BIAKIN THAK ZIAK A KIPAHTHU:
EBCC Phaisan LND in Biakin thak bawlna ding ground breaking April 28, 2019 in Rev V Thangkhangin DS in nei hi. September 5, 2019 in Division leh Headquarters huhna toh biakin bawl kipan uhi. October 17, 2019 in Biakin bawl zousiang pah uhi. October 29, 2019 in Biakin honna leh latna Rev S Vungminthang DM in nei hi. Khosung mipi kipak lua in ankuang luina nei in lawm uhi. Hiai hun ah mimal leh pawl min a deihsakna thilpiak petute leh Pathian pina lamdangtakte ziak in kipahthu ka hon gen uhi.– Upa V Thawnkhopau, Local Secretary
VAAL VENG KIPAHTHU:
EBCC Vaal veng in hotdamna camp a zat ding panpihna ankuang Nov. 1, 2019 a asai uh; ankuang va umsak a panpihna petute tengteng tung ah kipak petmah in kipahthu gen uhi. Amau January 7-11, 2020 sung Engedi Retreat Center Gelzang ah camp neih sawm uhi.– Upa Jamkhanpau, Secretary
STAFF QUARTER HONNA LEH LATNA:
Bukpi Bethel a CES Quarter lam zoh ahih toh kiton in Rev M Zalian Guite DS Thanlon Division in Sept. 30, 2019 in Pathian min a honna leh latna nei hi. Headmaster in 30th October in luah theita hi. Quarter poimoh mahmah suktuah theih ding leh zat theih ding a omte ahihziak in Pathian in thupina tengteng tangta hen.– Upa N Khamkhodal, Local Chairman
HIMALAYA MISSIONS FIELD VEH UH:
EBCC Kanaan Tualsung Baptist Missions Committee in October 7-12, 2019 sung in Himalayan Missions Field vehna va nei uhi. Hiai hun in Field sung a Saptuam 13 Buttabare, Birtamode, Budhabare, Chisang, Shantinagar, Pathari, Kirtipur, Damak, Basbare, Dharampur, Padajingi, Madangachi, Haldibari vehna va nei ua, thilpiak leh thumsakna nei zel uhi. Saptuam hichi bang a Field tuamtuam veh thei zelzel i om man in kipahhuai hi. Pathian in vehtu leh veh a omte a vualzawlna tamsem in hon vuk hen.– Upa Khoikhanpau, Local Secretary
KHALOH LAK MASAKPEN PIA UH:
Mr. T Thangkhankhual s/o Upa T Khamzalam, EBCC Pethuel in Mizoram Cooperative Bank ah sepna muthak a, a khaloh lak masakpen Pathian gam nasepna ding in Saptuam ah pia hi. Miss Ningngaihching d/o H. Langkhanmang, EBCC Pethuel in VMMC & Safdarjung Hospital, New Delhi ah Nursing Officer sepna muthak a, a khaloh lak masakpen Pathian gam nasepna ding in Saptuam ah pia hi. Pathian min thupina ding in i taklang hi, maban ah Toupan vualzawl zel hen.
COUPLE CAMP LOHCHING:
October 31-Nov 3, 2019 sung SVD House, New Airport Road, Guwahati ah Missionary Couple Camp lohchingtak in kizou hi. Open Door Ministry, Lynda Pauli leh a seppihte sponsore hi a, Resource Person in Rev Dr Ginneithang, Mrs Ningkhanching, Rev Lohit Basumatary, Sister Nyeamphe leh Mrs Lynda Pauli pang uhi. Missionary nupa kigawm 60 bang paikhawm ua, EBC mission fieldte akipan in Missionary kop 7 leh naupang 4 kihelkha thei uhi. Camp a telte apan in manpha leh phatuam mahmah ahihdan report kiza hi. Hun paisa ah leng Lynda Pauli-te sponsored na in CBCNEI, Guwahati ah EBC Missionary numeite leh Missionary-te zite camp lohchingtak in ana kineita hi. Hiai bang semkhethei zel ding in Toupa Pathian in Lynda Pauli leh a ministry ompih in makaih zel hen.
WEC MISSIONARY MYANMAR LUT:
Worldwide Evangelisation for Christ (WEC) tungtawn a Myanmar a missionary a kuan Miss Angela Hauzel d/o H. Nengkhanpau, EBCC Lamphel sawlkhiakna leh Pathian vualzawlna ngetsakna November 15, 2019 in Conference Room, Dorcas Hall ah neih in om hi. Kipahthu gen in, thumna in delhzui zel ni.