Songtal Local Pastor Quarter zoh hita:

EBCC Songtal in Pastor Quarter ding luahtheih ding a zoh ahih toh kiton in date 26th July 2020 in Honna leh Latna Rev N Thawndoulian DS Singngat Division in nei hi. Hiai Pastor Quarter lamna ding a kithuahpihna lam tuamtuam a kimute ziak leh Pathian hon makaihna ziak liauliau ahihman in KTZ tungtawn in kipahthu ka hon gen uhi. Na sennate uh aleh tampi in i Toupa Pathian in hon vualzawl chiat henla, midang panpih ngaite panpih thei zel ding in a vualzawlna toh hon makaih in hon ompih tawntung hen chih ka thumna uh ahi. Thupina Toupa kia in tang hen.
– Upa H Khamzadou
Local Secretary, EBCC Songtal

Thanlon Pastor Quarter zoh hita:

EBCC Thanlon in Pastor Quarter ding kum 2 phial bang ka na buaipih nung un, luahtheih ding in lamzoh a hong om toh kiton in July 31, 2020 in Rev M Zalian DS Thanlon Division in honna leh latna nei in Pastor in luahta hi. Hiai Pastor Quarter lamna ding a kithuahpihna lam tuamtuam a kimute ziak leh Pathian hon makaihna ziak liauliau ahihman in KTZ tungtawn in kipahthu ka hon gen uhi. Hiai Quarter hon ni leh lat ni in mipi’n alopna ding in ann kinekhawm hi. Na sennate uh aleh tampi in i Toupa Pathian in hon vualzawl chiat henla, midang panpih ngaite panpih thei zel ding in a vualzawlna toh hon makaih in hon ompih tawntung hen chih ka thumna uh ahi. Thupina Toupa kia in tang hen.
– Upa V Sangkhogin
Secretary TBSUC, EBCC Thanlon

DS tungtawn in panpihna pia uh:

EBCC G Bualjang in amau Division sung a relief ading in leh kuahiam inkuan tulai khovel natna hileng leh lockdown ziak a suansam leh haksa bang om khakleh chih khualna in a Local sung akipan in Division ah antang bag 6 date August 02, 2020 in Local Pastor leh Committee in DS kiang ah piakkhiakna nei uhi. Hiai bang thil thupitak semkhia Local Saptuam EBCC G Bualjang leh a dongkha inkuan leh mimalte Pathian in a tamsem in vualzawl hen.

Panpihna muh ziak a kipahthu genna:
Kou EBCC T Khuangkhai in Saptuam ading leh Biakin a ka poimoh mahmah uh hon theihpih in EBCC Vengnuam in Tutna, Pava Nou, Sound Box leh Pulpit a hon piak man un Saptuamte kipak petmah in hiai KTZ tungtawn in kipahthu ka hon gen uhi. Hiai bang a Saptuam lianzaw in a neuzawte huhna leh panpihna hon piakte uh tungtawn in Pathian in thupina tang henla, tuabang bawl thei zel ding in Pathian vualzawlna in hon petu Saptuamte ompih tawntung hen.
– Upa S Pumzatawn
Secretary TBSUC,
EBCC T Khuangkhai LND

Khaloh lak masakpen mission thohlawm ah pia uh:
Miss Chingbiakmawi d/o (L) Damdawl, Dorcas Veng, New Lamka a om in a sepna apan khaloh lak masakpen mission nasepna a zat ding in pia hi. Mr. T Dongthanlian s/o T Nengkhansuan, Dorcas Veng in Ministry of Home, Govt. of India, Subsidiary Intelligence Bureau Department a security Assistant Executive a sepna a muhna apan khaloh lak masakpen Khamangthangte itna ziak a Pathian gam nasepna ding in TBMC khut ah pia hi. Mr. S. Suanmang s/o (L) Upa Jamkhanlam of Kanan, New Lamka in Indian Army a sepna muthak, a khaloh lak masakpen Missionary nasepna din TBMC khut ah pia hi. Vualzawlna petu Pathian kiang a kipahthu genna leh mission nasepna awlmohna tuailaite’n a neihtheih zelte uh kipahhuai i sa hi.

Local Pastor zat ding in Gari pia:
Upa Tunkhansong, New Lane Bungmual a om in Gari (Two wheeler) aman a zatlai condition hoih mahmah Saptuam kemtu Pastor H Kamzachin zat ding in pia hi. Pathian nasepna hatsem ding leh lohchingtak a septheihna ding lunggulhna a semtute tung a deihsakna sunbuak a om thupi mahmah hi. Pathian in a zangtu leh petu vualzawl hen.