1NILAINI: Kum thak, 2020 hon musak i biak Pathian kiang ah kipahthu gen ni. Saptuam chih in kum thak lopna programme kizang ding, Pathian Khasiangthou ompihna leh makaihna ngen ni. Rev Paukhanmang Guite, GS in Kum thak lopna zing leh nitak ah EBCC Zenhang Lamka ah thu gen ding, thumpih ni.

2NINGANI: Zingchiang ni 3-5 sung EBCC Central Lamka in Second Coming chialpi nei ding a, Evan. T Damkhothang in thu gen ding. Hiai hun sung mah in EBCC Pearsonmun in Hotdamna Camp nei ding a, Evan. Lianding Guite in thu gen ding. Pathian Kha vehna ngen in thumpih ni.

3SINTAWPNI: Zingchiang ni 4-7 sung Tuailai Leaders’ Conference, EBCC Mimbung ah om ding. Rev S Vung Minthang, DMn. leh Rev K Kamchinkhup, DMs. thutak gentu in pang ding uh, Khawmpi lohching ahihna ding in thumna ah phawk ni.

4KIGINNI: Tukum adia saptuam chih in thupi dia i neih, “Kemtu Muanhuai” in gah manpha hon suah a, kikhekna tanpha hon tutna ding in Khasiangthou ompihna leh makaihna ngen in thum ni.

5NIPINI: Grace Bible College masawnna ding ngim a panlak lel ahihlai in EBC Kumsim khawmpi inleng M.Th degree tan a dopkang ding deihthu genta hi. Pathian pina leh makaihna ngen ni.

6SEPPATNI: Zingchiang ni 7-12 sung EBCC Mission Compound in Hotdamna Chialpi nei ding a, Evan. Lianding Guite in thutak gen ding. Pathian Kha ompihna ngen in thumpih ni.

7SEPNAWNNI: Zingchiang ni 8 – 12 tan Pethuel tualsung saptuam in Second Coming Chialpi nei ding uh a, Rev Ginmalsawm DSD in thu gen ding hi. Lohchingtak a zat ahihna ding in thumna ah phawk ni.

8NILAINI: Tuni a kipan ni 12 tan EBCC Vaalveng in Hotdamna Camp nei ding a, Evan. T Damkhothang leh Siampu Tonsing in thu gen ding. Pathian kha pawlna ngen in thumpih ni.

9NINGANI: Kum thak ahihtoh kiton in semtu bangzahhiam kisuankual hi. Amaute sepna mun thak ding dam a tung chiat a, Pathian ompihna leh makaihna toh gahsuah sem a hon sep theihna ding un thumpih ni.

10SINTAWPNI: Tukum thak a Pastor ordain thak 5 i neihte ziak in athak in kipahthu gen ni. Amaute hiamtak leh gahsuahtak a a zangtheitu i Pathian kiang ah thumsak in delhzui zel ni.

11KIGINNI: Toupa Saptuamte kemtu ding Upa ordain thak tutung khawmpi ah 13 i nei a kipah thu gen ni. Amaute’n kemtu muanhuai, gahsuang leh tuipaitak a Saptuamte a keptheihna ding un thumpih zel ni.

12NIPINI: I semtute lak ah training lel 12 i nei a India gam mun tuamtuam leh gamdang a training leng i nei hi. Amaute nasepna mun a gahsuang sem ding tupna ngen ahihman in Toupa’n tup leh ngimte hon hih tangtunsakna ding in thumpih ni.

13SEPPATNI: Ebenezer Academy dopsang sem ding a deihsakthu khawmpi ah leng lutta ahihman in tamsem in thumpih ni. Mr H Liankhanlal Principal leh a seppihte, Naupangte tengteng Toupa kepna, makaihna ngen in thumsak ni.

14SEPNAWNNI: Local Saptuam kemtu hidiakte Pastor i neih tengteng ading in thumsak ni. Amaute a kipan kemtu muanhuai diktak a hong piankhiak a, a zathuaptu Upate a lohzoh hialna ding un thumsak ni.

15NILAINI: Saptuam in Ordination a piak, vualzawlna toh a sawlkhiak, outside EBC a semtu Pastorte amau mun chiat a Toupa vanzat thupitak a suahna ding in thumna in delhzui zel ni.

16NINGANI: Zingchiang ni 17 in BDF Lamka South Division in Seminar nei ding a, Evan. T Damkhothang in sinsak ding, lohchingtak a zat ahihna ding in thumna ah phawk ni.

17SINTAWPNI: Tuailai khamtheih sal a tang amau hatna a suakta zou nawn mahmah loute thumsak ni. Awlmohtute ziak a Rehab Center a khum a omte bek in thutak thei a suahtakna a ngah ding un leh huchibang kemtu center tuamtuamte thumpih ni.

18KIGINNI: Missionary Training Center i neih NECTAR Shillong a semtute Rev S Nengzakhup leh a seppihte thumsak ni. Huai mun a kipan sawlkhiak a om tampite leng thumna in delhzui zel ni.

19NIPINI: Tuni Nipini Skul patna i tung nawnta kipahthu gen ni. Piching lam leh Naupang lam a sinsaktute leh sintu tengteng in Pathian thutak hinpih a khanpih ahihna ding in thum ni.

20SEPPATNI: Tuni a kipan ni 25 tan Priscilla Home New Lamka in Hotdamna Camp nei ding a, Rev K Kamchinkhup, DMs. leh Rev B Chinkhengoupau, CC in thu gen ding, Khasiangthou thopna ngen in thumpih ni.

21SEPNAWNNI: Tuni a kipan ni 26 tan EBCC Bungmual in Makai Camp nei ding a, Rev S Vung Minthang, D Mn. leh Evan. T Damkhothang thugenpi in pang ding uh, Pathian Kha ompihna leh makaihna ngen in thumpih ni.

22NILAINI: Missionary nasep a i kizoppihte FMPB, IEM, OMF, SIM, WEC, YWAM leh a dangdangte thumna in phawk zel ni. Toupa’n tuailai tamsem missionary ding a hon piakna ding in thum ni.

23NINGANI: Dorka Pawlte tungtawn a Toupa gam nna i sepna poimohtak DORCED masawn zelna ding leh gahsuahtak a sep a hihna ding in thumna in pahwk ni.

24SINTAWPNI: Convention Book House a semtute thumsak ni. Saptuam lai poimoh taktakte sepkhelh theih hihkhelh theih ngen ahihman in Pathian ompihna leh chidamna ngetsak ni.

25KIGINNI: Hun nanung a om petmahta i hihman in Kha siangthou vehna halsiangna, hihhalh thakna, vuah nanung i ngai mahmah hi, Toupa kiang ah ngen ngutngut ni.

26NIPINI: Saptuam a semtu pensioner kipawlkhawmte’n thumkhawmna leh thutak a kithuahna nei zel uh a hahpan mahmah lai uhi. Amau septheihtawk a phatuam leh Pathian adia manphatak ahihna ding un thumpih zel ni.

27SEPPATNI: Zingchiang ni 28-30 sung Karbi Anglong Khawmpi lian om ding a, EBC toh kisankhiakna leng om ding hi. Hiai hun a kizang ding mite thumpih in, Pathian Kha siangthou pawlna leh makaihna ngen ni.

28SEPNAWNNI: Politic heutu leh Makai i neihte’n Pathian hon piaksa, hamphatna omsate a hi ding bangtak a hon muhkhiakpih ua mipite lampi dik a hon zuihpih theihna ding un thumsak ni.

29NILAINI: Saptuam skul a semtute Evagelist Teacher ahihna bangtak ua naupangte siamsinna leh khalam dinmun a pitu leh kemtu muanhuai ahihna ding un thumsak zelzel ni.

30NINGANI: Leitung pumpi a Baptist inkuan kizom khawmte lak a eilam hon khaikhawmtu APBF heutu leh makaite ding in thumsak zelzel ni.

31SINTAWPNI: Tuni kha bei ni Toupa’n hon musak nawn, thupi lua; Toupa min phat in kipahthu gen ni. Kha thak a hon pikai nawnna ding ah Amah deihbangtak a kalsuan kilawm i neihtheihna ding un thum ni.