Upa Lian Naulak Kolkata a om in a Car zatlai Wagon R, Pathian min in EBCC Kolkatta a Local Pastor Khamzalam kiang ah Date 18-01-2021 in pia hi. Upa pan a genna ah “Hi chia ka zuak mai sang in Pastor in Amah mimal a Pathian gam nasepna adia a zat din chi a ka gari piak pen Missionary nasem dia sawl bang in ka kingai” chi hi. Petu leh dongtu Pathian in vualzawl chiat hen.
KIPAHTHU GENNA
‘LOCKGET LINK’ chi a kiminlohten kou Bungpilon EBCC Saptuamte ading in Christmas 2020 thupi, Kumthak 2021 thupi, Saptuam Kum thupi leh thupi khennennate computer a hon sutsak ua, tua kia hilou in Biakin Kemtu loh (Pay) ding 2021 sung hon piaksak ding chia hon gen man un ka kipak law mahmah uhi. Tua bang a pawl kibawlten Saptuam hon itna uh leh awlmohnate uh thupi ka sa mahmah ua, hiai KTZ tungtawn in ka kipahna uh ka hon taklang uhi. Pathian in tamsem in vualzawl hen.
–L/Upa Tuanzatuang
Local Secretary, EBCC Bungpilon
KHALOH LAK MASAKPEN PIA:
Unaupa James Hausonlian Shoute s/o S Thangsanglian Kanaan veng New Lamka a om in a sepna Assam Regiment, Indian Army a a sep nung a khaloh lak masakpen Pathian gam nasepna ding in EBCC Kanaan Saptuam kiang ah pia hi. Amah tulel in Shillong a om lel ahi. Pathian in amah a sepna ah vualzawl in makaih zel hen.
BAPTIST WORLD ALLIANCE SUNG THU
Baptist World Aid (BWAid) a Director thak ding in, Rev. Marsha Scipio guangthak uhi, aman February 01 apan in office kai panta a mohpuakna pipen ahihleh Baptist inkuan sung a huh ngai, panpih ngai leh khotang kidopkangna ding a panpihna piak leh etkai ahi. Amah America Simlam a khua Trinidad leh Tobago khua a piang in USA a khanglian ahi. Aman Trinidad and Tobago Ministry of Education nuai ah panpihna (Internship) in ana sem masa in United States Department of Justice – Civil Rights Division ah leng ana sem ngei ahi.
Rev. Doyle Sager (69) December 31, 1951 in Bethany, Missouri, ah piang hi. A Pa Norlin Max leh a Nu Barbara Ellen (Hedges) Sager ahi. April 14, 1972 in Doyle Janet Summa, kichi toh kiteng uhi. A sihni tan in BWA Commission on Creation Care a Vice Chair len lel Baptist inkuan ading a mi muanhuai leh zat mahmah ahi. Himahleh January 22, 2021 in Pathian thupina koppih ding in a tangtawn mun ding ah hon paisan ta hi. Aman ta 3, Tamara Everly (Tim), Kristen Sager (Zach McCall), leh Joel Sager (Zoe Hawk); tu 8 te mel mu in ana tawldam ta hi.