EBCC Delhi Ministerial in TBYF & Worship Team toh pangkhawm a sepkhiak dia Year Plan (2017-18) a guan, Gospel Music Festival (GMF) 2017 Pathian ompihna toh buaina bangmah omlou in kizou a Pathian min phat in om hen.
Hiai toh kisai tutkhawmna masa July 14, 2017 in om a tua hun in Core Group (GMF) - 2017 phuhkhiak in om hi. Hiai Core Group in August 26 - 27, 2017 sung Kiginni a hun 2 leh Nipini a hun 2 zat ding a, a kigawm a hun 4 zat ding a gel ahi. Tuabang a geel himahleh, Ram Rahim tungtang a CBI Special Court, thutanna toh kisai Delhi khawkim lak a buaina piang a mipi sousangte’ gamtatna huaisetak in Delhi khawpi sung pehthei ahi chih ziak in thuneitute’n Sec 144 Cr PC puang uhi. Huai ziak in, Augt. 26, Kiginni in GMF Core Group in “emergency meeting” sam in biakinn a Pastor Quarter ah TOUPA sam a thumkhawmna hun kizang hi. Hiai hun ah August 26 ni a hun zat louh phot a, hiai ni a dia hun sehsa special nos. or itemte August 27, Nipini a hun zeek a guan theih zahzah guan a zat ding in kiheilam dang hi. Heutupa Rev N Pumsuanmung Youth Coordinator in “Ka hinna aw, TOUPA phat in” (Sam 103:1a) chih thupi a nei in thugenna hun zang hi.

TOUPA a hoih a, Ni 2 zat di hunzek ni 1 a gawm a Thu leh Laa tungtawn in A’ saptuamte hongvaak veve. Huan TBYF Music ministry phungvuhna dia thilpiak kaihkhawm di kichi zong lohsam lou in hong koih hi. Hallelujah!

Gospel Music Festival hun zat zoh ahih in Delhi Local Pastor Tuang Lang in program khakna nei hi. Delhi a ana om ngei Upa khat in heutupa Rev. Pumsuanmung Y/C thugen Saptuam website a kikhah khia ana ngai kha hibang in a muhdan gen hi:
“…ka na ngaikhia a, hiai thute gen thei i heutute omta ahihman in kipahhuai ka sa hi. A thugente tulai vai mahmah ngen, khangthakte lungput heikawi thei ngen ahi a, hoih ka salua hi. Post-modernist worldview, permissive/ liberal outlook leh tech invasion hon gente hoih lua. Gengen di ngente ahi. Thanks.”

Phat leh pahtawi diing a kilawm Vanglian TOUPA phatna di Saptuam hunseh GMF a pang seseuh mimal/ pawl (solo/ duet/ band/ choir) te kilawpna leh chihtakna in vaisaite’ tha guan mahmah hi. Hiai in tualsung saptuam khat in Sound & Music system kichup tak nei hileh biakna kikhop a tuailaite kizat manphat didan bangtanhiam hon musak hia theih ahi.

“Ka hinna aw TOUPA phat inla, ka sung a om tengteng aw, A’ Min Siangthou phat in” chi zom theite hi di’n GMF Etkikna simtute, TOUPA hon vualzawl chiat hen. Pathian in thupina tangta hen!
Youth Coordinator thugen laksawn “Mahni behte ahih ziak a kam (job) a muh di chih koimah a kigelh lou eive… Eilawi kha, i behte ahihleh kam hon pethei di chih ngaihdan nei mawk in, ‘Behte hingal chin a,’ chi a lehpai zawmah lai! I behte hia poimoh masa, a.k.l. (ahih keileh) beh a hon bawl Pathian, huai’ diktatna leh sianthouna?” (Rev N Pumsuanmung) - Core Group, GMF, 2017- www.ebccdelhi.org