Thumasa: Central School Sub-Committee deihna bang in June 25, 2017 in CSSC, DS & Evan. Teacherten Lamka leh Imphal Division a Saptuamte vehna kinei hi. Hiai hun ah saptuam School a Semtu mi 80vel ten Saptuam 30 ah programme nuamtak leh manpha tak in kizang a, vehtute leh veh a om saptuamte kipak chiat ua theih ahih man in Toupa min i phat hi.
Kizatdan: Group teng ah leader kikoih a amau hon pi uhi. Kizatdante hoihtak a record bawl ahi a, hiai reportte amaute record apan hon kibawl ahi.
Shool Ministry Report: School Ministry Report, Office lamten a na kaihkhawmsate uh pansan in Group chih in Projector zang in lahkhiakna nei ua, huai in Saptuam mipite leh i semtute’ lungsim leng khoih mahmah a theih ahi. Hiai School Ministry report-na ah class-room nasepna, outdoor activities, school building leh tu-le-tu a schoolte’ poimohte muhtheih dia lahkhiak a om ahih man in hiai saptuam vehna in gah hon suah ngei ding lam-et ahi.
School Ministry Project Highlight: School Ministry theihchiang semna ding in Project Brochure Saptuamte kiang a hawmkhiak ahi. School Ministry a Project kiguangte fund omsa hilou ahih man in saptuam mipite’n leng hon lunglutpih chiat ua theih ahih man in tunung a a gah muh ding hong omtou zel dia lam-et ahi. EBCC Chennai in March 2017 in Teng Sing val hon thon khin ua, EBCC Lamphel in Audio-Visual Project ading LED TV 10 tak May kha in hon pekhinta uhi. Tuni tan in leng project tuamtuam ading panpihna hong lut tou zel lai a kipahhuai kisa petmah hi.
Vehtute muhdan: Atangpi a et in Saptuam mipite School Ministry ah lunglut mahmah uh ahih dan leh amau pantheihna ding a kong hon sak zel poimoh ahih dan muhkhiak thakthak in om hi.
Thukhitna: Hiai bang Programme maban a leng zattouh zel ding ban ah School Ministry toh kisai atam theilam a puanzak zel ding poimoh ahih dan muhkhiak in om hi. Huan, hiai programme manphatak leh lohchingtak a hon zangsak i TOUPA Pathian thupina tengteng i pia hi.
KIPAHTHU GENNA
Project Nehemia, BYF Delhi in Zoudawn a School-te huhna dia a gel uh tu kumthak budget a a guan uh hon thonnawn ta ua, BYF Delhi-te tung ah kipahthu i gen hi.
Daniel Scholarship, BYF Bangalore in Class VII ECE Topper 1 & 2 te adia Scholarship a piakzel uh tukum ading leng a sum hon thon nawnta ua kipahthu i gen hi.
Project Missions Workers (Evan.-Teachers) Tour, BYF Central Delhi in a pat uh tukum in leng sunzom theinawn ua Evan.-Teachers te mi 4 in June 24- July 5, 2017 sung City Tour va nei ua, kipahhuai petmah hi.
Project Joseph, BYF Kolkotta in tukum a pan in Zoudawn School-te huhna ding in Project Joseph hon pankhia ua kipahhuai i sa hi. Amau tukum adia budget zah a sum tang in Office ah hong pia ua kipahthu KTZ tungtawn in i gen hi.
Library Project, EBCC Guwahati in Zoudawn a siamsinte phattuampih ding in Laibu lui tamtak hon thon uh Ebenezer Academy-ten hon puaktung sak ua kipahhuai kisa petmah hi.
Siamsinpawlpi, CCPur College Branch inleng Zoudawn a i school bangzah hiamte ading van tuamtuam hon pia ua kipahhuai i sa mahmah hi.
Mi’ tate zaw, kichi Tuailai group khat in Zoudawn school-te huhna ding in silh-le-ten bangzah hiam leh a sumtang inleng hon pia ua kipahhuai i sa petmah hi.
Zoudawn Phawkna, EBCC Central Delhi in Project chituam mahmah Zoudawn Phawkna in Singngat Division sung a tukum in Innkuan Buh Khoukhia Tampen leh A omna Saptuamte kiang ah Director SD tungtawn in Rs. 5000/- tuak piaksawm uhi. Amau Zoudawn luahlum tute pahtawina leh khut nasep thanuam sem dia hanthawnna ding a hon patkhiak uh ahi a, chituam leh thupi sa in i kipahpih mahmah hi.
Saptuam School ministry a hon panpihtu KEF, SEETM, Thanlon Veteran, CDS, EBCC Aizawl leh mimal tuamtuamte tung ah kipahthu i gen hi.
Mimal leh Saptuam apan SD project sepkhiakna ding thilpiak leh thumna tampi mahmah kidong ahih man in kipak petmah in KTZ tungtawn in kipah thu hon kigen hi. Thupina tengteng Toupan tangta hen.