EBC KUMSIM KHAWMPI 72NA 2020 ZATZOH HITA
EBC in Kumsim Khawmpi 72na December 04-05, 2020 sung centenary hall ah vaihawmna leh khawmpi sai ding ceremony khenkhat te SOP guidelines zui in lohching tak in zou hi. Tutung khawmpi in Covid-19 Pandemic ziak in Government in zuih ding a dante bawl SOP zuih kul ahihman in Palai 200 khenglou ding a khawmpi neih ahi. Khawmpi palai paikhawm thei teng 183, kingen zah 6 palai absent 11 pha hi.
Khawmpi honna Rev Paukhanmang Guite General Secretary in dak 10:30 Am in nei hi. Khawmpi nimasa in palai hon paisan Semtu/Pensioner mi 11 leh Upa Ordained 13 te suunna hun neih ahi.
Kumnawn Khawmpi 73na Khawmpi Ulian ding telching a omte hiai bang ahi: Business Chairman Upa Dr. J Son Go Kham, Business Vice Chairman Upa Nengkhajam, Recording Secretary Upa N Lalzagou, Asst.Recording Secretary Upa N Chinsum te ahi. CEC 2021-2023 vaipaw ding mi 12 kitelna a telching a omte hiai bang ahi: Upa D Biakmuanthang, Upa V Daikhansuan, Upa M Darneingam, Upa V Ginchinpau, Upa M Ginzalian, Upa Joel G Hangzo, Upa Lalthanghlun Guite, Upa Dr. N Lalzagou, Upa Dr. T Nengkhanmang, Upa Nengkhojam, Upa Dr. J Son Go Kham, Upa K Vungzamawi. Khawmpi in kumnawn Annual Budget Ceiling ding in 23, 87, 50,000/- (Kumlui budget apan khansakna General account ah 5% leh Missions account ah 10% ahi. GBC Budget ding in 1, 73, 90,000/- pomna leng neih ahi. Hiai toh kiton in Semtute, Pensioners, leh Pension paisawnte DA 5% April 1, 2021 apat piak ding a thupuk ahi tua toh kiton mah in Contract Worker te basic apan 10% in April 1,2021 apat piak dia thupuk ahi.
Missions nasepna ding a thilpiak peuhmah (Missions toh kisai) EBC Hqtr. a sun a 10% local kietkolna dia piak ding thupuk ahi. Lamka South Division seh nih suah hihen chih thupukna lak ahihtoh kiton in CEC in Khawmpi 73na 2021, a pom theih ding a hon en zui ding a mohpuakna piak ahi. Hiai khawmpi hunsung mah in Upa mi 21te kiang ah leh semtu pension mi 8 te kiang ah meritorious certificate piak ahi. Tutung khawmpi in Upa mi 11te ordain piak ahi uh.
BYF MIMBUNG IN GOLDEN JUBILEE LOPN NEI
BYF Mimbung in November 22, 2020 ni’n EBCC Mimbung a BYF kipatkhiak kum 50 chinna, “Golden Jubilee (1970 - 2020)” programme zang ua, Rev. Dr. V. Ginsianthang DS EBC Mizoram in Jubilee Suangphuh honna leh latna nei in Jubilee message genna nei a, sehtuam mi 50 te’n Jubilee dak khen in Pastor Dr. Suankhanhau Gualnam in BYF Mimbung makai honna paisantate suunna leh a innkuante uh adia thumsakna makaih hi.
EBCC KAIHLAM IN SAPTUAM KUM 100 CHINNA CENTENARY LOPNA NEI
EBCC Kaihlam in kum 100 chinna Centenary Dec. 15-17, 2020 in lopna programme nei uhi. Centenary Suangphuh honna leh latna, thugenna Rev. Paukhanmang Guite GS in nei a, Souvenir honna leh thugenna Rev N Thawndoulian DS EBC Singngat inleng nei hi. Pathian hoihna ziak a Saptuam in programme a bawl bangbang lohching leh manpha tak in kizou thei, Toupa kia in thupina tang hen.
CMSC TUNGTAWN IN PATHIAN NGAIHLA TE MOBILE APPS A BAWL IN OM
Central Music Sub-Committee in Pathian Ngaih La Audio recording a bawl uh lamzang leh lohchingtak in zouta uhi. Hiai toh kisai tunung zek in Mobile Apps in hon kikoih khe ding, tua ding in pan la lel uhi. Hiai Apps hong om chiang in Biakna la kia hilou in Pathian Ngaih La le a audio leh a thu mobile tungtawn in ngaihkhiak theih ta ding hi.
MISSIONS-TUAILAI IN SEKBUK PROGRAM NEI
Missions-Tuailai 2020 vaisaina in December 06, 2020 zinglam dak 10:30 Am in Gospel Centenary Hall ah Team Antiok leh Magazine Board in kidemna asai short video Clip leh Essay/thugelh leh Painting/Art kidemna te kipahman hawmkhiakna nei uhi. Hiai hun a kipahman te la lou te’n DS office Lamka South ah lak theih gige ding in kikoih, ban ah tuni tan a MT-2020 nasep te report leh maban kalsuanna ding a hanthawnna programme hun zang uhi.
KHALOH LAK MASAKPEN PIA
Unaupa Langchinson Phaipi s/o P Nangkhanlian of 14-Zellang Veng in SO PWD Churachandpur in a sepna a muh huai khaloh lak masak pen Missions nasepna ding in pia hi. Hiai bang a tuailai kipe zoutak ziak in Toupa kia in thupina tang henla, a sepna ah vualzawl in makaih jel hen.