Amasa in Gammial Aw Simtute tengteng Jesu Khrist min in itna chibai! Gammial nasepna toh kisai Field tuamtuam tea pan report anuai a bang in enkhawm nawn leng i chi hi.

A. HIMALAYAN MISSION FIELD
1. WORKERS’ ORIENTATION PROGRAM:
Kum a hong thak chiang a Field sung a Casual worker ding leng athak a kila zel ahihna ah, field in tukum 2019 ading in Casual Worker 26 ana la uhi. Regular Worker 22 omsate toh Ministry Orientation Programme January 30 & 31, 2019 sung Birtamode Mission Centre ah lohchingtak in nei uhi. Hiai hun ah Pastor L Paukhankhup in “Worker’s Guidelines”; Pastor Ran Kumar in “Basic Doctrine”; Pastor Premraj Bantawa Rai in “How to handle Local Finance”; Pastor T Ginkhozam in “Importance of Winning Soul”; Pastor Padam Thapa in “The Importance of Prayer” chih leh Rev Lalmalsawm in “Personal Integrity in Ministry” chih thupite zang in ni 2 sung sinsak uhi. Orientation Programme ah Casual Evangelists 26te Commissioning piakna Field Superientendent in nei hi.

2. SEMTU THUM IN KOPPIH NEI
Himalayan Missions Field apan semtute mi 3 in koppih nei ua, kipahpih mahmah i hihman in i taklang ahi. Amaute– Evan. Ajay Gurung, Bhuttabari station a sem in January 10, 2019 in nei a, January 28, 2019 in Evan. Philip Khapangi, Songretar station a om in Dharampur ah nei a, Evan. B Jemson Ngaihte, Uttarey station a om in February 01, 2019 in EBCC Moria, Pearsonmun ah nei hi. Toupa’n nupa lohching ahih ua sepna lam a leng ahong pankhawm uh i deihsak hi.

3. KIPAHTHU GENNA LEH THUMNA DINGTE:
1. January 2019 sung in Pathian in Gingthak mi 27 leh Baptisma tang mi 2 a hon piakte ziak in kipahthu gen ni. Khalam a hong khanlet zel theihna ding un thum zomlai ni. Hwaku Biakin kilam lel, buaina omlou a zohpah ahihna ding in thum ni.
2. Semtute tate leh singtang dawn a gingtu naupang omte omtheihna ding Field in Hostel khat Birtamode mun a honkhiak hoih sa a, pan lalel uh, Pathian pina ngetsak ni.
3. Field in Sunday School Teachers’ training March 07, 2019 ni in nei ding, thumpih ni.

B. KARBI ANGLONG MISSION FIELD:
THU TUAMTUAM:
1) Field Khawmpi: Field Khawmpi 2veina January 17-21, 2019 sung EBCC Rongali ah “Na khe in paita in” (Matt. 9:5) chih thupi zang in thu-le-la ah kipolhlimna om hi. “Khristian innkuan & tulai hun” leh “Khristian tuailai & tulai hun”, chih thupi zang in Elder Dr. Lipson Rongpi leh Pastor Jacob Rongpi in sinsakna nei ua, thugenna hun Pastor Joel Hanse, Pastor Manthing Hanse leh Pastor T. Pauzalian te’n zang ua, Bible study hun Rev. Jameson Bey in zang hi. Khalam leh salam kitaitehna FBYF & FBDF ten programme tuamtuam hiai hun in sai ua, hiai khawmpi ziak in mipite lungnuam leh kipak in khalam leh salam ah vualzawlna tang chiat ahihman un kipak mahmah uhi.
2) Khakna leh vaidawnna: FBDFC in Evan. Manzarual, khakna a quarter Hidim Teron ah January 05, 2019 in nei ua, Assistant Field Superintendent in vualzawlna ngetsak hi. Tua ban ah, Field Head Office ah leng out-going FS Rev. M. Zalian Guite khakna in FCWC, FWC, BWC, FBDFC, BBDFC leh BBYF te’n annkuang umpih uhi. January 26, 2019 in FCWC, BWC, FWC ten Rev N. Tuang Lang, Field Superintendent thak leh a innkuante vaidawnna programme nei in Accountant thakte innkuan toh kipahna ankuang sawkkhawm uhi.

3) Karbi Kumthak: Field in February 5, 2019 Karbi Kumthak Field sung mun tuamtuam; EBCC Rongchingri, EBCC Tari Adong, EBCC Den Adong, EBCC Paklongkam ah Pathian kiang a kipahthu genna leh kumthak a Pathian vualzawlna khalam-salam a tanna kum ahihtheihna dia thumna, biakna programme ban ah kimawlna tuamtuam sai uhi. EBCC Rongchingri ah Rev N Tuang Lang in Pathian thutak genna nei a; EBCC Tari Adong ah Mr. T.P. Hanse; EBCC Den Arong ah Pastor Joel Hanse; EBCC Paklongkam ah Mr. Philip Ronghang in nei hi.
4) Building Extension: Diphu Rongchingri a om Grace English School, FWC malakna in skul extension pat leh sepzom in omta hi. New Langrik CES leng Pathian in naupang tampi a hon piak behlap ziak in building extension ngai a, local saptuam leh skul committee-te’n kuamah sawklou in nasep na pan uhi. Lamzangtak a honzoh chiat theihna ding un thumpih ni.

KIPAHTHU GENNA LEH THUMNA DINGTE:
1) Babu Sutnami, Manja Hidim Teron a om Khristian lunglut a, a lunglut bang a a hong kipiak theihna ding in thumpih ni.
2) Field sung a om semtute amau sepna mun chiat a buaina bangmah thu zak a omlouh man in kipahthu gen ni.
3) Pastor T. Pauzalian damsiang taktak nailou ahih ziak in thumna ah delhzui lai ni.
4) Workers-te’n Personal Ministry Year Plan – 2019 ading aneih/ abawl bang ua a sepsuah theihna ding un thumpih ni.
5) Field sung a skul i neihte’n class panta. Pathian in naupang kep ding tampi hon pia a kipahthu gen in, semtute leh student-te thumna ah phawk ni.
6) Field sung a om adiak in Rongali saptuam memberte nungtolh (backslide) tampi om a, thumna ah phawk ni.
7) Mrs. Sika Rongpi, New Langrik a om leh Mrs. Maloti Tokbipi Bithilangso a omte, cancer natna ziak a ki-enkol tou zel uh, thumpih ni.

8) Jiteplong area a ginglou Khristian lunglutte’n Khrist khebul a hon naih theihna ding un thum ni.
9) Buso Terang leh Longki Teron Waisong Rongkhelan-ten Pathian thu ngaina leh Khristian hih lunggulh uh, hong kipiakkhiak theihna ding un thumna ah phawk ni.

C. DHEMAJI MISSION FIELD:
KIPAHTHU GENNA LEH THUMNA DINGTE.
1. Evan. H Jamkhanmang, Karbi Anglong Missions Field apan Dhemaji Missions Field a sem ding in a inkuan un Feb 09, 2019 in field tungta ua, Pityangchapori a quarter pansan in Namgharia leh Pityangchapori area ah sem ding hi. Lamzang tak a hon sep theihna ding in thumpih ni.
2. January 2019 sung in Evan. T Chinbiakmung sepna mun ah baptisma tang mi-7 om hi. Amaute ginna piching tak nei a hong khankhiak theihna ding un Pathian kiang ah thumpih ni. Amau gingthakte: (i) Mr. Devanan Doley, (ii) Mrs Husharani Doley, (iii) Miss Geetamoni Doley, (iv) Miss Purnima Doley, (v) Mr Bula Doley, (vi) Mrs Lokhit Priya Doley, (vii) Miss Merina Mili hi uhi.
3. Field in January 25, 2019 in Field Office ah Native Evangelist (Casual) a semding interview nei a, Candidate-te written leh personal a etchet ahih nung un mi- 5 lakthak in om uhi. Pathian vanzat manpha hong hih theihna ding un thumpih chiat ni.
4. TBMC, EBCC Lamphel in a sponsor uh EBCC Namgharia biakin bawlna in masawn zel hi. Huan Field fund tungtawn in Dokhinchapori biakin major repairing bawl lellel ahi. Biakin nihte kilawm tak a bawlzoh ahihna ding in thumna ah phawk ni. Huan EBCC Itanagar biakin Upa Haulemthang Gualnam-te innpang bel a kibawl, zohsiang ahih toh kiton in February 10, 2019 in Field Superintendent in honna leh latna nei hi.
5. Muktiar khua kichihna mun ah Pathian in gingtu inkuan-2 hon piakte pansan in Evan. T Chinbiakmung leh a seppihte’n Fellowship panthak nawn uh. Amau nipikal khat in khatvei fellowship neikhawm thei zel uh. Inkuan tawmchik akipan hong puntouh ua saptuam tanpha dinkhiak ahihtheihna ding in thumpih ni.
6. Damlou thumpih ding- Amguri a om Mr Gunador Mili (A vangkim a Gilna). Dunaguri a om Mrs Rita Kutum (A gil a tumor om). Piyangchapori a om Mr Chungkrang (Kidney problem). Mr Chandrakanto Mili (Khe na- pai theilou). Amaute’n damna hon ngahna ding un thum ni.
7. Jan 31 apan Feb 4, sung Rev. K Kamchinkhup, Director of Missions leh Upa T Paukhansiam, Missions Coordinator leh Upa T Khaipu (Driver) te’n Field vehna nei uhi. Station mun teng etkhiakna a neih ban uah nitak hunchiang in semtu om teng toh open discussion manpha tak zangkhawm zel ua, February 3, 2019 Nipini in Lachangaon biakin ah Director in thugenna hun zang hi. Hiai hun ah maban pai dingdan leh pan lakthak dingdan tuamtuam kikupkhawmna nei uhi. Hiai kivehtuahna in gahsuah manpha tak hon tutngei lamet ahi.
8. BYF, EBCC Delhi Munirka area in silh-le-ten tamtak Field ading in thon uhi. A hamphatpih gingtuten kipahpih mahmah uh. Hichibang a field awlmohna ziak a gamla tak a pan thilpiak thontu BYF te tung ah kipahna lian mahmah hi. TBDF, EBCC Guwahati inleng puansilh tamtak Dhemaji Field ah tuma zek in ana thonkhin ta uhi.

D. MANIPUR MISSION FIELD:
KIPAHTHU GENNA LEH THUMNA DINGTE:
1. Gospel Harvesting Ministry tukum January – December 2019 sung in atawmpen in mun 12 a neih ding year plan, Field in koih hi. Hiai ministry tungtawn a Toupan khamangthang tamsem semtute tungtawn a hon piakna ding in thum ni.
2. Seekers/contact semtute’n a neihpih lelte uh a min ua lou in thumsak ni – L. Anand, Brajeshori, Ajitkumar, Ichand, Roshan, Ibomcha, Shyam, Tarun, Sanahan, Gyanapyari, Bhim singh, Mimi Devi, Sumanti, Nilamani, Kamanta, Jamuna, Akash, Naocha, Padama, O. James, N. Hero, N. Chaoba. Amauten Jesu a hotdamna kichian a hon neihtheihna ding un thumsak ni.
3. Tukum in Field in Naupang Sunday School kisinsakna khawmpi pat sawm uhi. Evan. Prembala in Beginner –Ate Sinlai Meitei pau in letlel hi. Lohchingtak a sepsuah ahihna ding in thumpih ni.
4. Tukum thupi: “Pathian Pomtak Biakna” chih mah field inleng thupi in zang hi. Biakna leh phatna lam, music lam kisinsakna uang bawl ding tup leh ngim in nei uhi. Pathian Kha kithuahpihna tang a gahsuah tak a sepkhiat ahihtheihna ding in thumna in phawk ni.
5. Pathian vualzawlna tang a gingtute kikhopna ding biakin kilam lellel – Jiribam leh Wapokpi MEBC Biakin leh Field Office ding Maitram ah nasepna in masawn zel hi. Toupa ompihna tang a, tuktui luanma ngei a belh theih ding a zoh chiat ahihna ding in thumna ah phawk ni.
6. Biakna mun ding lemchang nei thei nailou – Awangjiri leh Heisnam fellowship ten Pathian ompihna tang a amau atuam ding biakin lamna ding mun-le-mual a hon neih theihna ding un Toupa ompihna ngen in thumsak ni.
7. Field BYF Gospel Camp, Yaosang hun a neih zel, March 21 – 24, sung in neih ding in geel uhi. Programme lohchinna ding in thumpih ni. Hun paisate ah hiai hun in tuailai tampi’n Jesu Khrist hondampa dia san hun in a na zangzel uhi.