KHA KHAT LOH PATHIAN GAM NASEPNA DING IN PIA:

Mr. Kaikhenthang s/o (L) Daipau, tulel a CRPF 140 Bn Ambasa (Tripura State) a sem in Pathian vualzawlna tang a Sub-Inspector a promotion a ngahna ziak a kipahthu genna in a kha khat loh Pathian gam nasepna ding in Lamka South Division DS tungtawn in EBC Hqtr. ah pia hi. Pathian in a sepna ah ompih in makaih zel hen chih i deihsak hi.

Unaunu Manngaihlian d/o T/Upa K Thangsiam, Suangdoh, Singngat Division a om in a khaloh lak masak penpen Toupa Gam Nasepna ding in TBSUC/EBCC Suangdoh ah pekhia hi. Toupa’n aleh tampi’n vualzawl leh chih Saptuamte’ deihsakna leh thumna ahi

WATER COOLER KHAT PIA:
Pa N. Tunson leh a inkuanten EBCC Aizawl, Tlangnuam biakin mun a zat ding in Water Cooler khat pia ua, Local Pastor in latna nei hi. Hiai bang a saptuam mi kiphal omzelte ziak in kipahthu i gen hi. Petute leh zangtute Pathian in ompih in vualzawl zel hen.

BAPTIST WORLD ALLIANCE SUNG THU
Beth Hayworth Echols, Baptist World Alliance (BWA) Women’s Department a Director lui in December 10, 2020 in a tenna inn mun McLean, Virginia, USA, ah thupina gam hon na paisan hi amah kum 96 a upa ahi. 1924 in piang hi. Naupang chik ahih apan gamdang a missionary kuan ding a ut gige ahi. Laizilna lam a a graduate nung inleng tua bang a kuan theihna ding kong kihong a muh louh chiang in Women’s Missionary Union Training School Kentucky ah maban sunzom in kum 1949 in Bachelor of Religious Education zoukhia hi. Tua nung in Baptist-te kipawlkhawmna ah tel in innkim leh mundangte a Pathian nasepna ah kihel hi. Kum tamtak BWA Women’s Department ah sem in tua a sepna a khawl nung in innmun pansan in ama hihtheih khomkhom in Pathian gam nasepna a kihel tou den ahi.

Baptist World Alliance (BWA) in Horizons Children and Youth Ministry Training Initiative ading a gamdang a pan a khantouhna leh masawnna a khan hatluat ziak in member thum guan beh uhi. Amaute: Koffi Soké Kpomgbe in Area Director, BWA Horizons Africa, mohpuakna len a; Baptist John Jaya Prakash in India a Telangana Region ading in Area Director mohpuakna len a, Aruna Priya in BWA Horizons Registrar leh Administration Support mohpuakna len hi.