I. THAILAND REPORT TOMKIM
Khristian Thukizakna simtute amasa in hiai tantan a honpi a A gam nasepna ding a kong hon honsak i Toupa Pathian leh hondampa Jesu Khrist min in chibai kon buk masa uhi!
Pathian gam nasem dia heutute deihsakna toh ka kuankhiak uh Toupa pina toh Bangkok – Lopburi damtak in ka tung uhi. Toupa hon pina tomkim in anuai ah kon gelh hi:
OMF te toh sepkhawmna ding a mohpuakna piak a om bang in, July 21, 2018 (Kiginni) zinglam dak 1:10 in Suvarnabhumi Airport, Bangkok ka tung ua, Airport a kipat OMF heututen hon na sehsaksa Taxi/ Driver fel mahmah khat in hon na dawn a, Toupa’n Bangkok Home zinglam dak 03:45 vel in hon pitung a kipahthu gen ni. Bangkok Home ah ki-climatize-na hun ding in ni 2 hon pia ua, huai ah pau zil (Language Training) in heutute leh Home Manager-te toh Fellowship & Orientation hun ka zang uhi.
July 22, in Evangelical Church of Bangkok, International Church ah ka va kikhawmkha thei uhi. July 23 zinglam in, Field Headquarters Office teamte toh kithuahkhawmna hun tomchik ka zang uhi. July 23, in Bangkok apat Training-na ding Lopburi mun Toupa’n hon pitung a huai ah heutute deihsakna toh innluah ding mansa in ana om a, huai mun ah ka kipolut ngal uhi. Hon pitu Pathian tung ah kipahthu gen ni.
Addresses:
1. Ka tenna/omna inn uh (Owner: Mrs Nitaya Nuansali)
48 Sribrat Road, MuuBaan Pairot
Tambon: Thaleechupsorn
Amphur: Muang
Lopburi: 15000, Thailand

2. Letter/Document thot na ding
Hang Naulak
C/o Mark Bak
67 Soi Naresuan 3
Tambon: Thalechupsorn
Amphur: Muang
Lopburi: 15000, Thailand

3. Church/ Kikhopna saptuam: Lopburi omsung a ka kikhopna ding ua heutute’n hon na geelsak uh Prasiri Community Church ah July 29 in ka va kikhawm uhi (inn apat approx. 7 kms distance khawng ahi). Hiai Prasiri Community Church kichi Saptuam milip tawmchik omna ahi.

4. Orientation-cum-training: July 23 apan August 2 sung, Orientations (Session 1 – IX tan), exploring, settle etc.,
Daniel Language Training Centre: Hiai training Centre a Team Leader-te Mark Bak & Anne Marie Bak ahi uhi. Hiai ah sinsaktu (teachers) te a vek un 7 hi ua, sintute (student) 18 vel ka hi uhi. Student-te mun tuamtuam USA, Germany, S. Korea, Taiwan, Switzerland, Philippines, Hong Kong, India chihte apan paikhawm, innkuan a om bang ka om ua, Nupa leh mimal a om leng ka om uhi. Khenkhatte a kum a sim omta bang, akha a sim omta leh a pan lellel khawng ka hi uhi.
Language Training or classes: August 3, apat in class kipanta. Hiai training-na ah Teacher khat leh student khat kisinsak (One on one class) ahi. Class/period khat 50 minutes sung ahi.
A pau uh zil baihliai chilou ahihman in nakpitak a na hon thumpih ngitnget uh ka poimoh uhi.

5. Innkuan mimal vai: Toupa vualzawlna toh ka damtheihna lam uh hoih zel a, kipahthu gen ni. Pathian panpihna toh koulam ah hon sunawngkaitu omlou a, training ka hon zoh theihna ding un hon thumpih zelzel un. Kipak.
Report petu, Rev Khaikhuphang-te nupa

II. MALAYSIA A 13th ABWU KHAWMPI REPORT TOMKIM
Thupatna: Amasa in hiai report simtute Asian Baptist Women Union (ABWU) Conference 13na a hohte sik-le-tang in i Toupa Jesu Khrist min in chibai kon buk masa hi! I biak Pathian leh heutute lemsakpihna leh deihsakna ziak in hiai khawmpi a hoh ding in ei saptuam apan mi sawm ka kisa ua, kuan huntak in damlouhna ziak in khat tawpkik a mi kua ka hohthei uhi. Khawmpi a hoh ding toh kisai in Registration fee apoimoh bang in heututen hon hihsak ua ka kipak mahmah uhi. Tua ban ah, KTZ a khawmpi report gelhna ding lemchang hon bawlsak ziak un le ka kipak mahmah uhi. Anuai ah khawmpi report tomkim in kon gelh hi.
Khawmpina mun: George Town Baptist Church, Penang, Malaysia ahi.
Ahun sung: 29th August – 1st September, 2018
Thupi: Created, Transformed and Empowered to reach out (Ephe 2:10) chih ahi.
Hiai ABWU khawmpi kum 5 sung a khatvei a kinei zel ahi a tukum in Penang ah kinei hi. Huai a tel ding a hoh dingte August 28 zingkal dak 7 in heutupa Rev S Vung Minthang GS leh Rev. Paukhanmang Guite Director of Ministries-ten Dorcas Hall Campus ah thumna in hon khakhia uhi. Pathian in hun pha hon piak aleh kum nga nawn chiang in Burma ah kineinawn ding hi. Hiai khawmpi Asia Gambup (Country) tuamtuam 33 lak a gambup 29 kipaikhawm a gambup 4te hong pailou uhi. Khawmpi a paikhawm mi 710 vel ahi. Ei Saptuam apan mi 9 ka hi uhi.
•Program zatdan tangpite: Zingkal pen Devotion hun in kizang a, sun in thupi tuamtuam thupi a nei in Workshop kinei hi. Biakna hunte ah a gam miten maitaitak leh zouthohtak in worship hon neihpih gige uhi. Nungak leh nupiten keyboard, drums leh guitar-te tum in la hon pi ua nuam mahmah hi. Lapiten kikhopna bouruak nuamsak tuan mahmah uhi.
•Devotion hun: Zingkal thum mi thum in Khawmpi thupi pansan in Devotion hon neihpih ua a thugente un lungsim hon khoih a Pathian khutsuak van khua leh tui luah ding a Kha a chiamsate i hihdan uh hon gen ua, gingtute hampha i hihdan hon theisak thakthak mahmah hi. Pathian in thilhoih hih ding a numeite hon siamthak, hon hihhat a kha a hon thuamthak ahihdan hon theithaksak thakthak hi. Devotion hun in thugentu leh mimal khenkhatten a testimony uh hon gen ua, tuaten vualzawlna tampi hon dongsak sawnsawn hi.
•Workshop: Khawmpi sung in Workshop thupi tuamtuam zang in thumvei kinei hi.
Workshop I na August 30th in thupi sawm (10) mun tuamtuam ah a khen in kinei hi.
Workshop II na August 31st in thupi tuamtuam 8 a khen in workshop mun 8 ah kinei nawn hi.
Workshop tawpna ding in September 1st in thupi 8 mun tuamtuam ah kinei a huai tuh Workshop zohna ahi hi. Hiai workshop-te ah kou lunglutna lamchiat ah ka tel ua phattuampih ding leh theihthak ka va neichiat ua, ka kipak mahmah uhi.
Workshop a lung hon khoih tampite lak a tamlou kon lakkhawm uh kon taklang zek ding:
•Workshop masa ni in Peace Maker chih thupi pen ah eilamte ka va tel vek ua, huai a hon sinsaktunu in Bible a numei bangzahhiamte lemna bawltu ahihdan uh hon sinsak hi. Huan lemna bawlna ah alang khat tuaktuak ate thubuai labuai lakkhawm a, huai apan a thudik laizangpen ding a lemna thu gen ding ahihdan hon sinsak ua, lung hon khoih mahmah hi.
•Workshop II ah khenkhatte Elderly Care (Upa/tekte kepna) ah ka va tel ua, hihkhelh leh hih ding hihkhaklouh tampi ka va theithak ua, manpha ka sa mahmah uhi. Huan khenkhat boruak kepbitna (Environment care) toh kisai workshop a telten i bouruak kep siangthoulouh ziak a natna hi tuamtuam tampi omta leh sih phutphutnate tampi omta ahihdan hon sinsak ua, lung hon khoih thei mahmah hi. Singkung tampi suan ding, sing mawk phukphuk louh ding leh gari, tai vengvung tampite ziak a bouruak siangloute mihing hinna adia poikha ahihdan hon gen un pilvanna dia poimoh tampi hon sinsak uhi. Amau khangnoute bike leh garite a taisak sang in cycle ngen zangsakzaw ahihdan uh gen ua, huai in petrol ziak a bouruak sianglou ding tampi dal ahi chi uhi.
•Workshop IIIna ah Education and Poverty chih ah ka va tel ua ka heutunu uh Philipine apan ahi. Aman a neiten a neihlouh ziak ua laisim zouloute panpih ding ahihdan hon genleh Dorkaten DORCED tungtawn a naupang laisim ding bangzah hiam i na chawmte bang hon phawkkhesak a hih hoih bang kisak in om sim hi.
•Thugenpi pen: Khawmpi hun a thugenpi BWA Women’s Department President Dr. Ksenija Magda, Croatia gam apan ahi. Aman Genesis bung 1&2 pansan in Pathian in a thilsiamte lak a numeite tup leh ngim neih ziak a Special-tak a hon bawl ahihdan hoihtak in hon sutpih hi. Huan, amah deihna bang a ahoihlam hih dia kikheng leh khosa ding leh midangte kiang a Tanchinhoih pesawntu ding a A Khasiangthou a hon thuam ahihdan genpipen in nei hi.

A gam mite etton huainate:
1. Maitai un nelhuai mahmah uhi.
2. A siangthouna uh thupi in ettonhuai mahmah hi.
3. Diktatna ngaisang ua, huaimah a lohchinna bulpi uh hi a theih in om hi.
4. Taima mahmah ua, a taihmaknate uh ngaihsanhuai mahmah hi.

Khawmpi kuanma in Mizoram, Tripura, MBC leh KBC a ahoh ding teng ka kihoukhawm ua tunung a zinkha nawnlou thei i hihman in khawmpi zoh a kiklam chiang a Kuala Lumpur leh Singapore tot ding ka sawm ua, khawmpi zoh in Kuala Lumpur leh Singapore kon tawn uhi. Huai ah Tourist-te hon guide na nuai ah a gamsung ua mun poimoh tuamtuam hon etpih uhi. Hiaite tengteng Pathian ziak ahihman in Pathian tung ah kipahthu ka gen thakthak uhi.
Thukhitna: Hiai khawmpi a hohthei ding a deihsakna hon pia Pathian leh heutute ban ah, hon na thumpihte tengteng tung ah KTZ tungtawn in kipahthu kon gen uhi. Report tungtawn in Pathian in thupina tengteng tangta hen.
Khawmpi hohte sik a report petu
Mrs. Chingngaihlun, Asst Secretary, CDSC

III. KARBI ANGLONG MISSION FIELD A PATHIAN NASEPNA REPORT
“Aw Toupa kiang ah kipahthu hilh un… Pathiante’ Pathian Kumpite’ Toupa kiang ah… Amah kia thillamdang thupitak hih zel pa kiang ah...” Sam 136
Simtute i Toupa Jesu Khrist min in chibai kon buk masa uhi!
Tuni August 28, 2018 a Manja khua, Karbi Anglong, Assam a EBCC Biakin honna leh latna hun ah, genlouh theihlouh, ka mit mahmah a ka muh a, ka theihtheih a, ka khoihtheih - Toupa Pathian in eite ading a thillamdang thupitak a hihtak ziak in TOUPA kiang ah kipahthu ka gen hi.
Kum 29 paita: 1989 kum February kha in heututen Evangelist-Teacher ding in Karbi ah ahon sawl uh. Singhason bial a Bethani khua pansan in Tangthupha gen leh laihilh in ka taam uhi. Huai ah Malaria natna in ka inkuan un a hon tuam a, huan namkal buaina ziak in leh, damdawi inn zotna nuamzaw ding geelna in, Bethani khua akipan Jawlllian khua ah heutute’n hon omsak ua ka inkuan un hiai khua ah ka taam nawn uhi.
Jawllian a Toupa Gam nasep ding a gam mi, Karbite’n lem a saklouh ziak un – heututen Nepali-te ngiim in, 1993 kum March kha in Manja khua ah panmun khoh ding in a honsawl uhi. Dimapur-Guwahati lamlian zul, Diphu luipi toh tehtuah kal a khota khat Diphu luigal lam ahi. Nepali mite khosakna bial, Manja khua pansan in i saptuam mite omna khuate Langparpan, Arlonghemtak, Basbari, Langmili leh khua dangdang ka veh uhi. Hiai hunlai in, Rev. (L) Sing Taro, Evangelist Kania Hanse, Pastor Jemson Bay, Pastor Joel Hanse, Pastor Samuel Lama-te toh Toupa Gam nasepna ah ka kizui ua nuamsa in ka lungkim mahmah uhi. Tuni in dam leh kim sipsip in hiai hun zangkhawm theile uthuai ka sa mahmah uhi.
Hiai hunlai in Toupa Pathian in ka zi Chiinlian toh naungek piang ding doptheihna bang hon pia a damloute bang thumdam theihna bang hon pia a, TOUPA’N thillamdang thupi taktak A sem a, anuam in ka lungdam mahmah ua, Toupa kiang ah kipahthu gen in, A min ka phat uhi.
Luigal ah Upa K.B. Rai, Barnabas, Sanu Maya leh Lili Maya-te a teng uhi. Upa K.B. Rai inn ah biakkhawmna ka nei zel uh. Pathian ni khat kikhawm tawp inn lam zuan a Diphu lui ka kan lai un, ka tanu Manthianmalsawm (Sawmi) tui khang hiven, ka khahsuah dektak uh! Hun bangtan hiam nung in Pa Manghao Guite inn ah Saptuam mite’n biakkhawmna ka pan uhi. Pa Manghao leh a inkuante a kihong ua, thupi gen petmah uhi.
Ahi, “Aw, TOUPA kiang ah kipahthu hilh un... pathiante Pathian… kumpipate TOUPA kiang ah … Amah kia thillamdang thupitak hihzelpa kiang ah…”
Report petu:
Evan. Teacher (Rtd) G. Thangkhanpau &
Nu Chiinlian, Mission Compound, Churachandpur