I biak Pa Pathian’ lemgeelna leh heutute’ deihsakna ziak in 2019 Asia Pacific Baptist Youth Conference, Baguio City, Philippines a kizang ah kei leh heutupa Thanggoumang Valte ka va tel thei uhi. Hamphatna om mengmeng lou ahihban ah mohpuakna lianpi bang in ka la uh a, thumna tampi toh hiai khawmpi amanpha theipen a zang ding in ka kisingsa uhi. Hun kibichilh khak ziak in Philippines visa kingaihtuah manlou hi, himahleh Pathian in ahon pina hon muhsak ding ziak a na hizaw hi. Singapore Tourist visa ki apply a, huai tungtawn in Philippines ah 7-14 days visa-free entry ngahtheih hi. Abul apan in Toupa’ khut kilang den a, lampaina ah hi in giahna leh khawmpi hun sungte ah Pathian in hon makaih tawntung a, mimal ading hileh saptuam ading, thu leh sep ding poimoh leh manpha hunkhop hon pia hi. Hiai conference toh kisai a lampaina, khawmpi hun zatdan, muhthak leh etzui dia hoihsakte Khristian Thukizakna simtute ading in anuaia bang in report ka hon bawl hi.

LAMPAINA: Haokip Travels Agency tungtawn a visa kingaihtuah ahihman in amau tungtawn mah in flight ticket leng ki-book hi. Saptuam vai ahihman in a mantawm theipen hon etsak uh a; Imphal apan Philippines tunna ding in flight 4vei khek ngai hi, tua kia hilou in layover leng sawtkhoptak om hi. 18th May (Kiginni) in Lamka apan ka kuankhia uh a, nitaklam in Kolkata ka tung uhi. Kolkata ah Airport Immigration a sem unaupa Lianminthang in hon zintun hi. 19th May nitaklam dak 4 in Kolkata ka nusia uh a, tua ni mah in Bangkok Suvarnabhumi Airport ka tung uhi. Bangkok ah dakkal 11 layover ka nei uh a, airport ah ka omden uhi. 20th May zinglam in Bangkok apan Singapore ka zuan uh a, zinglam mah in ka tung uhi. Singapore visa a lut ka hihman un huai mun ah immigration ka through uh a, nikhat ka taam uhi. Singapore apan in Philippines 21st May zingkhang in ka zuan uh a, tua ni mah zinglam in Manila Airport ka boh uhi. Khawmpi zintunna mun, Baguio City bel Manila mal lam 244km khawng ahilai a, bus ah dakkal 8 bang tuang in APBY conference kizatna mun ding Philippines Baptist Theological Seminary, 21st May zan dak 9 lak khawng in ka tung uhi.

Ka hong kikna ding uh Manila apan Singapore flight ticket 25th May zinglam dak 9:55 ahihman in, conference organizing committee ten 24th May nitaklam a ka paikhiat uh hon deihsak uhi. Tua ziak in Khawmpi hunkhakna tel manlou in 24th May nitaklam dak 5 in Baguio City ka nusia uhi. Kou toh kibang a early flight nei Tangkhulte khat leh Malaysia-te 4 toh ka paikhawm uhi. Airport zankhang dak 12 in ka tung uh a, flight ngak in airport ah dakkal 9 sung ka om uhi. Singapore 25th May ni mah in ka tung uh a, immigration through in nikhat mah ka taam nawn uhi. 26th May zinglam in Bangkok ka zuan nawn uh a, tua ni mah in ka tung uhi. Bangkok ah dakkal 4 vel ka ngak nung un, Kolkata zuan in ka lengkhe nawn uhi. Tua ni mah in ka tung uh a, Kolkata ah zan khat ka taam nawn uhi. 27th May zinglam in Kolkata ka nusia uh a, dak 11 lakvel in Imphal ka tung uhi.

Ka lampaina uh singtanglam zin sang in tawlhuaizaw hi. Kuan lam leh kik lam ni thum sung tuak khawng ihmu man manglou in ka om uhi. Himahleh lampaina lel leng manpha mahmah hi. Mun muh ngeilouh ngen ka va mukha uh a, hamphat huai mahmah hi. Kuanlam in Khawmpi a lamet leh kihel dingdan tuitak in ka genkhawm man uh a, kiklam in sinkhiatte leh zuih dingte tuitak mah in ka kikum nawn thei uhi. Tuaban ah, Manila leh Baguio kikal Bus tuanna ah houlimpih ding Toupa’n hon pia a, khawmpi manphatna zahzah in tua lampi a kihoulimnate manpha hi.

KHAWMPI TOH KISAI: 2019 APBY conference ah gam 17 apan delegate 1100 lakvel ka paikhawm uhi (Philippines gam tellou a registration bawl 700 valzek ahi). Conference thupi “Making and Multiplying Disciples- 2 Timothy 2:2” chih ahi. Tutung conference zintuntu Philippines sung a Baptist Convention lianpente lak-a-khat Luzon Convention of Southern Baptist Churches ahi uhi. Tua convention in conference sub-committee ding na kiseh uh a, huaite’n iDisciple Ministries kichi amau sung a tuailai ministry khat Conference vai bangkim a tai ding in na sehsawn uhi. Conference zintunna mun bel Baguio City a Philippines Baptist Theological Seminary (PBTS) ahi hi. Baguio city ahihleh Aizawl leh Shillong khawpi bangsim ahi a, taksing kung tamna mun, bouruak nuamtak nei leng ahi hi. PBTS Seminary lianlua hikei mahleh giahna ding leh kihahsiangna ding chihte kizen mahmah hi (Hiai Seminary ah ei singtangmi thum tulel in a sinlai om uhi; Myanmar apan nih leh Lamka apan khat). A lamet sang ua delegate a tamzawk man in, Baguio City sungmah a Hotel khat leng a book uhi. International delegate-te na vaidawn leh makaih ding in convention sung a tuailai pawlte na kiseh uh a, airport ah honna vaidawn ngal uhi. Tuailaite kizenthei mahmah uh a, akilawm a nasep chihsang in a settheih dinga nasep pibawlzaw uh hi in muhtheih hi. Nek leh dawn ding bel PBTS canteen in mohpuakna la ngal hi. Conference hunsung a vuah hahzuk mahmah dinga gintak ahihlai in, khawmpi tawpni chihlouh tuabang buaina om hetlou hi. Hunzekdan siam mahmah uh chihding ahidia, om awl na ding hun omlou phial in hun kizang hi. Zan dak 10 in hihding teng zoh ahizel a, tuazoh chiang in mahni room chiat ah roommate-te toh dakkal nih-thum bang kihoulimna in kizat behzel hi. Conference hunzatdan toh kisai anuaia bang in ka hon vualsuk hi:

a) Speakers: Thugenpi guk pha uh a, amaute ahihleh Edwin Lam (APBF President), Vee Tetseo (APBF GS), Ardi Wiriadinata (Pastor, First Baptist Church of Bandung, Indonesia), Franco Ferrer (Pastor, International Baptist Church of Manila), Christine Redwood (Seaforth Baptist Church, Australia), Asha Sanchu (Miqlat Ministries, Nagaland Baptist Church Council) te ahi uhi. Amaute ban ah workshop facilitator mi 21 leh Ministry Expo Team thum leng omlai hi.

b) Biakkhawmna: Biakkhawmna hun akigawm in 7 vei kinei hi; zingsang hun thum leh zan hun li ahi hi. Biakkhawmnate zat dingdan “programme” chih a omtuankei a, akihel dingte thuzak lel uh hidin gintak huai hi. Tua ban ah, hiai hunte ah APBY committee member te sang mah in APBF General Secretary in ma kai zaw hi in muhtheih hi. Hunkemtu a omlouh hang in “event planner” dan khat in numei khat seh uh a, tua nu in a poimoh bang in akizang dingte na samkhawm zel a, stage tunga omlel te kiang ah leng direction pezel hi. Biakkhawmna hun a lapitu ding in gam tuamtuam apan mi kaikhawm uhi. Lasakkhawm nuamthei mahmah a, lapitute laphuahte mah kisa zel hi. Special Number leng om gige a, tawndan tuamtuam akipan ahih dungzui in Pathian phatdan leng na tuamzel hi in mutheih hi. Gentham leh suttham ching a ka theih bel Japan Team-te special number-te ahi; contemporary world toh biakna gawmkhawm nak mahmah uh a, tulai a kithang hip-hop rap song-te leh contemporary dance-te khawng stage ah hon lakkhia uhi. Hiai hun ah, gam khenkhat apan Pastor leh tuailai makai khenkhatte toh, tuabangdante Pathian biakna a kilawm mah ahidiam chih khawng ka va kikum uhi. Thugenna hun leng bikhiahsa om a, minute 45 genzel uhi. Thupi taisan hetlou in thugentuten gen uh a, a thutunte uh mawl leh mai thei mahmah hi. Gam tuamtuamte kikhopkhawmna hun a thugen ding in ka lamet sang in mawlthei mahmah ka sa hi. Himahleh, achituamna bel “practical” thei mahmah a, tu leh tu a zuihtheih ngal ding ngen in luikhia uhi. Tuabanah, huntamzaw in Laisiangthou sungthu mah gen kinken uhi. Thugen teng lak ah Pastor Ardi gen chiamteh tham pen hi in ka mu hi. Luke 5:1-11 sung pansan in thugen a, thugenna apan sindia manpha ka sak diak hiaite ahi:

Laisiangthou i theihna uh nasep-thilhih i suaksak vang mahmah uhi. Theology i thei uh a, himahleh thumanna i theikei uhi.
Thilhoih tampi i hih zelzel leh hih lellelte’n a hoihpen leh a poimohpen (Khamangthang mat leh nungzui bawl) i hih di lai ahon dalkhak ding lauhuai ahi.
Jesu’n a hon thupiak pen pilna leh ngaihtuahna (logic and reasoning) zang a zuih di ahikei a sikha i hihna pansan a zuih ding ahi.
Let go and let’s go, we’ll never know unless we go/ Khahkhia in kuankhe ni, i kuan keileh kithei ngeilou ding ahi (Toupa’ hon zat dingdan).
c) Workshops: Workshop ni nih sung in 24 sai hi a, ni khat in mikhat nihzel ah teltheih hi. Avek a etkhawm in workshop te bel Tanchinhoih puanzakna, nungzuite bawlna leh makaihna toh kisaia kisinsakna ahi tangpi hi. Nikhat in mun tuamtuam ah workshop 12 akisai zel a, utna munmun a teltheih himahleh munkhat ading in seat bikhiahsa koih uhi. Thugenna hunte mahbang in, workshop-te leng basic thei mahmah hi. Eilam seminar leh workshop-te toh va tehkhin khak in om a, gam changkangzawte’ Pathian thu gendan leh ei gendan akibang lou khenkhat om ahihdan muhtheih hi. Mawl mahmah ahihlai in, workshop-te leng practical thei mahmah a, mimal kilamtouhna ding in manpha mahmah hi

d) Ministry Expo: Conference hun sung a thilthak ka va chepkhak hiai ahi. Ministry dingsa leh experience hoihtak neisa thum a hong pai uh a, amaute’n a ministry uh tuailaite lak ah hon lakkhia uhi. Avek a tel lunggulh huai mahmah himahleh, mi khat expo khatzel a teltheih ding in hunzek ahihman in, khat kia ah ka telthei hi. Ministry hong paite ahih uleh i) Horizons ii) iDISCIPLE iii) Nehemiah Groups ahi uhi. Nehemiah Groups bel Mission toh kisai ahi ua, Philippines sung kia a sem ahi uhi. Summer leh Winter vacation hun chiang in tuailai a lunglutte kikaikhawm zel uh a, amau gamsung a khua tualniam leh haksa deuhte lak ah Pathian thu va gen zel uhi. Philippines bel Catholic te tamna ahi a, Baptist saptuam te’n amaute lakah Tanchinhoih ahibanga va puanzak pen poimoh ngaih mahmah uhi. iDISCIPLE ahihleh international youth ministry ahi a, himahleh conference a hong paite bel Philippines branch-te ahi uhi. Kum 2016 apan ka na etzui khat ahihman in ka lunglut mahmah a, conference hunsung in a makaite uh toh leng hun ka va zangthei uhi. iDISCIPLE expo ah tel ding lunggulh huai mahleh ka theihngei nailouh Horizons Ministry pen theihbeh tuak ka sak man in tuapen ah ka tel hi. iDISCIPLE expo ah heutupa Thanggoumang Valte ava tel thei hi. Horizons Ministry ahihleh Online Training Programme ahi a, youth leh child worker-te ading bik a bawl ahi hi. Hiai expo a ka telkhak manpha ka sa mahmah hi. Presentation leng a founder, Jeff Carter mah in hon nei a, mimal kitheihtuahna leng ka va bawlthei uh a, hamphat huai ka sa hi. BWA in leng hiai programme manpha sa ahingei ding a kizoppihna na neikhinta uhi. A lungluthuai semna ahihleh pau khatpeuh a let theih dinga bawl ahi a, tua kia hilou in sum bangmah sen ngailou a training laktheihna programme ahi hi. Mailam ah saptuam in i phattuampih ding uh lametna toh kal masa suanthei ding in Toupa’n ahon pi a, lungdam huai mahmah hi.

e) APBY Committee thak guanna: Conference hun sung in APBY committee thak ding guanna leng omngal hi. Committee member ding bel telthoh ahikei a, nominate thoh ahi a, committee luite leh APBF makaite’n aguanthoh uh ahi hi. Atangpi in APBF sung a convention te’n amau ai-oh a dingthei ding tuailai hiai bang ka nei uh chi in unofficial notification pezel uh hihtuak hi. APBY committee thakte bel Australia, Indonesia, Sri Lanka, Myanmar, Philippines leh India apan khat chiat ahi uhi. India apan member dia guan a om bel Mizoram Baptist Church apan Jacob Khiangte kichi hi a, amau sung ah term thak a Vice-Chairman ding in leng teel ngal uhi. Amaute’n APBY conference nawn 2024 tan mohpuakna len ding uhi.

KHAWMPI APAN SIN DING LEH ETZUI DIA LUNGLUT HUAI TE: EBC saptuam pawlam a conference ka zatkhak patna ahih mah bang in, eilam a hih ngeilouh leh hihdan tuam khenkhat ka va mu hi. Tuate ban ah, khawmpi hun sung a thugenna, workshop leh ministry expo-te apan in saptuam in etzui dia lunglut huai khenkhat leng ka hon chiamteh. Tuate saulou in anuaia bang in ka hon taklang hi:

a) Khawmpi feltak leh etlawmtak a sai chihsang in a thu leh laa mahmah a ngai poimoh uhi. Biakkhawmna mun ding in PBTS gym kizang a, eilam community hall bang lel ahi hi. Powerpoint presentation chihte a ngai poimoh kholkei uh a, kam a genkhiat a theihsiam ding in kisakhol uh hi in muhtheih hi. Thugente leng basic Christian living mah sukha ngen in gen uh a, community lamtouhna ding chihsang in mimal lamtouhna ding in thu genzaw uhi.

b) Philippines gam mi Gingtute, adiak in iDISCIPLE ministry-te apan sin ding hiaibang ka hon chiamteh hi: Mimal kitheihtuahna leh kizopna ngai poimoh mahmah uhi. Pulpit ministry sang in mimal leh mimal khalam kizoptuahna ngai poimohzaw uh hi in muhtheih hi. Tampi kiang a kichingloutak a gen sang in khat kiang a kichingtak a kizat manphazawsakna lianpi hon pia uhi.

c) Workshop-te ah leng resource person-te’n “kihoulim” bang dan in hon paipih uh a, a tel tengteng ading in angtan huaisak uhi. Thugen hunsung mah in kikupna paitou kawmthei hi. Workshop apan mimal a muhthak leh kilatna ka vabawl hiai bang ahi: Servanthood Leadership akigen sek a, himahleh hiai thumal nihte a kizom theilou ahi uhi. Servant ahihleh Leader hitheilou a, Leader ahihleh Servant hitheilou ahi. Huchi ahihleh, kei Pathian’ sikha ka hihna poimohzaw ahihdan ka va mukhia a, Pathian’ gamna ka sepna ah Servant lel kahi chih chetna leh kilatna ka va nei thei hi.

d) Ministry expo Horizons leh iDISCIPLE te anih in etzui tuak hi in muhtheih hi. Horizons bel amau hon vaikhakna pansan in ka na enzui ngal a, Pathian’ pina toh mailam ah kalsuan khawmna ding lampi hong kihon zel ka lamen hi. Horizons founder, Jeff Carter mah leng tuailai leh naupang heutute lak a a programme hong luikhiat lunggulhhuaisakna om hi. iDISCIPLE te ahihleh tuailaite ading a Pathian in ahon sawl hi ding in ka ngaihtuah hi. Aziak bel tuailai gingtu hihna a eilamte taksap awnghu thei ding in a sinsaknate uh manpha hi in ka mu hi. Tuabang ahihman in, amau mahmah toh hun zatkhop ding lunggulh huai hi.

e) Conference uap ding a hong paikhawm tuailaite atamzaw sepna (profession) nei ahihkeileh zillelte ahi uhi. Thupi ka sak mahmah bel amau’ mimal expense a hong zin tamzaw tham uhi. Tua kia hilou in, sepna hoih taktak nei; eilam a “saplian” i chihtheih ding tuailai tampi a om uhi. Himahleh, hiai khawmpi hun ah a sepna uleh khovel vai a ahihnate uh theihbut hetlouh ding khop in biakna leh gingtute unauna a ngai poimoh uhi. Tuaban ah, a sepna mah uh Tanchinhoih puanzakna vanzat in zang takpi uhi.

THUKHITNA: Toupa’n APBY conference ah a thilhih theihna hon musak a, saptuamte, abik in tuailai leh naupangte taksap leh poimohte toh kisai lamthak leh panpihtu ding mite ahon piakman in lungdam huai ka sa hi. Saptuam ai-oh a vakuan ka hihna uah, theihtawp suah in ka vapang uh a, mite’ hon theihphak ding chihlam sang in bang i zilkhe thei dia chih lungsim a koih gige kawm in ka vakihel uhi. Saptuam in hiai hun uapna ding a lampaina leh amun leh lamkal a zat ding a poimoh bangkim hon siksak a, amanphatdan leh saptuam teng in a chin uh hilou ahihdan leng ka vamu ua, lungdamhuai lua ahihdan ka vachian thakthak uhi. Bangkim ah Toupa min ka phat a, thupina tengteng Amah a ahi.