EBC LAMKA NORTH DBYF IN VALPAKOT SUAH BIAL VEHNA NEI:
EBC, Lamka North Division, Division Baptist Youth Fellowship leh Division Choir kigawm in apaisa 20th -21st March, 2021 sung Valpakot Suah Bial a EBC saptuam omte - EBCC G Mawnglian, EBCC Tuitengjang, EBCC B Kaljang-te veh in, saptuam mite toh biakkhawmna hun nuamtak va kinei hi. EBCC Mawnglian leh Kaljang ah Thugentu: Htp B Paubiaksang in zang a, Htp. Lianbiaklunthang in Tuitengjang ah thugenna nei hi. Biakkhawmna hunte ah phatna lapawl leh special number EBC Lamka North Division Choir apat leh Local BYF te apat om hi. Hiai hunte ah TBYF Secretary leh DBYF Secretary apat report leh memberte mellahna om tuaktuak hi. Thilpiakte TBYF phungvuhna ding in kipia hi. Tuailaite programme ahi chilou in biakkhawmna hunte saptuam mipi’n leng hong uap uh a, nuamtuam mahmah hi.
KHALOH LAK MASAKPEN PIA:
Unaupa Tuankhanmung Hangzou s/o (L) Jamzakham Moria, EBCC Pearsonmun in SBI ah sepna Clerk muthak in a khaloh lak masak pen Pathian gam nasepna ding in Moria EBCC Saptuam hon pia hi. Tamsem semkhia a pethei zel ding in Pathian in ompih in a vualzawlna tamsem behlapsak leh chih ka thumna uh ahi.
Unaupa Mr. P Songlianding s/o Thangmawi Lungchin Khua a om in CES Lungchin ah casual teacher in tukum 2021 in sem a, a khaloh lak masak pen apan in a kimkhat, Pathian gam nasepna ding in EBCC Lungchin Saptuam ah hon pia hi. Pathian in amah leh a nasepna ah vualzawl in makaih zel hen.
CHIALPINA ZOHNA REPORT:
Kou EBCC Behiang T, Singngat Division in hunsawtpi a kipan ka lunggulh uleh ka sawm uh, thumna tampi toh pang a, ngen a ka omna uah Pathian in i thumnate hon dawng a Hotdamna Chialpi Date 09-11, April 2021 in nei thei in ka om ua, kipak mahmah in thumnate dawng pa Pathian kiang kipahthu ka gen uhi. Thugentu in Evan. T Damkhothang; thupi in “Na lum leh lum inla, na vot leh vot vanglak in” Kilakna 3:15b. Hiai chialpina tungtawn in Hotdamna kitheitel leh kipiakthakna nei hunkhop om hi. Hiai chialpina hun khosung a om Saptuam tuamtuam a kipan in mipi tampitak inleng hong uap uhi. Thupina tengteng Pathian in tangta hen.
LRRC TRANSITION REPORT
LRRC nasepna government grant-in-aid khawlsan a mahni kitoudelh a nasepna sutzop ding Transition Plan leh Budget 2021-2022 CEC 294th Thupukna 14, dated October 14, 2020 in approval ahon piak dungzui in April 2021 apan in LRRC nasepnate sankhiak vek hita hi. Hiai toh kisai saptuamte theihtuak leh Khamtheih hih leh HIV in asukkhak mite kepna a pantheihna ding omte anuai a bang in ka hon taklang hi.
1. Lametna mun: Tulel in mi 37 kikem in, Saptuam thugin leh Laisiangthou toh kituak a sinsakna, Jesu Khrist Hotdamna tungtawn a Khamtheih leh Khovel saltanna apan suahtakna, khut nasep taihmakna leh nekzonna ching hi ding lametna toh haichi chiin leh vocational activities pat ahi. Hotdamna/Nungzuihna Chialpina khathum hal in Evangelists, Heutute leh Pastor-te zang a neih zel ahi.
Lametnamun apan hoihkhia innkuan vakna dia nasem (Mistry, Workshop, Computer works, Transport, Govt services leh saptuam nasepna) kipawlkhawmna “Core Group” ah tuin member 42 om lel uhi, amauten kha khat in Pathianni khat hun zatkhawmna Lametnamun ah neizel uhi.
2. PLHIVs Care and Support Programme – Hiai programme nuai ah HIV-AIDS in a sukkhak Meithai, Tagah leh daikilkal a khosa mi 70 te khateng in panpihna – (i) Antang Kg 10, (ii) Dal Kg-5, (iii) Nutrela- Kg 1, (iv) Mangan- Kg 1, leh (v) Sathau 1 Ltr kipe zel a, damlouhna pii deuh aneih hun un sum-le-pai in panpihna kipe zel hi. Amauten Amazing Group chi a kipawlkhawm in sum-le-pai zonna nasep lian loulou neizel uhi.
3. Maban sepzom ding- (i) Khamtheih hih kholak a giakten nitak a a belhtheih ding uh nasepna Night Shelter pat dia geel ahi. (ii) Kanni chiinna i gam a hong lutta ahiman in Kanni in mimal, inkuan, khotang, khosakna leh gam leitang adia siatna atutte study/research bawl dia geel ahi. (iii) Saptuam vehna - Saptuam toh kichimat leh thuk zawsem a sepkhawm theihna ding, lametnamun a pawtsan nung tanpha ua saptuamte toh panlak zom theih ding i tup-le-ngim ahi.
LRRC tungtawn a nasepna a pantheihna dingte:
Inmates Sponsor:
1. Admission fee - Rs. 1000, Security Deposit (Refundable) – Rs.1500, Mess Fee – Rs. 3000.P/m
2. Course Khat (Kha thum) sponsorship : Rs. 1000+1500+3000x3 = Rs. 11500.00
PLHIVs Support :
1. PLHIVs C&S Programme nuai a khatvei Doctors ki-etsakna leh damdawi man ding in Rs. 1000.00
2. PLHIVs C&S Prog nuai Mikhat, Khakhat nek leh tak man ding @ Rs. 800.00
LRRC nasepna a akul leh poimoh a zat ding in mahni lemtang bang in pantheih gige ding hi. Akimzaw leh theih beh utten Director SD, EBC (8730978036)/ Coordinator SD/Secy LRRC (9612003428) ah kan theih ding hi.
Panpihna online in leng piak theih gige hi –
Ac no 30236902269 IFSC; SBIN0006182
Lamka Rehabilitation and Research centre.
–Upa T.Langsanglian, Secretary LRRC