• APBF heutute’n hong veh: April 12, 2019 in Asia Pacific Baptist Federation heutute’n EBC Saptuam vehna hong nei ua, Mini Auditorium Dorcas Hall Compound ah Rev Paukhanmang Guite GS makaih in heutute toh houlimna hun zangkhawm uhi. APBF apan hong hohte Rev Dr Vesekhoyi Tetse General Secretary makaih in Rev Ronnie Chiu, Rev Kabi Gangmei ahi uhi. Asia gam a tangthupha meivak puakna ding in Asia mite mah i pankhawm poimoh pen ahihdan leh Pathian in eite huai hih zou ding a hon thuamkhinta ahihdante gen uhi. APBF nasepna ah EBC leng hun paisate ah nakpitak a kihel gige, khuam poimoh tak ahihman in talent hoih taktak nei tuailaite adia Pathian in kong hong gige ahihdante gen uhi. EBC heutute apan thukup poimoh tampi omte ban ah, Rev S Vung Minthang Director of Ministries in Baptist inkuan sung a om himahleh EBC chituamna leh Saptuam kipatna NEIGM a kiphutkip masa ahihdan leh Baptist Mainline Church a Pathian hon pilut dante khawng gen hi. Dorcas Hall a heutute, GBC Principal, CBH Manager leh LRRC Secretary te pan in leng thukup tuamtuam genkhawmna neih ahi.

• CES Staff Quarters Palkhuang: Convention English School Palkhuang, Thanlon Division in semtute quarter neilou a hun sawttak a om nung un heutute deihsakna toh lamzoh ahita hi. Luahtheih ding a zohsiang ahihtak man in Area Pastor N. Khualmang in February 28, 2019 in Pathian khut a latna leh honna nei hi. Local School Committee leh saptuam in kipahhuaisa petmah in a kipahna uh KTZ ah hon taklang uhi.

• Staff Quarters cum Jehovah Hostel: Lamka North Division a om T Khuangkhai khua ah semtute omna ding Staff Quarters cum Jehovah Hostel, luah theih ding a zohsiang ahihtak man in March 25, 2019 in honna neih ahita. Rev Ginmalsawm DSD leh Rev V Thangkhangin DS LND makaihna in honna leh latna neih ahi. Pathian hehpihna ziak in headquarters leh Local Saptuam pangkhawm a kibawl luahtheih ahihtak man in kipahhuai i sa mahmah hi.

• Khaloh lak masak pen pia: Miss Kimlemching d/o T Khupkhanpau Zoar veng Bungmual a om in BSF ah Sub-Inspector sepna mu hi. Pathian vualzawlna a hiaitan tungthei ahihdan phawk in Pathian kiang a kipahthu genna in EBCC Bethany ah a lohlak masak pen pia hi. Hiai bang a tuailaite’n Pathian a phawk zelna uh i kipahpih hi.

• Pastor PL Ropiang’ Kipahthu Genna: EBCC Teikhang a sem Pastor PL Ropiang in February 1, 2019 ni a Bike accident a tuah lai a buaipihtu masapen Mimbung leh Teikhang khomite; tua ban ah, District Hospital Lamka puaktung ahih nung a vehtu tengteng sum-le-pai, hun manpha taktak seng a vehtute, GS leh Director-te, DS Lamka North, South, Singngat, Vangai, Mizoram; Mission Committee Lamka South, Bethel Baptist Church, Pastor-te leh mimalmal thumna leh thilpiak a vehtu tengteng ban ah, Hospital a pawtkhiaksan nung a kemtu Pa T Pauzathang Nehru Marg leh minloh kimlouh tampi omte tengteng tung ah Pathian min a kipahthu genna in KTZ ah taklang hi. Simtute’n leng Pathian kiang a kipahthu genpih in a kep saptuamte lak a khalam vualzawlna tampi luankhiakna a hong hihna ding in thumpih ni.

• GBC Graduation May 10, 2019: Kum dang banglou in tukum apan Graduation Service Spring Semester zoh hun in kizang panta hi. Tukum in May 10, 2019 in Centenary Hall, New Lamka ah Graduation Service Programme neih hiding a, Speaker in Rev Dr Ginnei Thang Ngaihte hiding hi. Saptuam leh mimal kuapeuh in hiai hun uap chiat ding in Board of Governor, Principal, Staff leh Graduating student tengteng in chialna bawl uhi. GBC dinmun hiai a nuai a bang ahi.

Sinsaktu 14 leh office a semtu 10 pha uhi. Sintu naupang om lel zah: Master of Divinity 67, Bachelor of Theology 78, Diploma in Theology 28. Tukum a graduate ding zah, Master of Divinity 14, Bachelor of Theology 20, Diploma in Theology 12, Ministerial Training Course 25. A vek a gawm in 71 in zohna lukhu khu ding uhi.

GBC tungtawn a Pathian nasep theihna leh lunglut mite kihel theihna lam tuamtuam omte hiai bang ahi. Special Patron Rs. 10,000/- apan atung lam, Group Patron Rs. 5,000/-, Individual Patron Rs. 2,000/-, Life Member Rs. 1,000/-, Memorial/Anniversary Gift Rs. 500/-, Annual Member Rs. 100/-, Naupang chawmna kha teng a Rs 500/- apan atunglam.

• April kha in semtute mi nih pension uh: Upa H Shinkhokam in 1979 akipan in Pathian gam nasepna Tuiveimual ah Casual Teacher in na sem pan hi. 1980 apan 1981 sung C Tuiveljang JB School ah Headmaster in sem a, 1982 apan 1984 sung Singngat Convention Junior High School ah Assistant Headmaster sem hi. January 1985 apan Singngat District DS Office ah Clerk cum Accountant sem in Institution Department apan in GAD ah kisuan hi. Singngat DS Office ah 1992 tan sem in, 1993 in Dorcas Hall ah kisuan in Junior Accountant in April 2003 tan sem hi. May 2003 apan in Senior Accountant a kaisang in April 18, 2019 tan sem hi. Service kum 40 sung a sep man ban ah taksa kum 65 a chin toh kiton in pension ta hi.

Upa T Ginzathang Grade IV nasem leng April 24, 2019 in taksa kum 65 a chin toh kiton in pension ta hi. Aman 1990 kum in sem pan a Dorcas Hall ah Chowkidar nna hun sawttak a sep nung in GBC ah kisuan a, a pension tan huai mun ah sem hi. A sep tung akipan a pension tan in kum 29 sung service man hi.