EBCC SUANGDAI BIAKIN HONNA & LATNA:
EBC Headquarters in deihsakna leh awlmohna lian tak toh kou EBCC Suangdai Biakin thak din khiak sakna ding a ka poimoh leh kulte na hon piak ziak un ka kipak mahmah uhi. Hiai Biakin lamna ding toh kisai a EBC Singngat Division D/S leh Office staff-ten naktak a hon na kithuahpihna tung uah kipahthu ka gen uhi. Huai ban in Sum-le-pai kipatna ding neilou a ka om lai un Saptuamte leh mi phatuam ngaite lak a sahbon hong kizuak a hon na leisak siausiaute tung ah leng kipahthu ka hon gen uhi. Huai ban in hiai mun a semtu Headmaster CES in bangkim ahon makaih a Gari a poimoh bang a hon zatsak ziak in lungdam huai kisa mahmah hi. Huai ban in a lawinu Mrs. Lily Mawi in asumtang mahmah in Rs. 10,000.00 hon piak ziak in kipahna sang mahmah hi.
Tarik 30 March 2021 in Rev. S. Vung Minthang Director of Ministries EBC in honna leh Latna hong neih sak, Central Choirte hon tonpih ban in phatna la hongsak man un lungdam mahmah ung. Biakin hon ni a heutupa’n thumanphatak hong piak khiak na tung ah leng kipahhuai ka sa petmah uhi. Hiai hun a Sound System leh poimoh tuamtuam D/S Office staff lamten hon saisak ua, DWC memberte ban in khokim leh kiang a Saptuamten hong uap khiukhe ua, thilpiak thupi taktak hong piak ziak un kipahthu ka hon gen uhi. Khua sung a Saptuam pawl tuamtuam omte ban in khosung hausa makaiten naktak a hong kithuahpih man un lungdam lua in lungdam thu ka hon puak uhi. Biakin thak lopna ding in Local Chairman leh Building Committee Chairman-ten bawng khattuak hon thoh ua, mi tuamtuamten leng hihtheihna lam chiat a thohkhawm leh i pankhawmna ziak in Ankuang kilui zou ahihman in huchibang a pan hon lakpihte tung ah kipahthu ka hon gen nawn uhi.
Hiai Pathian Biakna Inn kihong khia tungtawn in Pathian in thupina leh Pahtawina tengteng tang henla, Saptuam mi leh sate ading in Khalam vualzawlna luan lutna hileh chih ka thum uh ahi.
–Report petu: Evan. V. Tualkhenmang
Local Secretary, EBCC Suangdai.
EBCC BEHIANGJANG BIAKIN THAK HONNA & LATNA:
EBCC Behiangjang Biakin kum 1984 vel a kilam, huai nung khatvei mah leng bawl thak louh a om, kou lah bawl zou lou, bawl tuak sa a ka om lai un EBC Headquarters deihsakna leh awlmohna lian tak ka tang ua ka kipak petmah uhi. EBC HQ deihsakna leh malaksakna toh Biakin thak hoih mahmah kou toh kituak litlet bawlkhiak in a om theita lungdam mahmah ung. HQ in a bawl ding Mistry hon sawl in gin omtak leh muan huai tak in na hong sem ua, khawl lou hial in nasep pai touh a kha khat sung in hon zoh sak ua, na semtute gin omna leh kipiakzohna tung ah leng kipah huai ka sa mahmah uhi.
Division Office a DS leh Office staff-ten leng ahih theihna tan chiang un hon panpih ua, hong enkhia, apoimoh bang HQ. a honna gen sakna tung uah kipahthu ka gen uhi. Huai ban in Behiangjang a Police OC & a team-ten leng phatuamngaitak in Tui ahong supply man un a tung uah kipahthu ka gen uhi. Tarik 19 April 2021 in Rev. Paukhanmang Guite General Secretary EBC in honna leh Latna hong neihsak, Central Choir-ten phatna la hongsak man un lungdam mahmah ung. Biakin honni a Heutupan thumanphatak hong piakkhiakna tung ah leng kipah huai ka sa petmah uhi. D/S leh staff-te ban in DWC member ahi thei dandante leh Suangdoh, G. Bualjang EBCC akipan Biakin honna uap tu hong pai a thil manphatak hong piakna tung uah kipahthu ka gen uhi. Hiai Pathian Biakna Inn kihong khia tungtawn in Pathian in thupina leh Pahtawina tengteng tang henla, Saptuam mi leh sate ading in Khalam vualzawlna luan lutna hileh chih ka thum uh ahi.
–Local Secretary, EBCC Behiangjang