Amasa in Gammial Aw Simtute tengteng i Toupa leh Hondampa Jesu Khrist min in chibai aw. I Mission field lam lungsim a ngaihtuah in, Toupa’n thil thupi hon hihsakte anuai a bang in enkhawm nawn leng i chi hi.

A. HIMALAYAN MISSION FIELD
1. GOPETAR PASTOR AREA SEMINAR REPORTS
EBC Mizoram Division sponsored-na in, Gopetar Pastor Bial ah Seminar lohchingtak in kineizou hi. Pastor bial sung a khua om teng telkimthei vek uhi. Thupi tuamtuam: Khristian Innkuan, Nu-leh-pa mohpuakna, Khristian Thilpiak, Doctrine, Saptuam a numeite mohpuakna leh Tuailaite Khrist adia kizat ding ahihdante, Pastor L Paukhankhup, Evan. Prem Raj, Evan. Geeta Tamang leh Evan. Chingkhansiam-te’n makaih in sinsak uhi. Maban a gah kipahhuaitak hon tut lamet ahi. EBC Mizoram Division tung ah kipahthu i gen hi.

2. YANGKHIM BAPTISMA PROGRAM
Yangkhim Fellowship, 2017 in kipan hi. Biakin lianlou, amau member tatna hunlel nei uhi. A hunhun in Pathian vehna tang uh a, gingtu leng kibehlap zelzel uhi. August 19, 2018 in gingthak mi 4, bialtu Pastor T. Ginkhozam in Baptisma pia hi. Amaute ziak in Toupa min i phat hi. Haleluiah!!

3. DHARAMPUR PASTOR AREA SEMINAR
Bialtu Pastor Padam Thapa makaihna in, Shanti Nagar leh Haldibari Saptuamte ah Tuailaite ading biik in Seminar August 30 leh September 1, 2018 in nei uhi. Shantinagar NEBCC a, hun zatna ah thupi tuamtuam: “Christian Etiquettes” – Prakash Rai, “Christian Family” – Prem Raj leh “Youth and Missions” – Evan. Dinesh in la in sinsak uhi. Hiai ni in Plain Area BYF Committee ding sehthakna leng nei uhi. Khua 5 apan in tuailai mi 40 vel paikhawm uhi. Haldibari Saptuam a Tuailaite ading biik a program bawl ah leng, thupi 4 zang in hun zatna om hi. Tua ban ah, “Biblical Doctrine” leh “How to Maintain Healthy Spiritual Life” chihte thupi behlap in om a, mi 30 vel khawng kihelthei uhi. Phattuampih ngei ding un i lamen a, kipahthu gen ni.

4. PADAJUNGI QUARTER HON HITA
Kum 2017 bul in Padajungi in semtu tenna ding Quarter, Headquarters huhna pansan in ana bawlpan uhi. Zoh ahih toh kiton in, August 9, 2018 in Field Superintendent in honna leh latna nei hi. Evan. T. Ginzalun leh a inkuante teng lutngal uhi. Quarters a furniture leina ding EBCC Kolkata in Rs. 15,000.00 pia ua, Eipawl group-ten Stabilizer khat Rs 6,250.00 in leisak uhi. Amaute tung ah kipahna lian mahmah hi. Toupa’n amaute tampi in vualzawl leh i chi ahi.

5. WORKERS’ EMPOWERMENT PROGRAM ZAT IN OM
September 03 & 04, 2018 in Workers’ Empowerment Program Siliguri a, Loyola Pastoral Centre ah zang uhi. Hiai Program, Lamka South Division in Field a semtute thopna awlmohna a project a guan uh ahi. Field sung a semtute mi 45 kim sipsip in kihelthei uhi.
Thupi 4 pansan in semtute thopna hun zat hi a: Rev V Thangkhangin in “EBC’s Missions Policy”, Rev V Nenglian in “Church Administration”, Upa T Paukhansiam, Missions Co-ordinator in “Primary Task of Missionary”, Rev Lalmalsawm in “Method of Evangelization” chih thupite pansan in sinsakna hun manphatak in nei uhi. Thupi sin a omte manpha mahmah, semtute poimoh, Saptuam leh Field vai a theih ding leh zuih ding ngenta ahihman in a telkhate hampha kisa mahmah uhi. Semtute’n report piakkhawmna leh thumkhawmna hun khat leng hiai program hun ah neih in om hi. Hiai programme hong piankhiak theihna ding a sponsor-tu, Lamka South Division-te leh Dorcas Hall a heute tung a Field a semtute kipak mahmah uhi. Toupa’n thupina tangta hen.

6. KIPAHTHU GENNA LEH THUMNA DINGTE:
1. August 2018 kha in Pathian in Gingthak 10 leh Baptisma tang 5 a hon piakte ziak in Pathian kiang ah kipahthu gen ni. Khalam a ahong khanlet zel theihna ding un thumzom lai ni.
2. Kolkata EBCC, Missions in Padajungi Quarter a zat ding furniture bawlna ding Rs. 15,000.00 a piak ziak un Pathian leh amaute tung ah kipahthu gen ni. Tuabang semthei zel ding in Toupa piina ngetsak ni.
3. Eipawl International in Buddhabare Saptuam in a zat ding Hollow Guitar pia a, tuaban ah Padajungi quarter thak a zat ding Stabilizer khat pia hi. Tuabang Saptuamte poimoh sukha ding thilpiak dongtute’n manphatak a a zat uh i deihsak a, a petute Pathian vualzawlna ngetsak ni.
4. Mr. Siamginsuan, Shillong a NECTAR a semlel leh a innkuante’n field station thak ITAHARI Fellowship a zat ding Hollow Guitar khat leina ding Rs. 7,000/- i semtu Evan. Sangbiakmawi kiang ah August 13, 2018 in ana pia ua, Guitar hoihtak khat leita uhi. Toupa’n thilpiak petute a vualzawlna tamsem a piakna ding in ngetsak ni.
5. August 16, 2018 in Pathian in Takuthang a i semtu Evangelist Givson Jack Rai leh a zi, tanu deihthohhuaitak pia hi. Kipahthu gen ni.

B. KARBI ANGLONG MISSION FIELD:
1. GINGTHAK KIBEHLAP
Mijung area a om Mr. Kacha Terang leh a zi Mrs. Kasang Phangchopi, Karbi sahkhua (honghari) zui a hinkhua zang a om lai, houlimna leh counselling hoihtak a semtute’n a neihpih nung un Jesu Khrist, Lal leh Hondampa a sang in Khristian hong suak uhi. Pastor Joel khut tungtawn in August 9, 2018 in baptisma program hoihtak neih in om a, amau nupa gingtu muanhuai kia hilou a theihpihtu muanhuai ahong hihna ding un thumpih ni.

2. OUTREACH NEIH AHI
Evan. NK Naulak leh Evan. Sarthe Hanse in amau sepna, sumpho Adong area khatvei beihpi suah ding lunggulh a a neih uh sepsuahna ding in area dang a seppihte chial in, Pastor Manthing Hanse makaih in mi 8 vel August 20-22, 2018 sung va lut uhi. Amau a omsung uh daih ding ration kipuak ua, Sumpho Adong khua, Langbung Dingpi khua leh Inghi khuate ah program hoihtak va nei uhi. Thumnate tungtawn a tunung a ahong gahsuah ngei lamet ahi.

3. DOOR TO DOOR EVANGELISM
Evangelist at large a i zat Evan. Jamkhanmang leh Evan. Jacob Rongpi, August 13-18, 2018 sung, Inlut Chialpi (door to door evangelism) nei in kalsuan uhi. I thumnate leh lametnate uh Pathian in vuaksuaksaklou in gah muhtheih bangzah hiam toh a kiktheih zel ziak un kipahhuai i sa hi. Hiai inlut chialpina tungtawn in Nupa kop thum (Hausapate nupa leng tel in), Tuailai mi 3 leh Nupi 3 in Jesu Khrist, Lal leh Hondampa ding a sanna kichiantak nei uhi. Nungzui muanhuai ahong hihtouh zelna ding un thumpih ni.

4. ANN NGAWL THUMNA NEIH IN OM
Field Working Committee in August 15, 2018 ni KAEBC Day of Prayer a a puan toh kizui in, Saptuam dinna khua teng ah an-ngawl thumna nei uhi. Hiai thumna a kingaipoimoh mahmahte ahihleh: Field Saptuam a makaite, Field sung a semtute, Chipih-Sapih gingloute ban ah gamsung makaite ahi. Saptuamte lungluttak a kihel chiat leh lohching mahmah hi-a theih ahi.

5. FIELD DORCAS SEMINAR
Field Dorcas Fellowship saina in August 22, 2018 in One day Dorcas Seminar program EBCC New Langrik ah nei uhi. Hiai Seminar hun ah; Rev. Jameson Bey, Asst FS, a hongtu in pang a, Evan. Manzarual, Evan. Hannah Hansepi-te’n “In-le-Lou Kepna a Khristian Numeite Mohpuakna” leh “Insung mite tung a Khristian Nute Mohpuak” chihte pansan in, sinsakna hun manphatak in zang uhi. Hiai hun ah numei 100 val kihelthei ua, manphatak in zangzou uhi.

6. MANJA BIAKIN HONNA
Manja a mun-le-mual neih ding lunggulh a sawtpitak a kizon nung in, Pathian in mun hoihtak hon pia hi. June 19, 2018 in Biakin lam kipan a, August 28, 2018 in Director of Mission EBC, Rev. Thangkhangin in, honna leh Pathian kiang a latna hun zang hi. Hiai hun ah Pathian deihsakna leh thilhih thupite mu a tang ding in mipi 200 val bang paikhawmthei a thupi mahmah hi. Saptuam khang leh masawn ahong hih ngeina ding in Pathian kiang ah thum ni.

7. BITHILANGSO BIAKIN HONNA
Heutute leh deihsaktu Saptuamte tungtawn a Pathian vualzawlna toh kum 4/5 vel paita a Bithilangso Biakin lam pat a om, sum-le-pai haksatna ziak a kizou khethei zoklou, Pathian in a lampi ding hon gelsak in June 2018 in zohkhiak fel hita hi. August 29, 2018 in Rev. V. Thangkhangin, Director of Missions in honna leh latna nei hi. Local in, kipahthu genna ankuang bawl ua paikhawm teng in vahtak leh taitak mai in umchiat uhi.

8. SAPTUAM KIVEHTUAHNA
Field BYF in Field saptuamte vehna neih ding chia Year Plan 2018 a aneih dungzui un August 19, 2018 ni in Bithilangso ah zan khat giak in programme nuamtak zat in om hi. Hiai hun ah AFS in thugenna hun zang hi. EBCC Rongchingri BYF in leng Diphu Taralangso area a gingloute lak ah in-vehna leh tract hawmna August 19, 2019 ni mah in nei uhi. Tuailai a omkhamkhamte thanuamtak in kihel ua nuam leh lohching mahmah hi-a theih in om hi. August 26, 2018 in BYF EBCC Rongchingri in 5KM Fellowship vehna nei ua, biakkhawmna hun nuamtak zang uhi. Tuailaite Saptuam mite inn teng a lut in thumsakna leh hanthawnna hun zang uhi. Tuailaite kipiakna leh awlmohna thupi leh phathuai mahmah hi.

KIPAHTHU GENNA LEH THUMNA DINGTE
1. Mijung a om Mr. Kacha Terang leh Mrs Kasang Phangchopi in Jesu Khrist Lal leh Hondampa dia a santheihtak ziak un kipahthu gen in, ahong hat zelna ding un thumpih ni.
2. Rongali khua a om Onjuli Terangpi (chibawk a damlou), Upa Longsing Teron (Sungna a damlou), Kachhai Hansepi (Stone case), Harsing Teron (taksa hatlou a om) te Pathian thilhihtheihna zang a hihdam a a omna ding un thumpih ni.
3. New Langrik khua a om Kajir Rongpipi a natna hiai chihchiah theihkhiaklouh himahleh naktak a damlou, a kemtu ding tapa neihsun lah GBC a Bible zil lellai, Pathian in lamdangtak a a hihdamna ding in thumpih ni.
4. Bokulia area-te tamtak Khristian hih lunglut uh himahleh doudaltute hatna mun ahihman in lauhna ziak in thupukna lak haksa sa uh. Pathian kha in hangsanna a piak a a lunggulh uh a tangtun theihna ding un thumna toh nakpi in pang ni.
5. Bokolia area a om Sing Ingti, Mr. Terang, Son Teron, Langbirik Timung ban ah Nihang Kro & a inkuante Khrist thu a dangtak mahmah uh, hoihtak a houlimpih ahih a hinna khekna ding khop a theihchetna a muhna ding un Pathian kiang ah ngetsak ni.
6. Hidim Teron Quarter ading a thilpiak (lupna, matress, dohkan, chair, tutna etc) Pathian min a hon pia unaupa Thuamzakap ziak in Pathian kiang ah kipahthu gen in, hihthei zel ding a a vualzawlna Pathian kiang ah ngetsak ni.
7. Field nuai a school i neihte Govt a recognition omlou a maban buai thei ding a alat man in, tulai in field in sailel hi. Buaina omlou a bangkim kizentak a sai a zohkhiak ahih theihna ding in thum ni.
8. Mrs. Nanglianmoi w/o Evan. Kamkhenthang Khuptong a ngawng a bawk a om ziak a damdawi a ki-enkol lellel, hoihtak a hong damsiangna ding in thumpih ni.
9. Rongchingri 5km a om Rohila Tokbipi Khristian a kipiak lunglut mahmah, kipeleh a pa siampu ahi a a thangpaih gamtat ding a ngaihtuah chiang a lauhna toh kipekhe ngamlou thumpih ni.
10. Nidang a thil hithei ngeilou ding bang a lang Langetso, Arthem Adong, Arlong Pharla, khuate ah lut in tangthupha va kigen theita, kong hon honsakpa Pathian ahi a, chi kituhte ahong pou ngeina ding in thumpih ni.
11. Khristian hih lunglut, Paklongkam area a om Saret Kro, Phunem Tokbi, Sonsing Singnar, Mensing Ingti, Babu Kro, Babu Tisso, Longsing Kro, Komol Kro, Kangbura Timung-te ading in Pathian kilakna ngen in thumsak ni.
12. New Langrik a om nu Rekha Teronpi leh Rongchingri a om Sarteh Rongpi-te, kal a suang om, sum neihlouh ziak a at theihlouh a om Pathian in atlouh a leng hihdamthei ahihman in Pathian hihdamna khut ngetsak ni.
13. Dengaon a om Rajen Hanse leh a inkuante Khristian lunglut mahmah, kipiakkhiak ding haksatna neilai hia kithei a laklohtak a om, Pathian lam a chiangtak a hong kipiakna ding un thumpih ni.
14. Octorber 17-20, 2018 sung Workerte zite leh Orden Upa zite hotdamna Camp field in a saina ding ah ahun leh ni thu, sum-le-pai thu a bangmah buaina omlou a zoh ahih theihna ding in thum ni

C. DHEMAJI MISSION FIELD:
1. KIPAHTHU GENNA DING.
1. Field in masawn mahmah hi-a theih ahihlai in setan inleng lam chi tuamtuam ah panla in hon sukbuai sawmsek hi. Himahleh, buaina neuhneuh omte thumtute thumpihna tungtawn a sukveng theih zel a om ziak in kipahthu gen ni.
2. Evan. Gounemlian in Dimapur a CLHTC Phase-II training chidamtak a hon zoh theihnawn ziak in kipahthu gen ni. Aman Oct 2018 in final Phase sunzom ding in Dimapur zuan nawn ding chih ahi.
3. Tu kha sung in semtute tungtawn in Pathian in gingthak mi - 3 hon pia a, amauten Pastor. S Thangbiakmang khut ah Baptisma tang uhi. Amaute ziak a kipahthu gen kawm in gingtu muanhuai hong hihna ding un thumpih ni.
4. Miss Dinesori Taid, Moruhoti a i gingtu gilpeng nat ziak in operation kibawl hi. Upa L Nangthiankham in Rs 5,000/- in huhna bawl a damloute kipak mahmah uhi. Pathian kiang ah kipahthu gen ni.

2. THUMNA POINT DINGTE
1. Tulai in area kekletna ding station thak kizong lellel hi. Pathian in mun kihong leh mission pawl dangdangte’n ana sawkthang gawplouhna mun hon piakna ding in thum ni.
2. Dokhinchapori mun a i gingtu, Mr. Deepak Doley-te a omlouh kal un, a Inn nuai uah kuahiam in Jadu Matar (Kibumna) va koihsak uhi. Huai tuh sabak leh bangbang hiam kibumna ding a kibawl ahi chi uhi. Saptuamte’n anngawl thumna a neihzoh un mei in haltum uhi. Amau innkuan ginna a hong hat semna ding uleh dawi leh kau nasep apan gingtute a bitna ding un thumpih chiat ni.
3. Dunaguri mun ah biakin gam neitu in tuahkhe ding a hon chih ziak in Mr. Devojit Kutum gam, kum-5 sung ading a kilemna bawl ahih toh kiton in biakin lui phelkhiak a om in FS in amun thak ding ground breaking bawl in nasep panzui ngal uhi. Biakin thak semtute makaih in bawlthak khinta uhi. Pathian pina toh buaina omlou a zattouh ahih theihna ding in thumna in delhzui chiat ni.
4. Amguri biakin huihpi mutsiat tunding nawnna mun ding toh kisai hungaih ahih nung in, amun ngeimah a tunding nawn ding a panlak ahi. Hiai biakin bawlna ding toh kisai in (i) Mr. T Thangthianmung, Manager, Allahabad Bank in Rs 2,000/- (ii) Sepoy khat in Rs 4,200/- (iii) 5th Assam Regt. Church in Pastor Rawna Kawpsiam tungtawn in Rs 30,000/- hong lut a, thupina Toupa i pia hi.
5. Tulai in Kapurdwa area damlou thumpih ding omte naktak a bohhuan ahi. Mrs. Sorne Kaman w/o Mr Dorne Kaman, mi bum ziak a kum-10 lam zawngkhal a om ban ah Doctor-ten a damdawi ding omlou chi a beidong uh. Thumna tungtawn in hong dam in a inkuan un Jesu Khrist sangthei ta uhi. Mr Lombit Ngatey leng khena a damlou thumna tungtawn a hoihlam manoh in Jesu Khrist sang theita, amah a zi in khe-na mah a a sihsan ahi. Mrs Numal Chintey inleng khaniin paai in Puja dek chiang in buaidiak hi. Amah leh a inkuanten leng Jesu Khrist sangthei uhi. Amaute hun lemtang masa a baptisma piak ding chih ahi. Setan tung a vualzohna i tan zel theihna ding in thumna in phawkchiat ni.
Dhemaji Field in lohching leh masawn zel a theih ahihlai in setan leng naktak in hong kigolh hi. Native Worker a i na zat uh Mr Monikanto Kutum in kiphinna tuamtuam hon nei in, atung a vaihawmte a thuman theihlouh ban ah meeting ding tanpha sapzoh hilou hi. Ni 07/08/2018 in i native worker pa un Evan. M Daizachin, tem in a khut satsak in Doctor-ten mun-10 ah khuisak uhi. Police ah FIR thehlut himahleh case sangtak neih i deihdan ahihlouh ban ah ngaihdamna/hotdamna i thutawi ahih gige man in Date 9/08/2018 in Police Thana, Dhemaji ah kilemna bawl theih in om hi. Hichibang thiltung i tuah nawnlouhna ding un leh lemna taksuak hong hihna ding in thumna in phawkchiat ni. Hiai incident ziak a Dhemaji mun mahmah a va delh EBC HQ sik in EBCC Guwahati, EBCC Itanagar ban ah, Police-te toh kihouna dia amun mahmah a makaih Mr S Thanglianmang. 2nd in Command, ITBP, huan Dhemaji Police-te a poimoh bang a agal apan phone sak Upa M Thanglianmang Dy SP/CBI, Pu Luanzamang Dy, SP/CBI ban ah Guwahati-te hohna ding Road Clearance hon bawlsak Pu Eugine. T Chinkhansiam DCIO/IB leh mun chih mualchih a thumpih tengteng tung ah Field kipak petmah hi.

D. MANIPUR MISSION FIELD:

KIPAHTHU GENNA LEH THUMNA A THEIH DINGTE
1. Toupan August kha sung in Gingthak – 13, Sawm-a-khat pethak – 07, Mimal a Missionary vakna pia 04 leh baptisma tang 02 hon piakte ziak in kipahthu gen ni.
2. Field in mass counselling/Group evangelism a neih zelte uh lohching tou zel in Jesu Khrist Hondampa ding a sangthak muh theih ding om zel hi. Speaker-te leh Counsellor-te Pathian kha ompihna ngetsak ni.
3. Semtute’n ginglou mi houpih a neih lelte un Khalam hotdamna ahon neih theihna ding un thumsak ni.
4. FWC in field a saptuam omte vehna neithei zel uhi. “Nang vualzawlna hi in” chih thupi pansan in Pastor-te leh FS in thugenna hun zang zel uhi. Hiai in kimeltheihtuahna leh kipumkhatna hoihzaw a tutna ding in thumna in phawk ni.
5. Field sung ah semtu hiin gingtute lak hitaleh buaina tuamtuam omthei gige hi. A kholdiak in Robindro a inn ding bawlsak zoh ahihnung in a tate 2 school fee, uniform leh adangdang niteng poimoh ngaihtuahsak ngai in om hi. Tua ban ah, Ranita mitdel atate 2 school kaina bangkim a etkai ngai in om ua, Jiribam a semtu LC Seitamjit kipiakna thupitak ziak in tunitan kikemthei uhi. Pathian ompihna, chidamna leh khalam a Toupa kithuahpihna ngen in thumsak ni.
6. Casual a semtu tangval Kh. Tomba, Langol; N. Joshua, Thanga salam, Ch. Shitaljit, Toubul leh N. Hemantate’n dansiangthou a koppih neih sawm in panla lel uhi. Amaute’ a inkuante uh Khristian hiveklou ahihman un, haksatna tuamtuam tuakkha zel uhi. Toupa gam nasepna a, panpihtu ding hoihtak Toupa’n a piak chiat nading un thumpih ni.
7. Field Office lam ding toh kisai panlakna paihoih tou zel hi. Pathian in mistry fel leh ginom hon piak a, buaina bangmah omlou a lampat a, lamzoh a hong hihtheihna ding in thum ni.
8. Field nasepna Tangthupha gen a khamangthangte mat kia hun lou ahihman in biakkhawmna, kivaihawmdan leh saptuam piching dia khalam leh salam a don/kepna ahihman in semtute taksap, ahunhun a Toupa’n a piakna ding in thumsak ni.
9. Semtute Toupa’n a ompih a kha teng a khamangthang mat nei a, baptisna tang ding mu a, sawm-a-khat leh missionary vakna petu ding kitatsat lou a muh ahihtheih zelna ding in Pathian kiang ah thumsak ni.

MINISTRIES REPORT