Amasa in KTZ Simtute tengteng chibai aw. Toupa’n field tungtawn a thil thupi hon muhsak, anuai a bang in enkhawm nawn leng i chi hi.

A. NEPAL MISSION FIELD:
1. GRACE BIBLE COLLEGE A KAI NEPALI STUDENT CHURCH VISIT- REPORT
December 11, 2017 apan January 7, 2018 sung Nepal Missions Field sung a saptuam 21 vehna hun Field apan a GBC a sinlai naupang 6 te’n zang uhi. Amau thupi khat: “Encourage one another and build each other up” chih kuankhiak pih in, Field sung a tanggam saptuamte va tawnsuak ua, Saptuamte’n a na kipahpih mahmah uhi. Saptuam vehna hun ah studentte’n practical ministry experience hun manphatak nei thei chiat uhi. Biakkhawmna hun kia hilou in, gingtute inn vehna leng Saptuam tamzaw ah zang thei uhi. Khualzin lampai sumsennate field in tup sak hi. Amaute tungtawn a Saptuamte hihhat a om a, ava kalsuanna un gah kipahhuaitak a hon tut i lamen a i thumna leng ahi. Toupa min phat in om hen.

2. NATIVE WORKERS ORIENTATION
Field in 2018 sung sem ding Native Evangelist 20 leh Caretaker 1 lathak uhi. January 31 leh February 1, 2018 in amaute hanthawnna, lamhilhna leh nagotna hun zang uhi. Field Superintendent apan in “Guidelines for NEBC Workers”, Pastor Padam Thapa apan in “Intimacy with God Everyday” chih leh Evan. Sangbiakmawi apan in “Interpersonal Skill” chihte pansan in sinsakna manphatak piakna nei uhi. A ni nihna ah NEBC worker dang teng leng tel in seminar nuam tak Evan. Prem Raj Bantawa Rai makaih in “Basics of Preaching” chih leh Evan. Suanboy apan in “How to Prepare for Personal Evangelism” chihte kisinsakna hun zang uhi.

3. BIAKIN LAM DING PROJECT NEIH LELTE
Saptuam omna mun khenkhat ah Biakna ding Inn nei nailou om ua, tuate awlmoh a nei in HQ toh pangkhawm in Localte kimandan zil in tu kum thak ah Field in Project 4 pan lel uhi.

Khedok saptuam, 1993 a kipan himahleh tua biakin i neihlel pen luita ban ah, a gam toh kisai fellou a om ziak in, munthak local saptuam in November 2017 in leikhia uhi. Tuin biakin kilam lel hi.

Ektin Saptuam, 2011 a kipan ahi. Tuni tan mi inn pansan in biakna nei zel uhi. I gingtu khat in awlmoh in ama gam khen in Ruponi 1 Biakin lamna ding in thoh hi. A sum a tuat in huai mun ading in NRS 10,00,000.00 khawng man hi. Ground levelling zouta ua, biakin lam patpah theih ding hita. Hiai biakin pen NRS. 9,15,000.00 bei ding a estimate budget ahi.

Bungrung Saptuam, 2008 a kipan ahi a, tawlkhat hong keniam mahmah mai a, tuin kitungding nawn ding in omtheita hi. Biakin mun ding gingtu khat in hon thoh a, Registration leng bawl zoh hita hi. Tuin ground levelling zouta ua, Baiakin bawlding in kisa lel uhi. Estimate budget NRS. 8,54,000.00 bawl uhi.

Basbari Saptuam 2008 a kidinkhia ahi. Member khang lawmlawm kei mahleh semtu i koih a, hong hoih zel dia lamet ahi. Hiai pen phaizang a om ahi.

4. KIPAHTHU GENNA LEH THUMNA DINGTE:
i) January 2018 khasung in Pathian in Gingthak mi 16 leh Baptisma tang mi 10 a hon piakte ziak in Pathian kiang ah kipahthu gen ni. Khalam a hong khanlet zel theihna ding un thum zom lai ni.
ii) Native Evangelist Orientation Program January 31 leh February 1 a manpha tak a zatzoh ahihtak man in kipahthu gen ni.
iii) Itahari station ah semtu Evangelist Sangbiakmawi i koihthak toh kiton in Fellowship thak February ni 3, 2018 in a na panta uhi. Thumna in delhzui ni.
iv) Pullbhanjeng mun ah leng Evangelist Prakash Rai malakna in tu kumthak akipan in Fellowship thak a na pan uhi. Kipahthu gen in lamzang tak a neihzom zel ahong hihtheihna ding in thumpih ni.
v) Biakin lam ding a kisa Saptuam 4te lamzang tak a lam ahih a, zoh pah ahih theihna ding in thum ni.

B. KARBI ANGLONG MISSION FIELD:
1. GINGTU KIBEHLAP:
Thum mite leh amun a semte pankhawmna tung ah Pathian zahngaihna hong lang muh ding om nawn thei ahihman in kipah huai i sa hi. Dengaon mun a Kaibong Tisso khua (ginglou khua) Hausapa lah hi huai kim a om gingloute’n Siampu a azat uh Mr. Sonuram Tisso leh a zi leh tanu Khristian ah kipia ua, Pastor leh Evangelistte’n Counselling neihpih ua January 14,2018 in Bialtu Pastor tungtawn in Baptisma tang uhi. Hiai counselling neihna hun ah midang ginglou nupi 2 kihel thei ua amau leng Baptistma tan ding a kiman ban uah gingtu hisa mi thumten leng kitheihchetna thak nei uhi.

2. GINGTU HIHNA ZIAK KHOSUNG AKIPAN PAWTKHE DIA VAUNA PIA:
Bokulia Area sung a Sumpho Adong kichihna mun a Gingthak, Unaupa Sanjoi Tarote innkuan Pathian hon piakte, a khua Hausapa un Khristian ahih ziak ua khosung a teng thei nawnlou ding a chihziak in, pawtkhiak ngai chihthu semtute’n azak nung un, heutu bangzahhiamte’n amun mahmah vapha in, hausapa leh a khosung makaite va kimuhpih in houlimna neihpih uhi. Pathian in i thumnate uh hon dawng in kumkhat sung kisakna ding om theilai ding in kihoulem ua, thumna toh delhzui ni. 3. SAPTUAM VEHNA NEI:
EBCC Diphu BYF te’n, Field Saptuamte veh dia Year Plan a neih bang un, Field Superintendent makaihna in January 13-14, 2018 in zan khat giahna ding ration kipuak in, Bisarpo Fellowship vehna nei uhi. Hiai vehna hun ah Pathian thu leh La a kithuahkhawmna ban ah Film lahna leng neihpih uhi.

Huan, EBCC Paklongkam BYF inleng January 2, 2018 in Bisarpo Fellowship vehna nei uhi. Hiai Fellowship gamla deuh a om ahih ban ah, hanthawn ngai mahmah uhi. Saptuam leh Fellowship dingte kihihhat tuah thei zel a omna ding un thumna ah phawk ni.

4. FIELD KISUKHALHNA KHAWMPI A KHATVEINA ZOH IN OM:
Field a saptuamte’n thumna tamveitak a neih nung un, Field mite ading Khalam leh salam kisukhalhna Khawmpi “Prepared to do any good Works” ( 2Tim 2:21) chih thupi pansan in thu le la a kithuahna nuamtak, January 24-27, 2018 sung EBCC Rongali ah a na zang zouta uhi.

Hiai Khawmpi hun sung in Pastor Manthing Hanse, Rev Jameson Bey AFS & Pastor Joel Hanse te thugentu in pang uhi. Zingkal hunte ah Challenge Hour Rev M. Zalian Guite FS in zang a, “Christian & Youths” leh “Christian & Persecution” chih subject te pansan in Seminar paper Elder Dr. Lipson Rongpi & Mr. Unique Terang, Mission Secretary NKBA in sinsakna pia uhi. Hiai Khawmpi hunsung mah in Field level a Department FBDF & FBYF vaisaina toh thu-le-la kitaitehna om hi. Hiai khawmpi zang ding in kho tuamtuam a pan mi 200 val paikhawm ua kikhelahtak in khawmpi zou uhi.

5. BIAKIN SUANGPHUMNA:
Hun sawttak Manja a mun neih ding lunggulh a kinei himahleh lemtang om zok theilou a om pen Pathian in 2017 kumbul in mun lemtang khat hon pia a Quarter khat kibawlzui ngal hi. Huai mun ah hun lemtang masa a Biakin bawl ding tup a nei in, January 23, 2018 in Biakin Suangphum na Upa Jamdouthang, BWC Chairman in nei hi. BWC member a om thei bangteng ban ah tualsung memberte tamtak in uapthei uhi. Biakin bawl ding Bial Working Committee project a hihman in, a lohchinna ding in Pathian kiang ah thumna toh delhzui zel ni.

6. WORKERS’ FELLOWSHIP:
February 30, 2018 (Tuesday) in Workers’ Meet-cum-Fellowship hun nuamtak Field Head Office mun ah nei uhi. Hiai hun ah workerte kimtak in kihel thei vek uhi. Sepna a gahmuh leh thiltuah tuamtuamte mi malmalten a gen ban uah Native Casual Evangelist-te ading a hun masa leh poimohtak ahihman in, Field Superintendent in maban paitou zel ding dan zaksakna, lamlahna leng neingal hi.

KIPAHTHUGENNA LEH THUMNA POINTS:
i) Rina Phangchopi Tari Adong a om, Hotdamna toh kisai houlimpih ahih nung inleng chiang theilou nilouh in om hi. Khatveitei Kha Siangthou nasepna tungtawn a hong chian theihna ding in thumpih ni.
ii) EBCC Basbari a Unau Garo-te amau Saptuam sung a makai thei ding heutu poimoh mahmah ban ah lehkha simthei, gelhthei tawm mahmah Pathian kiang ah thumpih ni.
iii) Field tungtawn a Agam na i sepnate leh i thilpiakte thawnlou ahihdan khateng a gah i muhtheih zelte ziak in kipahthu gen kawm in, Pathian in i sepna khamkham ah gah muhtheih ding a hon piak zelna ding in thum ni.
iv) Salam dam lunggulh a Khristian a hong kipia Jirka Phangchopi, Vikas Rai, Klar-et leh Mohesor Ronghangte ading in Pathian hihdamna ngetsak in, A thupina a hong kilat ngei theihna ding in thum ni.
v) Field sung a Semtute, Kumthak ahihtoh kiton in, Khrist Lalgam keklet a om theihna ding a kipiakna thak toh nakzawsem a kal a suan theihna ding un Salam, Khalam damna ngetsak in thumpih ni.
vi) Pathian in pha a sakleh March 20-23, 2018 sung EBCC Rongali ah Field nuai a Saptuamteng a Dorcas Committee Members Camp leh April 10-13, 2018 a EBCC Paklongkam a Field nuai a teng huap BYF Camp neih dingte lohching leh gahsuah ahih theihna ding in thum ni.
vii) Semtu kuapeuh in plan thak, tup leh ngim thak toh kum thak a zat chiat theihna ding un Pathian kha pina leh makaihna ngen in thum ni.

C. DHEMAJI MISSION FIELD:
1. BAPTISMA TANG UH: January 19, 2018 in EBCC Digolgorah mun ah gingthak mi-3 te’n Pastor. S Thangbiakmang khut ah Baptisma tang uh; huan January 21, 2018 in EBCC Itanagar ah mi-3 mahin FS khut ah baptisma tang uhi.

2. NATIVE WORKERS RE-COMMISSIONING: Jan 15, 2018 in Field a semtu Native Evangelist (Contract) mi-5 te hun bei toh kituak a etkhawmna neih ahih nung in amaute Field Superintendent in re-commissioning (Nnagotna) neihna hun zang hi.

3. WORKERS-TE INCHARGE PROGRAM: Kha paisa in semtu te’n a omna munthak ding chiat uah Incharge lazou chiatta uhi. Incharge kipiakna ah saptuam mipi’n ankuang umkhawmna leh maban paiding dan genkhawmna hun leng zatkhawmna nei uhi.

4. WINTER MINISTRY: Grace Bible College a sinlai naupang mi-5 ten Field sung a saptuam leh fellowship omte bangzah hiam vehna nei uh. Amauten report piakna leh thugenna hun zang ua kipahpih thei mahmah uhi. 5. BUAINA KHENKHAT:
i) Lachangaon khua a om Mr Baskar Pangin kichiin Gov’t apan IAY tungtawn a inn bawlna ding hamphatna ngah hi. Aman a sum ngah teng mistry pekhe mahleh bawllou in a sum zatbei sak hi. Gov’t in inspection a bawlkhak ding uh lau in lungkham mahmah. A haksatna hongven theihna ding in thumna in phawk ni. I gingtu bangzahhiamte’n hiai hamphatna ngahkha uhi.
ii) Dunaguri khua a Native Worker, Jugeswar Charah, a kho tangval zukhamten a Ak guksak in a zi va vua uh, aman leng Dakwakhana Police ah FIR thehlut hi. Khosung makai teng toh genkhawmna nei ua khutkhial lamten Rs 15,000/- liau ding in thupuk uhi.

6. JOINT FELLOWSHIP NEI UH: Jan. 31, 2018 ni in EBCC Namgharia, Pityangchapori leh Amguri-te’n Pityangchapori mun ah joint fellowship lohching leh manpha tak in neikhawm uhi. Biakna program zoh in Brahmaputra luipang ah ann huan in picnic nuamtak in zangkhawm thei uhi. Hichibang program zat gingtu khat leh khat kihihhat tuahna dia poimoh ahihman in manpha mahmah dia lamet ahi.

7. KIPAH THUGENNA & THUMNA DINGTE:
i) January kha sung in Pathian in gingthak Baptisma tang mi-6 (Itanagar-3) hon piakte ziak a kipahthu gen in, Khalam a hong pichinna ding un thumna in phawk ni.
ii) Amguri mun a Evan. T Chinbiakmung seppih theih ding Native Evangelist mi hoihtak, Pathian nasep lunglut mi muh ahihna ding in thumna in phawk ni.
iii) Pityangchapori mun a Mr Sondro Mili in damlouhna- Chibawk nei hi. Amah ading in thum ni. Dokinchapori mun a om Mr Isak Doley (Naupang) leng meima ziak in damlouhna tuak hi. Huan Kapurdwa a Mr Saikia, Mr Monuranjan Patir leh (Tb) Mrs Turesori Taye (Tuap a tui om) te damlou uh. Amaute’n damna hon ngahna ding un thumpih ni.
iv) Field sung akipan Cl-X (Board) exam thei ding mi-8 i neihte ziak a kipahthu gen in, Amaute’n lohchinna kipahhuai tak hon ngahna ding un thumpih chiat ni.
v) Tukum a 1/10 pe thak ding a thupukna bawlthak mi-5 te’n Pathian vualzawlna a tante uh kiphal tak a hon piakzom zel theihna ding un thumna toh delhzui ni.
vi) Assam gam kichi eilak mah bang in pawl kisiam tawm tampi na om hi. Amaute lak a khenkhat field office ah lut in sum ngen uhi. Himahleh semtute’n amau toh kihoulimna nei thei in, tamlou pia in paisak thei uhi. Thumtute thumna ziak a Toupan hon nuse lou ahih man in kipahthu gen kawm in, bitna leh muanna Toupa kiang ah ngen in thumzel ni.
vii) Tukum 2018 in Pathian gam nasepna field in naktak a beih kisawm hi. Semtute’n leng amau area chiat ading year plan/ target bawl in naktak a panlak sawm ua, lohchinna Pathian khut a om ahihman in thumtuten chiklaipeuh in phawkzel ni.

D. MANIPUR MISSION FIELD:
KIPAHTHU GENNA LEH THUMNA DINGTE:
1. Toupan khamangthang 1, sawm-a-khat pethak 1, missionary supporter 03 honpiakte ziak in kipahthu gen ni. Toupan gingthak leh thilpiak petu tamsem, semtute nasepna tung tawn a hon piakbeh a, tunung a field saptuam kitoudelh a hong hihtheihna ding un nasa zawsem in thumsak lai ni.
2. Field a semtu 41 omta. Native Evangelist 8te lak ah 4 in skul ah, 2 in office ah sem uhi. Field in Pau siam poimoh. Pathian in Field taksap leh poimoh ahun hun a hon piakna ding in Pathian kiang ah ngen ni.
3. Semtute’n counseling a neihpihte un Jesu Khrist a’ hondampa ding ua a honsan theihna diing un thumpih ni. Amaute – Somen Singh, Lalita Devi, Thouba Singh, Binita Devi, Bijiya Devi, Hero Singh, Chourajit Singh, Ibohalbi Singh, Ritabala Devi, Roshini Devi, Sundila Devi.
4. Casual a semtu ding a lakthakte, Kha mangthang mantu lohching leh gahsuah ahong hih theihna ding un thumpih ni.
5. Semtu L. Sonkumar pianna nu’ Shama Ongbi in a tangtawn in ding ah hon na paisanta hi. A nutsiat a inkuante adiak in a tapa neupen Sonkumar a sepna buaisak a omlouhna ding in Pathian ompihna ngetsak ni.
6. January 15,2018 in Pastorte, Saptuam paidan leh audit ding toh kisai kisinsakna field in neihpih hi. Hiai hun in Year plan leh goal setting toh kisai sinsakna leng nei uhi. A hong gahsuahna ding in thumna ah phawk ni.
7. Semtu, Missionary vaktu a pangte, ginom tak a hong panzom theih zelna ding un thumna ah phawk chiat ni.
8. Tukum semtute toh Joint Fellowship neih tam ding leh orientation training neih ding field in sawm hi. Pathian ompihna tang a khalam khanlohna thak nei a pan hon lakchiat theihna ding un, thumpih ni.