EBC THANLON DIVISION, MISSION KHAWMPI 42NA/2020 ZOH KIPAH THU GENNA & REPORT
Khovel buaina, dipkuat, patauh huai thu leng vengvung kal ah; September 04-06, 2020 sung, EBCC Palkhuang ah, EBC Thanlon Division in Division Missions Kumsim Khawmpi 42nd /2020 Pathian kha ompihna toh nuam leh lohchingtak in bangmah buaina omlou in kizang zou hi.
Khawmpi Honna & Khakna: Pastor N. Khualmang, Palkhuang Area Pastor in September 4, 2020 (Sintawpni) nitak dak 6:00 in Khawmpi honna nei a, Upa VN Pumkhoson, Chairman DMC in September 06, 2020 (Nipini) Nitak dak 09:30 in Khawmpi khakna nei hi.
Thugenna: Rev. M. Zalian Guite, DS, EBC TLD thugenpi a pang ding chih himahleh CEC Emergency Meeting a DS a vatel a ngaih ziak in Thugenna hunkhat Pastor T. Daikhankhup in zang a, Lamka South Division Missions Committee apan Upa N. Vungzathang leh Upa G. Liankhoson ten leng hun khattuak zang ua, Thugenpi (DS. EBC/TLD) in hun nih kia zangkha thei suak hi.
Khawmpi Thupi: Hiai Khawmpi ah thupi “Noumau Nek Ding Pia Un” Matt. 14:16 chih pansan in Pathian thutak genna hun 5vel kizang hi.
Devotion & Bible Study: Hiai hun poimohtak nihte ah Pastor T. Daikhankhup, Sinzawl leh Pastor B. Thangngaihmung, Khajang te pina in kisinsakna nuamtak in kizang hi.
Vaipaw Thak Telna: DMC (2020-2023) Vaipaw ding telna Pastor-te makaih in kinei a, telching a om amaute, nnagotna DS in September 06, 2020 (Nipini) nitak in nei a, Nitak biakna hun zoh in a lui leh a thakte Incharge kipiakna leng DS leh Pastorte makaih in neih zui ngal ahi.
DMC/LSD in Hong Veh: Lamka South Division, Division Missions Committee in kum bul a hong veh ding a Programme bangkim kihawm felsa hinapi Lock Down jiak a kikhawl sak sepsuahna hikawm in hiai hun ah member 14 vel in hong veh kawm in Khawmpi hong uap thei ua kihulum tuam mahmah hi. September 04, 2020 (Sintawpni) nitak in Amaute vaidawnna in DMC Thanlon Division in Pathian mina Pakkhi oksak in ngainatak in kimuak hi. DMC/ LSD in Thanlon Division a Saptuam kho 13te a ding Dekchi lianpipi leh Kho 3te a ding Ketli liantawk khat chiat zinpak in hon puak uhi. BYF Lapawl toh Khawmpi hong uap kha theite kiang ah leng deihsakna Thilpiak, kipahman Dakbawm leng pechiat uhi. Huai kia hilou in, September 06, 2020(Nipini) in bawng lianpi gou in nitak Annkuang mipi hon nekpih uhi. Huan, Khawmpi hun Kiginni sunnung leh Nipini Sunnung te ah Sharing hun manphatak-tak hong nei ua tha hon guan mahmah uhi. Amaute Phatna lasak lunglut mite ahihmanun Biakna hunte ah amaute toh khuttte beng in Pathian phat in Kilam khawm ziah ziah hi. September 7, 2020 (Sepatni) zingkal in amaute ngaihnatna leh deihsakna toh DS Quarters, Thanlon ah, Kelsa limtak nekpih in khelahtakin kikhakhia hi. Tamveipi lem theilou himahleh tum chiltel a a hong kalsuanna uah Division mite ka kipak petmah uhi.
Khawmpi Paikhawm: Tutung Khawmpi ah Mikhual 204 kipaikhawm a, tam ka kisa mahmah uhi. Kho 5 a pan BYF te’n Lapawl toh hong uap thei ua, kihulum tuam mahmah hi. Lapawlte banah Solo, Male Voice leh Division Singer apan Phatna La tampi mahmah ngaihkhiakna kinei hi.
Thukhitna: Khovel nuamloutak lak a Khawmpi nuamtak hon zangsak Pathian min pahtawina leh tha kigot tuahna in September 5, 2020 (Kiginni) nitaklam in EBCC Palkhuang leh DMC pangkhawm in Bawng khat gou in, Mipin annkuang kisawkkhawm hi. Paikhawmte tengteng salam khalam ah kitai chiat mahmah hi. Khawmpi lohching leh manphatak a hon zang zousak Pathian kia in Thupina tang hen. Halelujah! Amen!
— Secretary, DMC
EBC Thanlon Division
LAMKA SOUTH DIVISION DBYF IN PLANNING SESSION HUN ZANG
Lamka South Division sung a DBYF in Khawmpite neih theihlouh in om mahleh PLANNING SESSION hun September 05, 2020 nitaklam dak 01:00 in EBCC Vaal Veng ah neih theih in om a Toupa thupina i pe masa hi. Hiai hun in Khawmpi hun a thugenpi dinga chial a om Pastor G Pauzarual in a gelh ‘KHASIANGTHOU OMPIH TUAILAI’ kichi DS (Adviser DBYF LSD) in honna leh latna hun nei hi. August 29, 2020 a LSD sung a Prayer and Evangelism-te vaisaina nuai a Written Bible Quiz 2020 neih a omte kipahman hawmkhiakna leng neih ahi. Hiai a kipahman sangte ahihleh:
Top-1 Khawlthiankim, EBCC Hebron Suanlalpaul, EBCC Bethlehem
Top-2 Niangngaihlun, EBCC Zion S Paukhansuan, EBCC Vengnuam
Top-3 Ningthianhoih, EBCC Nghathal H Thangchinlun, EBCC V Munhoih
Top-4 Zenhoihmuan, EBCC Zion D Lunlalmuan Tonsing, EBCC Zion
Top-5 Nianglalnem, EBCC GMualkawi Thanglian, EBCC G Mualkawi
Hiai vaihawmna a member paikhawm hoih mahmah hi, LSD sung a BYF khua omna 24 pha in huai khua apan in TBYF Chairman & Secretary (amau lemtanlouhna ah member hon sawl uh). Hiai Planning hun in Kum nawn year plan leh budget ding guanna leng kinei a, Budget ding in 4, 70,000 (Four Lakhs Seventy Thousand) only kiguang hi. Year Plan hun khoptak kiguang a, local sum bituk leng kiguang in nitaklam annek khawmna nei in hiai planning session hun zoh ahi. Hun nuam leh manphatak kizang thei ahihman in Pathian tung ah kipahthu i gen hi.
— G Mangjoymung
Planning Recording Secretary
DBYF, EBC/LSD
KIPAHTHU GENNA LEH REPORT
Awlmohna lianpi toh hon thumsaktute tengteng i hondampa leh i Toupa Jesu Khrist min manpha in na vek un kei leh ka inkuanpihte leh Nepal a Pathian gam Nna ka seppihte tengteng in kipahna chibai ka hon buk masa uhi.
July 9, 2020 in Nepal gam a Sindhupalchok District a om Bulkote khua neuchik khat ah zanlai in luitui lian guih in inn nih toh mi li tuahmang hi. Tua tui in a tuahmangte lak ah kou saptuam member gingthak khat Phurpa Tamangte inkuan a; a pa, a zi leh a tapate leng telkha ua naupang khat luang kia kimukhia hi. Huai zan in Phurpa tanu upapen Sangita Tamang kum 10 a pute inn a a va giah khak zenzen ziak in bangmah chi khalou hi. Phurpa le mun khat a a khe awkkha in taikhezok manlou hi. Haksatak a a taikhiak nung in taklam khe thagui kitan a amah pen helicopter a pikhiak a om in Kathmandu hospital ah kal thum kienkol hi.
Zan khat thu a a inkuanpihte tan ahihman in kingaisia (depression) a lungkia kisa in hospital a apawtkhiak hunhun a amah leh amah kithah mai ding chih a lungsim a nei a a omlai in hospital ah ka vaveh kha uhi. Na tanu le damlai ahi a, amah ading bek a na hin poimoh ahi chiin thumsakna nei in Pathian min in ka va hanthawn uhi. Pathian panpihna toh aman le thathak hon ngah in kipaktak in hospital apan apawtkhit in a kholam uah painawn hi. Tun akhua uah om in Biakin kainawn panta ahihman in kipahhuai mahmah hi. Khalam leh salam a ahong hat theih zelna ding in a na thumpih lailai ding in kon ngen hi.
Unaupa Phurpa Tamangte inn kiang a om Lakpa Tamangte inn le menchim toh tui in nawk kha hi. Huai menchim leh tui-in a lakkhak pen a inn kong ua JCB khat a kikoih ziak in huai in na nangkha hi. Lakpa Tamang pen menchim in akawng tan a vuh khak ziak in paikhe theilou hi. A tapa in amah kia a kaihkhiak zohlouh phet in asaklam a ka Biakin ua giak tangval bangzah hiam omte vasam hi. Amaute toh pang a a kaihkhiak nung un a mounu uh leh a naungek kal khat (1 week) a upa toh innsung a tangte pikhia uhi. Hiai thiltung hun zan dak 1 vel hi a zingkal khua avak phet a tangvalte tua Lakpa inn JCB in a nankhak pen endia akuan uleh huai mun ah muhdi inn himhim om nawnlou hi. Huchia amau innkuan hutkhiak in om mahle uh a inn leh innvan bangmah muhdi omlou in tui in taimang vek hi. Lakpa in a hinkhua a hichibang a Pathian thillamdang hih a tuahkhak ziak in Pathian hon gingta ta hi. Lakpa zi leh tate bel gingtu hisa him ahi uhi. Lakpa-te inkuan ading inleng na na thumpih ding in kon ngen hi. Amahle gingthak ahihziak in khalam leh salam a hatna a neihtheih zelna ding in thumpihna poimoh gige hi.
Ban ah, September ni 13 nitak in Nagpuje khua Sindhupalchok District mah ah menchim in inn 75 val tuahkhia a huai ah mi 31 in sihna tuak uhi. Hiai a mangte lak ah siluang 14 muhkhiak hita a adangte zonna pailellel hi. Hiai mimangte lak ah kou Grace Children’s Home a om numei naupang (Ayusha Shrestha) inkuanpihte mi 6 telkha ua, amau lak ah mi khat luang muh khiak in omta a adangte bel tutan in kimunailou hi. Amaute; Ayusha pu, a ni leh tate 2, a paneu leh a zi toh mikhual (guest) a neihte uh ahi. Ka naupangnu uh bel Kathmandu a om ahihziak in bangmah chi khalou hi. Amah leh a inkuanpihte ading in le non na thumpih zel uh kon ngen uhi. Thumna a theih dia group tuamtuam a non na post sak ban uah non na thumpih ziak un kipahthu kon gen thakthak uhi.
— Rev Kamginthang, Director,
New Grace Nepal