Thumasa: EBCC Delhi Silver Jubilee lopna report simtute tengteng i Toupa Jesu Khrist min in chibai!
Pathian in i thumnate uh hon dawng in EBCC Delhi Saptuam dinkhiak kum 25na chinna Silver Jubilee lopna programme June 21-25, 2017 sung lohching tak in hon zang zousak a, Pathian tung ah kipahthu gen in pahtawina leh phatna Amah ka pia hi.
June 21, 2017 in Silver Jubilee lopna programme kizang hi. Hiai program zang ding in heutute Rev.S.Vung Minthang, GS leh Delhi Pastor a nahita Pastor 6te a zite utoh hong telthei chiat ua, Pathian hon pina kilatna masa ahi chi’n ka kipak mamah uhi.
EBCC Delhi Biakin ah programme kizang a, hun masa, Biakin pawlam ah Jubilee suang (plaque) honna heutupa Rev S. Vung Minthang, G/S makaih in kinei hi. EBCC Delhi Saptuam ainah phahtu teltuam mi 25ten, Jubilee dak (Jampi), Pathian pina latsakna in khat vei chiat sat/tum ua, mipiten Pathian phatna leh pahtawina in “Aw Pathian Tanga hon panpih” chih la kisa hi. Biakin sung ah Rev. Paukhanmang Guite, Director of Ministries apan “Toupa Lamtouh Saptuam” chih thupi zang a Jubilee Message /Pathian thu ngaihkhiak ahi. Tuaban ah thupina gam hon na paisanta te suunna kinei a, BYF te apan Pathian phatna la Hallelujah Chorus ngaihkhiakna kinei hi. Huan Jubilee Commitment – GBC a sinlai naupang tasam deuhte chawm ding leh “Jubilee Endowment Workshop” chih minvuah a kum 5 sung Workshop neih zom touh ding chih thupuan Upa L. Ngulminthang, Local Chairman apan ngaihkhiak ahi.
June 22, 2017 pen heutute awllen/vakkhiakna hun ding a kisepkholh dungzui in, amau teng mah leng va kithuahkhawmna (outing) in Agra ah Taj Mahal & Agra Fort va en in kithuahkhawmna hun manphatak in va zang uhi.
Huan June 23, 2017 zinglam in Delhi Pastor’s Prayer Fellowship (PPF-D) te toh “Challenges and Opportunities of City Pastors, Future prospect of City Churches” chih thupi a nei in kithuahkhawmna hun manpha tak kizang hi. PPF-Delhi i chihbel Delhi khopi a pawl tuamtuam a Saptuam heutu/Pastor a na om teng kipawlkhawmna ahi. Resource person in Rev. V. Nenglian, DS/LSD leh Facilitator in Upa Dr. B. Langkham & Pastor T. Tunson pang uhi. A nitak in Delhi pumpi bial 6 a khen in heutu hong zinte bial khat chiat a hun zatpihna manpha leh lohchingtak in kinei hi.
Kiginni June 24, 2017 in Siri Fort Auditorium ah 11:00Am – 03:00Pm sung programme nuam tak in kizang a, hiai hun ah heutupa Rev. S. Vung Minthang, GS apan Pathian thutak lungkhoih mahmah ngaihkhiakna kinei hi. Huan kum 25 sung a Toupa’n EBCC Delhi adia hon hihsak chiamteh tham tampite latom in Slide show in ki-en khawm a lungsim hon khoih thak tampi om hi. EBCC Delhi adia ma-phutu heutute & Pastorte kiang ah Memento piakkhiakna leng om hi. PPF-Delhi chairman a pan Jubilee Greetings leng om hi; Silver Jubilee Souvenir honkhiakna Rev. Paukhanmang Guite, Director Mn. in nei a, Pathian phatna EBCC Delhi leh Central Delhi apan Dept tuamtuamte’ ban ah ZCF Choir apan Lapawl leh mimal a phatna la sa leng tamtak om hi. Tanvou nei leh hun zang dingte hong kikhelh sung nangawn uh hun manphatak a zang in taksa a hong tel theilou Delhi Saptuam apan mimal leh heutu khenkhatte thuchah video kilate kikhahkhe zel hi. Hiai Siri Fort Auditorium mun a Programme kizang deihsaktu leh ngainatu Saptuam tuamtuam apan leh mimal tampite Silver Jubilee Programme a hong kihel thei tamni pen hi a, mi 1200 sang a tam kipaikhawm hi.
Silver Jubilee programme tawpni June 25, 2017 pen kikhopna hun nih in kizang a, hun masa zinglam pen EBCC Biakin, Nasirpur ah kizang a, Short sharing Pastor Khaikhuphang leh Jubilee Message, Rev. G. Kamzamuan, DS, S/D in Pathian thutak gen hi. Saptuam a dept. teng apan special item omvek hi. Nitaklam Jubilee programme pen EBCC Central Delhi ah kizang a Pastor T. Tunson in Short sharing hun zang a, Jubilee message Rev. V. Nenglian, DS, LSD in Pathian thutak gen hi; Special no. Pathian phatnala Dept. te apan ngaihkhiak ahi.
Hiai Silver Jubilee programme pen Delhi a EBCC saptuam 2 om tegel in a saikhawm hi a, EBCC HQ, EBCC Shillong leh Chandigarh in palai hon sawl ban uah kipahpihna thilpiak hong pelai uhi. Tuaban ah deihsakna thuchah tamtak mail tungtawn leng kidong hi. Programme hichi zawdeuh leh chihna ding omlou khop in, Jubilee programme kizang hi. Hon thumsaktute thumna gah ahih man in report pekawm in KTZ tungtawn in kipahthu ka hon taklang hi. Pathian in thupina tangta hen.
-Hausuanthang Guite, Secretary
Silver Jubilee Celebration Committee EBCC, Delhi.