GBC Principal Thak:
Grace Bible College Principal thak ding a Convention Executive Committee (CEC) in mohpuakna a piak, Rev V Khamvum in February 20, 2017 in charge lata hi. Amah GBC a Senior Lecturer semngei ahihban ah, EBCC Bungmual a Local Saptuam kemlel ahihna akipan in hiai mohpuakna thak la hi. Saptuam a Full time mohpuakna a letkhak dangte ahihleh, Principal, Ebenezer Academy, Mission Field Superintendent, Director, Local Pastor, Divisional Superintendent chihte ahi. Tua a mohpuakna thak ah leng Pathian in gah tampi suang ding in hon zang leh chih i deihsak leh thumna ahi.
BibleHong Tung, Kizuak Khinta:
Pathian Laisiangthou hun sawtpi apan i ngakngak uh, hun sawtpi mah Manipur economic blockade ziak a hong tung thei lou nilouh pen February 25, 2017 in Dorcas Hall puak tung in om hi. Ferbuary 28, 2017 in Rev S Vung Minthang, General Secretary EBC in Pathian kiang a latna, Mini Auditorium a a neih khit in kizuak ngal hi. Convention Book House leh Division Office teng leh Khawpi saptuamten leng a tankhak theihna ding ua hawmzak ahi. A vek in copy 8000 ahi a hun sawt daihlou in kizuak beipah ngal hi. Bible a dangtakna lianpi nei i hi uh chih hiai in hon musak a, huai sang a kipahhuai zaw lai ahihleh Bible deihna lungtang i neihlai man un khamuanhuai i sa hi. Hun tomchik sung a Bible 8000 leikhin diam i hihman in sim taktak i hihnak leh a gah muh ding hong om ngeingei ding hi. Deih mahmah a Bible i leite phattuampih lou in omsak kei ni!
Jesu Film PaitePau Honkhiak Ahi:
“Jesu Film” Paite pau a lehkhiak a om Tanchinhoih Luka gelh pansan a kibawl hon khiakna March khabul lam in Rev S Vung Minthang, General Secretary in Mini Auditorium ah nei hi. Campus Crusade for Christ India, kichi Bangalore pansan a Tanchinhoih genzakna nasep semtute tungtawn a hamphatna i tankhak ahi. Hiai Jesu Film leitung pumpi a pau chitampi in kiletta a, India kia ah leng pau tamtak in kiletta. Hiai Jesu Film tungtawn in mi tampi’n Pathian itna mu in pianthakna leh hinkhua kikhek lamdang nei in phattuampihta uhi. Hiai movie zuak thil hikei mahleh ngapzah zah a tam leh tawm chih omlou a leitheih ding a hawmzak ahi. Hiai DVD leina a sum kimute Campus Crusade for Christ nasepna a i telkhak samna hi ding a piak ahi ding hi.
EBCC Sialbu Camp:
EBCC Sialbu in Feb 10-12 sung Hotdamna Camp nei ua Rev Ginmalsawm DSD in thu gen hi. Hiai camp ah mi 36 lut ua, piangthak leh halhthakna nei a kilan thak mi 32 om uhi. Hiai camp adia sum leh pai leh thumna a panlakpih tute tung a a kipahthu uh KTZ tungtawn in taklang uhi.
EBCC Songtal Quarter Thak Luahta:
EBCC Songtal in semtute omna dia Quarter a bawl thak uh February 4, 2017 in Rev G Kamzamuan, DS Singngat Division in honna leh latna nei hi. Hiai quarter thak lamna dia sum leh pai, tha leh zung seng a panlatu Saptuamte phathuai i sa hi. Manpha leh phatuamtak a quarter zat ahihtheihna ding in Toupa’n vualzawl zel hen.
Beth Haran Hostel Kipanta:
I saptuam a semtute kisuan kual vialvialte tate laisimna ngaih poimoh ziak a semtute ngimna deuh a kilam ‘Beth Haran Hostel’ February 21, 2017 in luahta uhi. Mr Tualzakam Guite, warden hi a, Mr H Ginkhochin, ann huantu in pang hi. Naupang 5 om lellel uhi.
Khaloh Lak MasakpenPia Uh:
(i) Mr Thangbiaklian Hangzou s/o Upa H Dongkhansiam, Mata a om in Electricity Department Manipur Government nuai ah sepna muthak a Pathian kiang a kipahthu genna in a khaloh lak masakpen a omna saptuam ah pia hi. (ii) Unaupa Pau Joshua s/o Dalkhenkhai, Hiangmun in Assam Regt ah sem a aman a khaloh lak masak pen Missionary vaakna ding in EBCC Hiangmun tawn in Hqtrs ah pia hi. Kipahhuai i sa a Pathian in tamsem in vualzawl zel leh chih i deihsak hi. Tuailaite’n Pathian phawkna a neih uh kipahpih huai i sa hi.
KIPAHTHU GENNA:
Hindi WorshipServiceKipahthu Genna: Evan Thangbiaksuan, IEM training Centre OTI Tamilnadu a training ding amun lam a lemtan nailouh ziak in kha 6 sung Hindi Worship Service te lak a Pastor Samuel Lama toh semkhawm ding a a koih ziak un HWS makaiten kipahthu KTZ ah hon taklang uhi.
DES Behiangjang Kipahthu Genna: Daniel English School, Behiangjang in Epson Printer thak a nei ua February 12, 2017 Nipini in Pastor in latna nei hi. Hiai bang thilthak leh manpha a neih ziak ua kipak mahmah in itna ziak a deihsakna lianpi toh piak a a om man un a kipahna thu uh i thukizakna tungtawn in hon taklang uhi.
EBCC Hiangmun Kipahthu Genna: EBCC Hiangmun in hun sawtpi a pan a ana lunggulh gige uh saptuam quarters ding Inn hoihtak neita ua February 9, 2017 in Rev N Thawndoulian, D.S, Mizoram in hon khiakna leh latna nei hi. Hiai quarter lamna toh kisai a tha leh zung, sum leh pai leh thumna a na panpihte tengteng tung a a kipahna thu uh KTZ tungtawn in hon taklang uhi.
EBCC Sinzawl Kipahthu Genna: Vanzat ding Computer tasam a ka om lai un a poimoh dan thei in Major S Zamkholun in DESKTOP COMPUTER Saptuamte zat ding in hon pia a, kipahhuai lua ahihman in KTZ tungtawn in kipahthu ka hon taklang uhi. Toupa’n thupina tang hen.