EVANGELIST TEACHER CITY TOUR
THIRD PHASE REPORT TOMKIM:
Hiai report simtute na vek un i Toupa Jesu Khrist min in chibai kon buk masa uhi!

Convention School Evangelist Teacherte Khopi a khualzin thumveina hamphatpihte: Upa S. Pumzatawn, Headmaster, T. Khuangkhai; Mr. Chinpu, Headmaster, Khokawn Ebenezer Academy School leh Upa S. Chinzapau, Headmaster, Emmanuel Academy, Teikhang te ka hi uhi.

Hiai bang report pethei ding a hiai tantan a hon pitu i biak Pathian tung ah kipahthu ka gen uhi. EBCC Central Delhi in Convention School pute adia City Tour programme project a hon bawlkhiak zenzen uh manpha sa in amaute tung ah ka kipak mahmah uhi. Hiai hamphatna tang thei ding a deihsakna hon pia Head Quarters a heutute tung ah leng ka kipak mahmah uhi
Lampaina toh kisai - June 23, 2018 in Lamka apan Dimapur ah ka giak uhi. June 24 Nipini in EBCC Dimapur Saptuamte toh Pathian biakna hun ka zangkhawm ua, ka thum un thugenna saulou leh self-introduction ka nei uhi. Dimapur a i Saptuamte’n deihsakna thilpiak hoihtak hon na pia ua ka kipak mahmah uhi.

June 25 Pathianni zan in Dimapur Pastor leh Biakin kemtu in zinglam 2:30 in Dimapur Rail Station ah hong kha ua, huai apat Rail AC a tuang in nuamtak in sun-leh-zan pai in June 26 zinglam 10:30 in Delhi Rail Station ah EBCC Central Delhi Pastor leh Saptuamte’n thupitak in hon na vaidawn in pakkhi bang hon na oksak ua, nuam ka sa mahmah uhi. Pastor Quarters ka tun un, nek senglouh leh dawn senglouh tampi hon pia ua kihahsiang in huai zaan tawldam in a zing in Delhi khopi sung hon et/fanpih pih uhi.

Delhi a mun tuamtuam phaknate: C Delhi BYFte makaihna in hiai mun tuamtuamte ka va en uhi: Parliament House, North & South Block; India Gate; Gyara Murti; JNU, Akshardham Temple; Lotus Temple; Qutub Minar; Rapid Metro, Raj Ghat; Red Fort; Jama Masjid; Nehru Museum & Planetarium; AIIMS & Safdarjung Hospital, Connaught Place; National Museum; Rashtrapati Bhawan leh Gandhi Museum te ahi.

Delhi a ka om sung un mituamtuamten deihsakna ankuang hon umpih ua ka va tai mahmah ua, kipahhuai ka sa mahmah uhi.

Biakna toh kisai in – July 1, 2018 Nipini in EBCC Dwarka ah 11:00 am in biakna kikhop ah ka vatel ua, thugenna sauloulou leh self-introduction ka va nei chiat uhi. Huan nitaklam dak 2 in EBCC Central Delhi ah biakna kikhop ka nei nawn ua huai ah leng thugenna saulou leh self-introduction ka nei uhi. Huan nitaklam dak 4:00 EBCC Central Delhi BYFte Fellowship kikhopna ah ka thum un hun ka va zang nawn ua, nuam ka sa mahmah uhi.

Kipahthu Genna – EBCC Central Delhi Project tungtawn a Pathian min a deihsakna tang a ka om ziak un chikmah chiang a ka muhngeilouh ding uh munte bang hon musak a, khe a le leitual siik hetlou a Delhi hon pitung a damtak a hon kiiksak Saptuamte leh Pathian tung ah kipahthu ka gen uhi.

Delhi leh Dimapur a ka om sung ua Saptuamte leh mimal tuamtuam a pat a Pathian min a deihsakna tuamtuam hon petute, mun tuamtuam hon etpih leh vaakpih a hon makaihtu tengteng tung ah ka kipahthu uh mimalmal kiang a gen kha thei veklou ka hihman un ka kipahna thu uh KTZ tungtawn in kon gen uhi.

Feedback & Comment – Hiai bang project hoih leh manpha mahmah tawpsanlou a hihtouhzel ding in hoih ka sa uhi. India khangthu (History) laibu a kigelh leh skul subject a kitawite a mun mahmah a mit a vamu a studentte lak a sinsak theitu dia Evangelist Teacher te’n hamphatna ka tan man un kipahhuai ka sa petmah uhi.

Maban a hiaibang hamphatna tanglai dingte’n a hohna ding munte uh a tangthu gelhna mu in thei masa le uh phatuam zawsem din ka lamen uhi.

Report te tungtawn in Pathian thupina ka pia uhi.

Khopi zinte sik-le-taang in,
Sd/- Upa S. Chinzapau,
Headmaster, Emanuel Academy, EBCC Teikhang

MIZORAM DIVISION DORKA KHAWMPI REPORT
Mizoram Division Dorka Khawmpi 37na report tomkim kon taklang ding. June 22-25, 2018 sung EBCC Mimbung ah Mizoram Division Dorka Khawmpi 37na kinei hi. Khawmpi thupi “Nang vualzawlna hi in (Gen 12:2)” chih pansan in Division sung a Pastorten thutak genna nei in, heutupa Rev N Thawndoulian, DS in Ruthi laibu sinna hon neihpih a nuam kisa mahmah hi. Nu Thangngai EBCC Zion, New Lamka a om in Damtheihna leh Nek leh Dawn toh kisai in Seminar hun in hon sinsak a nuam leh manpha ka sa mahmah uhi. Heutunu Liankhoman, Dorcas Co-ordinator in khawmpi hong uap a vaihawmna hunte ah genchet tuak khenkhatte hon gen ban ah, Pathianni zingkal in Dorka Pawl toh kisai theihtuak khenkhatte leh DORCED thu genna nei a navakhuai tuan kisa in kipahhuai mahmah hi.

Itna thilpiak: EBCC Hebron Dorka Pawl in puan silhlai a dawnkhawmte uh heutunu Liankhoman D/C in bag 4 hon puak a, khua 8 ah kihawm khia hi. Huan mimal 7 kiang ah a sum in Rs. 1,000/- zel in Khawmpi in huhna kipia hi. Tutung khawmpi ah DORCED huhna ding thohlawm, Kiginni zan in DS makaih in kidawng a Rs. 8,252.00 ki dawngkhia hi. Hiai behlap in Mizoram Division Dorka Khawmpi 37na in DORCED huhna Rs. 10,000/- ki pia hi. Hiai report tungtawn in Pathian in thupina tang hen.

Report petu:
Nu Thankim, Secretary DBDFC Mizoram EBC.

COMMISSIONING SERVICE CUM LAUNCHING OF PARTNERSHIP IN MISSIONS PROGRAM
Central Missions Sub-committee, EBC vaisaina nuai ah July 14, 2018; 6:30PM in EBCC Hiangtam Lamka ah Thailand a missionary a kuan ding Rev N Khaikhuphang leh a zi Mrs. Nianggelvung nna-gotna leh sawlkhiakna thumsakna program manphatak a zat in om hi. Commissioning pen Rev V Thangkhangin, Director of Missions in zang hi. Hiai hun mah ah EBC in sepkhawmpih dia kilemna a bawlpih thak Worldwide Evangelization Crusade (WEC) leh Serving in Mission North East India (SIMNEI) te puankhiakna leh hiai mathak lakna adia thumsakna Rev S Vung Minthang, GS in nei hi.

Thailand a kuan ding Rev Khaikhuphang te nupa ahihleh ei heutute leh OMF heutute deihna bang in kumkhat sung thil tuamtuam va sin ding ua, kumkhat khit chiang in a muh uleh zakte uh EBC ah report hong bawl ding ua, tua pansan a EBC pawlpi in foreign mission a tak a sepzui theih ding lunggulhna toh sawlkhiak ahi uhi. Amasa pen in amau Daniel Training Center, Lopburi ah Language & Cultural Training pan ding ua OMF makaite nuai ah va training ding uhi.

MoU nei a Pawlpi in gamdang a missionary sawlkhiak masakna pen ahih ziak in, kuapeuh a zakha phot in kipahpih in local saptuam leh TBMC tuamtuam in hun zatpihna mun tuamtuam ah nei uhi. India gamsung ah Mission nasepna kum 50 bang apai nung in tukum a gamdang a kisawlkhethei a i om uh akua-akua in kipahhuai kisa chiat hi. Rev N Khaikhuphangte nupa bel July 20, 2018 in kuan kheta uhi. Toupa’n hon makaih dia tua gam va enkhe dia i sawlte report tungtawn a tunung a EBC in missionary tamsem i sawlkhiak ngei uh lametna lianpi om hi. Tulaitak a EBC missionary sawlkhiak dan EBC milip phazah apan teh in za-lak-ah khat leng phazou nailou hi. Huan mission a dia i sumzat uh leng za-lak-ah 20% val zek hipan dan ahi. Huai ziak in, saptuam neitu i Toupa hon sawlna mah nna pipen a nei semsem thei ding in thumna ah phawk chiat ni. Tualou ah WEC leh SIMNEI toh kizopna i bawlthak uh leng International Agency mah ahih ziak un tuailai laisiam, Pathian adia kizang nuamte adia kong honna ahi.

Sd/- Editor