Amasa in Gammial Aw simtute tengteng i Toupa leh Hondampa Jesu Khrist min in chibai aw! Missions Field-te a Pathian in thil thupi leh manpha hon muhsakte, anuai a bang in enkhawm nawn ni.

A. NEPAL MISSION FIELD:
1. DHARAMPUR QUARTERS ZOH SIANG HITA:
June 10, 2016 in Director of Missions in Dharampur Quarters honna leh latna nei hi. Tua hun in a inn kimkhat luah theih ding in kizou a, a langkhat a khuam leh tung kibawl mahleh ki-um bing zounai lou hi. Local Saptuamte leh Field pangkhawm in tu in, Quarter zoh siang hita. Kipahthu genna leh room kizouthak latna, July 1, 2017 in Field Superintendent in nei a, semtu in luahpah ngal hi.

2. NEPAL FIELD APAN B.Th. SIN THAK 2 OM:
Tangval nou 2, Mr. Bikas Rai, Hwaku NEBC Fellowship apan leh Mr. Khiyamraj Kadariya, Angkhop NEBC Saptuam apan in Grace Bible College ah B.Th August 2017 in sin panta uh. Amau gel deihsaktu Mr. Suanlian Tonsing, Bungmual, tulel a Germany a Ph.D sinlel in chawm ding hi. Hiaibang a mi kiphal Toupan honpiakna ah kipahna lian mahmah hi. Pathian in a tamsem seemthei ding in vualzawl leh i chi hi. Hiai tuailai 2te’n a sinna uh lamzang tak a honzoh theihna ding un thumpih ni. Nepal Missions Field apat tua mi 2 lou mi dang 6 in leng, EBC HQ chawm in Grace Bible College ah sinlel uhi.

3. SUUNNA:
Saptuam a Upa khat tel in kha paisa sung in mi 4 in thupina mun ah honna paisanta uhi. A Innkuante uleh a Saptuamte Toupa khamuanna ngetsak ni. Amaute i suun a, i it mahmah mai hi.

4. KIPAHTHU GENNA LEH THUMNA DINGTE:
1. Pathian in Gingthak mi 18 leh Baptisma tang mi 23 a hon piakte ziak in Pathian kiang ah kipahthu gen ni. Khalam a ahong khanlet zel theihna ding un thum zom lai ni.
2. Basbare Fellowship ading Biakin mun 15.25 Dhur (2,779.31sqft) a lian Nepali sum Rs. 2,33,950.00 in July 16, 2017 a leikhiak hita. Pathian kiang ah kipahthu gen ni.
3. Mizoram Division BYF in Nepal Missions Field a Cross-culture Missionary 12 omte ading thilpiak a a piakna tung uah kipahthu gen ni. Tuabang semthei zel ding in Toupa vualzawlna ngetsak ni.
4. Biakin leh Quarters kibawllelte lamzangtak a bawl ahih a zoh ahong hih theihna ding in thumna ah phawk ni.

B. KARBI ANGLONG MISSION FIELD:
1. FIELD IN SEMINAR PROGRAM NEI:
Field Working Committee (FWC) leh Field Baptist Dorcas Fellowship (FBDF) makaihna in Field sung mun tuamtuam ah, thupi (topic) tuamtuam zang in kisinsakna nei uhi.
i) “Khristian & Biakna” leh “Khristian & Khantouhna” thupite pansan in, July 2,2017 in EBCC Bithilangso leh July 30, 2017 in EBCC Rongali ah seminar lohching tak in nei uhi. Hiai hunte ah Mr Reuben Taro, Mr Robinson Teron leh AFS-te’n sinsakna pia uhi.
ii) July 14 & 15, 2017 in EBCC Rongchingri ah, Field BDF makaih in Khochih Dorcas makaite sinsakna “WOMEN LEADERS’SEMINAR” lohching tak in zang uhi. Evan. Jacob Rongpi in “Khristian Numei & Gift” chih thupi pansan in sinsak a, AFS in “Khristian Numei & Zin-le-lengte tung a mohpuakna” chih sinsakna nei hi. Khochih BDF makaih in mi 40 valtak paikhawm ua, Phatuam mahmah dia lamet ahi.

2. KIVEHTUAHNA PROGRAM:
July 9, 2017in EBCC New Langrik BDF member mi 18 vel in EBCC Rongchingri BDF vehna vanei uhi. Programme Session 2 a zang in kithuahkhawmna nuamtak vazangkhawm uhi. Thugentu in Evan. Sarthe Hanse leh Mrs Hana Rongpipi, President FBDF pang uhi. Hiai programme a telte’n muamsa in kipak chiat uhi.
July 23, 2017 in EBCC Rongchingri BDF in EBCC Bithilangso BDF vehna, Bialtu pastor (AFS) makaih in nei uhi. Kithuahkhawmna nuamtak aneih ban uah AFS in Pathian thutak genna nei hi.

3. GINGTU KIBEHLAP & BAPTISMA PROGRAM:
Saptuamte thumna leh semtute kuhkalna ziak in, Disama area ah Ginglou mi; Mr Velson Bey leh Mr Ronjit Ronghang, Evangelist-te leh Upaten houlimpih ua, Counselling tungtawn in Jesu Khrist Hondampa in sang uhi. Amaute July 23, 2017 in Pastor T.Pauzalian in Baptisma pia hi. Rongali a om Tabitha Hansepi, Serlin Ingtipi leh Mirdan Timungpi-ten leng hiai hun mah in baptisma tang uhi
Bithilangso a om Mrs Jelina Beypi, Karbi Honghari Sakhua akipan, Khristian ah hong kipia in, Counselling hoihtak neihpih ahihnung in July 9, 2017 in Pastor Joel Hanse in baptisma pia hi.

4. THU TUAMTUAMTE:
i) EBC Dorka Khawmpilian ading Field leh Bial Dorcaste join a lapawl zilna Diphu, Dimapur, Kohima leh New langrik munte ah nei uhi. Sinsaktu in Evan. H. Jamkhanmang, Mr. Danial Rongpi leh Evan. Jangkhohau Guite pang ua, a kipiak zohna uh phathuai mahmah hi.
ii) EBCC Bithilangso saina in July 24-28, 2017 sung, Bithilangso ah Tonic Solfa Training neih in om a, Evan. H. Jamkhanmang sinsaktu in pang hi. Local Saptuam a Tuailaite kia hilou in Saptuam dangte bangzah hiam in leng hiai training phattuampih uhi. Huchibang a local saptuam khat in ngaipoimoh a a na saina uah phathuai leh ettontak mahmah uhi.
iii) Dengaon muna Retaining wall kibawl zoh hita. Kipahthu gen in, TariAdong a school kibawl lel hoihtaka zoh khiak a hihna ding in thum ni.
iv) Dimapur a om unaupa Mr. Velngulmuan Hauzel (Boipu), Dy Chief Engineer Rly. in Field Superintendent zat ding in Pathian min in AC (Window AC) a tenna in mahmah uah va puak hi. Pathian mite deihsak leh awlmoh unaupa ziak in Pathian min i phat hi. Pathian in a leh tampi in vualzawl hen.

5. KIPAHTHU GENNA LEH THUMNA DINGTE:
1. Khristian lunglut unaute Mr Mohan Teron of Longnit, Mr Joysing Rongphar, Mr Biren Engleng leh Mr Sarsing Engleng of Diphu-te, alunglut bang ua hangsantak a a kipiak ngam ua Khrist ading a theihpihtu muanhuai a hong suah theihna ding un thumna ah phawk ni.
2. CES Rongali in July 12-14, 2017sung, Student Evangelistic week Program a neih uh lohchingtak a zoukhe thei ahihman un kipah thugen in a hong gahkhia muh ahih ngeina ding in naupangte thumpih zom ni.
3. Elder Dr.Lipson Rongpi accident ziak sawtpi Guwahati GNRC a ki-enkol, dam a a pai theih ziak in Pathian kiang ah kipahthu gen in ahong hatpah theihna ding in thumna a phawklai ni.
4. Sumpho adong khua a innkuan thum TARO Inkuante (Karbi Honghari Sakhua) Khristian lunglut hong kipe dia manta, kipahthu gen in amaute nungzui muanhuai a hong hihna ding un thumna toh delhzui lai ni.
5. Bokulia area sung a om Jeteplong khua Hausapa Teron & a innkuante Pathian thu kihoulimpih theih hita, a thuzakte uh tungtawn a Khristian a hong suah theihna ding un thumpih ni. Huchi mah bang in Mr Noren Teron leh a innkuante leng Pathian thu bangzah vei hiam semtuten houlimpih ta ua, maban lamet huai, thumna ah phawk ni.
6. Hun lemtang masapen a Khristian hong kipia dia mansa a om Unaute, Mr Longki Taro , Mrs Kave Hansepi, Mr Sonjoi Taro, Mr Rensing Taro, Mrs Sika Beypi, Ms Karisma Taropi, Ms Serdihun Taropi & Mr Aklar Taro-te ahi ua, amau Bokulia area Sumpho Adong kichihna mun ah om uhi. Thumpih ni.

C. DHEMAJI MISSION FIELD:
1. DIGOLGORAH BAPTISMA PROGRAM: July 2 leh July 13, 2017 in Digolgorah ah gingthak mi-5te’n Pastor S Thangbiakmang khut ah baptisma tang uhi. Pathian in a vangkim a i sepna gah hon piak zelte ziak a kipahthu gen kawm in, amaute khalam pichinna ding in thumpih gige ni.

2. MILIM BIAKNA INN SIANSUAH UH: July 2017 khasung in Pastor S Thangbiakmang leh Evan. Monikanto Kutum-te’n Digolgorah a om gingthakte compound a milim biakna inn siansuah uhi. Mrs Dorpona Doley kichi in damlouhna hunsawt tak tuak in doctor tuamtuam kiang ah ki-ensak mahleh damna taktak ngahlou hi. Huchiin semtute tungtawn in Jesu Khrist gingta in baptisma tang in, a tenna compound ua milim biakna inn siansuah ding lemsakna a piak dungzui in siansuah in om hi. Unaunu’n a ginna tungtawn a Pathian hihdamna hon ngahna ding leh a khalam pichinna ding in thumpih ni.

3. PITYANGCHAPORI SAPTUAM KUM-4 CHINNA LAWM UH: July 28, 2017 (Friday) in Pityangchapori saptuamte’n a kum-4 chinna thupi tak in lawm uhi. Hiai hun saptuam mipi’n Pathian kiang ah kipah thugenna leh thumna hun in zangkhawm ua, ankuang umkhawmna leng nei uhi.

4. PITYANGCHAPORI BIAKIN BAWLZOH HITA: Pityangchapori a mi gam khelh thoh a kum-4 biakna neih ahih nung in, Biakin mun ding gam bhiga khat leikhiak in om hi. Mahajon Pu Vungkhum Guite & Family leh EBC Headquarters pangkhawm in Biakin kilawm leh hoihtak, 34x15ft a lian bawlzoh hita hi. Fencing leng zoh hita a, mistry-te’n kou leng mission nasepna a ka panna uh chi in, fencing bawlman hon lalou uhi. Head Mistry Mr. Khamson leh a team-te tung ah kipahthu i gen hi. Biakin hon theih mai dia zoh hita.

5. FIELD OFFICE-CUM-FS QTR. BAWLNA: Jan. 2017 apan kibawl FS Qtr-cum- Office ding bawlna in masawn zel hi. Tulai in campus earth-filling, painting, outside toilets, windows, boxes/almirah-te bawlsan lel ahi a, hiai teng zohchiang in boundary wall/fencing bawl sutzop hi ding hi. Tua bangzel a nasep a pai touh leh kha-2 ma ngei a zohsiang lamet ahi.

6. BIBLE ZILTHAK 1 IN KIBEHLAP: Dunaguri khua a om Miss Trisnamoni Pegu GBC a Bible zilding in lutthak hi. Amah unaupa T Suanlian (Tu lel a Germany a Bible zillel) in hon sponsor sak ding a, Rev. Dr B Luaichinthang-te inkuan in Local guardian din mohpuakna hon laksak ding uhi. Tuin Mr Debyo Mili, Mr Kumar Pegu, Miss Deparani Doley-ten GBC ah sin lellel uhi. Amaute thumpih zel ni.

7. KIPAHTHU GENNA LEH THUMNA DINGTE:
i) Semtute’n Pathian kha thopna tang a, Khamangthang tamsem hon ngahna ding un thumpih ni
ii) Field office ding bawlna nasep tulai in paitou zel. Nasemte’n buaina omlou a honsep zom zel theihna ding un thum ni.
iii) Field office a semtu Evan. V Ginsonthang, Jan. 2017 a major operation kibawl nung a chithak/chiphual in phalou a om nung in, chithak in pha nawn hi. Hong damsiang theihna ding in thumpih ni.
iv) Pathian in field a gingthak honpiakte leh gingtu hisate Khalam pichinna ding leh ginna kipzaw sem hon neih theihna ding un thumpih ni.
v) Kangkan, Tinsukia District a i sepna khokiang ah khothak kisatthak hi. Hiai khothak a teng mi-3 te khani’n in subuai sek a, semtu leh saptuamte’n thumsakna a neih nung un hongdam uhi. Amauten Jesu Khrist gingta in baptisma tangding in kiman ta uh. Hunlem masa a baptisma piak ahih ua amaute leng Jesu Khrist a ginna kip zawsem hon neihna ding un thumna in phawk ni.

D. MANIPUR MISSION FIELD:
1. Nachou a mitdel Prakash tapa accident ziak in guh kitan in JNIMS ah etkol in om hi. A pi’n Khristian kuamah veh ding phallou. A hong damna ding in thumpih ni.
2. Counselling neihpih a om lel Toubul apan – A. Tatao leh W. Sanju Singh ; Nachou apan –Uttam leh Dollar Singh leh Thoubal Khunou apan M. Radhika-te’n thutak theichian a, Jesu Khrist Hondampa a hon san theihna ding un thumpih ni.
3. Field in workers nupa seminar neih sawm hi. Lohching leh gahsuahtak a neih a om theihna ding in thumpih ni.
4. Toubul a MEBC Chairman in a sihsan innkuante khosak haksa mahmah ua, A nu Hema nitha kiloh tawm khut ah kinga uhi. A tate mi 4 school kailai chawm toh buai mahmah ahihna ah thumpih ni.
5. Semtuten khamangthang itna leh veina nei a, lunglut tak a ahon sep ua, khalam khanlohna in Manipur field hong vehna ding in Pathian kiang ah ngen ni.