Missions Department nuai a Project base ading a huhna kimute:

1. Tualsung Baptist Missions Committee, EBCC Zenhang Lamka in Himalayan Missions Field a Jorethang in guitar a leina ding ua Rs. 9,000/ pia.

2. Division Baptist Missions Committee, Lamka North Division in Himalayan Missions Field a Chisang biakinn bawl tamtak a huhkhit nung ua a poimoh dan uh phawkpih a amaute huhna ding a Rs. 2,20,000/- piak beh uh.

3. Tualsung Baptist Missions Committee, EBCC Mumbai in field neihte kithuahpihna dia field i neihte kithuahpihna ding a Rs. 10,000/ pia.

4. EBCC Chennai in Himalayan Missions Field a Chisang Biakinn lamna ding a Rs. 10,000/-

5. Tualsung Baptist Missions Committee, Moria EBCC, Pearsonmun Manipur Missions Field a biakiin kilamlel omte huhna ding a kithuahpihna Rs. 30,000 pia uh.

6. Pa Zamkhanthang EBCC Bungmual a om in Manipur Mission MEBC Thoubal Khunou a biakin bawlna ding a Project Based tungtawn in Rs. 2500/- EBC Dorcas Hall ah hong pia hi.

7. Miss Niangngaihlian, EBCC Moria Rs 20,000 Jiribam MEBC huhna ding in pia.

8. Miss Niangthianching in EBCC Moria in Rs 5,898, Heisnam Saptuam huhna ding in pia.

HAUSA CAMP 2VEINA ZOH HITA:

Pathian ompihna leh makaihna toh Hausa Camp 2veina 2021 buaina omlou leh lohchingtak a zoh ahih toh kiton in report hiai anuai a bang in ka hon bawl hi:

Hausa Camp 2veina ding in 22-25 March, 2021 sung En-Gedi Retreat Centre, Geljang ah neih in om a, huai camp ah EBC Saptuam sung a hausate kia hilou in Saptuam tuamtuam 13 apan khua hausate leng kichial hi. Chialna lai kipia hausa 83 lak ah camp hong lut hausa 34 pha uhi.
Camp thupi ding in “Nang leh na innkuanpih tengteng long ah lut un” Genesi 7:1 apan kila hi. Thugenpi in Rev. S. Vung Minthang, Dir.(MN) leh Rev. K. Kamchinkhup, Dir.(MS) pang uh a, thu kisinsakna (seminar) Rev. Paukhanmang Guite, GS leh Rev. Gin Malsawm, Dir.(SD) in hon neihpih uhi. Counselor in Evan. T. Damkhothang, Evan. Lianding Guite leh Evan. N. Thangsuanpau pang uhi.
Medical care hon etkaisak ding in Dr. T. Nengkhanmang kichial a, aman van poimoh teng hon kaihkhawmsak ban ah, camp hun sung a hong panpih ding in Lia Niangnunhoih, B. Sc (Nursing) hon seh sak a, aman leng phatuamngaih hon suah in, camp hun sung hong giaklut a, kipahhuai in, nuam tuam mahmah hi.
March 22, 2021 4:00pm in camp kilut a, dak 6:30pm in camp honna Upa D. Biakmuanthang, Camp Director in nei hi. Camp sung in thugenna hunpi 8 vei kizang a, seminar hun 2 kila hi. Camp neih sung in EBCC Hebron biakin ah Upa L. Velson makaihna in thumna hun kizang tou thei a, kipahhuai mahmah hi. March 25, 2021 sun dak 12:00 in camp khakna Rev. S. Vung Minthang, Dir.(MN) in nei a, camp zat zoh ahi.
Camp hunsung in Lamka South Division in theitui (shark) leh dry fruit hong pia ua, Lamka North Division in Lassi dawn ding tam khoptak hong pia uhi.
Camper-te zat ding mattress hon khelsakte: 2 Assam Rifles, Manipur Mission Field, Grace Bible College, Beth Haran Hostel leh Jubilee Guest House apan mattress 74 khelhsak in ki-om a, kipahhuai sa in, thilpiak hong pete leh mattress hon khelsakte tung ah committee in kipahna chiamteh hi.
Muhdan tangpi: Tutung camp ah hausa bangzah hiam in khalam a kipahna thak ngah hi ua theih ahi. A tangpi in hausa camp neih zel tuak kisa hi. Hausate leng kithalop mahmah ua muh ahi. Camp tawpni in Pu L. Khaikholian Haokip, Gelzang hausa in Gelzang Resort free in etpihna hon nei a, huai mun ah zing ann leng kine ngal hi.

Toupa’n thupina tengteng tangta hen.