CEC lemsakna in BWA Annual Gathering July 7-12, 2019 sung Nassau, Bahamas a om ah Director of Ministries toh hoh dia kisa himahle ung, VISA lama lemtan louhna om ziak in kei kia ka va kihel thei hi. Report tomkim anuai a bang ahi.
1. Lam paidan leh hun zatdan: July 6, 2019 a kipankhia in Imphal – Kolkata – Dubai – Florida Beach Hotel, Nassau ka lut hi. Registration kibawlsa ahihman in Hotel Room book sa ah ka lut hi. Zingkal dak 7am in Breakfast zoh in zing kikhopna in zui ngal hi. Tua khit in singpi dawnna om a, General Council Meeting leh Seminar Session kizom tou hi. Sunnung a annek khit in General Council Meeting leh Seminar Session in kisunzom nawn a, nitak ann dak 7pm in kine hi.
2. Kihelkhaknate leh muhdan: Bible study pitute khami thei mahmah ua khalam ah hon chawm mahmah uhi. General Council 5vei kinei a, vaihawmna mun ah agenda committee in approval din hon lukhe zel uhi. Agenda hoihtak a committee in a velchetsa ahihman in thupukna bawl dingdan kichiantak in pulak in hon luikhethei zel uhi. A deihlou a khutlik a om leh genna ding hun pia ua, nialtu a om louh leh thupukna hi pahpah in kizou mengmeng hi. Agenda khat 5 minutes khawng a kizou thei a, tawldam huai mahmah hi. Huai dan i zuihtheih kal ngaklahhuai i sa hi.
3. Seminar a telkhaknate: Thupi khat “Pastoring in Digital Age” hiai thupi kisinsakna ah ka va tel a, tulai Pastorte nasepna Digital poimohdan leh pilvanhuai hon sinsak ua navakhuai mahmah hi. Eilam ah ahihleh tulel in a standard in ban nailou deuh bang ka sa hi. Thupi dang “Celebration of Preaching” ah ka tel hi. Thugen kisak kholhna, Thugen khiakdan, Mipite nektheih dia gen a poimohdan chihte hon sinsak uhi. Navakhuai mahmah ka sa hi.
4. Member thak laklutna: July 10, 2019 in General Council ah Zomi Baptist Convention, Myanmar BWA member dia laklutna hun zatkhawm ahi. July 11, 2019 in APBF Council neih ahia, Zomi Baptist Convention, Myanmar member thak dia loplutna leh kipahpihna thilpiakna hun zat ahi.
5. Term thak a heutu dingte: General Assembly hun in term thak 2019 – 2024 vaipaw dingte; President, First Vice President, Vice President 6 leh Treasurer ding agenda committee in proposal a guan uh ahibang in paisuak hi. President ding in Thomas Mackey, Venezuala mi telching ahi. Assembly hun in President/Secretary, Regional Presedent/Secretary 6 ten ministry report pechiat uhi.
6. Muhdan tangpi: Atangpi a ka muhdan in, makaite lungsim global mahmah, a awlmohna uh leh kipiaknate uh thupi thei mahmah hi. EBC adin BWA tan a i kizat theihna din regional level tan a nakpitak a i kizat masak ngai hi. Huchi hileh midangte nuai a hituan hetlou ding i hi. Tuabang hun ding ngaklahhuai i sa hi. July 11 in, unau ZBC America leh ZBC Myanmar toh kithuahkhawmna hun ka bawl thei uhi. Maban ah kipanpihtuah leh semkhawm ding in panla ni chih kithutuaktak in kikupkhawmna neih ahi.
7. Kiklam paidan: July 12, 2019 in, Melia Nassau Beach Hotel a kipan in; Nassau – New York – Milan – Dubai – Kolkata – Imphal tawn in July 14, in damtak in kong tung hi. Pathian leh heutute deihsakna ziak in hiai khawmpi a va kihelthei ka hihman in ka kipak mahmah hi.