EBC KUMSIM KHAWMPI LIAN 86NA REPORT TANGPI:
EBC Kumsim Khawmpi Lian 86na December 8-11, 2016 sung Gospel Centenary Hall New Lamka ah ki nei a report tangpi anuai a bang in i taklang ding:
Khawmpi honna leh khakna: December 8, 2016, 5:15 Pm in Upa M Ginzalian, Khawmpi Chairman in khawmpi honna nei a, Upa K Thansang, Vice Chairman CEC in khawmpi paikhawmte vaidawnna thu gen hi. December 11, 2016, 8:00Pm in Upa Lalthanghlun Guite, Khawmpi Vice Chairman in khawmpi khakna nei hi. HUN ZATDAN TANGPI:
Biakna leh Phatna La: Kikhop teng in EBC Central Choirte makaih in biakna leh phatna nuamtak in ki zang gige hi. Kho tuamtuam 16 BYF te akipan leh Imphal Division Choir, Lamka North Division Choir leh EBC Central Choirte banah mimal 5 Solo te akipan in Pathian phatna la siamtak a a sak uh ki ngaikhia gige hi.
Pathian thutak genna (Sermon) – Rev Dr Solomon Rongpi, General Secretary, CBCNEI a kipan in Khawmpi thupi “Diktatna a Kilam thakna” chih pansan in thugenna (sermon) 5 vei ki ngaikhia a, Rev Dr. Luaichinthang in mipi theihsiam ding in siamtak in kam hon lehsak hi. Bible Study: Rev Kumam Suresh Singh, Asia Co-ordinator of Partners in Discipleship International in Samuel laibu khatna pumpi Study December 9-11 (zingsang 3) hon neihpih a mipi’n nuamsa leh kipak tak in thutak ngaihkhiakna hunte ki zang hi.
Ordination Service: December 11, 2016, Nipini 1:00Pm in Ordination Service kizang a Upa ding mi 50 leh Pastor ding mi 6te Rev S Vung Minthang, General Secretary in Ordination pia hi.
Khawmpi khakna - December 11, 2016, 8:00Pm in Upa Lalthanghlun Guite, Khawmpi Vice Chairman in Kumsim khawmpilian 68na khak hi.
Upa Pahtakna Lai sangte: Tutung khawmpi ah Upa Pahtakna Lai sang mi 31 om hi.
Semtu Pahtakna Lai sangte: Saptuam a semtu Pension mi 6te kiang ah Meritorious Certificate ki pia hi.
Thupina gam a hon na paisan suunte: Tukum sung in semtu mi 6 leh Upa Ordain 17 in thupina gam ah hon paisan ua amaute suunna kinei hi.
Tukum khawmpi vaihawmna ah palaite kumdangteng sang in ginomtak in tukinken in masawn sawt mahmah a, kumnawn chiang in tuasang a masawn sem a i om ding lamet-huai hi.
Atawpna ah, tutung khawmpi ah Dorcas Hall staff te, khawmpi U Liante, Khawmpi Palaite, Biakna leh Phatna pitute, Lapawl leh Solo te, Khawmpi Zintuntu EBCC Zion Saptuamte leh Program a tan neite teng teng, akua akua i pankhawm siausiau ziak ua lohching tak a kizouthei ahihman in KTZ tungtawn in kipahthu i taklang hi. Khawmpi tungtawn in Pathian in thupina tengteng tangta hen. -Rev Paukhanmang Guite, Director of  Ministries, EBC