Kipahthu genna khaloh pia:
1. Evan. N Thangsuanpau in a sepna a khaloh a lak masakpen mission nasepna ding in, Director of Missions tungtawn in Dorcas Hall ah pia hi. Toupa’n a tamsem seem thei ding leh pethei zel ding in vualzawl hen aw !
2. Upa S Ginzathang, EBCC Dorcas Veng a om in kumteng a khaloh lakmasak pen (January a) Mission nasepna a poimoh bang a zat ding in Director of Missions tawn in Dorcas Hall ah hongpia hi. Aman kum bangzah hiam paita a ana pat ahihna ah, etton thamching i sa mahmah hi. Toupa’n amah leh a inkuante vualzawl in makaih zel hen.

Naupang Nipini Skul Honna:
EBCC Zoan in naupang nipini skul kum 10 val neilou a a omnung un, EBC Headquarters, Division, local saptuam leh mi kiphalte huhna toh zouta ua, January 6, 2019 in Rev. E Paukhanlian DS Lamka North in Pathian min a honna nei in, Pastor H Laithang, Bial Pastor in Pathian kiang ah latna nei hi. Pathian leh deihsak tute ziak a Nipini skul building hoihtak nei ahihna uah, kipak mahmah in, KTZ tungtawn in kipahthu hon gen uhi.

Camp lohching:
“Na pianthak ngeingei ding ahi” Johan 3:7 thupi a nei in, EBCC Songtal in Hotdamna Camp, January 30 - February 3, 2019 sung nei uhi. Thugentu in Evan..T Damkhothang leh Evan. Lianding Guite pang ua; sawltakte: TK Khual Gualnam, K. Muanthang Ngaihte, Jambiaklal Tunglut, Tualthianmung Hangzo leh Paubiakthang Samte ten panpih uhi. Hiai Camp tungtawn in Pathian’ kha vehna thupitak tang ua, camper 71 lak ah piangthak 60 leh halhthakna tang 11 om hi. Khasiangthou nasep thupi mahmah ahihman in, saptuam mipite kipak in, KTZ tungtawn in Pathian leh Saptuamte theih ding in kipahthu hon gen uhi.