Loh lakmasak pen pia: Miss Manlunniang d/o E Jamkhanlian Pethuel in Nurse nnasem a a khaloh lakmasak pen Pathian Gam nasepna ding in pia hi. Huchimah bang in Mr T Lienmalsawm s/o T Thawmkai Nehru Marg inleng Revenue Department Manipur nuai ah sepna mu a, Pathian kiang a kipahthu genna in khaloh lak masakpen Saptuam ah pia hi. Pathian in amaute vualzawl zel hen aw.

EBCC D. Phailian Report leh Kipahthu genna: EBCC D. Phailian Saptuam in kikhopna a patnawn uh 1999 kum apan tunitan in Naupangte lak a Chialpina 2vei a na neita mahle uh, Saptuam pumpi huap a Hotdamna Chialpina nei kha nailou uhi. May 19 - 21, 2017 sung chialpina nei ua, Pathian ompihna toh Evan. T. Damkhothang in thu gen a, Pathian ompihna toh hiai hun a kiphawk thak leh kilanthak mihing theih dan in 30 khong om uhi. Hiai chialpi ah amau saptuam kia hilou saptuam dangte leng vatel ua hamphatpih mahmah uhi. Hiai chialpina toh kisai a thugentu leh thumsaktute tengteng tung a a kipahna thu uh KTZ tungtawn in hon gen uhi. Pa Pathian in thupina tang hen.

EBCC Kaihlam kipahthu: EBCC Kaihlam in Biakinn tuang (floor) a bawl uh zousiangta uhi. A Biakin tuang bawlna uh toh kisai a panpihtu DS, Singngat Division leh HQ te tunga a kipahna uh KTZ tungtawn in hon gen uhi.

EBCC Bungpilon CES kipahthu: Convention English School, Bungpilon in School building lui mahmah ta, amau khua in a tunding zohlouh uh HQ panpihna ziak in a thak neithei ta uhi. Pastor V. Pauthianmuan, Area Pastor in school building thak honna leh latna April 02, 2017 in nei hi. BCD Sunday school toh kithuah School building thak a neih ziak un KTZ tungtawn in kipahthu gen uhi.

EBCC G. Bualjang: EBCC G. Bualjang, BYF in hun sawtpi apan a na lunggulh uh himahleh a leizoh louh uh Guiter EBC Imphal Division in Guiter hoihtak mai Rs. 10,000.00 man a leisak ziak un kipak mahmah ua KTZ tungtawn in kipahthu gen uhi.

EBCC Mualpheng kipahthu: Thanlon Division Offcie-ten EBCC Mualphengte zat ding Sound Box khat a piak ziak un kipak lua ua i thuzakna tungtawn in kipahthu gen uhi.

EBCC Khajang BYF kipahthu: EBCC Khajang BYF in Sound System Project a neih uh Pathian vualzawlna toh leikhinta uhi. Hiai Project sepsuahna ding a panlak khakpih tengteng tung a a kipahthu uh KTZ tungtawn in gen uhi.

EBC Gundung Pastor Bial Kipahthu: Lamka North Division, Children Department te huhna tungtawn in Gundung Pastor Bial Naupang Hotdamna Camp lohching tak in Tarik 22 – 25 June, 2017 sung in neih in om a, Camper-te khalam a pianthakna leh kimuhkhiak thakna nei tampitak om hi. Tua ziak in, hiai i KTZ deihthohhuai tak tungtawn in kou bial in Division BCD heutute tung ah kipahthu kon gen uhi. Pathian in amaute Naupang tamsem Jesu Khrist khebul a pilutna ding a vanzat manpha in zangtou zel hen aw. Kipak lua ung.

EBC Songtal Kipahthu: EBCC Songtal Saptuam in apaisa June 22 – 25, 2017 sung Naupang Camp ki nei a hiai hun ah heutupa Khenthang Buansing in thu gen hi. Camper mi 80 vel lak ah a tamzawten pianthakna nei ua mi 41 in Baptisma tang uhi. Camp a thugentu, thumsaktute, camp huhna leh panpihna pe tengteng tunga a kipahna thu uh KTZ tungtawn in hon gen uhi.

EBCC Tonglon (P) Kipahthu: EBCC Tonglon (P) in May 27, 2017 in Dorcas Committee makaihna in Itna Ankuang, Lamka South Division Office ah hong bawl uhi. Hiai Itna ankuang a bawl uh toh kisai in amun zangsaktu DS/LSD leh a staffte, Ankuang va umsakte leh a Ann nelou a a sum a piak thohte tung leh amau kia a hihzoulou ahih man ua a maute panpihtu EBCC Bethlehem BYF te, tung ah kipak mahmah uhi. Tua kia leng hilou in BYF Bethlehem-ten CES Tonglon (P) poimohna thei a, Laibu tampi ban ah, a sumtang a Rs. 2,000/- a piak ziak un kipahthu KTZ tungtawn in ka hon gen uhi.

EBCC Tuima Kipahthu: EBCC Tuima BYF-te panlakna in June 28 - July 2 sung Hotdamna Camp nei ua Pathian panpihna ziak in lohching tak in zouthei uhi. Hiai camp ah Khenthang Buansing in thu gen a, campers 93 lak ah halhthakna nei mi 52, piangthak mi 41 agawm in 93 hi uhi. Thumsaktute leh thugentu tung ah a kipahna thu uh hon taklang uhi. Pathian kia’n thupina tengteng tang hen hi. 