Amasa in Gammial Aw simtute tengteng i Toupa leh Hondampa Jesu Khrist min in Kumthak,  2017  chibai!  I thumnate  tungtawn  a Toupan Mission Fieldte a thil thupi hon muhsakte, anuai a bang in i enkhawm nawn ding: A. NEPAL MISSION FIELD
Toupa’n semtute tungtawn in Baptisma tang thak - 08, Gingthak = 13, Sawm-a-khat pethak = 10, leh Dansiangthou a koppih nei thak = 01 hon penawn hi. Toupa kiang ah kipahthu gen ni. 1. Imbung area group evangelism report:
November 27 – 28, 2016 in Imbung khua ah gingloute lak a tanchinhoih genna semtu mi 10 leh gingtu amaute panpih mi 5 in zinglam dak 7:30 apan in nitaklam dak 5:00 tan hun zang uhi. Pathian ompihna toh tanchinhoih zakha nailou tamkhop kituahpih in Pathian Hotdamna thu zasak uhi. Hiai program zat ahih sung in inn 145 ah lut uhi. Thukhunthak laibu 132 hawmkhia ua, “Heart    of Man” kichi labuta 10; tract bundle 7 leh tract dang “The Two  Ways” kichi copy 100 hawmkhia uhi. Ministry neih sung a piangthak omgeih kei mahle uh, a lunglut taktak tamkhop kihoulimpih uhi. Imbung NEBC Fellowship, Field Khawmpi 2016 in pom a, November 26, 2016 sun dak 11:00 in area Pastor Dilip Kumar Samal in honna nei hi. Pathian in Group Evangelism Ministry tungtawn a hiai bial  a Jesu Lalgam keklet a a hong om a, kha mangthang ding tamtak hotdamna huang sung a piilut a hong hihna ding in thum chiat ni. Phidim a i semtu Evan. Manoj Rana Magar in hiai fellowship enkol khawm hi. 2. Field apan missions motivation phase ii report tom: Missionarite apan a motivation program zang a Saptuamte vehna in i saptuam leh i Fieldte ah khanlohna thupitak tun a, maban ah nasa zaw sem in tun lai ding hi. Phase I leh Phase II a kuante report tungtawn in gah manpha tak suang ahi chih muhtheih a om man in kipahhuai i sa hi. Saptuamte a dia feedback hoihtak ahihman in poimoh i sa a, Phase II a kuante report anuai a bang in i taklang ahi. Pastor PL Ropiang Report: Pastor PL Ropiang pen Mizoram Division ah November 5 apan ni 15 sung vataam a, Saptuam 8 tawn in Field Report piakna nei hi. Aleh lam ah Saptuamte apan in Saptuamten missions a dia a panlakdante uh ngaihkhiakna hun va zang a, tua in thaguan mahmah hi. Mizoram DS in Tour program a bawlsak zui in, missionari dang 3 toh kizui ua, area pastorte’n ana makaih den uhi. Hiai program tungtawn a, a muhkhiak khenkhat Missions nna sepna ding a zing beltak a thumtu leh anngawl a thumtu tam mahmah, mimal leh saptuam in missionari vak, Missionarite a limthei pen  nek pih leh amaute a ding a thohlawm donsak chihte thupi sa in Saptuamte kipiakna kipahpih mahmah hi. Tua ahih dungzui in, Field a semtute naksem a pang ding in Field a omte hasuan hi. A kuante’n i commitment bang leng velthakthak ding poimoh sa mahmah a, Missionari lak chiang a leng commitment hoihtak neite mah lak ding deih hi. Pastor L Paukhankhup Report: Pastor L Paukhankhup in Imphal leh Vangai Divisionte ah lawm dang 3 toh khua 13 vatawn uhi. A va phakna khuate Missions nnasepdan a gente un a lungsim khoih mahmah hi. Imphal Division a DMC ten missionarite lim biakinn teng a taksuak ua, thumpih gige ua, thupi lua chi hi. Missionarite ana ngai thupi mahmah ua, thilpiak tuamtuam motivation a kuante a ding in pia ua, don sak uhi. Saptuam miten a innte ua lut a akhe niin bek uh vatat ding in chial uhi. A neilou mahmahte’n leng a piak ding uh zongtawm in banghiam bek piak sawm teitei uhi. Pathian min a kalsuankhete Saptuamte ngaihnatdan a muh in thaguan a, hampha kisa hi. 3. Community lay leaders healyh Training Certificate Course Zou: Evan. Sangbiakmawi in Field a zat theih ding damtheihna lam toh kisai training poimohtak mai a Phase IIIna leh a zohna October 29 to November 19, 2016 sung Alipur, Assam ah zouta hi. Amah leng kuhkal tak in a training ban ah zin leh vakvelna leng kithalawptak in kal va suan a hong zouta ahihna ah i kipahpih hi. Hiai training in semtute lak leh sepna mun le mite a dia vualzawlna khalam leh salam a atutngei i lamen a i thumna ahi. 4. Kipahthu genna leh Thumna a Theih dingte
1. 2017 casual a semtu Native worker 22 lak tup ahi. Pathian nna sep ut, mi kiva leh muanhuai piak a i om nading in thum ni. 2. Sikkim ah semtu khat kum nih paita a kikoih pen tu kumthak ah mi 2 koihbeh ki ut, mun leh mual kichian Pathian in a hon piakna ding in thum ni. 3. Pathian in Gingthak mi 13 hon piakte leh baptisma tang mi 8 te ziak in Pathian kiang ah kipahthu gen ni. Khalam a ahong khan jel theihna ding un thum zom lai ni. 4. OTI ah missionary training, January to November 2017 sung a kuan ding Evan. Sangbiakmawi, Padajungi station, thumna ah phawk ni. 6. Faklung khua a Pathian thu a lunglut mahmah himahleh a innkuante ziak a lemtang nai lou Mr. Budhiraj Rai, Mr. Sontosh Rai, Mr. Jibit Rai, Mr. Reuben Rai, leh Miss Sonu Raite thumsak ni, a ginna uh ahong taksuah theihna ding in. B. KARBI ANGLONG MISSION FIELD
Toupa’n semtute tungtawn in Gingthak 9, Baptistma tangthak 3, leh Sawm-a-khat pethak 2 a hon piaknawn te ziak in a min i phat ahi. 1.Mijung area ministry:
Tari Adong akipan 4Km vel a gamla, Mijung area kichihna mun (Ginglou Khua) ah, EBCC Tari Adong BYF leh Evangelist-ten Khamangthang veina leh awlmohna toh, mahni ration ding kipuak chiat in, November 4-5, 2016 sung Ministry va nei thei uhi. Hiai ministry manpha leh lohching mahmah a maban limchi mahmah ahihdan report zak ahi. A lohchinna di’n thumna a phawk chiat ni. 2. GingthaK Kibehlap:
I thumna dawnna leh Tari Adong mun a om semtute kuhkalna ziak in, Mr Horen Bey Innkuan Karbi Honghari akipan Khristian hong kipekhia ua, amaute November 12,2016 ni in Pastor khut tungtawn in Baptisma piak ahi. Gingtu muanhuai ahonghih nading in thumpih in amaute ziak in kipahthu genni. Tari Adong kichi, nidang a gingtu innkuan khat leng omlouhna a na hi a, himahleh Saptuamte thumna leh semtute panna ziak in tun hiai khua ah inn 3/4 kia ginglou (Honghari) omta, Halleluiah! Khristian khua a honghih theihna ding in thumpih lai ni. Baptisna kipete laka Maloti Beypi Class IX sim a Diphu a a pute kiang a om Khristian a hong suah ziak in a omna ah om thei nawnlou in tun FS in enkol lel a maban sunzawm hi. Pathian kiang ah thumpih ni. 3. KipahThu genna leh Thumna a Theih dingte:
1) Field sung a schoolte’n Kumtawp Exam buaina bangmah omlou a kizou thei ahihman in Pathian kiang ah kipahthu gen ni. 2) I thumna pangkhawmte uh tungtawn a Semtute gahmuhsak a om Tari Adong mun a om Mr Horen Beyte innkuan Khristian a hong kipia baptisna i piakte ziak in kipah thugen in, gingtu muanhuai ahong hih ngei nading un  thumna ah phawk ni. 3) Longnit area a Khristian lunglut Mr Deori Terang-te inkuan leh Mr Sikari Engleng-te innkuan hangsan tak a a hong kipiak theihna ding un thumpih ni. 4) Evan. G. Haupu Tapa Mr Thathang Lamka Rehab Centre a om, a hong kikhekna ding in thumna a phawk ni. 5) Disama area a om Mr Sonjit Beyte innkuan i thumnate ziak in November 5, 2016 in Khristian ah hong kipia uh, kipah thu gen ni. 6) Rongali a Evan. H. Jamkhanmang kipiak zohna ziak in khosung a Tuailaite leh a ut peuhmah ading in Bible Study Class neihpih a, paitou zel ahihna a kipahthu gen in, a hong gahsuah semsemna ding in thumpih ni. 7) EBCC Dengaon Saptuam mi nungtolhte ading Pastor leh Semtute kithuah in, inn a Counselling Program a neihna lohching mahmah ahihdan report muh ahi,  kipahthu gen in, thumna in phawkzui ni. 8) EBCC Paklongkam a i Saptuam member Mr Sing Ronghang leh a innkuante sisun a om, Pathian apan khamuanna a neih theihna ding un thumna in phawk ni. 9) EBCC Dengaon in Khamangthangte adia anngawl thumna, November 27, 2016 a a sai lohching leh kipaktak a zoh a omta ahihman in kipahthu gen ni. 10) Manja Jari Teron khua a om Mr Joising Kro leh Mr Kensing Kro Pathian thu lunglut leh Khristian suak ut, a hong kipiak theihna ding un thumna ah phawk ni. 11) Rongchingri mun a School building Construction zoh thei a omtak ziakin kipah thugen in, a kul-le- poimoh tampi hihding sep ding omlaite a hun hun a sepkhiak a hihtheih nading in thumna in phawk ni. 12) Field sung a Church Building leh Pastor Quarters Construction Nnasepna pailellelte buaina bangmah omlou a zoh ahihtheihna ding in thumna in phawk ni. 13) Ms Rupali Teronpi, Setan in nakpitak in soisa mahleh Saptuam (misiangthou) te thumna Pathian hon dawng in tu-in normal in hong omta chih thu zak ahi. Pathian kiang a Kipathu gen kawm in, amah hong damna tungtawn a gingloute Pathian lam a a hong kihei theihna ding un thum ni. 14) Hidim Teron Fellowshipte kikhopna mun sia lawta, amau a kibawl zoh chilou, biakna mun hoihtak a neih theih nading Pathian kiang a ngetpih ni. C.DHEMAJI MISSION FIELD:
Toupa’n semtute tungtawn in Baptisma tang thak 05, Gingthak 05, leh Biakinn thak 02 hon piaknawnte ziak in kipahthu gen ni.
1. Baptistmal programme: Nov 24, 2016 in Amguri khua  ah gingthak mi- 5 ten Pastor S Thangbiakmang khut ah baptisma tang uhi. Amaute sacrament ankuang umpihna leng neih a hi a, khalam a hong pichinna ding un thumna in phawkzel ni. 2. Dunaguri KuTum a biaK inn honna: Nov 23, 2016 in Dunaguri Kutum, North Lakhimpur district mun ah FS in biakinn thak honna leh latna nei hi. Biakinn honna program a kho hausapa’n a uap ban ah thugenna saulou vanei hi. Semtuten thugenna a neih chiat ban uah, Evan Kim Paite leh Mr Monikanto Kutum ten Pathian phatna lasakna hun nei uhi. Hiai khua June 2016 vel akipan semtu ten Gospel meivak a na puaklutna khua uh ahi. Pathian in gingtu tamlou honpiakte biakin ding poimoh ahihna ah Pu T Lalkhanhau, EBCC Aizawl in hon sponsor a kibawl thei ahi. 3. Amguri Khua ah biaKin ThaK hon leh bapTisma program KiThuah ZaT in om: Nov 24, 2016 in Amguri khua ah FS in Biakin thak honna leh latna nei in, Baptisma program leh sacrament ankuang toh leng thuahkhawm hi. Hiai Amguri khua ah May 2016 vel in semtu ten Tanchinhoih va genpan uhi, Pathian in i sepna hon vualjawl zel in, tuni chiang ah mi- 20 baptisma piak in om ta hi. Hiai biakin bawlna ding TMC/Hebron EBCC te’n hon sponsor uh a, a sung a furniture dingte TMC/EBCC Singngat in hon sponsor uhi. 4. Director leh m/CoordinaTor dhemaji ah: Director of Missions leh Missions Coordinator ten Oct 27, 2016 in Dhemaji field vehna nei ua, Mission Center mun ding Foundation Stone phumna nei ngal uhi. Hiai hun in Digolgorah leh Pityangchapori mun leh Kangkan, Tinsukia district lam vehna nei ua, Kangkan saptuam mipi’n reception program thupi tak a bawl ban uah maban nasep dingdan kikupkhawmna leng nei uhi. Director leh Coordinator toh kizui in Living Hope School, Arunachal Pradesh lam vehna leng nei uhi. 5. Field Office ah reception program zat  in om:   Nov 23, 2016   in Mission Campaign a kuan Evan Gounemlian leh Evan Daizachin ban ah, Community Lay Leaders Health Training zouthak Evan Nianghoihkim te reception program field in zatna nei hi. Hiai hun ah amauten report ngaih nop huai taktak pia ua, semtute tha thousak mahmah a theih ahi. 6. Field toh kisai chiamteh tham khenkhatte: Field toh kisai semtu ten theihpatawp a panla ahi uh chih theihtheihna ding in, chiamtehtham khenkhat hong kitaklang hi: (i) Buh-at lai pikhia: Evan Thangbiaksuan Pathian ni kikhawm ding a a kuan leh, Gingtute lak a numei khat buh-at in lou a na kuan hi. Evan. Suan lou lam a vatai vengveng in i gingtu numei buh-at lai Bike a pawkhia in, Biakin kaipih hi. (ii). Hun zatsiam lou uh: Amguri a Baptisma tangding a kuan baihte dak 9:00am vel in kuan uh, Baptisma tangding te lak a khat dak 11:00am tan inleng hongtung lou hi. Gingtuten a vasap dek uleh bawng ching in na kuan khia a, bawngchinna lam ah vasam uhi. Mi sam a kuan pen hongtung mahleh sap a om pen hong tung ngeilou zel hi. Ki sawl nawn a a va et nawn uleh sam rong (sam vomlou) ka nuh phot a na chi hiathiat dan ahi. Ahia, baptisma toh kisai buaina bangmah omlou in ki tangsak thei hi. Hichi bang mite lak a kuhkalna leh dohzohna toh i semtute kipiak zohna thupi mahmah sak in om hi. 7. Field in Thilpiak tuamtuam a tante: Field in saptuam leh mimal mission lunglutte akipan Itna thilpiak tatsatlou in kingah den hi. Hiai in mission nasepna a pangkhawm vek i hih dan hon musak ahih man in kipah huai mahmah hi. Tukha sung a thilpiak honglut tuamtuamte a nuai a bang ahi:
(i) Nu Vungkhoman, EBCC Itanagar in field poimoh nana a zat ding in FS khut ah Rs 5,000 pekhia hi. Hiai sum zang in Dunaguri biakin furniture (6-benches & 1 table) ding bawlsak ngal ahi. (ii) Upa Nangthiankham in Kangkan a semtu quarter furniture a ding in Rs 10,000 Field Account ah transfer hi. Amah Champhai a sem ahi. (iii) EBCC Kolkata in Dhemaji field in a poimoh bang a zat ding in, Rs 54,414 Director tungtawn in pia uhi. (iv) TBMC/EBCC Singngat in Amguri leh Namgharia biakin furniture a ding in, Rs 8,000 Director tungtawn in pia uhi. (v). TBDF/EBCC Mata in Field huhna ding in. Rs 5,000 Director tungtawn in pia uhi. (vi). EBCC Itanagar in Dhemaji field a hawm ding in, Second hand tamtham tak FS khut ah pia uhi. Hiai second hand puante semtute tungtawn a hawmkhiak hita hi. (vii). BDF/EBCC Guwahati in Dhemaji field a hawmding puansilh second hand tamtak kaikhawm in field office ah thon uh, hiai puansilh te Christmas gift dan in field in hawmkhia hi. Hichi bang silh leh  ten ki ngahsekte gingtu ding zolna a kizang hilou in, gingtu hisa (ei gingtu) te kiang a kihawm zel ahi, amauten kipahpih mahmah ua, sawplouh ngen in silh pahpah uh. Thilpiak honpetute tung ah kipahthu i gen a, Toupa vualzawlna i ngetsak hi. 8. KipahThu genna leh Thumna a Theih dingTe: 1. Field ading thilpiak tatsatlou a lut zelte ziak in kipah thugen in, thilpiak dongtuten Khrist Itna a theihchian semna uh ahihna ding in thum ni. 2. Digolgorah saptuam a gingthak Mr Sibonath i thumna te uh ziak in ding thei in mahni khe in pai thei panta hi. Kipah thugen kawm in ahong damsiangna ding in thumpih zomzel ni. 3. Kumthak 2017 chiang in i semtu Evan Thangbiaksuan, OTI, Hosur ah kum-1 sung training in kuan ding hi. Lohching tak a hon zoh khiak theihna ding leh a nutsiat ding a zi leh tate Pathian kiang ah thumpih ni. 4. Field a project tuamtuam Office-cum- Qtr bawlding leh, Kangkan mun a biakinn bawlding toh kisai lamzang tak a nasep a pai theihna ding in thumna ah phawk chiat ni. 5. Dhemaji field a thak ahih ziak in field office leh staffs ki nei nailou ahih man in FS in internal arrangement bawl in, Evan. Gounemlian nipikal khat a 2vei office kai in Account enkol in fel mahmah hi, Bank leh govt office ban ah nna poimoh tuamtuam ah Evan. Kaplun Paite in FS toh kithuah in semkhawm uh. Amaute ziak a kipah thugen in office nasep bangkim feltak a apai zom zel theihna ding in thumpih chiat ni. 6. Pathian in gingthak honpiakte piching sak zou ding in semtute a ding in thumpih ngitnget ni aw. D. MANIPUR MISSION FIELD:
Manipur Missions Field a Toupa’n semtute tungtawn in Gingthak – 01, Sawm-a-khat pethak - 04, leh Mission Support thak – 01 hon piaknawn te ziak in A min i phat hi. 1. Thu TuamTuam : 1. Lamka North Division Missions Committee in Thanga Salam vehna a va neih na uah a Biakin bawl uh Rs. 50,000/- in panpih  uhi. Tua ban ah itna ankuang umpihna leng nei ngal uhi. Ittu leh awlmawhtu Toupan a honpiak jel jiak in field a saptuamte kipak mahmah uhi. 2. EBC Headquarters in Kamranga Cachar Assam a MEBC saptuam leh Bethel English School tawh kisai saifel ding a chih bang in Field Superintendent makaih in semtu khat leh FWC Chairman vakalsuan uhi. Amau EBC a pan separation letter ana piak uh pomsak ahihman in, a gam patta piakkikna, semtu Pastor Bisteswar kitawp siangna thu kanchetna leh Skul a semtu Evan. Ginkhenmung sepna tawh kisai incharge kipiakfelna va nei uhi. 3. Thoubal khunou saptuamte’n MEBC a fellowship thakte thilpiak bench 4 chiat pia in Utlou, Oinam leh Ningthoukhong te vehna leh fellowshipte neih pih uhi. Hiai bang a amau leh amau ki awlmawh theihna ahon neih uh masawnna khat ahih man in I kipahpih mah mah hi. 4. November 22, 2016 niin Toubul  MEBC Chairman H.Chaoba    in thupina gam ah honna paisan hi. Aman a ji leh tapa 3 nusia hi. Amaute vengsung ginglouten naktak in mawhsa uhi. A huangsung ua Biakin kibawl bang phel ding in sawl uhi. Saptuam tamlou kipan tung leng ahih man un, semtu Ps Deban leh saptuamte ading in naktak in thumpih kisam mahmah hi. 2. KipahThu genna leh Thumna a Theih dingTe :
1. Pathian in khamangthang 01, sawm-a-khat pethak 04 leh Missionary supporter honpiak nawn ziak in kipahthu gen in, tuabang mi atamsem hong om nading in thumna ah phawk ni.
2. Evan S.Johnson leh S.Premjitte’n Mizoram leh Imphal/Vangai Division te ah field report pedia kuan damtak a atunkik ziak un kipahthu genni.
3. OTI ah Evan. Binoy Singh Langol a semtu in a zi-le-ta nusia in January 2017 in training in kuan ding hi. Pathian vanzat hiam  zaw leh lohching zaw sem ahong hihtheihna ding leh chidamtak a training ahong zawh theihna ding in thumsak ni. 4. Naranseina in Sound project a neih uh amau kia a hih buching zolou ahihna uah, Toupa’n Hiangtam Lamka TMC tungtawn a panpihna a piak ziak in kipahthu gen ni. Upa Mangpu Tonsing in sound-box 2tak athawn in pia hi. Toupa it mikiphal i neih ziak in Pathian kiang kipahthu genni. 5. Thanga Salam a biakin kibawlel sumlam buaina jiak in, deih bang in hat theilou hi. Semtu Pastor O.Manibabu leh a saptuam kepte’n tha it tak in sem uhi. Hoihtak a hon zohkhiak theihna ding un thumna ah phawk chiat ni. 6. Counselling neihpih lel aom Th Apik,Toubul leh Thokchom Munal,Thoubal te’n Jesu hondampa ding a hon san theihna ding un thumsak ni. 7. Mangjing a semtu Sonkumar a inluahna pa’n zu akham chiang in vanawkveu a, kisuankhe ding in vauna ngah zel hi. Hiai mun ah tuailai gingtu 20vel kinei a, mi gam khel a biakin lianlou i neihna mun ahi. Pathian venna leh ompihna manpha ngetsak din i kingen uhi.