Amasa in Kum khat sung ading a khatawp tan honpi tung nawnta i Biak Pathian min phat in Thupina i pia a, Gammial Aw Simtute tengteng i Toupa leh Hondampa Jesu Khrist min in chibai! I Mission field-te a Toupa’n thil thupi hon muhsakte anuai a bang in enkhawm nawn ni.

A. NEPAL MISSION FIELD:
1. BASIC BIBLE TRAINING- BIHIDIN REPORT TOM:
October 5 - 16, 2017 sung Bihidin NEBCC ah Basic Bible Training om hi. Hiai hun in sintu mi 45te regular tak in class teng ah tel ua, amaute participation certificate piak hi uhi. Hiai training hun in Pneumatology, Music in the Church, Bibliology, Soteriology, Christian Ethics, Church History, Church Administration leh Basic Christian Doctrine chih thupite pansan in sinsakna om hi. Semtute ngen in sinsakna pia ua, Saptuam 13 a kipan sintu paikhawm uhi. Phatuam mahmah ding a gintak ahi.

2. THIRD FIELD BYF CONFERENCE REPORT:
October 19 - 21, 2017 sung Budhabare Biakin ah Field Baptist Youth Fellowship Khawmpi a 3veina nei uhi. Hiai hun in Rev N Pumsuanmung, Youth Coordinator, EBC HQ in “Remember your Creator in the days of your youth” Eklijiasti 12:1 pansan in thutak genna hun zang hi. Tuailaite’n thugen nuamsa in kipahpih mahmah ua, mi 30 val in Pathian deihdan a hing a, Ama nna sem dia kipiakkhiak thakna nei thei uhi. Halleluiah! Field Choir in phatna leh biakna makaih ua, lapawl 6 sakhia in Pathian phatna laankhia uhi. Kum 3 sung Tuailai makai ding mi 14 kitelkhia ua, amaute commissioning piak ngal in om uhi.

3. ONE DAY SEMINAR – DAMAK LEH CHISANG
October 10, 2017 in Damak NEBCC ah One day Seminar sai in om a, Pastor Padam Thapa Area apan kho 4 kihelthei uhi.
Thupi tuamtuam; Khalam Pichinna chih thupi zang in FS in sinsak a, Local Saptuam a Dorka-te Mohpuak chih thupi zang in Mrs. Chingsiam in hun zang a, Biakna toh kisai kisinsakna Pastor Padam Thapa in nei hi. Hiai hun zatna ah mi 45 vel kihel thei uhi. October 29, 2017 in Chisang NEBC Fellowship ah One Day Seminar neih in om nawn a, hiai hun in Pastor Padam Thapa in “Christian Lifestyle”, Evan. Suanboy Vualnam in “The Importance of Christian Fellowship” leh Evan. Marina Manngaihlian in “Christian Etiquette” chih thupite zang in sinsakna pia uhi. Training sai thei zel dia hihtheihna leh hun hoih honpia Pathian kiang ah kipahthu i gen hi.

4. KATHMANDU BIAKIN HONNA REPORT:
November 5, 2017 zinglam dak 9:25 AM in Kathmandu NEBC Biakin thak honna leh latna Rev V Thangkhangin, Director of Missions, EBC in nei in, Rev. L. Kham Kho Lun in Pathian thutak genna hun zang hi. Hiai Biakin mun 2015 kum a kileikhia hia, amun pen Godamchaur, Lalitpur Kathmandu a om ahi. Mipi tamtak, Biakin dim phitphet in paikhawm ua, Kathmandu sung-a Saptuam makaite leh Pastor hunkhop hiai hun zatna ah kihel uhi. Biakna hun zat zoh in paikhawm mipite’n Biakin thak lopna annkuang umkhawmna nei uhi. Kathmandu NEBC Saptuam 2009 a kipan tuni tan in member kibehlap tou zel lai hi. Member a vek un 76 vel hi ua, member Piching 58 hi uhi. Tua a kihong thak, i Biakin pen Nepal Missions Field adia 2017 sung a a thumna hita hi. Toupa’n thil thupite ahon hihsak a i kipak mahmah ahi. Toupa’n thupina tangta hen.

5. KIPAHTHU GENNA LEH THUMNA DINGTE:
1. October kha sung in Pathian in Gingthak mi 4, Baptisma tang mi 13 leh sawm-a-khat pethak 21 hon piakte ziak in Pathian kiang ah kipahthu gen ni. Khalam a ahong khanlet zel theihna ding un thum zom lai ni.
2. Evangelist Givson Jack Rai, Takuthang, Sikkim a om in November 20 in zi nei a, Evangelist Marina Manngaihlian, Chisang a om inleng December 13, 2017 chiang in pasal nei ding. Amaute nupa lohching hong hih theihna ding un thumna ah phawk ni.
3. Kum thak ah Field in Field Office leh Quarter a ding Caretaker lak thak sawm hi. Mi hoih, fel leh kizen tak Pathian in ahon piakna ding in ngen ni. Tuaban ah, Native Casual a sem ding mi 22 kum thak in lak sawm uhi. Pathian nasep ut leh sapna tang piak a i omna ding in leng thumna toh Pathian buan ni.

B. KARBI ANGLONG MISSION FIELD:
1. FIELD JOINT KHAWMPI:
October 06 - 08, 2017 sung, EBCC Bithilangso Saptuam intekna in Field Annual Khawmpi neih in om hi. Hiai hun ah Rev. S. Vung Minthang, General Secretary EBC in “Na Khe in Paita in” chih thupi zang in Pathian thutak genna hun zang a, October 7, 2017 sunnung in Indigenization Policy toh kisai Seminar poimohtak leng nei hi. Devotion hun nihte Pastor T. Thanggoulian in a makaih ban-ah, Ordination kikhop hun in Field Superintendent tungtawn in Upa 4 Ordination piak in om uhi. Amaute hasotna thugenna General Secretary EBC in nei hi. Hiai khawmpi hun sung in Khawmpi nawn hun a Khawmpi Ulian ding telna leh Field Central Working Committee Member ding a FWC leh BWC apan delegate-te pomna om a, Field Superintendent in Nnagotna (Commissioning) leh thumsakna hun zang hi. Khawmpi hun sungteng Field Choir in lapina ban-ah Special No. a hun hun in present ua khawmpi nuam leh lohching tak in zou uhi.

2. BIAKIN LEH SCHOOL HONNA:
Bithilangso a khawmpi zouphet, October 09, 2017 zingkal in Tari Adong khua a Biakin leh School honna programme zat in om hi. Biakin leh School, honna leh Latna Rev S. Vung Minthang, General Secretary, EBC in nei hi. Programme zoh in mipi paikhawmte’n annkuang umkhawmna nei uhi.

3. DISCIPLESHIP CAMP:
Field sung a Saptuam memberte Khrist nungzuihna lam a kipzaw leh hatzaw a hong hih ding uh ngimna toh field in “You Must be Born Again” (Jn 3:7) chih thupi a nei in, Field sung mite a lemtanna mun 6 ah kaikhawm in Discipleship Camp neihpih ding in programme bawl uhi. Huaite lak ah October kha sung in mun 4 ah zoh in omta hi.
i) EBCC Rongchingri ah, October 20-22, 2017 sung, Camper 50 vel paikhawm in, amaute lak ah Evan. Chinkholal Lethil leh Evan. Sarthe Hanse in thugenna hun zang uhi.
ii) EBCC Rong Ali ah, October 20-22, 2017 sung, Camper 80 vel paikhawmin Programme nei uhi. Hiai hun ah thugenna hun Pastor Manthing Hanse leh Upa Dr. Lipson Rongpi in zang uhi.
iii) EBCC Bisarpo ah camper 52 vel paikhawm in, October 27-29, 2017 sung mah Camp programme zat in om hi. Hiai hun ah thugenna hun Evan. Jacob Rongpi leh Mr. Robinson Teron in zang uhi.
iv) EBCC Tari Adong ah, October 27-29, 2017 sung camper 90 vel paikhawmin programme zat in om hi. Hiai hun ah thugenna hun Upa Sundorsing Timung leh Rev. Jameson Bey in zang uhi.
Hiai camp-te, mihing muhna leh ngaihtuahna khellam ah lohchinna kimu hia theih ahih man in kipahna lian mahmah hi. Saptuam member tampite’n kilatthakna a neih ban uah, mun khenkhat ah gingloute bang leng telin Jesu Khrist lal leh Hondampa dia sang a kilan thei bang om ua thupi leh manpha mahmah hi. Hiai ding a Thumna leh sum leh pai a pangte tung ah kipahna lian mahmah hi.

4. PARENTS MEET:
New Langrik Convention English School in, 2nd Quarterly Examination Result Declaration-cum-Parents Meet Programme October 5, 2017 in school mun ah nei uhi. Hiai hun ah nu-le-pa tamtak paikhawm ua, School maban ding genna leh Pathian thutak genna hun Assistant Field Superintendent in zang hi. Schoolte tungtawn a naupangte kiang kia hilou a nu-le-pate uh kiang bang a leng Tangthupha gen theihna lampi i muh man in manpha mahmah hi. I chituh hong pouna ding in thumna tampi toh tuibuak ni.

5. KIPAH THUGENNA LEH THUMNA DINGTE:
i) Khristian hih lunglut, hong kipe nuam Bokolia area aom Mr. Jemsing Tisso, Mrs. Lovely Rongpharpi, Mr. Rahul Tisso, Mr. Rakesh Teron, Mrs. Rupsari Killingpi, Mrs. Moina Teronpi & Family leh Khoya Ingti & family- te ading in thumsak ni.
ii) Pathian in gingthak hon piakte khalam a piching a hihdong ua a khan zel theihna ding un, amau leh a makaihtu Evangelist-te thumpih ni.
iii) Sumpho Adong a om Tarote nupa Khristian a hong kipia ding chia programme bawl fel hita, buaina bangmah omlou a a hong kipiak theihna ding un thumpih ni.
iv) 5Km a om naupang Jirka Phangchopi, a nu-le-pan a damna ding lunggulhna ziak a Khristian a hong kipia, Pathian thupina muh a omna ding in thum ni.
v) 5Km a om Mrs. Roma Rongpipi damtheilou, Pathian in hon damsak leh Khristian ka hong hi ding chia damna lamen a om, a hong damna ding in thum ni.
vi) Evan. Vungngaihnuam Typhoid vei ziak a taksa hatlou a tawlkhat om, Pathian in thumnate dawng in tun damta a Pathian kiang ah kipahthu gen ni.
vii) Evan. H. Jamkhanmang a Sungna dam hoih theilou a om nilouh, Pathian in damna a piakna ding in thum ni.
viii) Field sung a Discipleship camp neih ding a field in a guan bang a mun li a neihzoh a omtate ziak in kipah thu gen in, neih nailouhna mun nihte ah Pathian thil hih thupi muh ahih ngeina ding in thum ni.

C. DHEMAJI MISSION FIELD:
1. GINGTHAK 4 IN BAPTISMA TANG: October 24, 2017 in Lachangaon khua ah gingthak mi 4 in Pastor S. Thangbiakmang khut ah Baptisma tang uhi. A zingchiang in Evan. M Daizachin leh Pastor Mang makaih in a tenna inn uh siansuahna om a, tuaban ah Bible (NT) leh Field Labu piakna leng nei uhi. Amaute tungtawn a fellowship pat hong hih theihna ding in thumna ah phawk ni.

2. BDF & BCD/EBCC GUWAHATI IN HUHNA PIA: October 15, 2017 in FS in EBCC Guwahati ah BYF Day hun vazang hi. Hiai hun ah Saptuamte apan kithuah pihna hoihtak a ngah ban-ah, BDF leh BCD ten Year Plan a aguan uh silh leh ten a kaihkhawmte uh field huhna ding in pia uhi. Hiai puante gingtu hisate lak ah field in hawmkhiakna nei a, kipahpih mahmah uhi. Thilpiak petute tung ah kipahna i taklang hi.

3. PROJECTOR THAK: Field in Toupa gam nasepna ding a vanzat poimoh mahmah, Projector ahihlam thei a Toupa gam nasep a lunglut mahmah mi khat in a leina ding apiak nung in October, 2017 sung in Guwahati ah EPSON ` 35,000/- a leikhiak hita. Pastor S. Thangbiakmang in staff meeting hun ah latna nei hi. Thilpiak manphatak hon petu tung ah kipahna i taklang a, Toupa’n aleh tampi’n vualzawl leh chih i thumna ahi (a petu’n amin taklat kul salou).

4. KIPAH THUGENNA & THUMNA DINGTE:
1. Grace Bible College a sinlai mi-4 i neihte lak ah Miss Deeparani Doley in malaria veikha hi. Lungke mailou a hon zoh theih teiteina ding un amaute thumna in phawk ni.
2. Field sung a kho khenkhat a gingtu inkuan khenkhat govt. in IAY tungtawn in a tenna inn uh bawlsak theihbang nei uhi. Amaute ziak in kipahthu gen ni.
4. Dunaguri khua ah Mr Raj Pegu te innkuan tulai in counseling bawlpih zel in om uhi. Hotdamna hon ngah theihna ding ua semtute Pathian kha thawpna ngetpih ni.
5. Evan. V Ginsonthang in damlouhna khenkhat chiphual (Kaumak pian sim) leh gilna nei theizel hi. Doctor in test tuamtuam bawlsak mahleh report ah normal vekzel in om. Hong damsiang a Toupa gam nasep hon sutzop zel theihna ding in thumna ah phawk ni.
6. Moru Huti kichi khua a gingthak 4 Pathian in hon piakte pansan a fellowship thak patkhiak sawm ahi. Hiai mun a gingtu hong kibehlap theihna ding in thum ni.
7. Field Office honkhiak hita ahihman in Pathian kiang ah kipahthu gen kawm in, chidam tak a luah a hih a, nasep lamzang leh lohching tak a apai touh theihna ding in Pathian kiang ah thum ni.

D. MANIPUR MISSION FIELD:
1. Field Baptist Youth Fellowship: October 28, 2017 ni’n Social Media tawh kisai Seminar Dr Niangsangching, Lecturer GBC in tuailaite lak ah sinsakna hun manphatak in vanei hi. Tuaban ah, Christian Ethics toh kisai leng sinsakna nei ngal hi. Hiai hun in field sung a tuailai 86 vel kihel thei uhi. Khawmpi’n 2018 budget din Rs 1.8 Lakhs a guan uh pompih hi.

2. Field Baptist Dorcas Fellowship: Dorkate’n atuam a budget neithei in masawn mahmah uhi. Khawmpi’n 2018 budget dia Rs 2 Lakhs a guan uh pompih hi. Dorka pawl in DORCED panpihna piak sawm in panla lel uhi.

3. THU TUAMTUAMTE:
i) Immanuel English School, Thiyam Konjin hoihtak in paitou thei zel hi. School keklet ngai khop a masawn uh ahihmanin kipahhuai i sa hi. Ma hon sawn touh zel theih na ding in thumna in phawk ni.
ii) Sugnu Wapokpi a Quarter kibawl Oct 17, 2017 in Rev V Thangkhangin Director (Ms) in honna leh latna nei hi.
iii) Field sung ah Mass Counselling program kha lui a taklat a om bang in semtute zang a lohching tak a neih in om hi. Pathian kha ompihna, saptuamte thumsakna ziak in chialpi beihpi khat semtute tungtawn a zoh a om theihtak man in kipahhuai i sa hi.

4. KIPAHTHU GENNA LEH THUMNA DINGTE:
i) Toupan khamangthang mi 08, sawm a-khat pethak 04 leh missionary vakna pethak 3 hon piakte ziak in kipahthu gen ni.
ii) Field Kumtawp khawmpi vaihawmna October 14, 2017 ni in Paite veng EBC biakin ah neih zawh in om hi. Thugenna hun Pastor Girani in “Thouni in lamni” chih thupi pansan in nei hi. Field Superintendent in Comissioning leh Toupa nitak annkuang sai hi. Field in kumthak ah Casual native 3 lakbeh a sawm ban-ah sunday skul sinlai ding in Romte laibu zillai a neih ding in thupuk hi. Thumna in nak pi’n phawk ni.
iii) FBDF in DORCED panpihna ding in thilpiak lakhawm panpanta uhi. Thumna ah phawk tou zel ni.
iv) Counselling neih pih lel (seekers) Kenedy leh Sanatombate ban-ah counseling neihsate follow up ngai omte’n thutak theichian a, Jesu Khrist hondampa a hon pom theihna ding un thumsak ni.
v) BYF ten Meitei Bible Roman script a teikhiatna project in nei lellel uhi. Tuailai tampite’n Bengali Script sim thei nawnlou ahihman un Bible taksapna lianpi om hi. Hiai project liantak a hong lohchin baih theihna din thumna in phawk ni.
vi) Semtute’n khamangthang itna veina, nei a lunglut tak a ahon sep ua, khalam khanlohna in Manipur Field hong veh na din Pathian kiang ah semtute thumsak ni.
vii) Nambol ah Quarter lamna pai lel hi. Buaina omlou a zawh ahih theihna din thumna in phawk ni. Tuaban ah, Thamnapokpi ah Multipurpose a zat di’n hall khat field in bawl sawm hi. Buaina bangmah omlou a sepsuah ahihtheihna ding in thumna ah phawk ni. 