Gammial Aw simtute tengteng i Toupa leh Hondampa Jesu Khrist min in chibai aw! I thumnate tungtawn a Toupa’n thil thupi leh lamdang hon muhsak te, anuai a bang in i enkhawm nawn ding:

A. NEPAL MISSION FIELD:
1. FIELD KHAWMPI 26 VEINA REPORT
“Pichin lam i manoh ding uh” Hebrute 6:1 pansan in, Annual Field Conference, 26 veina, September 20 & 21, 2017 in Birtamode NEBCC ah nei uhi. Tukum khawmpi, Palaite kia a ding a geel ahihbang in, khawmpi palai 97 kihel thei uhi. Rev T. Lalmalsawm, FS in thutak genna hun zang hi. Kumnawn, 2018-2019 budget ding in Nepali sum 60 Lakhs pomna om a, Native Missionary te khaloh leng teng 1,000.00 chiat a punsak ding thukim uhi. Upa 3 ordination piak in om hi.

2. DORCAS KHAWMPI LIAN 41 VEINA REPORT:
Field Dorcas in mi 5 Dorcas Khawmpi Lian, EBC Gospel Centenary Hall, New Lamka a tel ding a atelte ban uah mahni sum kisen a hoh nuamte toh sim in field a kipan mi 18 pha uhi. Amaute’n khawmpi hun in Pathian phatna la 2 sa uhi. Khawmpi vaisaite apan in deihsakna Belpi khat sang ua, Field Khawmpi hun in Dorcas makaite’n Field a zat ding in FWC Chairman kiang ah piakkhiakna nei uhi. Thu kigen tamzaw tham theisiam kei mahle uh, khawmpi hunsung a a thilmuhte uh tungtawn in Pathian thupina mu veve uhi. Lam saupi a paina un, “missionaryte hiai tantan a Tanchinhoih gen dia na hong pai uh, Pathian na itna uleh koute non itna uh thupi mahmah” chih leh “Na biakinnte uh hoih thei mahmah ei” chih a muhkhiak dan uh ahi.

3. TOUPAN THIL LAMDANGTE HON MUSAK ZELZEL:
Thil Om Mengmeng Lou: Pathian thu in mi a khoihkhak taktak chiang in kikhekna thupi tak tung sek hi. Mr. Bal Bahadur Sarki, kum 79 leh a zi Mrs. Yam Kumari Bailkoti, kum 67 te Kum tampi kiteeng khinta, teek nung vuai nung himahleh Saptuam dansiangthou a kiteng khalou ahihman un kiteen lunggulh ua, Pastor Dilip Samal khut ah September 7, 2017 in Imbung NEBC Fellowship ah Saptuam dan siangthou in kiteeng thak uhi. Amaute’n tanu 5 leh tapa 8 nei uhi. Saptuam dan a kiteng ut tinten ahihman un hiai bang program field in bawl sak hi. Hiai bang thil om mengmeng lou ahihna ah kipahhuaisa in i taklang hi. Khristian hihna ziak a, Saptuam dan-a kiteen lunggulh a kiteenna a bawl theih man un i kipahpih mahmah hi.

4. KIPAHTHU GENNA LEH THUMNA DINGTE:
a) September kha sung in Pathian in Gingthak mi 6 leh Baptisma tang mi 6 a hon piakte ziak in kipahthu gen ni. Khalam a ahong khanlet zel theihna ding un thum zom lai ni.
b) Field sung a project pailelte lungtunhuai tak a zoh a hihna ding in thum ni: Kathmandu biakinn zohphial hita. Budhabare Kitchen pen Field BYF Khawmpi ma ngeingei a lamzoh sawm ahi; Tanglepa Pastor Quarter lamna leng zou dek mahmah ta. Padajungi leh Kirtipur Staff quarter pen dinkhawl phot, lamzompah lamet ahi. Angepa biakinn lamna leng pai hoih zel; Shantinagar toilet-bathroom zoh hita, kitchen pen kipan lemtang nailou hi.

B. KARBI ANGLONG MISSION FIELD:
1. GINGTU KIBEHLAP:
Thum mite thumna tungtawn in kuan khete kalsuanna Pathian in vualzawl a, September kha sung in Jesu Khrist khebul zuan thei mi 11 Toupa’n hon pia hi. Amaute Khristian innkuan apan mi 3 leh ginglou Honghari apan mi 8 hi uhi. Amaute, Dengaon khomi leh Bisarpo khomi hi ua, Pastor Manthing Hanse khut ah September 03 leh 24, 2017 in Baptismna tang uhi. Amaute gingtu muanhuai leh suanhuai ahong hihtouh zelna ding un thumpih ni.

2. KHAWMPI NIH ZOH IN OMTA:
a) Field Khawmpi: FBYF leh FBDF in Field Khawmpi hun ma in hun khat tuak Kitelna, Budget guanna leh thu kikupna hun zang uhi. Karbi Anglong Mission Field nuai a native lam in Field Khawmpi kum teng a a neihsek pen a zangkhai zodeuh ngim in ni khat, September 20, 2017 in EBCC Rongchingri ah Palaite paikhawm in Vaihawmna nei uhi. Hiai hun ah agenda tuamtuam kikupna a om ban ah FWC member ding telna leng nei uhi. FBYF member thakte, FBDF member thakte leh FWC member thakte nagotna hun leng hiai hun in om ngal hi.
b) Bial Khawmpi: September 22-24, 2017 sung EBCC Dimapur ah Bial Khawmpi neih in om hi. Hiai hun ah Upa T. Paukhansiam, Missions Co-ordinator in “Diktatna a Kilamthakna” chih thupi pansan in thutak genna hun zang hi. Hiai Khawmpi hun in Bial BYF leh Bial BDF in zingkal masa ah Vaihawmna hun in zang ua, term thak vaipo ding telna leng nei uhi.

3. THU TUAM TUAM:
a) Field Sung ah Seminar Programme Neih in Om:
“Khristian Biakna” leh “Khristianna leh Khantouhna” chihte thupi pansan a Kisinsakna, Seminar neih ding a field in Plan abawlsa August kha sung a zoh khit louh khuate September 2&3, 2017 in Koilamati ah neih hia, September 9&10, 2017 in Dengaon ah neih in om hi. Resource Person in Evan. John Milik, Evan. Chinkholal Lethil, Evan. Jacob Rongpi leh Rev. Jameson Bey te pang ua, Saptuamten nuam leh manpha sa mahmah chiat uhi.
b) Fellowship:
RongAli station a nei Bialtu Pastor T. Pauzalian in September 6, 2017 in amah bialsung a Upate toh kithuahkhawmna program khat neihpih hi. Hiai kithuah khawmna hun ah Pastor in a seppih Upate, Saptuam kem ding leh gum ding a thaunilhna tang i hihna dan leh chiklaipeuh a leng pangkhawm ding hih dan gen a hasuan in Upa paikhawmte teng a khe uh silsak vek hi. Program teng zoh in, ankuang umkhawmna leng neingal uhi.
c) Dorcas Khawmpi Lian:
Dorcas Khawmpi Lian, September 7-10, 2017 sung EBC Gospel Centenary Hall, New Lamka a om ah Karbi Anglong Mission Field apan mi 45 vel kihel thei uhi. Hiai hun in Phatna Lapawl sakna leng nei uhi. Khawmpi in Khawmpi chiamtehna in Field Dorca Pawl Belsun khap 6 khat pia uhi.
d) Upa Ordain dingte Orientation leh Examna:
Field in Upa Ordination piak ding a neih mi 4te (Reuben Taro, Honsing Hanse, Lokhiram Teron leh Lunse Ronghang), September 28, 2017 in thugen ding dan, Bible study neih ding dan, Ceremony sai ding dan leh adangdang sinsakna Orientation neihpih uhi.

4. KIPAH THUGENNA LEH THUMNA DINGTE:
a) Khristian lunglut leh hong kipiak ut Mr Rakesh Teron leh a innkuante ading, a lunglut bang ua a hong kipiak theihna ding un thumpih ni.
b) Jeteplong, Bokulia mun a Fellowship thak tukum a kipan khia, gingtu om sunte khalam leh salam a a hong khantouh theih zelna ding un thumna ah phawk ni.
c) Patradisha a om Unaupa Babusing Timung, Khristian a a hong kipiak nung Kum 1 bang phata, himahleh kikhek taktakna omlou, awlmoh huai mahmah thumna ah phawk ni.
d) Dengaon a om Mr Hongbar Tisso in Khristiante huat petmah a hua, lungtang khektheipa Pathian kiang ah thumpih ni.
e) Field level Departmentte leh Local level a Department ten Year Plan a a guan uh sepsuah khit nailouhte lohchingtak a a sepsuah theihna ding un thumpih ni.
f) Field sung a gingtu i neihsate awlmohna toh November kha sung in leng FWC malakna a Centre mun 6 vel ah Discipleship Camp neih sawm hi. A kizang ding mite a ding, a vaisaitute ading leh sum-le-pai kul-le-poimohte a hun hun a zattheih-a a omna ding ban ah Camp lohchinna ding in thumna a phawk chiat ni.
g) Pathian in September khasung a gingthak mi 11 hon piakte, gingtu muanhuai hi ngei ding a a hong pichin theihna ding un thumna ah phawk ni.
h) Longnit khua a, i member Ms Pratibha Rongpipi in September 29, 2017 in honna beisan a, a nutsiat a sanggamte leh a innkuante a ding in Pathian kiang ah khamuanna leh theihsiamna ngetsak ni.
i) Karbi Anglong Mission Field nuai a om Department teng in Khawmpi leh Vaihawmna hoihtak in zousiang thei vekta, Pathian kiang ah kipahthu gen ni.
j) Field hon makaih ding FCWC, FWC leh BWC member dia telching thakte ziak in Pathian kiang ah kipahthu gen in, amaute’n Pathian deihna bang a hon makaih theihna ding un thumpih ni.
k) Longnit a om Mr Mohon Teron leh a inkuante Khristian lunglut mahmah ahihlai un kipia ngam chiahlou, Pathianin hangsanna a piak a a hong kipiak ngamna ding un thumpih ni.
l) Evan. Vungngaihnuam, Typhoid ziak a damlou, misiangthoute thumna ziak in hoih mahmahta, a hong hatna ding in thumpih ni.
m) EBCC Hidim Teron in, Saptuam memberte inlusi bituk bawl a kithoh in Biakinn mun ding gam leikhia uh, Pathian kiang ah kipahthu gen ni. Biakinn tunding ahih theihna ding in Pathian vualzawlna ngen ni.
n) Evan. K. Siamzoulian’ zi Lamka a naunei ding a om, naungek chidamtak a hon neihna ding in thumpih ni.
o) Evan. Manzarual’ pasal damlouhna ziak a sepna a omkhawm theilou, a hong damsiang a, mun khat a a omkhawm theih na ding un thumpih ni.

C. DHEMAJI MISSION FIELD:
1. EBC MISSION CENTER HONKHIAK HIDING:
DMC/LSD leh HQ pangkhawm a kibawl EBC Mission center November 11-12, 2017 chiang in Rev. V Thangkhangin Director of Missions, EBC in ahonna leh latna nei ding hi. Hiai Quarter Bedroom-3, Sittingroom & Kitchen ban ah office attached a kibawl ahih ban ah Geyser leh RO/Water purifier fitsak vek ahi. Hiai program leh seminar thuahkhawm dia gel ahi a, Director of Missions leh Rev V Nenglian DS/LSD te resource persons a pang in sinsak ding uhi.

2. BAPTISMA PROGRAM leh SAPTUAM DAN A KITENNA PROGRAM:
September 04, 2017 in Evan. Haukhosiam Guite sepna khua ah gingthak mi-3 ten Pastor S Thangbiakmang khut ah baptisma tang ua, Evan. Khual Doley sepna Namgharia khua ah leng gingthak mi-2 in FS khut ah Baptisma tang uh. Hiai program zoh in Mr Migang Doley te nupa in FS khut ah kiten thakna nei zui ngal ua, Saptuam mipi’n Sacrament ankuang umkhawmna leh biakna hun manpha tak zangkhawm uhi. Hiai hunte ah a paikhawm mipite’n Local sum senna in ankuang umkhawmna leng nei uhi.
Tua ban ah, September kha mah in Evan. M Daizachin sepna mun Kapurdwa ah gingthak mi-5 te’n Pastor S. Thangbiakmang khut ah baptisma tang uhi. Hiai hun in Sacrament ankuang umkhawmna leh Fellowship manpha zatkhawmna leng nei ngal uhi.

3. EMERGENCY OPERATION BAWLSAK:
Lachangaon a om Mr Bidhyadar Taw, BCB Care Hospital ah emergency operation bawlsak ahi. Amah appendix puakkeh theiding dinmun a om ziak a bawlsak ngai hi a, sum leh pai bangmah neikei mahle uh Pathian muanna toh Hospital a puaklut in om hi. Pathian in BYF/EBCC Bungmual te zang in, operation lohching tak a neih zoh in om hi. Mr Taw’ zi kipak lua in “Ka pasal in chikchiang in hon beisan dia chia khase tak a ka omlai in, Sir te’n (Missionary-te) non awlmoh na ziak un ka pasal hinna humbit in om hi. Toupa ka phat hi” chiin kipah thu gen hi.

4. MIZORAM AH PROGAM VAZANG UH:
September 12-14, 2017 sung EBCC Aizawl in kum-25 chinna Silver Jubilee zang uhi. Hiai hun ah FS leng EBCC Aizawl a omkha ngei Pastor khat ahihna ah chial a om in lohching tak in program vazang thei hi. Huan, Sept 21-24, 2017 sung EBCC Kawlbem ah Mizoram Division Tuailai Missions-2017 program neih a om ah Field akipan Evan. Haukhosiam Guite vakihel in, field report piakna vanei hi.

5. KIPAHTHU GENNA LEH THUMNA DINGTE:
a) Field in Toupa gam nasepna ding a poimoh mahmah Powerpoint/ Projector poimoh mah mah ahihna thei in, Toupa gam nasep lunglut mahmah inkuan khat in field ah a leina ding thon uh. Amaute ziak in Toupa min phat in kipahthu i gen hi.

b) November 19, 2017 in Field Superintendent in EBCC Mumbai ah Tualsung Missions Program hun vazang ding hi. Lohching tak a zat theihna ding in thumna in delhzui ni.

c) November 11-12, 2017 a EBC Mission Center honna ding leh Seminar lohching tak a zat ahih theihna ding in thum ni.

d) September 2017 sung a Pathian in semtute tungtawn a gingthak honpiakte, khalam pichinna ding in Pathian kiang ah ngen in thum ni.

e) Mr Bidhyadar Taw, Emergency a operation kibawl hong damsiang pahna ding in thumpih chiat ni.

f) Mrs Asaboti Pegu, Namgharia damlouhna ziak in hun sawttak biakin kaizou lou hi. Amah hong damna ding in thum ni.

g) Mrs Sila Pait Pityangchapori a om damlou hong dam nawnta, a natna in awl a hon phanawn dek ahihman in semtute’n damdawi ngaihtuah sak in enkol lellel uhi. Amah lungsim lam buai hun nei ahi a, hong damna ding in thumpih ni.

h) Evan. Harbeswar Ngate, damlouhna chikhat (Dangtong na in pau haksa sa) nei sek hi. Hong damna ding in thum ni.

D. MANIPUR MISSION FIELD:
1. THU TUAMTUAMTE:
a) Immanuel English School, Thiyam Konjin in October 3-6, 2017 sung Annual sport cum Evangelistic week lohching tak in zang zou hi. Kipah thu gen ni.
b) Field Dorcas in leng DORCED panpihna piak ding sawm in motivation bawl in, naktak in pan lalel uhi. Thumna ah phawk ni.
c) Thamnapokpi saptuam in Key Board khat amau leh amau in ana neithak zou ua, kipahpih huai mahmah hi.

2. KIPAHTHU GENNA LEH THUMNA DINGTE:
a) Toupan hon piak khamangthang mi 01, Baptisma tang 03 om hi, sawm a-khat petu 04 leh mission supporter 02 hon piakte ziak in kipahthu gen ni.
b) FBDF khawmpi lohching tak a zoh in om thei, kipahthu gen ni.
c) Counselling neihpih a om MC Shingambala, David, Romila, N. Sanahanbi Devi of Oinam, H. Bebe, S. Rishikes of Langol ten thutak theichian a, Jesu hondampa a hong pom theihna ding un thumsak ni.
d) Gingthak Khomdonbi (Sarita nu) cancer in damlou hi. Pathian in damna a piakna ding in thumsak ni. Sarita mah leng maban ah Asian championship kituhna, Vietnam a om ding ah Nov. 03 a kimawl din kisakhol lel hi. Pathian min thupina ding a lohchinna a hon neihna din thumsak ni.
e) Semtute’n khamangthang itna veina, nei a lungluttak a hon sep ua, khalam khanlohna in Manipur Field hong vehna ding in Pathian kiang ah ngetsak ni.