1. NILAINI: Toupa’n kha thak mel hon musak nawn a kipahthu gen in tukha a Pathian vualzawlna kha ahih theihna ding leh Amah ompihna leh makaihna ngen ni.

2. NINGANI: EBC in Evangelist at large i neih Evan. T Damkhothang, Evan. Lianding Guite leh Evan. N Thangsuanpau te Pathian in manphatak in hon zatsak a ei sung leh pawl tuamtuam in leng hon hamphatpih uhi. Kipah thu gen in, salam leh insung chidamna ding in thumpih ni.

3. SINTAWPNI: Tuni apan ni 7 tan daih ding Himalayan Mission Field in Khawmpi Birtamod Nepal ah zang ding ua, huai hun in Rev Paukhanmang Guite GS thu gen ding, Khawmpi a tel ding leh thugentu ding thumpih ni.

4. KIGINNI: Pastor (Retd) H Vungzalian tuma a operation a om chau mahmah lai in Dawmdawi inn ah pawtsan thei nailou hong damsiang nading in thumna in thei ni.

5. NIPINI: Tuni GBC Day ahihtoh kiton in GBC a teaching leh non-teaching staff, students, BOG te thumna in thei ni, amau COVID -19 ziak in tukum in class leh programme khenkhatte zang theilou in om uhi.

6. SEPPATNI: EBC nuai a mundang leh agency tuamtuam a Missionary nasem a omte tulai khovel buaina ziak a, a lehlamtak a Pathian in lamdangtak a a zatna ding in thum ni.

7. SEPNAWNNI: Covention Book House a semtute thumpih ni, amau lockdown sung in leng nasep ding khawlsan theihlouh ahihziak in semzom thei gige uhi.

8. NILAINI: Kha thum bang ching hialta, mipi biakkhawmna nei theilou i hihlai in online sermonte Toupan hon vualzawl sak in khalam kimuhthakna, kipiakthakna nei tampi omte ziak a kipahthu gen in thumpih zel ni.

9. NINGANI: OMF Missionary Rev N Khaikhuphang tenupa in Thai pau zang in a poimohna mun ah nasepna bulpan theita uhi. Kipahthu gen in thumpih zom zel ni.

10. SINTAWPNI: Tuni apan in Pathianni tan EBCC Pearsonmun ah Rev K Kamchinkhup in Missions vai in thugenna hun zang ding, thumpih ni.

11. KIGINNI: Tulai a India leh China kal a buaina, Line of Actual Control (LAC) Ladakh mun a omkhate, ei singtangmi 400 vel bang telkha uhi. Toupa ompihna leh venbitna ngen in thumsak ni.

12. NIPINI: Tuni NLBC in Haithak Kipahthugenna programme zang ding uh, thugentu ding in Rev Gin malsawm DSD pang ding thumpih ni.

13. SEPPATNI: Natna hipi leng in khovel hon tuam ziak in, siamsin naupangte maban ding nakpitak in sukha hi. Pawl X leh XII zou lungsim piching nailou deuhte thumpih gige ni.

14. SEPNAWNNI: Koimunpeuh ah mipi biakkhawmna neithei lou himahlehang Pastor leh Upa khenkhatte khalam nasepna tawpsan lou in pang semsem uhi. Kipahthu gen in thumpih ni.

15. NILAINI: Khovel gamteng in galvan hoihpipi muang in kichoutuahna nasa mahmah, galpi 3na piantheihna ding daltu om nawnlou hi. I muanpen ding zaw Pathian ahi chih thei in thum ni.

16. NINGANI: COVID 19 hipi leng in khovel pumpi zelsuak in kham vual hinawnlou hi. Natna thuaktute tengteng thuakpih kawm in Pathian khamuanna ngen in thumsak ni.

17. SINTAWPNI: Tuni apan ni 19 tan EBCC G Mualkawi in Second Coming Crusade programme nei ding ua, hiai hun sung in Rev Ginmalsawm thugentu in kizang ding, thumpih ni.

18. KIGINNI: Khovel kilamdang ziak in Pathian mel mu taktak dia a kingaihtuah chiang a thawmhau mi tampi om ahihman in amauten Jesu Khrist a kituahpih ngeingeina ding un thum ni.

19. NIPINI: Hiai laigelh ni tan in COVID 19 vei tamna pen America hilai hi. Mivomte tung a khutkhakna ziak in movement hoihloutak piang zawmah lai ahihman in thumpih ni.

20. SEPPATNI: Tulai khovel a hipi leng tungtawn in Saptuam a semtute’n Pathian bangkim tung a thuneitu leh vaihawmtu ahihna theichian a, gahsuah sem a hong kizat theihna ding un thum ni.

21. SEPNAWNNI: Khovel in siat lam zuan a paipai a hihlai in khalam halhthakna i poimoh petmah hi, khasiangthou vehna leh halhthakna ngen in thum ni.

22. NILAINI: Quarantine Center mun tuamtuam a omte chikmah a om ngeilouhna mun ahihziak a haksatna tampi thuak ahihman un kingaihsiatna leh damlouh theihnate lak a Toupa venbitna ngen in thumsak ni.

23. NINGANI: Gam sung COVID-19 ziak a Lockdown om ziak in i saptuam schoolte khak in om mahleh mun khenkhatte ah semtuten a hihtheih dandan panla in sem uhi thumpih ni.

24. SINTAWPNI: COVID 19 ziak a nektawm zong a khosa mi tamtak in buaina namenlou tuak ahihman in, mehzuak, rickshow hek, khedap bawl leh a dangdangte thumpih ni.

25. KIGINNI: Doctors leh Nurses mun tuamtuam a semtute amau nekmuhna nasem kia hinawn lou in a damtheihna ding ua lauhuai leh mipite adia nasem ahihman un Toupa venbitna ngen in thumsak ni.

26. NIPINI: Lockdown kipat nung a natna thuak a sihna tanpha a na tuak tamtak i om uhi. Vangtah tuam kisa a lungkham tak a om theih ahihman in Pathian khamuanna ngen in thumsak ni.

27. SEPPATNI: Khovel in hun haksa a tuahlaitak a vaihawmna tutphah a tu MP leh MLA, Prime Minister leh State Chief Minister tengteng ading in vaihawm siamna ngen in thumsak ni.

28. SEPNAWNNI: Zodawn lam a lou nasem mite’n buaina hiai zah kalah amau hihtheih dandan a nasep sunzom zel uh hi a theih ahi. Louma vuaksuak lou a vualzawlna tampi hon piakna ding in Toupa kiang ah ngen ni.

29. NILAINI: LRRC a tuailai khamtheih zongsangte i kepna mun ah, buaina i tuah ma sangmah a tamzaw kikem hi. Semtute leh kep a omte ading in Pathian vehna ngetsak in thum ni.

30. NINGANI: Tuni apan August 2 tan EBC Mizoram Division, Mimbung ah Salpha Camp om ding a, hiai hun ah thugentu in Rev Ginmalsawm leh Pastor Daikhankhup kizang ding, Camp gahsuah leh manpha tak ahih theihna ding in thumpih ni.

31. SINTAWPNI: Tuni kha bei nitan Toupa honpi kai nawn a i kipak mahmah hi. Kipahthu gen kawm in maban ah honpi zel ding in thum ni.