Amasa in Gammial Aw Simtute tengteng i Toupa leh Hondampa Jesu Khrist min in chibai aw. I mission fieldte a Toupa’n semtute leh a mi Siangthoute thumna tungtawn a gah hon piakte hiai anuai ate ahi –

A. NEPAL MISSION FIELD:
1. ANGEPA BIAKINN HONNA REPORT
Mr. Harkaraj Rai (i gingtu khat) un Angepa Biakinn mun ding a dunglam 25ft. a sau leh a vai 14ft a lian hon piak lamzoh ahih toh kitawn in February 16, 2018 zinglam dak 11:00 in Area Pastor Paukhankhup in honna nei hi. Program Miss Kamala Rai in makaih a, Mr. Harkaraj Rai in mipite vaidawnna nei hi. Local BYF in biakna leh phatna makaih ua, Laam lahna Chyangthapu BYF, Bungrung leh khotualte’n nei uhi. Area Pastor in Pathian thutak gen hi. Financial report Chandra Bahadur Rai in pia hi. Hun khakna FWC Elder Jonah Rai in zang a, mipi 100 val in hiai program uap uhi.

2. MUKTI CAMP REPORT
February 20-22, 2018 sung Atithi Sadan, Birtamode ah Mukti Camp (Hotdamna Camp) neih in om a, Evangelist T Damkhothang thugentu ahi. Semtute leh saptuam member 89 tel uhi. Hiai hun
chialpina leh semtute chialpi hih dingdan kisinsakna a zat in om hi. A telte’n phattuam pih mahmah ua, camp hun sung in hotdamna sang mi 30 val om hi. Toupa’n thupina tang hen.

3. EXPOSITORY PREACHING TRAINING A KIHEL:
NEBC a semtu mi 9te Schools of Biblical Training, Nepal in Nepal Ebenezer Bible College, Kathmandu a Expository Preaching/Teaching training February 13-16, 2018 sung a neihna uah va kihel uhi. Hiai program ah Saptuam tuamtuam 20 apan tamkhop paikhawm ua manpha sa mahmah uhi. Crosslinks kichi pawl in Saptuamte khanna ding awlmohna ziak a, semtute adia hiai bang training a sai zel uh ahi.

4. KIPAHTHU GENNA LEH THUMNA DINGTE:
1. February 2018 khasung in Pathian in Gingthak mi 6 leh Baptisma tang mi 2 hon piakte ziak in kipahthu gen in Khalam a hong khanzel theihna ding un thum ni.

2. Mukti Camp leh Kathmandu a Training lohching leh manphatak a zoh ahih man in kipahthu gen ni.

3. Field working Committee thupukna bang in semtu 2 lakbeh hi ua, Elder Parsuram Dangi, Hwaku a sem ding, leh Evangelist Subhas BK, Shantinagar a sem ding ahi uh. Kipahthu gen in lohching tak a a hon septheihna ding un thumpih ni.

4. Semtute tate, a ngek deuh bang, School leh College kaitate bang, nulepa toh omkhawm theilou a, laizilna ziak a kikhen kha omte thumpih ni.

B. KARBI ANGLONG MISSION FIELD:
1. THU TUAMTUAM:
1. Gingtu Kibehlap:
Thum mite thumna leh Semtute malakna tungtawn in February 2018 sung in Pathian in gah muh ding hon pia hi.
(a) Paklongkam Area, Ingti khomi ginglou inkuan khat Khristian a hong kipiak ut chih thu bohzui in bialtu pastor leh Evangelistte’n thumna toh nasatak in counselling neihpih ua, Pathian kha nasepna lamdangtak hong kilang in, mi 4 in Hotdam kitheihchetna nei ua, Feb 25, 2018 in Bialtu Pastor, Pastor Manthing Hanse in Baptistma tangsak hi. Amaute khalam a hong hattouh zel theihna ding un thumpih ni.

(b) Mijung Area a Waisong Rongkhelan khomi inkuan 5, member milip 36 velte’n hun sawtpi Khristian minpu a a na om ban uah keplouh a na omte’n EBC a om a lunggulh thu uh zak ahihin bialtu Pastor, Asst. FS leh Evangelist-te kithuah in theih bangbang in bohzui uhi. Milip 36 bang pha ua, Counseling naktak a neihpih ahih nung in tamtakin Hotdam hih kitheihchetna nei ua February 7, 2018 in piching 10in bialtu pastor Joel Hanse tungtawn in baptisma tang uhi. Kipahthu genkawmin khalam a akhantou zelna ding un thumpih ni.

2. Fellowship Thak Ding:
Waisong Rongkhelan khomi inkuan 5 (mi 36) te EBC a honglut uh toh kiton in February 7, 2018 in Fellowship thak dinkhiak hita hi. Hiai hun ah Asst. FS makaih in bialtu Pastor leh Evangelist bang zah hiam ban ah Tari Adong saptuam member bangzah hiamte va kihel thei uhi. Hiai hun ah Saptuam paidan sinsakna Asst. FS in a neih ban ah makai ding Committee Member guanna leng neihpih ngal hi.

3. Local Committee Camp:
Saptuam khanna leh masawnna ding a makaih theihna ding in Khalam a Pianthakna mah poimoh chihna toh Feb. 13-16, 2018 sung Field Saptuam a Local Upa Committee Members Camp New Langrik, EBC Biakin ah neih ahi. Thugenna Evan. H. Jamkhanmang leh Evan. Jacob Rongpi in zang ua, mi 50 vel paikhawm thei uhi. Pathian kha vehna tangin piangthak mi 7 leh halhthak 29 vel chiamteh theih in om uhi. Hiai mite puknawn mailou a, midangte awlmohna leh veina nei a mailam a hon not zelna ding un thumpih ni.

4. Workers’ Renewal Retreat:
Karbi Anglong Mission Field in semtute kibulphuhna hihkipthak poimoh masa in February 2017 a EBCC Dimapur a ‘Workers Renewal Retreat’ neih ding in geel mahleh Nagaland buai ziak a neihtheihlouh Pathian in hun hoih hon pia in Rongchingri Diphu ah February 20-23, 2018 sung Rev. N. Pumsuanmung leh Evan. Upa T. Khupzatun makaih in lohchingtak in kizang hi. Hiai hun ah Worker-te (Regular & Casual) kimtak in kihel theivek ua, a tel khempeuh in nuam leh manpha sa chiat uhi. Hiai Camp a sum senna tengteng Bial Baptist Dorcas in sponsored vek ahi.

5. Saptuam leh Fellowshipte Kepna:
Field sung a Saptuam dingsate leh Fellowship dingsate dinmun kankhe ding leh enkai ding a mohpuakna piak a om, Evan. H. Jamkhanmang leh Evan. Jacob Rongpi, saptuamte veh a a kalsuanna uh lohching zel hi. Mi tampite Hotdamna kibulphuhna toh kisai chiangloute zongkhia in houlimpihna (counseling) neihpih zel ua lohching mahmah hi, thumpih zel ni.

2. THUMNA LEK KIPAHTHU GENNA DINGTE:
1. Jiteplong Fellowship Member, Sumpho Adong khua om Mr. Sonjoy Taro leh a inkuante, amau kia huai khua a gingtu omsun ahih man un a ginna ua kiptak a ding a mailam a akalsuan zel theihna ding un thumpih ni.

2. Disama Area a om Khoya Ingti leh a inkuante hun bang tanhiam paita apan Khristian lunglut hinapi kipe lemtanglou a om nilouh, tua Khristian suakta ding ka hi chia a kipuanna bang a a taksuah theihna ding in thumpih ni.

3. Evangelist i koihna areate (Disama, Mijung, Rongchingri, Patradisha etc.) a ginglou khuate ah Pathian thu zalentak a gen ahihtheih zelna ding in thum ni.

4. Fellowship dinthakna, Waisong Rongkhelan ah kikhopna mimal inkhawng ah hihtheih dandan a neih in om zel hi. Member 30 val ahih man un hiai dan lemchang gige khollou ding hi. Huaiziak in, biakin a neih baih theihna ding un thumpih ni.

5. February 2018 sung a Gingthak, tuiphum theih mi 19 a hon piakte ziak in kipahthu gen in khalam a a hong pichinna ding un thumpih ni.

6. New Langrik CES in kumlui session a naupang 50 vel nei hinapi, tukum a naupang 110 vel a hong puntouh guih ziak in Pathian ziak a a kim leh kiangte’n hon muang hiding ahih man un kipahthu gen ni. Hiai mite hon muanna manpha leh phatuamtak a zat ahih theihna ding in a enkoltu Evangelist-te leh naupangte adi’n thum ni.

7. Rini Kilingpi taksa hatlou leh damlou a om in, taksalam leh khalam damna a lunggulh leh lamet bang a Pathian in a damsakna ding in thumpih ni.

8. Singnar khua a om, Mr. Babusing Timung leh a inkuante khalam bah petmah, biakna mun leng lunggulh zoulou a, Pathian kha hihhalhna a tan ua, khalam a a hong hat theihna ding un thumpih ni.

9. Tari Adong khuaah i saptuam member laisim theilouten Bible bek a sim theihna ding uh awlmoh ziak in huai khua a om semtuten Adult Education patpihta uh, hong lohchinna ding in thumpih ni.

10. Field Saptuamte Seminar leh Training tuamtuam a poimoh leh taksap bang dungzui ua a hun hun a piak ahih theih zelna ding in thumsak ni.

11. Taksa hatlouhna ziak a ki-enkol Pastor T. Pauzalian i thumpihna uh Pathian in hon dawng a a mohpuaknate semthei leh kalsuanthei zel a kipahthu genkawm in hong hoih zomzelna ding in thum ni.

12. Evan. Kaplun Paite Malaria ziak a khosik a om, damdawi a a ki-etkol nung in tun damsiangta kipahthu gen in, a hatzel theihna ding in thum ni.

14. Kholum kipan dek, damlouhna uang mahmah, semtute leh Saptuamte hichibang lak a bit leh chidam a om theih zelna ding un thumpih ni.
15. Maban a Field BYF Committee Camp (April 10-13, 2018) leh Biakin & Quarter bawl lel leh bawl dingte a hunhun a lohchingtak a zoh ahihna ding in thum ni.

C. DHEMAJI MISSION FIELD:
1. BAPTISMA TANG UH:
February kha sung in EBCC Kapurdwa ah gingthak Nupa kawp-2, Pathian in hon pethak hi. Amaute tenna Inn siansuahna neih ahih zoh in Pastor S Thangbiakmang in Baptisma tangsak ngal hi. Hiai mun kihong lolou a om himahleh, Pathian in thumtute thumna gah hon musak ahih man in a min i phat ahi.

2. MiCoGoJ FOLLOW UP-CUM- WORKERS RENEWAL:
Feb 9-11, 2018 sung Field Office ah MiCoGoJ Follow Upa-cum- Workers’ Renewal program lohching tak a zatzoh ahi. Hiai hun ah Rev. S Vung Minthang GS/EBC in “Kipak kawm in Toupa Nna sem un” (Sam 100:2) pansan in thutak genna hunteng zang a, a tel khempeuh in nuamsa chiat uhi.

3. LACHAN AREA PICNIC FELLOWSHIP :
February kha sung in Lachan Area a saptuam-3 Lachangaon, Bandena leh Dokhinchapori ten Evan. Haukhosiam Guite makaih in Dokin River ah Picnic Fellowship lohching tak in nei uhi. Amau ann nekkhawmna ban ah Bible pansan a competition tuamtuam, Lasakna leh a dangdang a kidemna a neih uh nuamsa mahmah ua, hichibang a kithuahkhawmna in gingthakte tha guan mahmah ahih man in manpha mahmah hi.

4. DIPHU AH FS CONSULTATIVE MEETING:
Feb.16-19, 2018 sung Director of Missions makaih in EBC nuai a field 4 teng toh FS Consultative Meeting leh Field Tour, Diphu a Karbi Anglong a neih ahi. Consultative hun in field te performance report piakna leh Year Plan & Budget- 2018-2019 a ding etkhawmna hun neih a a om ban ah Karbi Anglong a station bangzah hiam hiai hun a paikhawmte’n a mun ah etkhiakna leng nei ngal uhi.

5. KIPAHTHU GENNA LEH THUMNA DINGTE:
1. February kha sung in Pathian in gingthak Baptisma tang Nupa kawp-2 te ziak in kipahthu gen in, Khalam a hong pichinna ding un thumpih ni.

2. Native Evangelist Mr. Harbeswar Ngate in Pathian gam nasepna dia vanzat poimoh Bike leikhia ua, kipahthu gen in vanzat manpha tak a hon zatna ding un thumsak ni

3. Gingtute lak ah taksa damlouhna nei om mun mahmah ua, gingthak damloute’n lungkiakna nei baih mahmah uhi. Damlouhna apan a hongdam pahzel theihna ding un thumsak ni.

4. Field in Class-X (Board) exam mi-11 kinei hi, kipahthu gen in a result uh hong lohchinna ding un thumpih ni.

5. Tukum in semtuten gingtu kepna toh kisai naktak a uangbawl sawm chiat uhi. Tua ding in year plan & target leng amau area chiat ah bawl ua, a sepsuah chiat theihna ding un thumna in delhzui ni.

6. EBCC Itanagar biakin omna mun neipan earth filling a bawlziak in leisai in vukmang ding in kisa hi. Phelkhiak louh theihlouh dinmun a om ahih man in EBCC Itanagar in biakin nei nawnlou ding dinmun in om phut hi. Pathian in mun lem leh hoih A piaktheihna ding in thumpih ni.

D. MANIPUR MISSION FIELD:
KIPAHTHU GENNA LEH THUMNA DINGTE :
1. Toupan khamangthang 6, sawm a-khat pethak 6, Missionary vaktu 3 hon piakthakte ziak in kipahthu gen ni. Toupan gingthak leh thilpiak petute tamsem hon piak beh a, tunung a saptuam kitoudelh a hong hihtheihna ding un thumpih ni.

2. Field a counseling neihpih a om te’n Jesu hondampa a san theihna diing un thumsak ni.

3. The 6th Annual Youth Gospel Camp 2018, Feb 2 – 6, 2018 sung Thamnapokpi a kinei Pathian ompihna toh lohching mahmah hi. Piangthak mi 20 val om ua, Jesu theihpihtu hidia kilatna nei tamkhop om ua kipahthu gen ni.

4. Gingtu mitdel Prakash tunitan biakin kai leh gingtute toh kithuzak ding khaam hilai hi. Amah ginom mahmah a Mimal Missionary vakna di’n Rs. 100/- khateng in pezou gige hi, a nungtolh louhna di’n thumpih zel ni.

5. Jiribam a gingtu Robindro inn ding bawlsak a om kizou dektak a. Imphal Division, Field leh Jiri a om EBC saptuamte deihsakna thupi mahmah hi. Kipahthu gen in, Khalam leh salam a hong hatzel theihna ding un thumsak ni.

6. Field taksap Meitei pau Bible Roman script a kisun ahi. Pathian panpihna ziak a tuailaite simtheih ding Bible neih baih ahihtheihna ding in Thumsak ni. FBYF in nasatak in panlak sawm lel uhi, thumpih ni.

7. Tukum field in Joint Fellowship neih tam ding leh orientation training neih ding sawm hi. Pathian ompihna tang a khalam khanlohna thak nei a pan hon lak theihna ding un thumsak ni.

8. Khamangthang matna nnapi a neikawm a salam biakin, quarters leh adangdang bawlsak ngai gige hi. Pathian ompihna toh Field in office hon neih pah theihna ding un thumpih ni.

9. Damlou a om Ramesh, teacher IES, Activa a tai midang in phutkhak ziak in accident hi. A hong damsiang pah theihna ding in thumsak ni.

10. Tuni chiang in IES Thiyam pai hoih zel a, Student 220 vel pha uhi. Maban a kitoudelh thei a hong hihna ding un thumna in phawk ni.

11. Field sung a mi Bible zil 4 omlelte’n hoihtak a hon zohtheih na ding un thumpih ni.