Convention Book House in laisutna ding a Khawl poimoh mahmah Digital Duplicator, MF9350 kichi Riso Company, a na leikhia hi. 13th August, 2021 in Rev. Paukhanmang Guite, GS in a latna nei in zat pat in om theita hi.
BIAKIN BAWLNA HUHTE TUNG A KIPAHTHU GENNA
EBCC Thanlon in 2012-2014 sung in Biakin lamna a na kinei a, huai hun ah HQ apan Loan la in neih dandan in kidintou zel hi. Dit zoh nailouh omte suktuahna ding in, Munphiah, maitang a nei in, Lamka North leh South Division sung a Saptuamte, Division Office-te kiang ah ka hong dak uhi. Saptuamte’n kamnemtak a honna vaidawn in, sum-le-pai tampi a na hon panpihna uh kipak lua ka hih man un hiai Khristian Thukizakna tungtawn in kipahthu ka hon gen uhi. Tha-le-zung, sum-le-pai na sennate uh Pathian in aleh tampi in hon vualzawl hen.
— Upa V. Sangkhogin, TBSUC, EBCC Thanlon
G MAWNGLIAN BIAKIN HONNA LEH LATNA
Hiai biakin toh kisai 2017 a nasep kipan June 2021 a zousiang in om a, hon pah ding chih himahleh Covid leh Lockdown ziak in kihong pah theilou nilouh hi. Hiai Biakin lamna a sumsen teng 25,32,658.00 ahi a Dorcas Hall, Division leh local contribution-te tungtawn a kibawlkhia ahi. EBCC G. Mawnglian in August 14, 2021 Kiginni in Biakin thak honna Pathian kithuahpihna toh Rev.Paukhanmang Guite, General Secretary EBC in honna leh latna nei in Rev S Vung Minthang, DMn in hasotna thu gen in leh Rev Gin Malsawm DSD in Saptuamte thumsakna nei hi. Hiai hun in LND DS, Rev V Thangkhangin leh LND DWC Chairman apan in thugenna leng om hi. Biakin thak honna Program manphatak in ka zouthei ua kipaklua ka hihman un hiai i thukizakna tungtawn in kipahthu ka hon gen uhi.
— Upa Letkhokam, Local Secretary, EBCC G Mawnglian.
KIPAHTHU GENNA
May 27, 2021 in Mild Stroke in ka damkei a, ka pumpi veilam teng hong buai in tangthei phalou in hun sawtpi inn a kikem in ka om hi. KTZ Thumna Makai ah thumpih ding a hong kitaklang bang in noute leh misiangthou tampite’n na hon thumsaknate uh ziak in ka hong damdeuhta a, ka pumpi veilam teng hong buai in tangthei phalou a om himah leng exercise khawng la in damsiang vilvel hikei mahleng July 29, 2021 apan in Office ka kaithei nawnta hi. Praise The Lord! Noute tung leh hihdamtu Pathian tung ah kipahthu ka hon gen hi. Chidam a Office ka kaizom zel theihna ding in hon na thumpih lai ding in ka hon ngen hi.
— K. Jamchinthang, Head Clerk, EBC Hqtrs/Circulation Manager, KTZ
KIPAHTHU GENNA
EBCC Tuilakjang in hun sawtkuamtak Sound Box leh Mixer neih lunggulh mahmah in ka om ua, himahleh kou hatna a nei zoulou a ka om nung un Pathian in EBCC Bethany apan in Baptist Youth Fellowship (BYF) te tungtawn in ka deih uh hon suktuahsak ding in amau zat lui himahleh kou ading a a thak bangmai, hoih mahmah lai a hong piak man un ka kipak law mahmah uh chih leh amaute tung a kipahthu gen kia sim thamlou in hiai Thukizakna ah leng ka kipahna uh ka hon taklang uhi. Pathian in panpih ngaite panpihthei zel ding a BYF Bethany-te vualzawl hen chih ka thumna uh ahi.
— Upa PK Tuan, Local Secretary, EBCC Tuilakjang
KHALOH LAK MASAKPEN PIA
Unaunu Niangmuankim d/o (L) Doulianthang Vengnuam, Jiribam a om in Chinchpada Christian Hospital, Maharastra State a nurse sem a va om in a khaloh lak masakpen Pathian gam nasepna ding in Tualsung Saptuam EBCC Vengnuam, Jiribam ahon pia hi. Pathian in mailam hun ah a sepna ah midangte ading a vualzawlna hithei zel ding in ompih in makaih leh chih ka deihsakna uh ka lan uhi.
— Upa T Thangthianmuan, Local Secretary TBSUC
EBCC Vengnuam Jiribam
KIPAHTHU GENNA
LRRC-Lamentnamun a khamtheih hih tawpsan dia kikemte panpihna, tualsung saptuam leh memberte apan hong lut zel ziak in, Management Committee leh semtute sik-le- tang in kipahthu ka hon gen hi. July – August kha sung in EBCC- Delhi apan Upa H. Zabiak, Central Delhi apan Upa K.Thangzalun, Kolkata apan Upa N. Khenthang, Aizawl apan Upa Khamkhokam Guite, NLBC apan Upa Chinkhanneng, Bethany apan Upa Biakmuanthang, Hiangtam Lamka apan Upa Ts. Jamkhanthang leh EBCC Moria TBSUC leh BYF apan in inmates panpih leh sponsor-na ding in Rs 18,000.00 (Teng Singkhat leh sang giat geih) hong lut in tuin inmates nih – Luangzakham, EBCC Pearsonmun leh Jamthianmuan, V. Munhoih PCI apante sponsorhip in kikem lel hi. Amaute leh midang kikem a om 19 te’n khamtheih hih hon khawlsan ua Pathian leh a gam adia manphatak a ahong kizat theihna ding un thumna ah delh zui lai ni.
— Upa T. Langsanglian, Secretary LRRC
KIPAHTHU GENNA
Ka zi ittak M Rupeshwori Devi in vangsiathuaitak in kum 2020 in accident huaisetak hon tuak hi, tua accident hon tuah lai in khua leng phawklou, bangmah leng theilou in damdawi inn ICU ah hun sawtttak om hi. Hiai hun lai COVID-19 ziak in Lockdown hun lai leng ahi. Tua bang haksatna ka tuah lai un EBC a u-le-nau kuapeuhmah in nonna thumpih uh kou ading in a man tam mahmah hi. Tuni in noute thumna ziak in ka zi in hinna thak nei bang in ka kikoih uhi. Ka buai leh haksat hun a EBC a heutute anai gamla a om Khrist a u-le-naute kiang ah lungsim tawng apan in kipahthu ka hon gen in noute ading in vualzawlna ka thumna uh ahi gige. Kipak lua ung.
— Evan. M Deba Singh, h/o M Rupeshwori Devi
EBC Manipur Mission Field.