipahna thak nei, thilpiak a pan lathak dia thuchiam bawlthak leh missionary a kuan dia lunglutna neite ziak a kipahthu gen in, a thuchiam bang uh subuching thei ding in Pathian vualzawlna ngen in thumpih ni.

    5. NILAINI: Divisional Superinten-dent teng, a min uh lou in, khalam leh salam chidamna ban ah, division chih a kepna uah Pathian kha thopna leh makaihna ngen in thumpih ni.

    6. NINGANI: Saptuam a sem Pastorte ziak a kipahthu gen in, a kep saptuam chiat uh Topupa deihna bang a hon kep zel theihna ding un thumpih ni.

    7. SINTAWPNI: Mission field-te a Field Superintendent-te a min uh lou in, Pathian ompihna leh pina ngetsak in thumpih ni.

    8. KIGINNI: Tulaitak a Biakin kilam lel, Covid-19 ziak a haksatna tuakte; EBCC Daido, Khazang, Bengalore, Teikhang, Kanaan leh Hiangtam Lamka intuanna ding, hoihtak a zoh a hong hihna ding in thumpih ni.

    9. NIPINI: Saptuam sung mi, mun tuam tuam a Bible sinlelten dam leh lohchingtak a honzoh chiat theihna ding un thumpih ni.

    10. SEPPATNI: Tulai buaina kawmkal ah Pathian in Mission Fieldte ah gah kilawm honpezel a kipahthu gen ni. Missionary-ten hiai hun a Pathian pina toh bittak a sem a, sepdan ding thak hon muhkhiak zel theihna ding un thumpih ni.

    11. SEPNAWNNI: WEC, OMF leh SIM toh Partnership tungtawn a gamdang a missionary a kuante ading in thum ni.

    12. NILAINI: Covid-19 in gamsung pumpi a buaina namenlou hontut ban ah, adiak in naupangte siamsinna sukha mahmah ahihman in, siamsin naupangte, sinsaktute leh nu leh pate ading in thum ni.

    13. NINGANI: Covid-19 tungtawn a Pathian houpihna michih in i tan theihna ding a thum in, hiai ziak a i gam in kialpi i thuak louhna ding in Pathian naih in, a kiang ah thum ni.

    14. SINTAWPNI: Saptuam a thilpiak petu tengteng ziak a Pathian kiang a kipahthu gen in, tamsem pethei ding in A vualzawlna ngetsak ni.

    15. KIGINNI: Tuni India in zalenna a muh ni, Independence Day ahih toh kiton in Pathian kiang ah kipahthu gen ni. India a vaihawm tute adia thum in, Sahkhua leh mimal zalenna kepbit ahih zel theihna ding in thum ni.

    16. NIPINI: Bible translation work pailel, BSI, BIIS, Paite-English Parallel Bible-te a translator-te leh Read and Review Committee (RRC) member-te ading in Pathian pina leh makaihna ngen in thumpih ni.

    17. SEPPATNI: Dorcas pawl etkolna a puankhuina, DotProJ a puankhui zil mi 10 leh sinsaktute adin Pathian ompihna leh makaihna ngen in thum ni.

    18. SEPNAWNNI: Mission Tuailai, 2020 vaisaina nuai a programme tuam tuam paitou zelte ziak a Pathian kiang a kipahthu genkawm in, maban a Toupa deihna bang a kal hon suan touhzel theihna ding un thumpih ni.

    19. NILAINI: India gamsung a missions nna i seppih, IEM leh FMPB te ziak a kipahthu gen in, maban a Pathian ompihna toh lamzangtak a i paizel theihna ding in thum ni.

    20. NINGANI: Pathian in tulel a Saptuam Makai ding a honpiak GS leh Directorte ziak a kipahthu gen in, amaute a min uh lou in Pathian khasiangthou thopna ngen in thumpih ni.

    21. SINTAWPNI: I Saptuam a driverte ziak a kipahthu gen in, Pathian ompihna leh chidamna ngen in thumpih ni.

    22. KIGINNI: Upa Ordain Toupa’n hon piakte ziak a kipahthu gen in, Pathian deihna bang a saptuamte kem a, hon makaihzel theihna ding un thumpih ni.

    23. NIPINI: Toupa Belampu Pastorte ziak a kipahthu gen in, amauten Pathian deihna bang a Saptuamte itnatak toh hon makaih zel theihna ding un thumpih ni.

    24. SEPPATNI: Saptuam office tuamtuam a sem, Clerical staff-te ziak a kipahthu gen in, lamzangtak a hon sepzom zel theihna ding un thumpih ni.

    25. SEPNAWNNI: Evan. Pauven Ngaihte in ana etkol, Bethel Home Mission, Tamu in masawnzel. Kipahthu gen in, Pathian ompihna ngetpih ni.

    26. NILAINI: CEC leh division chih a DWC memberte ziak a kipahthu gen in, amauten Pathian deihna bang a Saptuam maban ding hon geel zel theihna ding un Tunglam pilna ngen in thumpih ni.

    27. NINGANI: Saptuam in budget a i guan bang bang muzou leh zang thei din Toupa apan vualzawlna ngen in thum ni.

    28. SINTAWPNI: Rev Chinlamthang in ana patkhiak, “LOK-KI-SEVA” ministries in Pathian ompihna toh masawn zel, kipahthu gen in, maban a Pathian ompihna leh makaihna ngen in thumpih ni.

    29. KIGINNI: Gamsung chidam, nam chidam leh khotang chidam i neihtheihna ding in Jehovah Pathian mai a kitulut in, A mel zong in thum ni.

    30. NIPINI: KTZ Editorial Board-te ziak a kipahthu gen in, maban a leng Pathian deihna bang a hon sep khiakzel theihna ding un thumpih ni.

    31. SEPPATNI: August khatawp tan a honpi i biak Pathian kiang a kipahthu gen in, hiai kha sung a i hihkhelhnate ah ngaihdam ngen ni.