STAFF QUARTER LEH SMART CLASS ROOM HONNA
Grace Bible College in tuni dated January 6, 2021 sun dak 12 in College campus sung a staff quarter leh smart class room ding honna leh Pathian kiang a latna EBC General Secretary Rev. Paukhanmang Guite in nei hi. Hiai smart class room EBC khangthu adia amasapen leng ahih toh manpha diak hi. Hiai bang thil manpha leh thupi college in i neihna tung ah kipah huai kisa a i biak Pathian kiang thupina i pia ahi. Manphatak a hong kizat leng i deihsak ahi.

LAMETNAMUN RECOVERING EX-INMATE TE TOH FELLOWSHIP PROGRAMME
LRRC in Lametnamun apan khamtheih khawlsan recovering inmate te toh Fellowship programme December 16, 2020 sun dak 11 apan Lametnamun ah nei uhi. Lametnamun apan hoihkhia adamlai mi 63 lak ah 34 kihel thei ua amaute kum 30 khamtheih khawlsan apan a kha a sim khawlsanta te hi uhi. Amaute apan sharing ngaihkhiakna leh Rev Ginmalsawm Director SD, EBC in hanthawnna leh thumsakna nei in kipahpihna thilpiak leng pia uhi. Lametnamun apan hoihkhia mi 63 te atamzaw Lamka apan hi ua, Singngat leh Thanlon division, Chandel, Ukhrul, Imphal West leh Mizoram apan leng om uhi. Hiai hun a tel theilou mundang a omte apan message simkhiakna leng om hi. Amaute sepna leh siamsinna lam tuam tuam- Govt- Military, Police & Civil, Pvt Company, mimal sumdawnna, gari leh steel workshop, computer works, church leh para church organization a sem leh niteng thaloh a nasem ban ah Laisiangthou zil leng om uhi.

SAPTUAM A SEMTU THAK KILATE:
Saptuam in department leh nna poimoh tuamtuam a semtu ding regular leh contract basis in mi 9 te lak thak ahi:

Amaute leh ahihnate uh:

Regular ding in:-

1. S Ginsuanmang s/o S Nengzadam of Pethuel, LDA/Jr. Acct
2. T Pumdoulian s/o Upa T Ginzathang of Kanaan, Chowkidar/Grade IV
3. P Kaizalam s/o Upa P Thangsuanhau of Khuangkhai, Evan. Teacher III
4. G Lian Vunghsut s/o Upa Thangkhanlam of Bethany, Evan. Teacher III

Contract Basis ding in:-
1. G Pumdouthang S/o (L)Upa G Zamkhopau of Mata, LDA/Jr. Acct
2. V Khupsonmuan s/o V Liankhopum of Paite Veng, Multi tasking
3. G Thuambiaklun s/o Upa G Doulianmang of Kanaan, Multi tasking
4. Lian Itmuan Tunglut s/o T Laltuakmawi of Khominthang, Multi tasking
5. M Thangzamang s/o M Zenmuan of Pethuel Multi tasking
6. Mr. Haukhansang s/o (L) Ngulkholal of G Mualkawi, Toilet Complex enkoltu

STAFF QUARTER HONNA LEH LATNA
Kou EBCC D Leikot in Staff quarter ding khat poimoh tak a ka omlai un, koumau neihsa sum tawmchik a kipan in nasep ka pat lai un i Division a DS leh DWC te leh Dorcas a heutute deihsakna toh, Quarter kilam in date December 20, 2020 in Pathian min a latna leh honna Director SD Rev Gin Malsawm leh DS Rev L Khaikhansong te’n hong neihsak uhi. Heutute deihsakna leh i thumna te leh mipi pankhawmna ziak a semi pucca a kilam staff quarter thak khat kinei ahihman in kipahna hiai KTZ tungtawn in ka hon taklang uhi. Thupina tengteng Pathian in tang hen.
–Upa S Haukhanthang
Secretary TBSUC, EBCC D Leikot

SCHOOL BUILDING THAK HONNA
EBC Lamjang School committee in School building bawlthak ding chi a ground breaking Rev. L. Khaikhansong DS Lamka South in nisim 19-10-2020 a neih ahi. Division leh Headquarters panpihna toh October 20-2020 apan a bawl uh ni 56 sung a bawl nung un Pathian panpihna toh zou thei in Nisim 10-01-2021 Zing dak 7:30 in Heutupa Rev. S. Gin Malsawm, Director of Social Development in Pathian min a honna leh latna nei hi. Saptuam kepna kahiang poimohtak, salam leh khalam a kikepna School hon awlmoh Division leh Headquarter a i Heutute tung ua kipak law peetmah uh ahihdan School Headmaster K. Paulianthang apan thutut kingah hi.

KHRISTMAS GIFT PIAKNA NEI:
EBCC Mission Compound Jiribam Saptuam a kahiang poimoh mahmah Missions Committee in Unaupa Robindro Meeitei of Jiribam te inkuan vehna leh Christmas thilpiak dan in Committee in antang bag 1 leh a sumtang in Rs 1000 piakna va nei uhi. Hiai bang a na hoihsep pen etton tham leh kipah huai mahmah leh itna toh Khrist min a kalsuanna hiai Khristian Thukizakna tungtawn in i taklang uhi.