1. KHALOH LAK/SUM MUH MASAK PEN PIA:
i) Mr. Tunglut Khamminthang s/o Upa T. Ginzapao, Tribal Colony, Imphal a om in MAHUD Department, Government of Manipur nuai ah Executive Officer, Manipur Municipal Administration Service (MMAS)  mu a a khaloh lak masak pen Pathian gam nasepna ding in a omna Saptuam Tribal Colony ah pia hi.
ii) Mrs Manzen w/o Thuamzahau, Khupzavel Street New Lamka in Dawr bawl a tukum Ja naury 2017 adia a muh masak pente Pathian gam nasepna ding in a om EBCC Pethuel ah pia hi.
iii) Mr Thangsianmang s/o Kaikhanthang, Khominthang Assam Regt. a sem in a khaloh lak masak pen Pathian gam nasepna ding in EBCC Khominthang ah pia hi. Amaute Pathian in vualjawl zel leh chih i deihsak hi. 2. KIPAHTHU GENNA
EBCC Bukpi kipahthu genna: EBCC Bukpi in Pastor Quarters ding a lam uh Pathian panpihna leh Hqtrs leh Saptuam mipi pankhawmna ziak in zoh hita in November 27, 2016 in Rev. S. Vung Minthang, GS, in “Pastor Quarter –cum- Counselling Centre” honna leh latna nei hi. EBCC Bukpi saptuam kipak mahmah ahihman un a kipahna thu uh KTZ tungtawn in taklang uhi. Hiai Quarters Pathian thupina leh Khamangthang tampi matna hong hihtheihna ding in thumpih ni. EBCC Khuanggin kipahthu genna: EBCC Khuanggin in December 16-18, 2016 sung Naupang Chialpina nei ua, hiai hun ah heutupa Khenthang in thu gen a lohching mahmah uhi. EBCC Khuanggin in chialpina toh kisai a thugentu, thumsaktu leh hiai camp adia panlate tengteng tung a kipak mahmah ahihman un KTZ tungtawn in a kipahna thu uh hon taklang uhi. Khristmas leh Kum thak Gift:
EBCC Hiangtam Lamka TBSUC in Church worker & EBC workers amau tualsung saptuam a om a semlelte leh saptuam sung a songnawite (differently abled), Khristmas leh Kum thak gift Rs 2000/- chiat pia uhi. Toupa min phat in om hen.   BETH HARAN HOSTEL
Pulakna: Pathian gam nasepna ah EBC in inkuan ngai poimoh mahmah hi. Huai ziak in,  Saptuam a semtute a sepna mun ua nupa a khamuang leh gahsuah a a om theihna ding ua a tate uh khalam-salam a kepna piak ding hun sawtpi apan a na lunggulh hi. Pathian in hiai i lunggulh uh hon hih buchinsak in Beth Haran Hostel (House of Grace – Numbers 32:36) semtute tate kepna ding Hostel EBC gam Dorcas Veng New Lamka ah hon peta a, Pathian tung ah kipahthu i gen hi. Hostel a Sumsenna dingte:
1. Admission fee including medical (minor case) – Rs. 5, 000/- (Rs. 3,000/- from the workers + Rs. 2,000/- from the Headquarters). Hostel om sung teng a dia khatvei kia Admission fee piak ding.
2. Annual Fee Rs. 1,500/- (Rs. 1,000/- from the workers + Rs. 500/- from the Headquarters).  Hiai pen kum teng a maintenance a zat ding.
3. Mess Fee – fix omlou, khateng in a beizahzah hosteller teng ki thoh zel ding.
4. Vocational training i pat zoh hun chiang in a fee awl a etthak ahi ding.
5. Tulel a sumsen ding dan :
# Admission masa in Semtuten mi khat ah Rs. 4,000/- (admission & Annual Fees) seng ding ua, ahaksat luat ua leh instalment basis a pay bill a cut sak ahi ding.
# Kum nihna apan admission/annual fee in Rs. 1,000/- kia sengta ding uhi. #  Khateng in mi khat ah Mess feee in Rs. 1,000/- apan Rs. 1,500/- vel seng ding ua hisap ahi. Hostel a om dingte selection bawl ding dan:
1. p1, Semtu a postingna mun a tate school kai theina di omloute.
2. p2, Semtu a postingna mun a laizilman tamluat ziak a akitonpih zouloute.
3. p3 High School student hichiahlou mahni a ki-enkoltheita sanggamte toh omkhawm teitei poimohte.
4. p4, Semtu a postingna mun a school kaina ding om himahleh duhthusam loute.
5. p5, Semtute ta hilou poimohsakna tuambik ziak a GB in a recommend-te.
6. Class VI – X student te lak ahi dia, seat om dungzui in unau nih tan omsak duhthusam ahi, special case a om hial leh GB thupukna ah a kinga ding.
7. Student selection BG ten a bawl ding uh. COMPASSION EAST TOH I SEPKHAWMNA
Tulai a India Government vaisaina tuamtuamten Saptuam hon suk-khak bangzah hiam lak ah Compassion East te toh i sepkhawmna leng hon subuai kha hi. Tuate: Dinthar Child Development Centre leh Zion Child Development Centre te hih tawp ahihban ah Compassion East a semtuten February 9, 2017 apan in India hon nuseta ding uhi. India Government vaisai Thumna in phawk jel ni. Ordain Sunna UPA T. TUNZATHON (70)
Upa T. Tunzathon, 1946 in Zenkham Tonsing leh Maichiin te gil a gah goutan 2na ding in Zeikhan khua ah piang hi. Haksatak leh kuhkal tak in Lai ziltou in Mission Compound, Churachandpur ah Cl-X tan zou hi. 1971 kum in BMC Hospital, Alipore ah Nurse zil zou a 1979 kum in RMC (tua RIMS), Imphal ah Staff Nurse join a, ginomtak in 2013 February tan sem in Ward Master in pension hi. 1975 kum in Upa Tonsing Tunkhohau tanu T. Vungngaihniang toh Chingmun khua ah Pastor Haukhothang khut ah dansiangthou in kiteng uh a, gil a gah goutan tapa 2 nei uhi. EBCC Lamphel, a kum bangtan hiam a kizat nung in 1991 Kumsim Khawmpi 43na ah Rev. T. Jam Khothang, E/S tungtawn in Upa Ordination tang hi. EBCC Lamphel ah Local Chairman in November 21, 1995 pan January 8, 2002 sung pang hi. Ginom tak a Toupa Saptuamte a etkol nung in December 11, 2016 in Upa Pahtakna lai sang hi. November 2016 khabul akipan in thagui natna GBS (Guillain-Barre Syndrome) a neih ziak in kha khat leh akim vel a ki-etkol nung in December 15, 2016 in a nna a sep a muan Toupa kiang a tawldam ding in hon paisanta hi. A nutsiat a inkuanpihte Pathian khamuanna ngen in thumsak ni. UPA T. ZAMPU (54)
Upa T. Zampu s/o Tunza chin Tonsing, Sialbu khua ah 1962 in piang hi. Aman pianpih sanggam numei 2 leh pasal 3 nei hi. November 17, 1992 in Nungak Ninglian d/o (L) Suangtun Hangzo tanu toh Saptuam Dan Siangthou in kiteng uhi. 1997 in Songtal ah pem ua, huai ah ahihtheihtan in Saptuam ah panla in Local Committee & Mission Deptt ah a na kizang hi. 2011 kum in New Lamka Khominthang ah pem in, EBCC Khominthang Saptuam ah ama kizat theihna lamlam a kizang in 2015 a EBC Kumsim Khawmpi 67 in Rev. S. Vung Minthang, General Secretary khut ah Upa Ordination hihna tang hi. Tulel in Saptuam ah Local Committee & Mission Committee, Building Committee ah Treasurer in pang hi. Term thak 2017 - 2019 sung ading in TBSUC ah Treasurer dia telching himahleh in-charge la manlou hi. Amah ahihleh sum leh pai a mi muanhuai, mi chitak mahmah ahi. Saptuam in a muanhuaina leh a chihtaknate khelah mahmah kawm in ittak leh ngaina tak in khakhia uhi. A damlouhnate:
Aman damlouhna tuamtuam nei; Zunkhum, Kalna leh Gilpi Vang chihte thuak zoulou in December 19, 2016 dak 9:30pm in a nna a sep a muan Toupan, a sep thaman la ding in tawldamsak ta hi. A nutsiat a inkuanpihte Pathian in Khamuan in ompih zel hen. UPA T LAMENTHANG (71)
Upa T Lamenthang, Lungthul (T) a phamta Pa T Khamthuam leh phamta Nu Chiinkhochingte gil a gah goutan ding in kum 1945 lakvel in piang hi. Pastor H Jamkhothang in 1950 kum a a naupanlai in Baptisma na tangsak hi. Aman 1967 kum in Govt. School ah teacher na nasem pan hi. Nungak Vungsialching (d/o (L) Upa V Khualgou) toh saptuam dansiangthou in Lungthul (T) Biakin ah Pastor  Khoiza chin in kitengsak hi. 1977 kum in Bukpi khua ah ECC Kumsim khawmpi 28veina ah Pastor (L) T. Lalkhogin in Upa Ordination pia hi. 2015 kum a EBC Kumsim khawmpi 67na ah Upa pahtakna lai a nasang ta hi. Pathian saptuamte lak a a sep sung kum 38 kha 10 leh ni 14 ahi hi. Sorkar nasepna toh kisai a sep khakna munte: Singngat Govt. High School, Lanva Model High School, Sawmbung Primary School, Ningthoukhong LP School leh Lanva Model High School ah sem nawn in a pension tan huaimun ah sem hi. SAPTUAM A PANNA/ HIHNATE:
1. LOCAL TOH KISAITE a a panna tuamtuamte: Kum 1967 -1978 sung ECC Lungthul T ah om a huai hun sung in Local Chairman, Secretary leh Finance Secy. na a na len hi. Kum 1980 -1998 sung ECC Singngat ah om a huai hun sung in singngat ah KTP Adviser, Nipi Skul sinsaktu,  Finance Secretary leh Local Chiarman in pang kha hi. Kum 1999- 2011, Sung Hebron New Lamka Saptuam ah om a huai hun sung in Building Committee, Local Treasurer, Vice Chairman TBSUC, Nipi Skul sinsaktu, Plot Committee member, Local Chairman  leh Vice Chairman hihna len hi. 2. DISTRICT/ DIVISION toh kisai a a sepnate:
Kum 1973 -1995 sung in Singngat District/ Division ah YCAR Director, District Secretary, DWC Member, Vice President, Bible Society, Accountant /Office Asst. DWC Chairman, Business Chairman, leh DWC Member te in pang hi.
Kum 2006  – 2011 sung Lamka South Division ah DWC Chairman leh Member in pang hi. 3. HEAD QUARTERS TOH KISAI IN:
1990 – 2014 sung in EBC Head Quarters ah BOT leh Sub Committee tuamtuamte ah dinmun poimoh taktak a na len hi. Hiaite ban ah Bible Society leh Grace Bible College ah Patron member in pang hi. A DAMLOUNA TOH KISAI: April 2016 lak vel apan in zunkhum vei in hiai toh kisai in treatment latou pah a, akallak ah Prostrate lam natna leng treatment bawl kawm jel hi. September kha tawp lak apan in a tha bah hiaihiai kisa in, khe na, leh lung-am in ann duhnate kiam hiaihiai a, October kha in Doctor advice na nuai ah Imphal Hospital ah etkol a om in test chituamtuam hih nung in Delhi a Gangaram Hospital ah sawl a om in huai ah Investigation tuamtuam bawl ahihnung in Doctor ten a lu a bawk om leh a tuap cancer natna om kithehzakta ahihlam mu khia uhi. October 24 in a lu a bawk om pen Gangaram Hospital ah operation kibawl hi. Atuap cancer pen doctor ten chemo khai ding chimahleh ataksa a hatlouhman in khai ngam nailou in November 14, 2016 in Delhi apan innlam a kikem ding in hong pai hi. Inn a bangtan hiam a kikep nung in December 22, 2016, 1:30 Pm in a muan a nung a zuihpa kiang ah hon na tawldam santa hi. Pathian vualjawlna ziak in tapa 1 leh tanu 4 nei a, amaute apan tu 8 melmu man hi. I Upa deihthoh tak in a nutsiat a zi, a tu leh tate ban ah a kep saptuamte thumpih ni.