Amasa in Gammial Aw Simtute tengteng i Toupa leh Hondampa Jesu Khrist min in Kumthak chibai aw. Mission fieldte a Toupa’n thil thupi hon hihsakte anuai a bang in i enkhawm nawn ding:

A. HIMALAYAN MISSION FIELD
1. FIELD DORCAS FELLOWSHIP CONFERENCE REPORTS
Field Dorcas Fellowship in a 6veina Khawmpi, November 6 & 7, 2018 in Birtamode mun a Atithi Sadan ah zang uhi. Hiai hun in “For if You Keep Silent at this Time…” (Esther 4:14a) thupi a zang in thugenna, Rev Lalmalsawm Field Superintendent, leh Evangelist Geeta Tamang in hun 2 tuak zang ua, Evangelist Chingkhansiam in zingsang Bible Study, Jacob Laikhak pansan in hun 2 la hi. Hiai bang khalam a kisinsaknate ban ah, Lapawl leh Bible Quiz kidemna leng om hi.
Hiai khawmpi ah khua 37 apan Dorcas member paikhawm ua, Khawmpi zang milip 200 val a, Field sung a pastor leh semtu tamtak kihel thei uhi. Tutung in Himalayan Field sung a a gammi Pastor Retired 2 (Pastor RB Sharma leh Pastor Tikaram Thapa) te kiang ah pahtakna, Memento pia ua, a kum a upata, Senior Dorcas Fellowship member 6 kiang ah leng puan silhsakna nei uhi. I Field sung a Saptuamte Khanna leh masawnna ding a Dorcas Fellowship malakna thupi leh manpha mahmah hi.

2. KHEDOK BIAKINN THAK HONNA & SILVER JUBILEE LOPNA
November 12, 2018 in Rev Lalmalsawm, FS in Khedok Biakin thak honna leh latna nei hi. Hiai Biakin a din nung kum 25 chinna toh Pathian kiang a kipahthu genna hun zangkhawm uhi. Pathian muanhuaina chiamtehna suang, Ebenezer phuh a om, hawkkhiatna Pastor T Ginkhozam in nei hi. Jubilee dak 25 vei mi tuamtuam apan khet in om a, Silver Jubilee Souvenir luikhiatna Elder Jonah Rai in nei hi.

3. BUNGRUNG BIAKINN THAK HONNA
November 21, 2018 in Bungrung Biakin thak honna leh latna Rev Lalmalsawm, FS, in nei hi. Tu kum sung a biakin thak lam a om, a 6na leh a tawpna hita hi. Toupa piina hiaitan i muhte ziak in thupina leh pahtawina Amah i khusak ahi. Bungrung Saptuam 2008 a kipankhia a, tuin milip 53 phata uhi. Tua i biakin mun gingtu Sher Bahadur Sencheuri leh a innkuanten a mun a piak uh ahi. Biakinn hon hun in semtute tamkhop kihel thei ua, a khuami gingloute leng chial a om in va uap thei uhi. Toupa min phat in om hen.

4. MUN TUAMTUAM A SEMINAR LEH PROGRAMME NEIH IN OM:
• BIRTAMODE: A thumveina, BYF Plain area vaisaina in “Kithuahkhawmna”, November 09, 2018 in Birtamode Biakin ah nei uhi. Hiai hun in Field BYF, Chairman Evangelist Philip Khapangee in, Philipite 3:12-14 pansan in tuailaite hasotna thugenna hun zang hi. Saptuam 8 apan in tuailai milip 40 vel paikhawm uhi.
• KHEDOK: November 12, 2018 Biakin thak honni, sunnung hun in session 2, Khasiangthou toh kisai a gindan diklou khenkhat leh Tualsung Saptuam kivaipuakna, thupi a zang in, Rev Lalmalsawm, FS leh Evangelist Prem Raj Bantawa Rai in sinsak uhi.
• TUNIBOTE: November 13, 2018 in Tunibote Saptuam ah One Day Seminar, Session 3 sai in om hi. Khasiangthou toh kisai a gindan diklou toh kisai Evangelist Prem Raj Bantawa Rai in session 2 la a, Rev Lalmalsawm in Tualsung Saptuam kivaipuakdan sinsakna hun zang hi. Hiai hun in kiim le kiang a pan in Saptuam 7 a kipan milip 80 val kihel thei uhi.
• FAKLUNG: Field BYF in mun tuamtuam a One Day Seminar neih ding a gel uh sepsuahna in November 22, 2018 in Faklung Biakin ah tuabang kimuhkhawmna Gopetar Pastor bial a ding in nei ua, tuailai mi 20 vel paikhawm uhi. Hiai hun in thupi 2, Biakna leh Music toh kisai Mr. Nirmal Laksam in sinsak a, lapii dan leh Guitar tumdan practical in sinsak hi. Session 2na ah Evan. Dinesh Khadka, Field BYF Secretary in Tuailaite Khrist ading leh Saptuam a dia kizat ding apoimohna leh a septheihte genna nei hi. Faklung tualsung saptuam in nek-le-tak leh zintunna bangkim sai uhi.
• PADAJUNGI: Phaizang saptuam a Sunday School heutute “Kithuahkhawmna” programme gel a om November 27, 2018 in Padajungi Saptuam intekna in sai in om hi. Hiai hun in Saptuam 7 apan mi 15 kihel thei uhi. Basic Doctrine leh Naupangte Jesu Khrist a neihna ding ua pii ding apoimohna Evangelist Prem Raj Bantawa Rai in sinsakna hun zang hi. Area Pastor Dilip Kumar makaih in heutute ading Quiz kitaitehna hun leng zang uhi.
• SONGRETAR: Tanglepa leh Tunibote Pastor area Sunday School heutute leh semtute “Kithuahkhawmna” hun Songretar ah November 27, 2018 in zang uhi. Hiai hun in mi 65, saptuam 11 apan paikhawm ua, Pastor Ran Kumar Sewa in paikhawmte hasotna in thugenna hun zang hi. Evangelist Prakash Rai in Sunday School toh kisai a theihtuak leh zuihtuak sinsakna hun zang hi.

5. KIPAHTHU GENNA LEH THUMNA DINGTE:
1. November 2018 khasung in Pathian in Gingthak mi 12 leh Baptisma tang mi 17 a hon piakte ziak in Pathian kiang ah kipahthu gen ni. Khalam a a hong khanlet zel theihna ding un thum zom lai ni.
2. November 17, 2018 in Hwaku Saptuamte ading temporary church building lamna ding ground breaking Pastor Paukhankhup in nei hi. Hiai mun a biakin lamna ding EBC Headquarters in a tupsak ahi. Elder Parsuram Dangi gam a kilam ahi a, lamzang tak a lamzom ahihna ding in thumna ah phawk ni.
3. Field Dorcas Committee member 2019-2021 kitel thakte ading in thum ni. I Field sung a numeite sep khiat tampi omta, septheih tampi nei ua, Saptuam ading a department manpha tak ahong hihna ding un thumpih ni.

B. KARBI ANGLONG MISSION FIELD:
1. THU TUAM TUAM:
• WORK-CAMP: EBCC New Langrik Biakin bawlna nasep huhna in November 06, 2018 (Tuesday) in, Field sung a workers om thei teng paikhawm in, Work-Camp leh Fellowship nuamtak nei uhi. Hiai ni mah in Local saptuam leng a ki hel thei zahzah kihel in hun nuamtak zang khawm uhi. Nitaklam in paikhawmte’n ankuang umkhawmna nei uhi.
• MISSION MOTIVATION & SEMINAR: FWC in Year Plan a a neih bang un, Field Saptuam lian zodeuh Dengaon area, Rongchingri area leh Tariadong area te ah Missions Motivation nuamtak in November kha in nei uhi. Seminar hun in Christianity and Politics, Christianity and Modern Information & Technology, Christianity and Culture chih thupi te pansan in Elder Dr. Lipson Rongpi, Elder Reuben Taro, leh Mr. TP Hanse te’n sinsakna manpha pia uhi.
• EVANGELISM: Tariadong mun a ginglou mi Pathian thu lunglut mahmah Khristian suak nuam inkuan thum a pan milip sawm leh nihte toh houlimna (counselling) November 20, 2018 in semtute’n nei uhi. Hiai hun ah Evan. John Milik leh Evan. Hannah Hansepi in nounel tak in Pathian thu sinsakna nei uhi. A thuzakte un a houpih zom zela kilawptaka ahong lut theihna ding un thum ni.

2. KIPAHTHU GENNA LEH THUMNA DINGTE:
1. December 13-18,2018 sung EBCC New Langrik ah Papi Camp neih in om hi. Hiai hun in Evan. JK Teron leh Evan. Jacob Rongpi te’n thutak genna hun zang uhi. Kipahthu gen ni.
2. Dengaon aom Mr Rajen Hansete innkuan Pathian thu lunglut, a lunglut bang ua, ahong kipiak theihna ding un thumpihni.
3. Field sung a Semtute leh Saptuam memberte damlouhnate om mahleh khenkhatte i thumna ziak in damna ngah zel ua, huan khenkhatte’n ki-enkol lellel leng a om lai ua, damna ngahte ziak in kipahthu gen kawm in a dam nailoute a dam siang theihna ding un thumna ah phawk ni.
4. Sumpho adong aom Mr Sanjay Taro te innkuan tumalam a a omna khosung a Khristian ahih ziak in teng thei nawnlou ding chi a dateline a piak dungzui un a Pute gam ah inn lampat sawm ahi ua, buaina omlou a ahong lamzoh theihna ding thumpih ni.
5. Field sung a Pastor Area teng, Area-wise in Seminar leh Pastor Area Khawmpite hoihtak a November kha sung a zoh theih a om ziak in kipahthu gen ni.
6. FWC Mission Motivation Year Plan dungzui in, Field sung a Saptuam piching deuhna munte ah motivation neih zoh a omtak ziak in kipahthu gen ni.
7. Vaisong Rongkhelan a om Mr Longki Teron leh Mrs Sika Kropi Khristian leh Pathian thu lunglut a hong kilat theihna ding thumpih ni.
8. Disama area sung a, Sarsing Tisso Kho hausa Mr Kangbura Tisso Khristian lunglut mahmah thumna a phawk ni.
9. EBCC Rongali in benches 60 leh EBCC manja in benches 15 hoih leh kilawm tak aneihtak ziak un kipahthu gen ni.

C. DHEMAJI MISSION FIELD:
1. KIPAHTHU GENNA DING LEH THUMNA POINT DINGTE:
1. Pathian in 2018 kumtawp tan bittak a honpi in haksatna tuamtuam omte hon galkai pih ziak in leh, kum 2018 sung a gahmuh theih tamtak honpiakte ziak in kipahthu gen ni.
2. November kha in semtute tungtawn in Pathian in gingthak mi-5 baptisma tang leh mission support a pangthei mi-3 hon piakte ziak in kipahthu gen ni.
3. GBC a sintu mi-2, Mr Chiro Kumar Pegu leh Miss Deeparani Doley ten Dip Th lohching tak in hon zoukhia uhi. Amaute ziak a kipahthu gen kawm in Pathian vanzat hong hih theihna ding un thumpih zomzel ni.
4. Pityangchapori khua a i gingtu Mr Horinath Pegu S/o Mr Umakanto Pegu in damlouhna lamdangtak nei hi. A gilna sa in a ngaihtuahna normal lou, mi bum ahih muangmoh uhi. Huan Kapurdwa a damlou tuamtuam i thumpihte un hoihlam a manoh lai un, Mrs Babhita Taw in naupai taksa dam thei lawlou leh, hat lawlou ahihman in thumpih poimoh mahmah hi. Amau damloute Pathian kiang ah thumpih ni.
5. TBMC/EBCC Lamphelpat in Namgharia biakin bawlding project in laksak uhi. Hiai nasep patna ding in November 23, 2018 in FS in foundation stone phumna nei in nasep patzui in omta hi. Nasep lohching tak a zoh ahih theihna ding in a semtute leh enkoltu area incharge Evan. Khual Doley te Pathian kiang ah thumna in phawk chiat ni.
6. EBC Headquarters deihsakna ziak in Itanagar ah i saptuamte kikhop theihna ding biakin bawl sawm ahi. Mun leh mual kineilou ahihman in Upa Haulemthang Gualnam te inn pangbel a bawl kisawm hi. Lohchingtak a bawlkhiak ahih theihna ding in thumna ah phawkchiat ni.
7. Evan. T Chinbiakmung leh a seppih Evan. Santush Doley in Bekali khua ah inkuan khat houlim pihna nei uhi. Innteknu lunglut in kiman mahleh a pasal kimin zou nailou hi. Jesu Khrist hon muhchianna ding un thumna ah phawkchiat ni.
8. Mrs Binapani Doley kichi damlouh ziak in ni-5 sung Lachangaon biakin ah giaklut. Saptuam ten ann ngawl a a thumpih nung un hong dam hi. Himahleh, baptisma tanding a inkuan ten dallai uh. Pathian in kong a hon honsakna ding in thumpih ni.
9. Lakhipathar a i gingtu Mrs Sumitra Gogoi (meithai) leh a tanu tenna inn selua, belhtak nawn hetlou a omlai in Mission nasep lunglut mahmah nupi khat (EBCC Vengnuam) in huhna apiak tungtawn in langva bundles nih ban ah inn van ding field a semtuten leisak in inn bawl sak uhi. Upa Haulemthang Gualnam leh T/Upa Chinkhovung te’n a lupna ding uh bawlsak uhi. Kipahthu gen ni.
10. Dunaguri khua a om Mohendra Pegu kichi in, a zi leh tate biakin kai ding phal ngeilou hi. Pathian in a lungsim hon kheksak nading in thumpih ni.

D. MANIPUR MISSION FIELD:
KIPAHTHU GENNA LEH THUMNA DINGTE:
1. Mass counseling/Group evangelism Sabantongba ah November 11, 2018 in neih in om a, piangthak mi 5om uhi. Toupa’n hiai programme-te hon vualzawl zel a, field in piangthak target 100 lak ah 137 honpeta a, Baptisma tang target 50 lak ah mi 41 hon peta, New tither target 50 lak ah 68 hon peta in MMV mi 50 target lak ah 39 hon peta hi. Vaisai localte, speaker/counsellorte ziak in kipahthu gen ni.
2. Naranseina tuailaite’n project a a neih uh, Keyboard PSR-I 445 field office toh 50% ki share in leikheta uhi. Hiai bang panlakna phat huai sak in om a, manpha tak a hon zat ua, tuailaite’n khalam halhna a neih loh hial theihna ding un thumsak ni.
3. Semtute’n awlmohna leh thanuam tak a a sepna chiat uh a hon sepzom theih zel nading un thumsak ni.
4. Toupa gam nasepna leh a khekhap zui a kalsuan thubaih hilou ahihna ah semtute Pathian Kha vehna leh ompihna ngen in naksem in thumpih lai ni.
5. Maitram a Field Office ding lamna in masawn mahmah hi. Kipahthu gen in, nawngkaina om hetlouh a lamzoh ahih theihna ding in thumna in phawk zel ni.