GBC Brief Report - Pathian ompihna toh Grace Bible College nasepna paitou zel in tukum a kum 36 tan mel muthei a i om ziak in Pathian min i phat hi. November 20 - 29 sung in Fall Semester Final exam kinei zou hi. December 4, 2017 in BOG leh Semtute kithuah in ‘Annual Thanksgiving leh Cultural Exchange Program kinei ding hi. Hong tung ding December 7, 2017 a Graduation Program kizang ding ah Rev. Bonny Resu, Former General Secretary, APBF in thu gen ding hi. Graduate dingte Master of Divinity = 08; Bachelor of Theology = 23; leh Diploma in Theology = 08 hi uhi. Sintu naupang lakna (Admission intake) kumkhat a khatvei kinei ta ahihman in 2018 a sinnuamte ading in July 2018 in Admission kihong ding hi.
Tonglon ‘P’ & Tuizang a EBC Quarters-te kihongta - EBCC Tonglon ‘P’ leh EBCC Tonglon Tuizangten amau kia a Quarters lamzohlouh lai un DWC/LSD leh Hqtr a heutute deihsakna ziak a Quarters a lamzoh man un kipak mahmah uhi.
Behiangjang DES Evangelistic Week - Daniel English School, Behiangjang in Oct. 11-13 sung Student Evangelistic Week “You are the Light of the World” (Matt 5: 14) chih thupi a nei in Sir G Lang Muanthang, Headmaster leh Madam Chingngaihlun, Asst. Teacher-ten thugentu in pang uhi. Chialpina lohching mahmah naupang 22 in hotdamna sang thei uhi. Halleluiah.
KIPAHTHU GENNA
VVCES Aibulon Kipahthu: Headquarters panpihna toh a bawl uh School building leh Sunday School hall kithuah zousiangta ua alatna Rev Khaikhansong DS in Sept. 1, in nei hi. Saptuamte kipak mahmah ua a kipahna uh KTZ ah taklang uhi.
EBCC Mualpheng Kipahthu: EBCC Mualpheng in hun bangtan hiam apat Keyboard Project a a neih uh pan a na lakpih Division, HQ, mi phatuamngai tuamtuamte panpihna ziak a Keyboard a neihtak man un a kipahna thu uh KTZ tungtawn in hon taklang uhi.
EBCC Mata Mualtam kipahthu: Mata Mualtam Convention English School in Pathian leh LSD leh Heutute deihsakna ziak in Television leh a speaker a neih ziak un kipak mahmah uhi.
EBCC Geljang kipahthu genna: EBCC Geljang in hun sawtpi apan a a Biakin ua ding meivak nei lou a a om nung un DWC, LSD in 12volt Battery a leisak ziak un kipak mahmah ua a kipahna thu uh KTZ ah hon taklang uhi.
A kha khat pension sum pia: Nu Thangnem, Joshua Road, Hebron Veng New Lamka in a Service na Dy. Secretary, Govt of Manipur nuai a kum thum phial a pension nung a leng Pathian in chidamna hoihtak toh khalam leh salam a vualzawlna a piaklai laite a ngaihtuah chiang a kipak lua in Pathian tung a kipahthu a genna in a kha khat pension sum Rs. 33,200/- Director of Missions, Dorcas Hall ah hong pia hi. Hiai thilpiak tungtawn in Pathian in thupina tang henla, Pathian in amah tamsem in vualzawl zel leh chih i deihsak hi.