Amasa in KTZ Simtute tengteng chibai aw. Mission Fieldte a kipan Toupa vualzawlna i tante, anuai a bang in enkhawm nawn leng i chi hi.

A. NEPAL MISSION FIELD:
1. TANGLEPA NEBCC IN PASTOR QUARTER NEITA December 16, 2017 sun dak 10:30 AM in Tanglepa Pastor Quarter honna leh latna Field Superintendent Rev Lalmalsawm in nei hi. Headquarters leh Local Saptuam pangkhawm a bawl ahi. Area pastor station dia amun tel a aom a kipan Local Saptuam in Pastor Quarter bawl ding sawm pah ua, kum 2 gingtute inkhat aluah nung in tuin Saptuam Quarter ah Pastor Ran Kumar Sewa tenglutta hi. Toupa min phat in om hen.

2. KIPAHTHU GENNA LEH THUMNA DINGTE:
1. December 2017 sung in Pathian in Gingthak mi 22 leh Baptisma tang mi 08 a hon piakte ziak in Pathian kiang ah kipahthu gen ni. Khalam a hong khanlet zel theihna ding un thum zom lai ni.

2. Grace Bible College a kai, Nepali student 8 lak ah mi 6 in i saptuam tanggam a om 22te vehna December 11, 2017 apan in January 08, 2018 sung nei uhi. Pathian piina toh nuam sa mahmah ua, Saptuamte’n leng a na pakta mahmah uhi. Kipahthu gen ni.

3. Semtu, munthak a kisuante’n lamzangtak a a sepna uh sunzom a, lungsim thak leh sepdan thak toh, hiamtak a hong kizat theihna ding un thumpih ni.

4. 2018 sung a semtu ding Native Evangelist mi 21 leh Field Office Caretaker ding Pathian in mi a hon piakte ziak in kipahthu gen in, lohching tak a a hon sep zom zel nading un thumpih lai ni. B. KARBI ANGLONG MISSION FIELD:
1. BIAKIN THAK HONNA LEH LATNA:
i) Hidim Teron Biakin: Hun sawttak EBCC Hidim Teron biakin kisiat ziak a kikhopna ding neilou a om nung un, local saptuam in in-lusi a sum kidong in, Biakin mun ding lei khia ua, a kisuk dan un FCW Committeee in a muh chiang in kilawp huai sa in sum om bang bang kaikhawm a Biakin bawl sak ding in thupuk hi. FCWC neih bang bang kaihkhop in a dailouhna teng Head Quarter in huh a Biakin neu feltak khat ni 10 valzek sung in bawl khiak zoh in om thei hi.

Hiai Biakin Honna leh Latna December 15, 2017 in Field Superintendent in nei hi. Hiai hun zatna ah FCWC member kihel thei teng leh local saptuam memberte ban ah Evangelist a om thei teng paikhawm ua, tua hun in local Saptuam in amau khut mahmah a a bawl uh sang leh singpi limtak nekkhawmna leng nei uhi.

ii) Rongchingri (5Km Lumding Road) Biakin: Pathian in i thumnate uh hon dawng in, Rongchingri mun ah member kibehlap thei zelin om hi. Mi in a Fellowship neih lemtang gige lou ahihman in, local Saptuam in kisuk in Biakin khat hon tungkhia uhi. Amau panna maban ah Field in a tung khuhna ding tumsak hi. Hiai biakin bawlna toh kisaiin EBCC Rongchingri, Diphu leh Bithilangso inleng ni khat work camp dan in huh uhi. December 8, 2017 in Advent Christmas programme toh thuah in Assistant Field Superintendent in honna leh latna nei hi. A sung vanzat bangmah om nailou ahih man in a hong bukim touhna ding Pathian kiang ah thum in ngetpih ni.

2. DISCIPLESHIP CAMP:
Field in Year Plan a a neih bang a Field sung mun 7 a Discipleship Camp neih ding a agel, zohna ding in Koilamati ah December 9-10, 2017 sung neih in om hi. Hiai hun ah thugenna leh sinsakna Rev. Jameson Bey leh Evan. Sarthe Hanse in zang uhi. Hiai camp ah “You must be born again” chih thupi in nei ua, khasiangthou nasepna tungtawn in kimuhthakna leh kipiakthakna nei tamtak muh theih in om chih report kingah hi.

3. GINGTU KIBEHLAP:
December kha sung in, thum mite thumna leh amun a semte kuhkalna ziak in Rongchingri 5km Lumding Road khua mi nupa, Francis Ingti leh Kakrung Ronghangpi ten Jesu khrist Hondampa in sang uhi. Amaute counselling neihpih ahih nung in December 16, 2017 in bialtu Pastor Joel Hanse in Baptisna pia hi. Gingtu muan huai hong hih touh zelna ding un thumna ah phawk zui ni.

4. KIPAHTHU GENNA LEH THUMNA DINGTE:
i) Khristmas leh Kumthak season sung a ginglou mi tampi Pathian thutak zaksak a om theih man in kipahthu gen ni. Hiai thu zaten a zak uh ngaihtuah zom a, khat vei tei hihvak a hong omna ding un thumna toh delhzui ni.

ii) Semtute omna kiheikual a khosakna kipatthak ngai pawl om ahihman un, amau mun chiat a gahsuah leh lohching a hong hih chiatna ding un thumna ah phawk ni.

iii) Native Casual Evangelist 10 leh Contract Evangelist 2 Pathian in hon piak thakte ziak in kipahthu gen ni. Amaute gahsuah leh manpha tak a hong kizatna ding un thumpih ni.

iv) Field Nasepna a vanzat poimoh mahmah School in kumthak a, sa leh kha ading a gah manpha a suahna ding in semtute leh sintu ding naupangte thumpih ni.

v) Semtute teng teng Pathian in sepdan thak, muhdan thak leh lunglutna thak a hon piak chiatna ding in thum pih ni.

C. DHEMAJI MISSION FIELD:
1. BAPTISMA PROGRAM ZAT IN OM:
Digolgorah mun ah gingthak Mr Dinesh Doley leh a zi Mrs Sonia Doley ten Pastor S. Thangbiakmang khut ah Baptisma tang uh. A vangkim a gingthak hong omzelte ziak a kipah thugen kawm in, khalam a hong pichinna ding un Pathian pina ngetsak ni. 2. COMMUNITY LAY LEADERS HEALTH TRAINING ZOU UH:
Evan. Haukhosiam Guite leh Evan. Raja Narah ten Community Lay Leaders Health Training, Alipur apan Dec 2017 in hon zoukhia uhi. Amaute’n natna khenkhat ki etkol dingdan a sinkhiak te uh field nasepna a manpha tak a hon zat theihna ding un thumna toh delhzui zel ni.

3. OUTREACH TRAINING INSTITUTE APAN HONZOU THAK: Dec 2017 sung in Evan. M Thangbiaksuan in traing hon zouthak in Dakwakhana pansan in sem nawnta hi. Training phat tuam pih a gahsuah sem a hon sep theihna ding in Pathian ompihna ngetpih ni.

4. MiCoGoJ FOLLOW-UP NEIH HI DING: Feb 9-11, 2017 sung Field Office ah MiCoGoJ Follow-Up program zat hi ding hi. Hiai hun ah Rev. S Vung Minthang, GS/EBC in “Kipak kawm in Toupa’ Nna sem un” (Sam 100:2) pansan in Missionary te lakah thugenna hun zang ding hi. Hiai program Cross-Cultural Missionary teng leh a zite uh telna dia field in abawl ahi. Program lohchinna ding in thumna in phawkchiat ni.

5. VOCATION MINISTRY: Field akipan Grace Bible College a sintu mi- 4 i neihte winter vacation sung in, FS in program bawlsak a, saptuam te lakah report piakna leh thugenna hun vazang ua saptuam ten leng nuam sa in phattuam pih mahmah uhi

6. KIPAHTHU GENNA LEH THUMNA DINGTE:
1. Kumthak-2018 sung, field a Toupa’ gam nasepna ding ah buaina, haksatna tuamtuam omlou a maban sutzop ahih theihna ding in thum ni.

2. Field in Feb 09-11, 2018 sung MiCoGoJ FollowUp program zat sawm hi. Hiai hun lohching tak a zat ahihna ding leh thugen ding Rev. S Vung Minthang, GS thumna in phawk chiat ni. Semtu Missionary te a zite utoh a kihelna ding ua program bawl ahi. 3. Field a semtu Frontline ading, i missionary te Pathian vanzat manpha hong hih semsem ua, Team chidam tak hon neih theihna ding un thumna in phawk ni.

4. School naupang te’n siamsinna bul pannawn ta uhi. Amaute’n chidam tak a hon sin theihna ding un thumna ah phawk chiat ni.

5. Kapurdwa a om Mr Junaki Taid in piles (tawpol) nei in, nasa thei mahmah hi. Hongdamna ding in thumpih ni. Huan a pasal Mr Bobhokanto Taid in gingtu ka suahnung nasep ding mu theilou ka hi chi a lungkham mahmah a om in, Sukonya Agro Producer Cooperative Society nuaiah sepna mu thak hi. Gingtu hongsuak te’n damlouhna hiam haksatna deuh a tuah chiang un gingtu suah ziak peuh ngoh theizel uh. Amaute pichinna ding leh lohchinna ding in thumpih ni.

D. MANIPUR MISSION FIELD:
1. KIPAHTHU GENNA LEH THUMNA DINGTE:
i) Thamnapokpi a Quarter bawlna pat in om thei ta hi. Tukum, 2018 Yaosang Youth Gospel Camp March kha a zat man ngeingei ding field a ngim ahihman un zohman a hong om theihna ding in thumna toh delhzui ni.

ii) Toupa’n khamangthang mi 09, sawm-a-khat pethak 04, honpiakte ziak in kipahthu gen ni. Toupa’n ging thak leh thilpiak petute tamsem, semtute nasepna tungtawn a hon piak beh a, tunung a field a saptuam kitoudelh a hong hihtheihna ding un nasa zawsem in thumsak lai ni.

iii) Semtu sepnamun suan a omte’n thathak la a, sepdan thak toh lawhching tak a hon sep theihna ding un thumna toh delhzui ni.

iv) Kum 2017 sung a Toupan Khalam gingthak – 95; Baptisma tang – 39; Sawm-akhat pethak – 64; Missionary vakna pethak – 35 hon piakte ziak in kipahthu gen ni. Field kitoudelh ding tum i hihman in, Piangthak leh Baptisma tang thakte’n sawm-akhat, missionary chawmna leh thilpiak tuam tuam te hon awlmoh theihna ding un thumpih ni.

v) BYF te’n Annual Project Yaosang hun toh kituak a Gospel Camp a neih gige uh 2018 sung inleng Thamnapokpi ah neih nawn sawm uhi. Salam kitheihtuahna, khalam kisinsakna poimawh lua hihman in thumna toh phawk ni.

vi) Manipur field a semtute lungsim munkhat a, ki-ittuahchiat a, theihtawp a pan hon lakkhawm theihna ding un Pathian kha ompihna ngen in thumsak ni.

vii) Khamangthang matna napi a nei i hihna ah, biakin, quarters leh adangdang bawlsak ngai gige ahihman in Pathian pina leh vualzawlna ngen ni.