Thupatna: Amasa in report simtute i Toupa Jesu Khrist min in chibai! I biak Pathian leh General Secretary EBC hon lemgeel pihna bang in Karbi Anglong Mission Field vehna Central Mission Committee member apan in Upa Herbert T. Sumpu leh Upa D. Biakmuanthang, Upa T. Paukhansiam (Missions Co-ordinator) leh Upa D. Kamlianthang (Driver) toh kithuah in, Karbi Anglong Mission Field a semtute Quarter ding kibawlthak nihte honna leh nasep lakloh bangzah hiam etkhiakna ban ah, Workers Seminar nei ding in June 27 – July 2, 2017 sung hun ka va zang uhi.
Field veh dia kuanna leh Field a hunzat dante: June 27, 2017 zingkal dak 5 vel in Lamka a kipankhia in nitak dak 7 vel in damtak in Diphu ka tung uhi. Azing June 28, KEBC Bithilangso Biakin, School building leh Quarters etna ka nei ua Quarters hoihtak Pastor in luahta hi. Biakin ahihleh a zohna ding un sum tamkhop beilai ding hi. School building leng puahtuak mahmah, amau a foundation bawl kipanta uhi. Bithilangso akipan in Dengaon a Retaining wall leh Earth filling etna ka nei ua, semtuten nasep tha-it thei mahmah uhi. I missionary te kho-ul kai niuniau a nasem muh in lungsim hon khoih mahmah hi. Dengaon akipan kipankhia nawn in Paklongkam vehna ka nei ua, School naupangten ekzam zoulel ahih man un, Headmaster leh Asst. teacher-te quarters ka pha uhi. Paklongkam akipan hong pai nawn in, Jiteplong a Quarters bawlna ding mun etna ka nei uhi. Hiai mun eigam hilou in, Inn neipan hon khelhsak ding a kilemna a na bawl uh ahi. Jiteplong a kipan painawn in, nitak dak 7 vel in Rongchingri ka tung uhi. Semtu omte leh Saptuam memberte toh kithuahkhawmna hun ka zang ua, annekkhawmna leng hon na neihpih uhi. Nitak dak 9:00 vel in FS Quarters ka tungkik nawn uhi.
New Langrik Quarters honna: June 29, 2017 zing dak 6 vel a kipankhia in, KEBC New Langrik ah semtu Quarters honna kinei hi. Hiai hun ah school naupang omthei bang bang a na kikaikhawm in, school gate ah vaidawnna, mawltak leh lungsim khoihtak in hon na nei uhi. Quarters honna leh latna neihzoh in singpi dawnkhawmna om a, saptuam mipi ahitheitan hong paikhawm ua, School ading Water Filter khat leh school naupangte ading chikhum ka pia uhi. New Langrik akipan in Rongali zuan in ka painawn ua, Rongali ah Biakin etna ka nei masa ua, maban lakloh mahmah a muh ahi. Pastor Quarters honna leh latna hun kizang a, FS leh mistry te hahpanna phat tham ching kisa mahmah hi. School naupangte ading in Football khat leh chikhum kipia hi.
Manza a Quarters etna: Rong Ali akipan Manza a semtu Quarters etna kinei nawn a, hoih mahmah a, semtute leng amau hihtheihna tan ah kipezou mahmah uhi. Saptuam memberte toh Singpi dawnna leh amaute adia thumsakna hun kizang in Manza a kipan Hidim Teron ka zuan nawn uhi. Semtu Inn ah a omthei teng a na kikaikhawm ua, singpi dawn in, thumsakna hun kizang hi. Biakin mun ding gam aleina uh etna leng kinei hi. A gam hoih mahmah hi. Tuazoh in Hidim Teron akipan Tari Adong zuan in ka pai nawn ua, hiai mun ah school building kibawl pan etna leh ring well kibawl etna kinei hi. Nasemte kipiakzohna leh khosung mite hahpanna thupi in phat huai kisa hi. School foundation bawl lel lel ua, ringwell ahihleh feet 60 vel a toh zoh nung un, gas om chih ziak in, maban sawn ngam nailou in, a sutzop didan ngaihtuah lel uhi.
Diphu tung kiknawnta: Diphu nitak dak 7 vel a tung nawn in, Pa, Henjang in nitak ann hon nekpih a, lungdamhuai mahmah hi. Saptuam a semtute annekpih thei dia a om kipahhuai a sak thu bang hon gen a, hon kipaksak sawnsawn hi.
EBCC Diphu ah workshop & Seminar kinei: June 30, 2017 in semtute EBCC Diphu ah workshop leh seminar kinei khawm hi. Hiai hun ah Director in EBC kivaipuak dan leh EBC Mission Field Manual sinsakna lungtunhuai tak in nei a, Missions Co-ordinator in Morality, Integrity and self-control of EBC Missionaries chih thupi pansan in seminar paper luikhia hi. Upa D. Biakmuanthang, Member, CMSC in thumna a poimoh dan leh a thilhihtheih dan semtute zaksakna leh chouna nei hi. A paikhawm ten nuamsa uh ahih dan genchiat uhi. Directorate of Missions senna in paikhawm ten ankuang umkhawmna kinei hi.
Inn lam kiknawn: July 1, 2017, 5:00Am vel in Diphu a kipan hong kipan khia in lampi ah lamzangtak a pai ka kichihlai un, Piphema khua khen ah lam-et louhtak in ka gari uh hong sia a, ken innlam a program laksa ka neih ziak in, ECA te gari in kong paisuak thei a, hon pawtu ECA heutute tung ah ka kipak mahmah hi. Adangte ahihleh gari lehkaih in, 12:00Pm vel in Dimapur a Mahindra Workshop tungkik uhi. Gari bawlzoh zok ding ahih louh man in, Night Bus in hong pai ua July 2, 2017 nitaklam dak 3:00 vel in inn kong tungkim thei uhi.
Thukhitna: Tutung Mission field vehna ah, atangpi in semtuten ahih theih tan ua tha-it uh hi a muh ahi. A kipiakzohna uleh, Saptuam member-ten a zathuapna uh thupi mahmah hi. Upa Herbert T. Sumpu, Member, CMSC in Quarters thak kihongte a zat ding Sanapi khat chiat pia a, kipahna lian mahmah hi. Report tungtawn in Pathian in thupina tang hen.