Amasa in Khristian Thukizakna simtute tengteng Kumthak Chibai aw! Toupa’n hun thak leh ni thak ah hon pi kai nawn a, thupi sa mahmah in, A kiang ah kipahthu i gen hi ! Tutung in Fieldte a kipan report hongkim theikei a, Khawmpi leh Khrismas vai a kibuaichiat ahihna ah, ana theisiam ding inleng i kingen hi. Kum 2018 a midangte adia vualzawlna hiding in Toupan hon makaih chiat hen.

A. NEPAL MISSION FIELD:
1. TUNIBOTE AREA GROUP EVANGELISM Area Pastor Dilip Kumar makaih in mi 11, group 3 a kikhen in Tunibote kiim a khua omte ah November 14, 2017 in tanchinhoih puanzakna hun zat in om hi. Group teng in inn 15-20 vel chiat va tawn thei ua, track 200 leh Thukhun Thak bu 5 hawmkhia uhi. Hiai program ziak in kipahthu gen ni. Tanchinhoih chi kituh ahong pou a, gah manpha tak a hon suanna ding in thumpih ni.

2. KIPAHTHU GENNA & THUMNA DINGTE:
1. November 2017 khasung in Pathian in Gingthak mi 11 leh Baptisma tang mi 04 a hon piakte ziak in Pathian kiang ah kipahthu genni. Khalam a ahong khanlet zel theihna ding un thum zom laini.
2. Grace Bible College apan a Nepali student 7 Nepal a I saptuam tanggam a om 22te vehna December 11, 2017 apan in January 13, 2018 sung nei ding uh. A tup bang ua lamzang tak a azat theihna ding un thumna ah phawk ni.
3. Seppih Evangelist Givson Jack Rai, Takuthang, Sikkim a om in November 20 in zi nei hi. A zi Jianreiliu leng M.Div zousa ahi. Nupa kituak ahong hih ua, sepna lam a leng pangkhawm a ministry lohchingtak a hon sepzom zel theihna ding un thumpih ni.
4. Padajungi NEBC Staff Quarter leng kilam zou dek tak, transportation lam lemtan louhna ziak in khawl tadih. Lam zom pah hita ding. Tu December a honkhiak man kei leh leng January 2018 khasung a hon khiak man lamet ahi. Thumna ah phawk ni.

B. KARBI ANGLONG MISSION FIELD:
1 Discipleship Camp and Seminar
Field in tup-le-ngim a a neih Field sung mun tuam tuam a Nungzuihna toh kisai kisinsakna camp neih ding a a gel bangbang uh buaina omlou in zou thei ta uhi. Hiai programme te ah “You Must Be Born Again” (Johan 3:7) chih thupi pansan in semtute amau mah resource person a pang in thutak genna hunte zang zel uhi. Hiai hun ah kipahna thak leh kipiakna thak nei tampi om ahihman un Pathian thupina i pia hi.
Hiaite ban ah Field Dorcas vaisaina toh EBCC Bithilangso ah Seminar cum Halhthakna Chialpi November 25-26, 2017 sung nei uhi. Haggai 1:7 “Na Lampite uh Enthak un” chih thupi pansan in Assistant Field Superintendent leh Upa Dr. Lipson Rongpi in sinsakna nei uhi. Kho tuamtuam a pan Dorcas member tamtak paikhawm ua, kha pawlhna tang in nuam leh lungkim huai sa mahmah chiat uhi.

2. Work Camp:
5KM Rongchingri Fellowship in mi Inn a kikhop lemtang gigelou chi a ngai poimoh a kisuk-in Biakin neih dingdan lampi lunggel uhi. Member te’n mahni hih theih lamchiat sing leh gua kaikhawm ua, November 16, 2017 in Bialtu Pastor makaih in kim leh kiang a Saptuam member omte a paikhawm thei bangteng paikhawmin Work Camp nei in Biakin lamsak uhi. Hiai Biakin lamna mun ahihleh Fellowship memberte khat in ama gam a zatsak ahi.

3. Biakin Suangphumna Om:
Hidim Teron a Saptuam a dinna sawtta, mitphial phial himahleh tu-in kitohsuah thakna hong om a, Biakin mun ding amau sum kithoh in ana leikhia uhi. Kipahpih mahmah kawm in, FCWC in Biakin lamsak ding chi’n thupuk hi. November 20, 2017 zingkal in FCWC member leh local Saptuam a omthei bang bang paikhawm in, FCWC Vice Chairman Upa VL Muana in Pathian min a Biakin Suangphum phumna nei hi.

4. Semtute Omna ding Quarter Lam in Om:
Pathian leh Heutute deihsakna ziak in, Jiteplong ah Bimol Teron gam lease a la in Semtute omna ding leh Fellowship neihna mun ding ngim khawm in inn khat lam ahi. Huai mun-a sem Evan. Kania Hanse leh Evan. NK Naulak etkaina nuai ah Unaupa Sarthe leh Pauboi in va sem ua, tun a guhgel teng leh a tung khuh zoh hita hi. Pathian in pha asak leh January kha a luah theih dia lam-et ahi

5. Kipahthu Genna Leh Thumna Dingte:
1. Pathian thu lunglut ngei mahmahlou, mi lungtang khauh mahmah Mr. Jemsing Tisso, damlouhna a hon neih ziak in Pathian thu ngaihkhiak lunggulh a Pathian thu a houlimpihna i semtuten nei uhi. A thuzak leh theihte tungtawn a Jesu Khrist khebul a hon zot theihna ding in thum ni.

2. Pathian thu lunglut mahmah hinapi kipekhe ngamlou Disobai a om Mr. Terang-te Inkuan, Dengaon a om Jon Ingti te inkuan, Sumpho Adong a om Longki Taro-te inkuan leh Lunse Timung khua a om Terang-te inkuan ading in Pathian muan huaina a muhchet ua hangsan tak a a pom ngamna ding un thum pih ni.
3. November 2017 kha sung a Pathian vualzawlna goutan piak a om Evan. Siamzoulian (tapa), Evan. Sarthe Hanse (tanu) te ziak a kipahthu i gen kawm kawm in, a nu leh naungek chidam a khan hoih a a hong khan theihna ding un thumpih ni.

4. Disama area a Khoja Ingti Village leh Rongkimi khuate, nidang a lut theihlouhna himahleh tulaiin valut a houlimna neih theih zel ahih man in kipah thu gen in, Tanchin hoih muchian dia a khalam mit uh a vakna ding in Pathian kiang ah ngen ni.

5. Field sung a Discipleship camp neih ding a kigel bang bang mun 6 a neih zoh ahih tak man in kipahthu gen ni. 6. Pathian in gingthak a hon piakte’n Nungzui muanhuai a hong hih ngeina ding un thum ni.

C. MANIPUR MISSION FIELD:
1. THU TUAM TUAMTE:
1. IES Thiyam Konjin hoihtak in paitou thei zel. School keklet na nasep leng pan ta uhi. School gahsuah leh lohching hong hihtheih nading in thumna ah phawk ni.

2. Thanga Biakinn leh Quarter nikum apan kibawl November 24, 2017 in Rev V Thangkhangin, Director of Missions in honna leh latna nei hi. Field sung-a Saptuam Makai hunkhop in a uap ban ah, Lamka North/South Division apan heutu bangzah hiam inleng uap in, programme zoh in paikhawmte’n annkuang umkhawmna nei uhi.

3. Thamnapokpi ah Quarter lian hun tawktak bawlna pat hita. Hiai Quarter ahihleh L-shape hi a, avai 14ft leh adung 60 val hi. Bangmah buaina omlou a, Quarter hoihtak leh etlawmtak lamkhiak a hong hihtheihna ding in thumna toh delhzui ni. Field in Kum 2018 Yaosang Youth Gospel Camp hiai mun a zat sawm ahih man un, tha-it huai mahmah hi.

4. Nambol a Quarter bawlna nasep inleng masawn zel hi. Tunung a Asst Superintendent Office bangle omthei dia hisap kawm a bawl ahi. Nasepna lamzang tak a hong paitheihna ding in thumna in saptuamte’n delhzui zel ni.

5. Toubul a biakin kilamna gam neitu, local Chairman Chaoba sih nung lemtang lou simpi a om laiin, Pathian vualzawlna toh gingtu Y. Kamala tungtawn in gam 0.8 alian lakhs 3 a leikhiak in omta hi. Toupa’n tunung a Biakin kilawm tak hon tunkhiak sak ngei i lam-en hi.

6. Malom a Field Office plot fencing bawl sawm ahi a, Pathian panpihna tawh feltak a bawl ahihtheihna din thumna ah phawk ni.

2. KIPAHTHU GENNA LEH THUMNA DINGTE:
1. Toupan khamangthang 03, Sawm a-khat pethak 03, Missionary vakna a pangthak 02 leh Baptisma tang thak 9 hon piakte ziak in kipahthu genni. Toupa’n gingthak leh thilpiak petu tamsem, semtute nasepna tungtawn a hon piak beh a, tunung a field a saptuam kitoudelh a hong hihtheihna ding un nasa zawsem in thum ni.

2. Field in paulettu ding leh translation bawl thei ding mi poimawh petmah hi. Tua bang ding mi Pathian in a hon piakna ding in Pathian kiang ah semtu ding ngen in thum ni.

3. Kumtawp kuan ministry Khristmas leh Kumthak lopna tungtawn a kim-le-kiang a gingloute Pathian itna thu zaksak a aom ua, thutak Jesu Khrist gintakna a hon neih theihna ding un Pathian kha ompihna ngen in thumsak ni.

4. Semtute’n counselling a neihpih lel te un Pathian kha vehna tang a, Jesu Krist a ginna kiptak a hon neih theih ua, Khalam pianthakna diktak a hon neih theihna ding un thumna ah phawk ni.

5. FBYF in Meitei Bible Roman script a teikhiatna project in nei lellel uhi. Tuailai tampite’n Bengali script sim thei nawnlou ahih man un Bible taksapna lianpi om hi. Hiai project liantak ahong lohchin baih theih nading in thumsak ni.

6. December 05, 2017 a Field Superintendent in accident a tuahna ah, a khe ni 45 sung khetuamna, akhauhte a tuam sak in om hi. Pathian vehna tang a, damna a hon neihna ding leh Office a sepna buaisak ahih louhna din thumna ah phawk ni.

7. Manipur field a semtute lungsim munkhat a, ki-ittuahchiat a, theihtawp a pan hon lakhawm theihna ding un Pathian kha ompihna ngen in thumpih ni.

8. Sa leh kha a hing khawm lai i hihman in, khamangthang matna nnapi a nei kawm in salam a biakin, quarters leh adangdang bawl ngai gige hi. Pathian ompihna tawh Field in office a hon neih theih baihna ding in thumna ah phaw k ni.