Khaloh lakmasak pen pia uh: Mr Isac Ginlian B.Tech  s/o Upa   M Kamzalian, Lower GS Road New Lamka ‘G’ in Bureau of Indian Science ah Scientist nasepna muthak a a khaloh lakmasak pen EBCC Bethlehem New Lamka ‘G’ Biakin lamna ding in pia a kipahhuai i sa mahmah hi. Pathian in vualzawl zel leh chih i deihsak hi. Buangmun apan kipahthu genna: Vangai Division a om EBCC Buangmun in Biakin a bawl uh bangtan hiam a zoh nung un sum dinmun a haksatna lianpi toh dinkhawl uhi. Headquarters lam apan huhna a nget bang in huhna piak ahihna uah kipak lua in kipahthu genna KTZ ah hon suahkhia uhi. GBC Graduation Service zoh hita: Grace Bible College New Lamka ah tukum in Laisiangthou sinzou 103 in degree tuamtuam sang uhi. Master of Divinity zou 23, Bachelor of Theology 20, Diploma in Theology 9, Ministerial Training Course 51 in zou uhi. Hiai program ah Rev Dr V Ginsianthang, Principal in degree piakna nei a, Rev S Vung Minthang GS/ EBC in hasotna thugen leh thumsakna nei hi. Mipi tamtak paikhawm in Centenary Hall dim mitmet hi. Silh leh ten donkhawmte pia uh: EBCC National Game Village (NGV) Tuailai Pawl (BYF) in amau silh leh ten lai puan dongkhawm ua tampi mahmah Dorcas Hall ah hong pia ua, tuate Division khenkhatte ah kihawmkhia hi. Huan EBCC Guwahati Dorka Pawl in leng amau silh leh tente dong khawm in Dhemaji Mission Field ah bag lianpipi dim 5 pia uhi. Amaute ziak in kipahthu i gen hi. Pathian in pethei zel ding a hon vualjawl ziak in kipahthu i gen a, tamsem pethei zel ding in hon vualjawl hen. I nasepsate tungtawn  in Pathian in thupina tangta  hen. D Leikot Biakin kihong: EBCC D. Leikot in Biakin ginatak neilou a hun sawtkhop a om nung un, Pathian vualjawlna ziak a deihsaktu leh panpihtu tuamtuam mimalmal, Pawlpi, Division leh Head Quarters te tungtawn in Building hoih leh kilawmtak mai lamzoh hita in, December 1, 2016 in Rev S Vung Minthang, G/S in honna leh latna nei hi. EBCC D Leikot te kipak mahmah ahihman un Pathian tung leh panpihna leh huhna pete tengteng tung a akipahna thu uh leh a Biakin lem uh KTZ ah hon taklang  uhi. KIPAH THUGENNA
1.Mizoram Division kipahthu genna: Pathian ompihna leh makaihna toh EBC Mizoram nasepna in masawn zel a EBC Hqtr. leh Local Saptuam in hihtheihna lam chiat ah ma hon lakpihzel ua tuate i taklang ding:
EBC Hqtr. a Dorka Pawlte panlakna in DORCED Project tungtawn in Mizoram a EBC School naupang chawmna mi bangzahhiam ading hon bawlsak ziak un naupang laisim zoulou dingten Laisim theihna hunlem mu ua, Saptuam nasepna nasatak a hon zathuap hi. EBCC Aizawl Tualsung Baptist Missions Committee in Home Missions Project in Mizoram EBC nuai a School 6 omte lak a student tuition fee pekhin zouloute zongkhia in, huhna  pia  uhi. Hiai huhna a sum tang in Rs. 40,000.00 ahi a, school ten student  list ahon piak dungzui un kihawm khia hi. Hiai in, Inkuan haksa  leh naupangte chawmna a haksatna thuak tampite dawn zangkhai mahmah hi. Mizoram Division in hiaite ziak a ka kipahna thu uh KTZ tungtawn in kon taklang uhi. Toupa’n a nasepna a hatsem a semthei ding in saptuamte hon vualzawl leh chih ka thumna uh  ahi.
~Rev. N Thawndoulian, DS Mizoram Division 2. EBCC Khuangkhai kipahthu genna: EBCC Zion in bus 3 dimzen in EBCC Khuangkhai Saptuam hong veh ua, Khuangkhai saptuam in ka poimoh mahmah uh Sound Box (speaker) 2 hon piak ban uah, Department tuamtuam apat in thilpaik tuamtuam hon pia uhi. Dorka Pawl in second hand tamtak hon pia uhi. Hiaite banah bawng khat gou in Saptuam mipi ann nekkhawmna hong neihpih zawmah lai ua, ka kipahna uh lian law mahmah ahihman in KTZ tungtawn in kipahthu kon taklang uhi. Tutung leh hun paisa a EBCC Khuangkhai Saptuam hong vehte tengteng Pathian in aleh tampi in vualjawl leh chih ka thumsakna uh  ahi.
-Upa S Pumzatawn, Secy. TBSUC  Khuangkhai 3. Dhemaji Project adi Rs. 50,000/- pia uh: Lamka South Division Missions Committee in Dhemaji Mission Field HQ mun a Office leh Staff quarters bawl ding Project in nei uhi. Hiai project Dorcas Hall tungtawn a kum 2017 - 2018 sung a sepsuah ding  in  Rs.  9 lakh budget guang uhi. EBCC Hebron TBMC in LSD Missions Committee tungtawn in hiai Project ading in Rs.50, 000/- peta uhi. A kum kipatma a EBCC Hebron in hiai zah hon piakman un kipak petmah in a pemasa pen a hihna utoh KTZ tungtawn in kipahna thu i taklang hi. Midangte leng pethei zel ding in Pathian in hon vualzawl chiat hen.