Hihtheihna lam chiat suah leh tawlngalou a ana pang gige Saptuam te Mission nna sem ding a thuneihna leh mohpuakna hon pia i Toupa Jesu Khrist min in chibai, na tung uah kipahna leh lungmuanna om tawntung hen…!!! Toupa hoihna OMF tungtawn in ka dawng zel ua, hon deihsak in hon nek-ngaih mahmah uhi. Saptuam-te i pankhawmna ziak ahi chih phawk in Toupa kiang ah nakpitak in kipahthute ka na gen zel ua, KTZ tungtawn in noute tung ah leng kipahthu ka hon gen uhi. Na thumpihna uh dongtu – Hang & Vung.

Thumtu leh Saptuam mite theih ding in khawmpi report tomkim a nuai a bang in ka hon bawl hi:

1. Ahun: June 27 – 30, 2019 sung khawmpi kizang hi.

2. Amun: Supalai Resort, Saraburi, Thailand. Hiai (Supalai Resort) mun ahihleh mun lian (za), mun thoveng leh mun nuamtak ahi a, Khawmpi leh camp/retreat chihte zatna mun ding in lemtang mahmah hi. Lamzang a Saptuam mun bang leng zattheih hong hih hun ding hon ngaklahsak hi.

3. Thupi/ Theme & Speakers: “Effective Partnerships for God’s Kingdom” chih thupi zang in David Chang (Main Speaker), Pastor Supachot leh Mrs Tasanee Yanasiddhi te’n sinsakna pia uhi. Midang toh sepkhawm a poimohdan bang, ministry lohchin zawk semna ding chihte nakgen mahmah uhi. A thugente uh laktom vek hileh; “…a theory / a thu kia a siam hilou in, atak a hinpih siamna…ei kia panglou in midang toh pankhawm siamna leh sepkhawm siamna ministry lohchinna thuguk khat ahi...”. Eh, ana hi law ngut na e chihding bang, mimaltak bang in thugen leh workshop te nakpitak in hamphat pih ing.

4. Report and Challenging Hour: Region tuamtuam apat in ministry report piakna leh ngaihkhiakna om a, region a tuam dungzui in nasepdan leh paidan kibang veklou hi. Khawmpi sung in OMF toh kum 20 val bang ana sem heutu tuamtuam apat in chouna thu ngaihkhiak ahi a, phatuam mahmah hi.

5. Session tuamtuam:

Farewell & Recognition: Ulrich Kohler (Director OMF Thiland) makaih in Missionary innlam a kik dingte, field /gamdang a kisuan dingte pahtawina leh khakna programme hun kizang a, ki ittak leh ki ngailai pipi in kikhen uhi.
Communion Service: Khawmpi hoh teng in Toupa Nitak Annkuang umkhawmna kinei hi.
Prayer session: Devotion hun 3vei kinei. Sintawpni sun nung hun leh sintawpni nitak session te thumkhawmna hun ding in kiseh tuam hi.
Everyone Responsibility Worksheet: Miteng in i mohpuak uh ahi chi in Naupang etkolna lam toh kisai kisinsakna zong om hi.
Khawmpi sung in Strategy leh Admin Council member ding teelna om hi.
6. Hamphatpih leh zil khiak:

Nu leh pate programme zat subuai lou ding in tuailai bangzah hiamte naupang enkawl ding in ki-volunteer ua – Bible chang thu leh late ana sinsak zel uhi. Gam tuamtuam apat mimal sum seng a hong paikhawm ahihman un a kipiakzohna uh thupi sa ing.
Khawmpi sung in OMF member sung a Doctor te leng hong tel uh a, damlouhna nei leh ki-ensak utte Doctor-te’n athawn in en uhi. Ei khawmpi lian bang himawk leh Upa lam deuhte ban ah singtang lamte bang in phattuampih diakkhol ding in upna lianpi nei ing.
Hihna leh siamnate midangte phattuampih ding in a zang siam mahmah uh. OMF toh semkhawm ding a MOU i bawl uh hong manpha ding hi.
Evaluation form (?) chihdan khat om a, khawmpi toh kisai a hoihzawkna ding theite’n/ gelhte’n letter box khat ah khia uhi.
Thukhitna: Eite sepdan leng hoih mahmah a, midangte/ pawl dangte sepdan theihbeh thei a ka om man in hampha kisa ing. Report tungtawn in Toupa’n thupina tang henla, A Saptuamte mission nasepna a mailam nawt ding in hon makaih zel hen. Lungdam…!!!