I. KHA LOH LAK MASAK PEN PIA UH:
TV Mawithanding s/o L Rosiam, EBCC Mimbung in Police Department, Govt of Mizoram nuai a sepna muthak a Pathian tung a kipahthu genna in EBCC Mimbung ah a khaloh lak masak pen pia hi.
Mr Kaisuanmang, s/o Lalbiaklun, ARC, Shillong in Assam Regiment a sepna muthak a Pathian tung a kipahthu genna in a khaloh lak masak pen EBCC Shillong ah pia hi.
Mr H Tunmuanlal S/o H Goukhanpau, CYA Road, New Lamka ‘G’ in Manipur Government nuai a Education Department ah sepna mu a a khaloh lak masak pen EBCC Bethlehem Saptuam ah Pathian gam nasepna ding in pia hi.
Miss Nianglawmkim d/o S Kamzagin, Gilgal, Mimbung in a khaloh lak masak pen Gammial a Mission nasepna ding EBCC Gilgal Mimbung ah pia hi.
Hiai bang thilpiak petute ziak in kipahthu i gen a, Pathian in amaute vualzawl zel hen aw.

II. KIPAHTHU GENNATE:
Hiangmun kipahthu: EBCC Hiangmuan Bethel English School in Filter, Syntax leh Furniture grant a muh ziak un kipak mahmah ua, kipahthu KTZ ah taklang uhi.

Vengnuam (Teikhang) kipahthu: Lamka South DWC in Mizoram DWC a vehlai un Teikhang khua a om EBCC Vengnuam, Mizoram Division biakin bawlna ding Rs. 10,000/- a piak ziak un kipak mahmah ua a kipahthu uh KTZ ah taklang uhi.
EBC Kawlbem kipahthu: Nu Ngaikhanman leh a tapa genthei tak a om Saptuam, Kawlbem YMA leh khosung mipi’n sum-le-pai, leh van neih bangbang thohkhawm in a inn ding uh bawlsak ua, March 8 in Pastor K. Paulianmung in inn latna nei hi. TBSUC leh TBDF in leng panpihna pia uhi.

Tonglon kipahthu: EBCC Tonglon (T) Dorka Pawl in March 8 -11 sung, Hotdamna Camp a neih uh lohchingtak in zou ua thumna leh lamtuamtuam a panpihtute tung a a kipahthu uh KTZ tungtawn in gen uhi.
Phaisan kipahthu: EBCC Phaisan in Teachers’ Quarter amau khobing in a neih zohloh uh LN/Divsion DWC tungtawn a aneih thak uh March 17 in Rev E Paukhanlian DS, LN in honna nei in, Pastor K Thangsuanmung in lan hi. A neihzoh ngeilouh uh a neih ziak ua kipaklua in KTZ ah a kipahthu taklang uhi.

Lungchin Kipahthu: EBCC Lungchin Biakin sia a bawlthak uh zouta ua, May 11, 2018 in Rev G Kamzamuan DS, SD in Honna leh Latna nei hi. Hiai biakin lamna toh kisai a panlak pihte tengteng tung a a kipahthu uh KTZ tungtawn in hon taklang uhi.

Mata Mualtam kipahthu: EBCC Mata Mualtam in a saptuam phungvuhna ding leh Pathian gam nasepna ding a Tv. T. Suanlianmang S/o T Ginkhochin Mata Mualtam in a kha khat loh Saptuam a a piak ziak in kipak mahmah ua a kipahna thu uh KTZ ah hon taklang uhi.

Mr Robindro huhna pia: TBMC EBCC Vengnuam, Jiribam in Mr Robindro a khe a pai theilou wheelchair zang a khosa April 7th in a inn ding lamsak ua Rs. 1,000/- huhna leng pia uhi.

III. BIAKIN LAMTHAK DEK

EBCC Immanuel, Headquarters Veng in Biakin kiang a gam leithak in Naupang Nipini School ding a bawl uh tukum apan zang ta uhi. Tuakhit in Pastor Quarters ding lam nawn ua tuin Pastor in luahta hi. Tua nung in Biakin kemtu quarters lamkhin nawn uhi. Hiai tengteng koimah a panpihna lalou a saptuam mite kithohkhawm a a bawl uh ahi. Tuin Biakin thak 60’ x 40’ a lian lamdin kisa ua May 22, 2018 zingkal in ground breaking nei uhi. Hiai tualsung Saptuam pen nidang a Upa Khaivum leh Makai tamtak omnasa hi-a mahni kitoudelh ding a na tup tinten uh ahih ziak in tuni tan in ahithei tan a memberte thohkhawmte zanga tualsung kitoudelh ding a tup uh hilai hi.

IV. ORDINATION PIA:

CEC deihna leh phasakna bang in May 16, 2018 nitak in EBCC Songtal Biakin ah Upa Genliankap, Pastor Ordination Program zat in om hi. Hiai hun Rev G Kamzamuan DS Singngat Div in makaih a, Rev Paukhanmang Guite, Director of Ministries in kichiamna neisak in Rev Gin Malsawm, Director Social Development in Pastor Ordination pia hi. Hiai hun ah heutupa Rev S Vung Minthang, G/S leh Directorten thugenna nei uhi. Amah ordination na pastor for Ministries Outside of EBC rule nuai a ki-ordain ahi. Aman ZRO/ZRA sung ah chaplain/ Pastor nasem ding ahih man in thumna in phawk zel ni.

V. DAMLOUHNA TUNG A KIPAHTHU GENNA:

Ka tapa Mr MANG BENSON (25) in, June 2015 a Leukemia Natna, vei ahi chih muhkhiak ahih apan tunitan VELLORE CMC ah etkol in om hi. I thumnate uh Pathian in hong dong a tun a enkoltu Doctor in a Natna om nawnlou chita ua, hiaitan hon pitu i biak Pathian tung ah kipahthu gen in, thupina tengteng ka pia uhi.

Noute’n lungsimtak tak a non na thumsaknate uh ziak bang, sum-le-pai, tha-leh-zung a non awlmohna leh panpihnate uh ziak a hiaitan tung ka hihman un Pathian tung leh noute tengteng tung ah kipahthu kon gen uhi. EBC Head Quarters (Dorcas Hall) leh EBC, DWC Lamka North Division ban ah khobing, Pawl tuamtuam leh mi malmalte’n thumna leh sum-leh-pai a na hon panpihna uleh khotuahnate uh ziak in kipahthu kon gen uhi. Huan Pastor Paununsang, EBCC Chennai a omlai in CMC Vellore ah a bul hon patpih a amah tung ah leng ka kipak mahmah uhi.

Noute tung ah kei leh ka innkuanpihte ka kipak mahmah ua ka kipahna uh mi malmal tung a hon gen kim theilou ka hihman un na vek ua tung ah KTZ tungtawn in kipahthu kon gen uhi. Thupina tengteng Pathian in tangta hen.

-Upa T. Nangzalam & Innkuante
Zion veng, New Lamka.