Reports | KTZ

    KTZ
    Reports

    DIVISION MISSIONS KHAWMPI 30 VEINA ZANG ZOU

    Apaita August 8th – 9th 2020 in Lungthul D EBCC ah Division Missions Khawmpi 30 veina EBC Singngat Division in a na zang zouta uhi.

    Khawmpi honna Pastor G. Thangrosiam Lungthul – D in nei hi.

    Thugen pi in Rev. Thawndoulian DS, Singngat Division pang.

    Khawmpi Thupi: TANCHINHOIH KEMTU MUANHUAI (IKorinth 4:1&2) ahi.

    Khawmpi hun sung in Division Baptist Missions Committee Term 2020 – 2023 ading kitelna neih in om hi. Office Bearer ding kitelna nei in In-charge kipiakna leng nei ngal uhi.

    Chairman Upa Tp. Vungzamuan, Singngat; Vice Chairman Upa PK. Tuan Tuilakjang; Secretary T/Upa T. Pauzalam, Singngat leh Asst. Secy ding in T/Upa K. Thangsiam Suangdoh hi uhi. Member 15 telkhiakte ban in Division sung a Pastor om teng Ex- Officio member a koih ahi uh.

    Amaute Divisional Superintendent in Nagotna Tarik 9.8.2020 nitak in nei ngal hi.

    Term thak ading in Budget Rs. 1,08,000.00 pomna nei uhi.

    Year plan ding in hiaite guang uhi:-

    1. Mimal Missionary vakna a pang ding mi tamsem muhkhiak sawm ding.

    2. Field thak honkhiak a om chiang a hihtheihna tan a huhna piak ding.

    3. GBC student chawmna leh Bible Society a pang ding tamsem muhkhiak sawm ding.

    4. Missionary-te gift piak sawm ding.

    5. Missions field koisan hiam vehna piak sawm ding.

    6. Division sung a Missions Motivation Tour neih ding.

    Hiaite member paikhawmten genkhawmna neih ahih nung in Division khawmpi a piaktouh dia thupuk ahi.

    Khawmpi hohthei khua 24 lak ah khua 16 kipaikhawm thei hi. Tulai natna Covid – 19 omlai himahleh palai leng a kimkhat sang a tamzawtham paikhawmthei uhi. Hiai hun mah in DBYF apat title a na ngah, Mr S. Thangminlun, Big star, Miss Chiinsawnkim Promising Artiste leh Miss Chingbiakhoih, Golden Voice-ten Toupa phatna laa sa in Kho tuamtuam apat Lapawl 6 ngaihkhiat in om hi.

    Khotual leh DBMC te pangkhawm in Pathianni nitaklam in Ankuang umkhawmna neih ahi. Khotualte kipiakzohna thupi kisa mahmah hi. Biakna kikhop hun thum leh Zingkal Devotion hun khat kizang hi. Gingtu michihte Tanchin hoih kemtu muanhuai hi ding a Toupa’ hon deihte i hihman un, michih kiang a Tanchin hoih piakna a mohpuak neite i hi uh chi’n khawmpi kikhak hi. Khawmpi khakna Upa T. Thangzadal Chairman DWC in nei hi.

    Covid-19 Pandemic omlaitak himahleh Toupa kha vehna leh ompihna kitang mahmah ahi chih kimu thei hi. Haksat hun a hon veng leh natna lauhuai apat hon humbittu Toupa min i phat ahi.

    Report petu:
    – Secretary, DBMC, Singngat Division, EBC