Amasa in Gammial Aw Simtute tengteng i Toupa leh Hondampa Jesu Khrist min in chibai aw. Toupa’n i thumnate leh thilpiakte tungtawn a Mission Fieldte a thil thupi honmuhsakte enkhawm nawn ni.

A. HIMALAYAN MISSION FIELD
1. DIRECTOR OF MISSIONS IN FIELD VEHNA NEI:
Director of Missions leh Missions Coordinator te’n March 30 apan April 04, 2019 sung Field vehna nei uhi. March 29 in Lamka apan Bhuttabari mun a Field Office nitaklam dak 03:30 PM vel in tung ua, tua nitak in Bhuttabari EBCC biakin ah kikhopna hun zang uhi. Director of Missions in thutak genna hun zang a, kikhop zoh in mipin ann nekkhawmna nei uhi. Hiai hun ah Siliguri a om Eimi Fellowship ten leng uap ua, nuamtuam sa mahmah uhi.
March 30, 2019 in Sikkim station a semtute vehna nei in amaute toh houlim khawmna manpha tak in va zangkhawm thei uhi. March 31, 2019 zing biakna kikhop Takuthang EBC Saptuam ah zang ua, Coordinator in chibaibukna hunkhat zang a, Director of Missions in thutak genna hun zang hi.
April 01, 2019 in Nepal phaizang a station leh semtute omna mun 5; Budhabare, Dharampur, Padajungi, Damak leh Itahari vehna nei uhi. Biakin mun ah semtu leh gingtute mu in, semtute quarters pha in semtute adia thumsakna hun leng zang ngal ua, April 02, 2019 in Field Sub-office, Birtamode ah semtu tengteng toh seminar hun zangkhawm uhi. Hiai hun in Director of Missions in Indigenization Church toh kisai i Field dinmun leh Christian discipleship sinsakna hun manpha tak neih pih hi.
April 03, 2019 sung Nepal tangdawn lam a station 3; Ilam, Phidim leh Gopetar vehna nei nawn uhi. Hiai hun in Phidim a saptuam gam lei ding velna leh amun a kipahthu genna thumna nei uhi. Director in hichi bang a field veh a ava kalsuanna ah field te kipak mahmah uhi.

2. KIPAHTHU GENNA LEH THUMNA DINGTE:
1. March 2019 kha sung in Pathian in Gingthak mi 14 leh Baptisna tang mi 5 a hon piakte ziak in Pathian kiang ah kipahthu gen ni. Khalam a hong khanlet zel theihna ding un thum zom lai ni.
2. Lamka South Division a Missions Committee in Field Office leh Quarters van leina ding leh Field sung a damloute vehna ding a piak ziak un amaute tung ah kipahthu i gen a, tuabang semthei zel ding in Pathian in amaute vualzawl leh i chi ahi.
3. EBCC Bangalore in Mission field adia Two-Wheeler project a neih uh sepsuahna in Rs. 80,000 /- Dorcas Hall tawn in pia ua, heutute deihna bang in Sikkim a zat ding a gel ahi. Toupa’n thupina tang hen aw !!
4. Grace Bible College a kai, Mr. Prakash Shiwa in May 2019 in B. Th zouta ding hi. I thumnate gah ahihman in kipahna liandiak hi. Hiai tan honpi Pathian kiang ah kipahthu gen ni.
5. May 12 – 24, 2019 sung Ektin Nepal EBCC ah Basic Bible School neih hiding. Sintu ding, sinsaktu dingte leh a poimoh sum leh tha senna dingte ah Pathian piina ngen ni.

B. KARBI ANGLONG MISSION FIELD:
1. THU TUAMTUAM:
1) Fellowship thak honna leh biakin mun ding latna: March 03, 2019 in Paklongkam area a Engti khua ah Dikrutso Fellowship thak Pastor Joel Hanse in honna nei in Biakin lamna ding mun ground breaking leng nei ngal hi. Hiai adin FWC in Rs. 1500/-, Holy Bible 1 leh Labu 10 kipahna etsakna in Pastor khut ah pia hi. Tuaban ah, EBCC Paklongkam Biakin mun ding Pu Bidyaram Ronghangte innkuan in apiak uh March 10, 2019 zingkal in Rev. N. Tuang Lang, Field Superintendent in ground breaking nei a, nasep pat hita hi. Hiai ahih leh Lamka North Division Mission Committee in project a alak uh ahi a, kipahhuai i sa mahmah hi.
2) School Building honna leh latna: Grace English School Rongchingri, Diphu a FWC te malakna a school building extension zohsiang hinaikei mahleh zat a poimoh ziak in March 2, 2019 in Rev. N Tuang Lang, Field Superintendent in honna leh latna nei hi. Programme zoh ahih in school staff te toh kipahna singpi dawnkhawm uhi. New Langrik CES leng naupang tampi kibehlap ahihman a building extension abawl uh zoh ahih toh kiton in March 9, 2019 in Field Superintendent in honna leh latna nei hi.
3) Itna thilpiak kimu: EBCC Delhi apan Jubilee T-Shirt, Field Superintendent tungtawn in KAEBC Workerte’n itna thilpiak dong uh a, kipak mahmah uhi. Tua ban ah, saptuam tuamtuam akipan huhna tuamtuam a donte uh ziak in field in kipahthu gen hi.
4) Local saptuam vehna: Rongchingri EBCC in Year plan 2019 sepsuahna masapen ding in 5Km Lumding road Fellowship vehna nei uhi. Pathian thu ah hasawtna nei in hun nuamtak in vazang uhi. Tua ban ah, March 9-10, 2019 in Field Superintendent leh Assistant Field Superintendent in amasapen ding in Paklongkam EBCC official visit va nei uhi. Pathian ompihna toh hun manphatak vazang khawm uhi.
5) Field Exposure-te a pan hamphatna: Field exposure dia Director of Ministries in a sawl evangelist thumte Field Superintendent makaihna in Field Office ah Area Pastorte toh kimuhkhawmna om a, Field sung ah lut ngal in school, vehna leh chialpina ah kizang pah uhi. March 8-10 sung, EBCC Tari Adong ah Hotdamna Chialpina om a huai ah Evan. Robinson Teron, Harthang Hanse leh Pastor candidate ten hunpi vatang ua, mi 31 in hotdamna kitheihchetna nei uhi. March 22-24 sung, EBCC Bithilangso ah Hotdamna chialpi om nawn a, huai ah Pastor candidate 3te’n Pathian thutak genna nei in, mi 37 vel in hotdamna kitheihchetna nei uhi. Pastor candidate te ziak in field te kipak mahmah uhi. Thupi na om tengteng Pathian i pia hi.
6) Gingtu leh Baptisna tang ding kibehlap: Dengaon area a om Photani Teron khuate Khristian mudah leh kho hausapa leng Dengaon a biakin kibawl lai a doudaltu a napang himahleh Saptuamte thumna Pathian in hon dawng in, hausapa’ sanggam Khristian a hong suahtak ziak in Halleluiah Pathian min i phat hi. Photani Teron Khohausa’pa sanggam Mr. Ajit Teron, a zi Serjalin Tokbipi leh tate kuamah sap hilou, amau a innkuan ua saptuam biakna vanaih in Pathian’ thu hon thei ua, Pastor in counselling nei in March 24 in, Pastor Joel Hanse khut ah a nupa un baptisma tang uhi. EBCC Hidim Teron ah leng March 11, in tuailai mi 10 in Pastor T. Pauzalian khut ah baptisna tang uhi. Hiai saptuam khawnvak mit dekdek bang a om himahleh saptuamte thumna, Pastorte leh evangelistte panlakna in tuailai hiai zah Pathian lam ngathei a hon piak ziak in thupina tengteng Amah i pia hi.

2. KIPAHTHUGENNA LEH THUMNA DINGTE:
1) Dengaon area Photani Teron khua a khristian lunglutte a hong lut ngamna ding un thumpih ni.
2) Ajit Teron leh a innkuante Khrist nungzui muanhuai leh Khristian innkuan hoih a hong hih nading un thumpih ni.
3) Bokalia area Langsun Terang khuate’n Khrist hondamtu a hon san theih na ding un thumpih ni.
4) Pastor T. Pauzalian a damlouhna apan hong damsiang theih nadi’n thumpih lai ni.
5) Hidim Teron a tuailai mi 10 baptisma tangte khalam leh salam a hong pichin theih nading un thumpih ni.
6) March 10, 2019 in Pastor Joel Hanse, a pianna pa’n beisan, Pastor leh a innkuante khamuanna ngetsak ni.
7) Mr. Sarbon Timung phungzawl nei, Pathian hihdamna ngetsak ni.
8) Waisong Rongkhekan fellowship in biakin poimoh a hihman un, thumna ah phawk ni.
9) EBCC Tari Adong leh Bithilangso a camp a halhthakna tangte kipahthu gen kawm in thumpih ni.
10) Field sung a school a teacher te leh student te’n damtak a ma ahon sawn theih nading un thumpih ni.
11) Sterlin Terangpi damlou, hong damna din thumpih ni.
12) Longki Teron leh a innkuante’n Khristian a kipiak lunggulh uh, min tak leh kithukim tak a hong kipiak theihna ding un thumpih ni.

C. DHEMAJI MISSION FIELD:
KIPAHTHU GENNA LEH THUMNA DINGTE:
1. EBCC Namgharia biakin bawlna zohsiang hita. Kipahthu i gen kawmkawm in manpha tak a zat a hong hih theih na ding in thumna in delhzui lai ni.
2. Lakhipathar area ah missionary te’n amau hihtheihna tan in sem uh himahleh, gingtu om masate testimony a na hoih luat tellouh ziak in luhkhiak haksa mahmah dinmun in om uhi. Bangchi hiam a Pathian in kong hon honsakna ding in thumna tamsem toh missionaryte delhzui ni.
3. Thumna a i na phawksek uh Miss Priyanka, Dokhinchapori khua a om in a sungkuante apan dalna nasatak tuak hi. I thumnate ziak in a vangkim in biakin ah mel muh theih ding in hong om nawn panta hi. Kipahthu gen in amah leh a sungkuante ading in thumsak lai ni.
4. Pyangchapori mun ah Evan. H. Jamkhanmang @JK Mili makaih in Home Tuition patkhiak hi a, Kha 1 sung in student 40 val bang phatou hi. Etkai nopzawkna ding in batch 2 a khen in om ua, kibehlap tou theizel lai dia lamet ahi. Khosung mite toh kal a kitanauna hoihtak hon tut lamet ahih ban ah nu-le-pate reach-out na vanzat manpha tak hong hih ngei lamet ahi. Thumna in delhzui ni.
5. Evan. H Jamkhanmang taksa dam theihna toh kisai Imphal ah doctor te’n investigation tuamtuam a bawl nung un Fatty Liver (Sin a thau tam) ahihdan musuah uhi. Aman Imphal ah test ding khat neilai hi. Taksa hiselna hoihtak hon neih theih na ding in thumna in phawk ni.
6. March 14, 2019 in Dokhinchapori biakin honna leh latna Field Superintendent in nei hi. Hiai hun ah Director of Missions leh DS/LSD ban ah Mission Coordinator ten thugenna hunzang uhi. Biakin honna programme ah Lachangaon, Bandena, Dimoruguri leh Dunaguri a gingtute’n a uapvek ban uah semtu teng in leng uap theivek uhi. Kipahthu gen ni.
7. Semtute’n kholum gam a sem ahihna uah awlmoh huaisa in DMC/LSD te’n missionary-te zat ding Stand Fan khat chiat leina ding a piak uh zang in leikhiak hita a, Missionary-te kiang ah khat chiat hawmkhiak hita. Amau DMC/LSD in field a damlou khezeng a omden Mr Chandrakanto Mili Pyangchapori huhna ding Rs. 4,000 leh Missionary-te lak a treatment lasek huhna ding Rs. 4,000/- thon uhi. Amaute thilpiak manpha takte ziak in semtute kipak mahmah uhi.
8. Mrs. Kumari Lagasung Dhunaguri khua a om in gintak louhpi’n hon sihsan phut a poi petmah hi. Amah ahihleh Baptisna tang naikei mahleh Biakin kai gige ahi a, aman a nutsiat a tate leh a pasal in hiai tungtawn a Pathian ahon muh loh nading un thumna ah phawk ni.
9. Muktiar a i gingtu uh Mr Pait te bawngtal 1 kigu mang hi. Mun tuamtuam a zonnung unleng muzou tuanlou ua lungkham pih mahmah uh. Gingtute hiin semtute hita leh bittak a om theihzelna ding in thumpih poimoh mahmah uhi.
10. Amguri khua a om i gingtu Mr Biju Taid a inn bawlna uah kia in a khut ngawng suliam kha hi. Amah inkuan a nekzong omsun ahihman in hong damsiang pahna ding in thumpih ni.
11. Mrs Kamam damlouhna ziak in Dibrugarh ah doctor ki ensak in hohzel hi. Amah a sunglam na ahihman in doctor in operation ngai maithei a chih ziak in Operation ngailou a hong damna ding in thumpih ni.
12. Muktiar a om Mr Modubala Pait zi in venlouh hun nei theizel hi. Pathian hihdamna atan theih nading in thumsak ni.
13. Dunaguri a om Miss Mousumi Pegu in kaih a neih ziak in buai thei mahmah hi. Akhen chiang in kikhop sung tanpha inleng pha thei sek hi. Hong damsiang theihna ding in thumpih ni.

D. MANIPUR MISSION FIELD:
1. THU TUAMTUAMTE:
1. Lamka South Division Missions Committee deihsakna ziak in Workers’ Empowerment programme March 27 in lohching tak a zat zoh hita. Sinsakna piak a omte’n gah manphatak ahon suahna ding in thum ni.
2. Heisnam leh Awangjiri te biakin mun ding leikhiak in om ta hi. Maban a sai ding om bangbang feltak a sai ahih theih a biakin kilawmtak tunkhiak pah a hong hih theihna ding in thumna in delhzui ni.
3. Maitram a Field Office ding kilam lel nasepna paizom tou zel hi. Buaina bangmah omlou a sepzom theih a hong hihna ding in thumna in phawk ni. Tua ban ah, Jiribam leh Sugnu ah leng biakin bawl lel in om hi.

2. KIPAHTHU GENNA LEH THUMNA DINGTE:
1. Manipur Mission Field nasepna in awlawl in hoihlam a khanlohna leh masawnna a neih theih zel man in i biak Pathian min phat in kipahthu gen ni.
2. Gospel Harvesting Ministry tukum January – December 2019 sung in atawmpen a mun 12 a neih ding in field in year plan in nei hi. Hiai ministry tungtawn a khamangthang tamsem Toupa’n semtute tungtawn a hon piakna ding in thum ni.
3. Semtute’n March khasung a houlimpih a neihte uh ading in thumsak ni. Amaute Jesu Khrist khebul a pilut a hong hih ua, khalam hotdamna kichian a neih theihna ding un thumsak ni.
4. EBC a Sawltak, pastor candidate Mr TK Khual Gualnam leh Mr Jambiaklal Tunglut te’n March khasung in Manipur Missions Field ah exposure nei uhi. Amaute’n buaina bangmah omlou a a kalsuanna ding uh geel a om bangbang a zoh theih ziak un kipahthu gen ni.
5. Tukum thupi “Pathian Pomtak Biakna” chih mah field in leng thupi in nei hi. Biakna leh phatna lam, music lam kisinsakna uang bawl ding chih khawmpi thupukna ahi. Pathian Kha kithuahpihna tanga gahsuah tak a sepkhiat a hong hih theih na’ng in thumna in thei ni.
6. Semtu Ch Jano in pile case ziak in Lamka Damdawi inn ah March 27, 2019 in operation in om. A hong damsiang pah theih a, anasep ahon sutzop baih theihna ding in Pathian kiang ah damna ngetsak ni
7. Naupang Sunday skul pat ding Khawmpi thupukna FWC deihna bang in sepsuah pat in om hi. Semtute’n itna leh awlmohna nei a, naupangte kepna leh sinsakna a pan hon lak touh theihna ding un Pathian kha ompihna ngen in thumsak ni.
8. Field ah khalam piangthak hong om thei zelzel a kipahna lian mahmah hi. Huchih laiin amaute kepna leh makaihna lam ah semtute panlakna ding mohpuakna kibehlap zel hi. Khalam makaihna taksap ziak in leng tampi mangthang kik theizel ahihmanin semtute ading in Toupa’ kha ompihna ngetsak lai ni.
9. Toupa’n Biakin lam ding mun 3; Nachou, Heisnam leh Awangjiri te ah hon pia hi. Field in budget leh neihsa neilou ahihman in thumna toh delhzui ni.