Amasa in Gammial Aw Simtute tengteng i Toupa leh Hondampa Jesu Khrist min in chibai aw. Toupa hoihnate i tang a kumkim bang zang khin theinawn a tuni chiang honpi man in kipahhuai i sa hi. Semtute tungtawn a Toupa’n gah hon piakte leh sep-le-bawl omte hiai anuai a bang in ennawn leng i chi hi.

A. HIMALAYAN MISSION FIELD
(alui a Nepal Missions Field chi a i na theih)

1. Haldibari Biakin Honna Report:

June 20, 2018 in Haldibari Biakin thak liklek honna Rev S Vung Minthang, General Secretary, EBC in nei hi. Hiai hun in Director of Missions ban ah biakin bawlsaktu Lamka North Division apan member 5 in uap uhi. Hiai nasepna Mr. Khamson leh a lawmte mi 8 in zingkal beltak apan in khaw-mui dong sem in, ni 26 sung in Biakin kilawm tak hon tunding sak uhi. Biakin bawlna a senna tengteng Lamka North Division in sengvek hi. Thupina Toupa i pia hi.

2. Basbari Biakinn Honna Report:
June 20, 2018 in Basbari Biakin thak honna Rev S Vung Minthang, General Secretary, EBC in nei hi. EBC HQ deihsakna ziak in Biakin kilawm tak neita uh ahihna ah memberte kipak mahmah uhi.

3. Lamka North Division In Field Veh:
Lamka North Division apan member 5 ten Haldibari Biakin honna program zoh, ni 2 sung ki-hih awngthawl in Field sung a Biakin dang 10 vehna nei uhi. Saptuamte kiang ah thilpiak leh thumna hun vazang zel ua, veh a omte kipak in, khamuang tuan mahmah uhi. Hiai bang a Saptuam hong veh zelten Semtute leh Saptuam mite tha guan mahmah ahihdan report kimu hi. Toupa phat in om hen!!

4. Basic Bible School Report:
June 18, 2018 nitak in Basic Bible School honna Pastor Padam Thapa, Area Pastor in nei hi. Hiai ah sintu mi 31, khua 13 a kipan in paikhawm ua, Budhabare NEBC Biakin ah ki-kulh in ni 15 sung subject tuamtuam 11 sinkhawmna nei uhi. July 2, 2018 nitak lam dak 4:30 PM in Hasotna leh Certificate hawmna, banah kithuahkhawmna hun nuamtak zang ua, khotual Saptuamte toh a khakna hun zang khawm uhi. Sinsaktu in Semtute pang ua, Thupi tuamtuam: Hotdamna, Thugen dan, Khasiangthou, Tumging, Khristian Khangthu, Laisiangthou, Christian Ethics, Saptuam Kivaipuak dan, Gindan, Missions leh Nungzuihna chihte sinsakna pia uhi. Phatuam mahmah ding a lamet ahi.

5. General Secretary leh Director of Missions in field pha:
Budhabare NEBCC Biakin ah Himalayan Mission Field sung a Upa leh semtute leh Basic Bible School a sinlai naupangte toh June 21, 2018 in Seminar Session 3 General Secretary, EBC leh Director of Missions in makaih in hun manpha tak zangkhawm uhi. Hiai hun in Field maban, sum saina leh kizopna a pilvan a poimohna leh Field min kikheng tungtang leh semtute hasotna leh tha-ki-gotna hun manpha tak zatkhawmna nei uhi. June 22-24, 2018 sung Sikkim Field vehna va nei ua, hiai hun in semtute sepna station mun 3 amun mahmah ah vasik ua, mailam a sep ding dan tangpi genkhawmna leng nei uhi. Septheihna ding a lam-et, Soreng leh Geyzing mun leng vapha uhi.

6. Ektin biakin honna report:
July 7, 2018 in Ektin NEBC Biakin thak honna Rev Lalmalsawm, Field Superintendent in nei hi. Hiai biakin March 6, 2018 a lampat ahi. Amun Native Evangelist Harka Rai leh a innkuante’n ahon thoh uh ahi. Biakin honna hun ah khokiim apat mipi tamtak paikhawm ua, biakin sung a leng tazoulou khop in uaptu om hi. Hiai tan honpi Pathian min i phat ahi.

7. Kipahthu genna leh thumna dingte:
1. June 2018 khasung in Pathian in Gingthak mi 23 leh Baptisma tang mi 7 a hon piakte ziak in Pathian kiang ah kipahthu gen ni. Khalam a ahong khanlet zel theihna ding un thum zom lai ni.
2. Basic Bible School, Budhabare NEBCC lamzang tak a zatzoh ahihtak man in kipahthu genni. A tel mi 31 te’n manpha tak-a a thusin khiakte uh azat theihna ding un thumpih ni.
3. Jorethang station, Sikkim Mission Field ah i missionaryte teenna leh kikhopkhawmna a zattheih ding inn kichiantak i muh man in kipahhuai i sa a, kipahthu Pathian kiang ah gen ni.
4. Sikkim Mission Field a Takuthang station ah Biakin mun ding gam kichiantak piak a i om ziak un kipahthu gen ni. A gam leina ding process pat ahi a, lamzangtak a leikhiat ahong hihna ding in thum ni.
5. Padajungi staff Quarter leh Khedok Biakinte a taangpi zoh hita. Hiai tan honpi Pathian kiang ah kipahthu gen ni.
6. Himalayan Mission Field Office leh Quarter ding Buttabari mun a inn kichian leh hoih mahmah i muhna ding in thumni.
7. Bungrung a biakin kibawl lel lamzang tak a bawlzom ahihtheihna ding in thum ni.

B. KARBI ANGLONG MISSION FIELD:
I. THUTUAMTUAM:
1. Kivehtuahna: Field Baptist Dorcas Fellowship thupukna bang in June khasung in Langrik Dorka Pawl in Dengaon, Paklonglam Dorka Pawl in New langrik, Tari Adong Dorka Pawl in Bithilangso vehna nei uhi. Hiai kivehtuahna ah Dorkate amau kia hilou in Bialtu Pastorte, Missionaryte toh kizui in thugenna hun zang in pang ua nuamsa mahmah uhi. Hiai kivehtuahna tungtawn in kichimatna hoih zaw leh sa leh kha a kinaina hoihtak gahkhia hi a theih in a om a phatuam mahmah hi. Field Sub Office in leng June 3, 2018 in Nihang Langso Fellowship vehna AFS makaih in nei ua Pathian thu a hasotna leh thumsakna vanei uhi. Hiaiten gah manphatak hon suah ngei lamet ahi.
2. Thilpiak kimu: 5 KM Fellowship a om Mr. Mohesor Ronghang, gingtu ahong hihna sawt nailou himahleh awlmohna toh, Fellowship inn a zat ding amah mimal in kiphaltak in Alluminium Baltin 3 leh Bel 2 leisak hi. Huan ginglou mi Mr. Nihang Ingti inleng Biakin tutna ding singtum 30 pieces a thawn in pia a, Fellowship memberte’n singpek ding in at ua, Cubic 28 pha hi. Hichibang a mi kiphal Toupan ahon piak kipahhuai mahmah hi. Tuin hiaite zangin Biakin tutna bawl ding dan malak sawm ahi. A hong lohchin ngeina ding in thumna ah phawk ni.
3. Door to Door Gospel Campaign: Evan. Jamkhanmang & Evan. Jacob Rongpi in June 8-11 leh June 13-15 sung EBCC Bithilangso leh EBCC Bisarpo ah inlut chialpina programme nei uhi. Hiai Programme phatuam leh manpha mahmah hi a theih ahi. Gingtu dan a i neih tampite’n Hotdamna omzia theiloupi khawng ana hiphing ua, tampite’n kitheihthakna nei uhi.
4. Native Workerte ading Seminar: June 29, 2018 Field Head Office mun ah (a) EBC Doctrine, (b) Modern Principle of Counselling & (c) The Effective life of the Counsellor chih thupite pansan in Seminar neih in om hi. Hiai hun in Evan. Jamkhanmang, Evan. Jacob Rongpi & AFS te’n sinsakna pia uhi. Phatuam mahmah dia lamet ahi. EBCC 5 KM ah leng “Christian Giving & Ethics” chih thupi a nei in seminar neih in om hi. Evan. Jamkhanmang & Evan. Jacob Rongpi mah sinsaktu in pang ua, hiai a kihelkha kuapeuh in nuam leh manpha sa chiat ua kipak mahmah uhi.
5. Bial BDF toh Felowship: Bial BDF in Year plan a a neih, Field sung-a semtute toh kithuahkhawm ding chi a a sawm bang un, June 30, 2018 in EBCC Diphu Biakin ah Fellowship nuamtak nei thei uhi. Hiai hun ah semtute ading a hasotna thu manphatak a genpih ban uah worker teng kiang ah Bedsheet hoih leh kilawm mahmah khat chiat pia uhi. Hiai hun a paikhawm semtute ading a thumsakna FS in nei hi. Hiai ni mah nitaklam in Field a pan Bible zil a kuante toh Bial BDF in Fellowship hunkhat nei nawn khawm uhi. Hasawtna thu manphatak a genpih ban uah hanthawnna thilpiak `1000.00 chiat pia uhi. Sinlai naupangte awlmoh leh veipha makaite ziak in Pathian thupina i pia hi.
6. GBC Student Summer Minisrty: Field akipan a GBC a kai student te, innlam a suty a paite deihthoh leh hawmthoh tak in Ministry Programme Field in bawlsak hi. Programme bawl bangbang June 23, 2018 apan July 1, 2018 tan Pathian huhna toh lohching tak in zoukhia vek thei ua kipahhuai mahmah hi. Ministry a neihna uh tungtawn a experiences neita ding ua lamet ahih ban ah veh a om saptuamte ading a leng phatuam mahmah ding a lamet ahi.
7. Field Development Work: Headquarters deihsakna leh Field Central Working Committee malakna in Hidim Teron ah Quarter khat lam in om hi. Zoh siang ahih hun in Toupa kiang ah latna nei in semtu Evan. Manzarual lutngal ding hi. Duhthusam bang-a a pai theihna ding in thumna ah phawk ni.
8. Manja Biakin bawlna nasep paizom lel: Hiai biakin lamna ding Headquarters in huhna apiak ban ah bial saptuamte’n bangzah zah hiam athoh khawmte uleh mi kiphal Upa Jamdouthang & family leh Mr. Thang Paul & family te’n Pathian min a a thohkhawmte ua pan a kibawl ahi. I pankhawm siausiau nate uh tungtawn a zoh khiak a hong hihpah ding lamet ahi. Duhthusam bang a a pai theih leh August kha sung ngei a honna neih ding a gel ahi. Hoih leh kilawmtak a zoh ahihna ding in thumna ah phawk ni.

II. THUMNA LEH KIPAHTHU GENNA DINGTE:
1. Field sunga Saptuam schoolte’n Half Year Exam hoihtak in zou thei, kipahthu gen ni.
2. Mrs Kachhai Hansepi m/o Evan. Moses Teron khalui a damlou gim mahmah himahleh Saptuamte thumpihna ziak in hoih/damdeuhta kipahthu genpih ni, a damsiangna ding in leng thumpih lai ni.
3. Field sunga Door to Door vehnate Program tungtawn a Hotdamna toh kisai kimuthak leh kitheichetna thak Pathian in honpiakte ziak in kipahthu gen in, Field sung a Saptuam memberte gingtu muanhuai a hong hihchiat theihna ding un thumpih ni.
4. Evan. Jamkhanmang taksa lam damtheihna kisam, hatna thak leh damna toh a mohpuakte a sepzoh theih zelna ding in thumpih ni.
5. Pastor T. Pauzalian leng taksalam hatna kisam mahmah, thumpih ni.
6. Bokulia Area sung, Langbung dingpi kichihna mun a, Khristian lunglut mahmah Langbirik Timungte innkuan leh Mrs Josna Rongpite adin, a lunglut bang ua ahong kipiak theihna ding un thumpih ni.
7. Mr Sanjoy Taro, Khristian ahihna ziak a khosung a tengthei nawnlou ding chih ahih ziak in, a tungtang ngaihtuah in om a, tuate’n aginna hatlousak thei ahihman in thumpih ni.
8. August Khasung in, Bokulia Area, Sumpho Adong mun pansan a Evangelistte’n group bawl in Ministry neih sawm ua a lohchinna ding in thumna in phawk ni.
9. Field sung a sungkhoh/Santeen hii leng om, himahleh damdawi innte a ki-enkol in hiai ziak a sihna manna omlou Pathian kiang a kipahthu gen ni.

C. DHEMAJI MISSION FIELD:
1. Pathian in tu 2018 kumkim bang hon zangzou sakta a, hiai tan a honpi man in kipahthu gen ni.
2. Tulai in Missionaryte’n amau munchiat ah challenges tuak nak thei mahmah uhi. Tua challenges-te pawlam akipan hilou in gingtute lak akipan, kituahlouhna, kihazatna leh salam hamphatna ding kia lunggulh luatna ziak hideuh tangpi hi. Amaute Pathian’ Khasiangthou thawpna toh hon etkol leh makaih zel theihna ding un, FS leh a seppihte thumna tamsem in phawkchiat ni.
3. June kha sung in Pityangchapori khuate’n Dobur Puja (Kho siansuahna) a zatna uah, khosung mi hoihloute’n i biakinn hon na suksiat sak in window glass mun-2 susia in, kongkhakpi kalhsiat sawm in soisa zek uh. Semtute lungkim lou ahihman un kho hausa ban ah khosung mipi tamtak leh tua mun a semtu Evan. H Khankhual Team makaih in kihouna neih in om hi. Biakin susia a ngoh mi-2te Mr Durjan Letum s/o Kuttak Letum leh Mr Prasad Payeng s/o Mr Sumit Payeng te Rs 1,000/- liausak uhi. Hiai sum deih tuntunna hikei mahleh maban a i biakin a muhsit louhna ding ua liausak hizaw uhi. Semtute’n a sum pesiang ding a a nget dungzui un mipi mai ah kipiaksiangna neingal uhi. Tuabang thil deih huailou i tuah nawnlouhna ding in thumna in phawk ni.
4. EBC Headquarters huhna zang in Lachangaon biakin leh toilet bawlna pai lellel hi. Lamzang tak a zohsiang ahihna ding in thumna in phawk chiat ni.
5. July 13, 2018 in Pityangchapori ah semtu Quarter honna Mr. L. Suanthang Ngaihte, Commandant, ITBP in nei a, Field Superintendent in Pathian kiang a latna nei hi. Hiai hun Missions Co-ordinator in hong uap kha thei a, nuamtuam mahmah hi. Quarters honna program zoh in semtute leh Co-ordinator in kithuahkhawmna hun manphatak zang uhi.
6. Field a i sepna mun khenkhat ah gingtu a kipe nuam om zeuhzeuh mahleh, sungkuante leh tanaute phallouh ziak a kipe ngamlou bangzah hiam om uhi. Amaute’n Jesu Khrist hon muhchian ua thupukna kichiantak hon lak theihna ding un thumpih ni.
7. July 11-13, 2018 sung Finance Department, EBC Headquarters in Field ah account training programe va neihpih uhi. Hiai hun ah Missions Co-ordinator leng kihel a, gelsa bang a program zat ahih theih ziak in kipahthu gen ni.

D. MANIPUR MISSION FIELD:
KIPAHTHU GENNA LEH THUMNA DINGTE:
1. Immanuel English School, Thiyam konjin Pathian ompihna toh hoihtak in pai thei zel hi. Sum-le-pai thu ah leng hong kitoudelh theita uhi. Pathian kiang kipahthu gen ni.
2. Toubul a biakin kibawllel saukhop zoh in omta hi. Buaina omlou a zoh a hong hih theih nading in thum ni.
3. Toupa’n June kha sung in Gingthak – 26, Sawm-a-khat pethak – 11, MMV mi 1 leh baptisma tang mi 9 a hon piak ziak in kipahthu gen ni.
4. Mass counselling mun 10 a neih ding leh kha mangthang 100 tukum sung a mat ding chih field in target in nei a, a tup-le-ngiim bang ua lohching leh gahsuah tak a hon septheihna ding un thumpih ni.
5. Semtute’n seekers/contact a neihpih lellel uh hiaite amin min uh lou in thumsak ni – Rajesh, Bengky, Samou, Kajon Devi, Thadoi Devi, L. Amita, Th. Kenarjit, L. Jiban, L. Arun, Rajen Singh, Meijao Singh, Nandhoni, Sonalika, W. Megha, W. Inakhunbi, L. Besajit, Gopal Singh (16). Amaute’n semtute tungtawn a Khalam hotdamna a hon neih theihna ding un thumsak ni.
6. Semtu Salam Hatlouhna neite; Surchandra, Naranseina a sem in Kalna nei in puang thei zel hi. Pastor Manglemba, Nambol stone case in kidney bladder damdoi ne lel a, tua banah Suranjoy, Sabantongba inleng awmna a neih hong damsiangna ding in thumpih ni.
7. Field in semtute kitheihsiamna leh pankhawm semna a om theihna ding ngimna in Pastor area-wise in mid-month prayer fellowship neih gige sawm uhi. Pathian vualzawlna toh a hong masawn theihna ding in thumna in phawk ni.