Khaloh LakMasakpenPia Uh
Mr Khamthianlal S/o (L) Rev L Siema, tulel a EBCC Lamphel BYF chairman in MSPDC Ltd a Computer Operator bangtan hiam Contract a a sep nung in regularisation mu a kipahthu genna in khaloh lak masak pen Pathian gam nasepna ding in EBCC Lamphel tungtawn in Hqtrs ah pia hi. Mr. Haukhansiam Khuptong, S/o K Suanthang, Convention Road New Lamka ‘G’ in PHED ah SO Grade I mu a a khaloh lak masak pen Pathian tung a kipahthu genna in a omna EBCC Bethlehem Biakin lamna ding in pia hi. Amaute thilpiak kipahhuai i sa Pathian in a tamsem in vualzawl leh chih i deihsak hi.

Kipahthu Genna, Takvom: EBCC Takvom Lamka South Divisionte zat ding vanzat poimohtak Mike set khat DWC/LSD in apiak ziak un kipahthu genna KTZ tungtawn in taklang uhi. Pathian vualzawlna leh nasep hoih tampi semthei zel ding a deihsak thu leng gen uhi.

Dhemaji MissionField adingpia: Upa Chalau Hauzel, Vengnuam, New Lamka a om in Upa Pahtakna lai toh a san khawm cheng 10,0000/- Dhemaji Mission Field project a ding in TBMC, EBCC Vengnuam ah pia a kipahhuai i sa hi. Pathian in amah vualzawl zel leh chih i deihsak hi.

EBCC Mualnuam Kipahthu Genna: EBCC Mualnuam in Sound Project aneih uh amau kia a lei zoulou ahihman un Pathian panpihna leh huhtute ziak in leizouta ua kipak mahmah in a kipahna thu uh KTZ ah hon taklang uhi. A van neih uh phatuam tak a a zattheihna ding un Pathian in vualzawl leh chih i deihsak hi.

KIPAHTHU GENNATE
Damlouhna TungAKipahthu Genna
Simtu deihtak, Hondampa Toupa Jesu Khrist min manpha in chibai! Damlouhna ka tuah toh kisai in misiangthoute thumsakna tampi dong a Toupa’n hon damsak nawn ahihna ah Toupa tung leh hon na thumsak tute tengteng tung a kipahthu genna in hiai lai ka hon gelh hi. January 24, 2017 zan a internal bleeding a ka om ziak in January 25 in Lamka Damdawi in ah ka lut a sisan unit 1 Mr. Manggoulian s/o (L) Vanlalsiam in a thawn in hon pia a, ka kipak mahmah hi. District Hospital aten RIMS ah hon refer ua huai ah Dr Dhanaraj leh Dr Shanti te etkolna nuai ah kal khat ka va om hi. RIMS ah leng sisan khai ding ka poimoh ziak in Lamphel YPA mi 3in sisan a thawn in hon pia ua, huai akipan in ka hong halhkhe thei nawn hi.

Sisan hon piaten a thawn ngen a hon pia ahihman un tua in sisan manphat dan phawkin Jesu Khrist sisan manpha mahmah a thawn a ka tan toh ka teh a, thupi ka sa mahmah hi. Ka gilpi nuailam deuh ah meima (Duodenum ulcer) om ziak a huai a sisan pawt hihtuak hi. Mangbang tawpkhawk a ka omlai in Toupa hoihna tampi ka mu a A hon houpihna leng lam tuamtuam ah ka mu hi. La tungtawn a Pathian in hon houpih kon tak lang ding”

“Khris sisanpha tuibang hong luang ka mohna sianna hi… Aw ! Piandang sisan pha hong luang Hon gum Toupa nak pan, Thangvan donga ka zaila ding aw Sisan Sisan pha … Ka simlei mi hinna pumpi’n omlai vei thuak zong leh tua sisan pha a tutkhawl in lailung muang kumkhua ning…”

Toupa kiang ah, Toupa, na lohloh hon loh in ka kha leh ka simlei mihinna pumpi na khut a om ahi a, na zat nopna na ah zang in khitui tampi luang kawma ka chih leh Toupa’n dam nawn a A nna ka sep ding lemsa ahingei ding a a hon damsak nawn a, Hallelujah! Toupa min ka phat hi.

Na hon na thumsaknate uh Pathian in hon dawng in February 1, 2017 Nilaini a inn hong tung kiknawn in February 8, 2017 in Office ka kaithei nawnta hi. Hiai tan hon pi leh hondam saktu Pathian tung ah kipahthu ka gen hi. Huan ka damlouh ziak a hong veh, hong thumsaktu Saptuamte leh mi malmal tuamtuamte, Dorcas Hall a seppihte, Imphal DS & FS, Imphal Div. Dorka Pawl ban ah Hebron Dorka Pawlte tung ah kipahthu KTZ tungtawn in kon gen hi. Ka tung a na hoihnate uh aleh tampi in Toupa’n hon din in hon vualzawl hen.
- K Jamchinthang, Circulation Manager, KTZ

Damlouhna TungAKipahthu Genna
Nov 28, 2016 – Jan 6, 2017 sung ka Hani a sipawt (gum bleeding) ziak in hun bangtan hiam Delhi a NLJP Hospital ah ka va om hi. Hiai hun sung in Pathian panpihna ziak in tha leh zung seng a hon huh a, hon panpihtute leh thumsaktute thumna Pathian in hon dawng in tu in ka sepna maban sunzawm ding in EBCC Bualjang ah ka paithei nawnta hi. Hiai tan hon pitu i Pathian min ka phat hi.

Hospital a ka om sung in Delhi a eimi Nurse omten ka poimohte hoihtak leh feltak in hon saisak vek ua, fel uh ka sa thei mahmah hi. Huai ban in EBCC Delhi, Duarka leh EBCC Centre Delhi a Saptuam memberten hon na awlmohna uh thupi ka sa a ka kipak petmah hi.
- Evan. Teacher Upa V Thawnkhopau, G Bualjang

Damlouhna TungA Kipahthugenna
Hun paisa a chithak, chibawk leh khebawk a om in, doctor tampi: Jagun, Margherita, Dibrugarh (Assam) leh Imphal (Manipur) te a kaki etsak nungin leng damsiang theilou in ka om hi. Huchihlai in, thakhat in ka gil hong na a, lum theilou in Tangsa Baptist Churches Association(TBCA) a seppihte leh EBC Missionary-te panlakna in Ali Hospital, Assam a kipawlut in gilpi’ vang, operation ngai chih hon muhkhia uhi.
Hiai thu ka heutupa Mr. G. Thonkhanlian, Principal LHS in muntuam tuam ah honna kapkhiak sak hi. Dorcas Hall a heutute, TBCA heutute, Local saptuamte leh deihsaktu mimal tuamtuam apan sumlepai tampi a huh in ka om uhi. Huaite zang a operation lohchingtaka bawla om in, private Hospital himahleh bat nei hetlou in ni 10 nung in hon discharge uhi, Hallelujah! Hiai ka beidot hun a hon panpih i biak Pathian ban ah thumna leh thilpiak a hon huh tengteng tung ah kipahthu i Khristian Thukizakna tungtawn in ka hon gen hi. Pathian in na hoihna uh a leh tampi in hon thuk leh chih ka thumna uh ahi.

Ka kipak, kei na lainat uh,
-Mr. V. Ginsonthang, Assistant Teacher, Living Hope School,
Nongtham, Arunchal Pradesh, India