Amasa in Gammial Aw simtute tengteng i Toupa leh Hondampa Jesu Khrist min in chibai! I thumna leh thilpiakte tungtawn a Toupa’n Mission Field-te a thilthak hon muhsakte anuai a bang in enkhawm nawn ni.

A. NEPAL MISSION FIELD:
1. HALDIBARI BIAKINN HONNA:
June 22, 2017 in Rev Lalmalsawm, Field Superintendent in Haldibari Biakin thak honna leh latna nei hi. I gingtu Milan Magar huangsung a biakin mun neihma a zatzual dia kilam ahi. Saptuam Inn 13 pha ua, baptisma tangsa member 19 hi uhi. August 2016 a Fellowship kipan ahi a, January 2017 apan in Native Worker khat, Evangelist Ganesh Rasaily leh a innkuanten teenchilh uhi.

Hiai khokiim a singpi huan a sem, Mrs. Maina Murmu kum 33 mi damlou, a khe na in paithei lou hi. Evan. Ganesh tungtawn in hong piangthak a, a khe na leng awlawl in hong hoih hiaihiai hi. Amah leh midang 8 in April 22, 2017 in Baptisma tang uhi. Tuni chiang in damsiang vilvelta hi. Tukum sung in hiai mun a singpi huan bawlte mi 15 in Jesu hondampa in sangta uhi. Toupa min phat in omhen.

2. SIKKIM GROUP EVANGELISM REPORT
June 5-11, 2017 sung Sikkim a i sepna mun, Takhuthang leh Uttarey pansan in Pastor Paukhankhup makaih in mi 8 in Group Evangelism nei in, tua i station kiim a khua 5 ah tanchinhoih puanzakna hun zang uhi. Hiai hun in gingthak mi 4 piakbeh in i om hi. Sikkim a station 2 i neih te ah Biakkhawmna kipan thei panta hi. Ahong pun zel ua, biakna ding mun leh mual i neih a saptuam dinkhiak ahong hihpah theihna ding in thumna ah phawk ni.

3. KIPAHTHU GENNA LEH THUMNA DINGTE:
i) Buttabari a i gingtu Mrs. Suria Kumari Subba damlou a lupna ngak, zawngkhal mahmah mai thumpih ni.
ii) Grace Bible College a Laisiangthou sin nuam mi 2, Mr. Bikash Rai leh Mr. Khyamraj Kadariya ten B Th. Course ading in kisa uhi. Daltu omlou a tup le ngim bang a Laisiangthou a sin theihna ding un thumpih ni.
iii) Biakin leh Quarter kibawl lellelte thumna ah phawk ni– Kathmandu Biakin, Parajungi Quarter, leh Tanglepa Quarter.

B. KARBI ANGLONG MISSION FIELD:
I. NASEP TUAMTUAM:
a) Quarter Honna:
1. Pathian hoihna ziak in Manja ah Saptuam gam ding tukum bul a leikhiak a omna mun ah, Quarter hoih leh kilawmtak Bial Working Committee in bawl hi. June 10,2017 in BWC makaih in Rev Jameson Bey (Asst.Field Superintendent) in honna leh latna nei hi. Hiai hun ah BWC Chairman Upa Ginzalal in Manja Fellowship Chairman khut ah Saptuam Quarter kepna leh etkolna toh kisai mohpuakna piakkhiakna nei hi.
2. Headquarters toh pangkhawm in Field Central Working Committee in Pastor Quarter hoihtak Rongali ah lamkhia a, Director of Missions, EBC in June 29, 2017 in honna leh latna nei hi. Hiai hun ah FCWC member om thei teng leh CMSC member Upa Herbert T. Sumpu leh Upa Biakmuanthang ban ah Mission Coordinator-te’n leng uap uhi. Upa Herbert T. Sumpu in Quarter ading Wall Clock hoih mahmah khat pia hi.
3. Tualsung Baptist Missions Committee EBCC Dimapur, FCWC leh Headquarters pangkhawm a New Langrik a semtute Quarter kibawl zoh ahihtoh kiton in, June 29, 2017 in honna leh latna Director of Missions EBC in nei hi. Hiai hun ah CMSC member Upa Biakmuanthang, Upa Herbert T.Sumpu, Mission Co-ordinator Upa T.Paukhansiam leh Field Central Working Committee Chairman Upa V. Thawngzalian, FCWC member Upa VL Muana leh semtute bang zah hiam in uap thei uhi. Upa Herbert T. Sumpu in Quarter ading Wall Clock hoih mahmah khat a piak ban ah Upa Biakmuanthang in leng itna thilpiak pia hi. Hiai Quarters tunding nading a nikhat leng maihlou a kisuk a pang Sarthe Hanse leh Paunou Guite kiang ah field in kipahna thilpiak tamlou tuak pia hi.
b) Kithuahkhawmna:
1. June 8, 2017 in Field Head Quarter ah FS & AFS te makaihna in tuailai, Bible zil lunglut leh a zouthakte Consultative Meeting neihpih uhi. Field akipan a GBC a Bible zil, 2017 a zou khia mi thumte leh Bible zil dia field in a sawlsawm Tuailai mi ngate kipiakna leh a testimony te uh ngaihkhiak na leh houlimna om ban ah, FS in a zoute tung a lamet liantak Saptuam in nei ahih dan leh a kuanthak dingte’n Field taksapna en veng veng kawm a kuhkaltak a pan kul ahih dan gen hi.
2. Field Baptist Dorcas Fellowship Committee (FBDF/C) makaih in June 22, 2017 in Field adia a khatveina hi ding in Field Sub-Office, Rongchingri mun a, Field sung a Tuailai Bible zouthakte toh One Day Fellowship leh amaute Pathian min-a pahtawina & kipahpihna etsakna in Programme zatpih uhi. Hiai hun ah FBDF in amaute Karbi Muffler khat chiat awksak in refreshment limtak nekpih uhi. Hasotna thute gen in, Asst. Field Superintendent in amaute ading a thumsakna nei hi.
c) Thilpiak:
1. Mr. TP Hanse (Editor, Arleng Daily) leh a inkuanten Pathian gam nasepna in, EBCC Bithilangso Biakin ading Tutna (Bench) 50, Pulpit leh chair nih bawlsak ua, June 20, 2017 in EBCC Bithilangso Biakin ah va koih uhi. Hiaibang a mi kiphalte ziak in Pathian min i phat a, Toupa vualzawlna i ngetsak hi.
2. Pathian’ misiangthoute thumna dawn a om in, 5KM Lumding Road ah EBC Fellowship member inkuan 2/3 toh hing hamham a om, tukum in inkuan 10 pha theita ding bang in lang a Toupa min i phat hi. Pathian vualzawlna toh neuchik i ki behlap chiang in a, mun leh mual in hon chinlou pah zel ahih man in, Biakinn mun ding lunggulh huai pah zel hi. Tualsungte kisak kholhna awlmohna toh EBCC Diphu in Asst Field Superintendent tungtawn in huhna Rs. 5000.00 pia hi. Field a Saptuam Khanna leh masawnna omzelten Saptuamte hon kilawpsak mahmah ahih man in, a hong lohchin touh zelna ding in thumpih ni.
d) Project Etna Nei:
Director of Missions EBC, Missions Coordinator EBC leh Central Missions Sub Committee member nih in June 27-30, 2017 sung Karbi Anglong Mission Field vehna nei uhi. Hiai hun sung in Field sung a nasep (Project) kizouta (Manja Quarter, New Langrik Quarter, Rongali Quarter, Dengaon Quarter, Rongchingri School Toilet, Bithilangso Pastor Quarter) te leh a pai lellel (Dengaon a Retaining Wall, Tari Adong a Ring Well & School building, Rongali Biakin, Bithilangso Biakin) te etna leh maban panlak ding dan amauten field-te toh kikupna nei uhi.
II. KIPAH THUGENNA LEH THUMNA DINGTE:
1. Mijung Area sung a om Langetso khua ah gingtu hisa inn 7 vel member 40 pha, i saptuam a honglut ut uh ahih thu zak ahi. Etzui touh zek a laklut ding dang geltheih dan a om hiam chihna toh a dinmun uleh hihna dan uh kanchian ding in pastor heu in misawl hi. Tunung a thil omdan a hong hoih zelleh Mijung area a i sepna pansan ding kizen mahmah ding ahih man in a hoihpen dia Pathian geldan muhchet ahih theihna ding in thumna toh delhzui ni.
2. Field in Saptuam kemtu ding upa telna a paisuak, examna pethei ding 4(li) Pathian in hon piakte ziak in kipahthu gen in, Upa gahsuah leh manpha a hong hihna ding un thumpih ni.
3. EBCC Rongali member nungtolh: Robinson Bey, Sokjok Timung, Sarthe Rongpi, Sonsing Hanse, Thomas Hanse, Lokso Tisso te a pukna lai uh thei a Pathian lam a hong kiknawnna ding un thumpih ni. Amaute ban ah Field sung a Tuailai khamtheih thilchiin tuamtuam a kibualte leng thumpih ni.
4. Field sub office Chowkidar, Evan. Sarthe Rongpi zun paina kong a suang om, operation ngai ding, lohching tak a at zoh ahih a, a hong damsiang pahna ding in thum ni.
5. Field sung Tuailaite lak ah thutak a dangtakna hong om kipahhuai i sa. Tua toh kizui in Bible zilnuam mi 5/6 vel om uhi. A lunggulh bang ua chance a muhna ding uleh Field domkangtu dia Pathian vanzat ahih ngei nading un thumpih ni.

C. DHEMAJI MISSION FIELD:
1. GBC TEN PRACTICAL MINISTRY NEI. June 1 - 8, 2017 sung Grace Bible College a M.Div & B.Th Graduating student mi 11 ten Dr Suankhanhau leh Sir H Pauthianmuang makaih in Dhemaji field ah practical ministry lohching tak in nei uhi. Amau team thum a kikhen in Dakwakhana area, Dhemaji area leh Silapathar area ah beihpi suah uhi. Amaute’n damlou omte vehna leh tangthupha za nailoute kiang a tanchinhoih genna nei uhi. Hichi bang a veina liantak toh field adia volunteer a kuan students te leh heutute ziak in Toupa min i phat hi.
2. FS IN QUARTER HONNA LEH LATNA NEI: Digolgorah a semtu quarter kibawl, zoh ahihtoh kiton in June 17, 2017 in Field Superintendent in honna leh latna nei hi. Hiai quarter half wall concrete a kibawl ahih ban ah toilet pucca in kibawl hi. Pastor S Thangbiakmang in luahta hi. Chidam tak a hon luah i deihsak mahmah hi.
3. GRACE ENGLISH SCHOOL AH HEALTH TALK: June 24, 2017 in Evan. G Haukhosiam Guite in, Grace English School, Bakuguri ah “Health Talk” hun manpha tak in zang hi. Aman naupangte lak ah khosik, sungkhoh, BP, diabetic problem leh natna tuamtuam etkol dingdan sinsakna pia a phattuampih mahmah uhi.
4. PITYANGCHAPORI BIAKIN BAWLNA: Dhemaji field a Pityangchapori khua ah biakin bawlna nasep bangtan hiam tunnung in kho hausa leh khosung tangval khenkhat in- “Na biakin bawl ding un non dong kei uh. Na zohchiang ua kihou ngai ding ahi” chi a, nasepna a a va gen ziak un, June 18,2017 in kihoukhAWmna huai mun a semtute toh nei uhi. Kho hausa ban ah, khosung mi leh TMPK (Takam Mising Porim Kebang- Student Union lianpen) a Secretary leng Silapathar apan sam ua, Pathian pina toh biakin bawlzom ding in kihoulem thei uhi. Biakin bawlzoh a hong hih a khamangthang tamsem muhna mun ahihna ding in thumna tamsem toh delhzui ni.
5. BAPTISMA PROGRAM ZAT IN OM HI: Digolgorah ah gingthak Mrs Dorpona Doley (44) in Jesu Khrist a sannung in, Pastor S Thangbiakmang khut ah Baptisma tang hi. Hiai hun, a pasal (Ginglou mi) in a uap ban ah a theihpihtu ding in pang hi. Pastor Thangbiakmang in Digolgorah area a etkol nung adia gingthak muh masakna pen ahi. Tamsem hon muhna ding in thumpih ni.
6. FS QUARTER-cum-OFFICE BAWLNA PAIZEL: Field Superintendent Quarter-cum-Office bawlna in masawn zel hi. Toupa’n pha honsakpih aleh, September kha a Pityangchapori Biakin toh honkhawm theih dia lam-et ahi. Thumna ah phawk ni.
7. KIPAH THUGENNA LEH THUMNA POINT DINGTE:
i) Khohun kiheidan ah tuktui luan hun hita, hiai bang hun ah tuikhang (flood) in i sepna mun hon subuai kha theizel hi. Semtute leh gingtute bitna ding in thum ni.
ii) Field a semtuten team chidam ban ah khalam leh lungsim hatna poimoh mahmah uhi. Amaute’n a sepna chiat uh kuhkal leh chitaktak a hon sutzop theihna ding un thum ni.
iii) Pu N Langchinthang, EBCC New Lane, Bungmual in Miss Deeparani Doley GBC student, Summer Vacation sung a inn uah a na ompih hi. Hichibang i student inlam pai zoulou hon awlmoh pihte ziak in kipahthu gen ni.
iv) Pathian in gingthak hon piak sate khalam pichinna ding in thum ni. Amaute’n khalam ban ah chihtakna leh ginomna leng poimoh mahmah uh.
v) Nungak Trishnamoni Pegu, Dunaguri khua a om, GBC ah Bible zil ding in kisa hi. Amah insung khosa haksa ahih man in sum leh pai genlouh zanpuan ding nasan neilou ahi. Ittu leh deihsaktu ding a om a, lohching tak a a lut theihna ding in thumna in phawk ni.

D. MANIPUR MISSION FIELD:
1. THU TUAM TUAMTE :
1. Tuailaite dan siangthou a kiteng hong om pan panta, kipahhuai mahmah hi. Khristian inkuan hoihtak bawlkhetu ahong hih theih na ding un thumpih ni.
2. Field apan Bible zil lelte lunglut leh chitaktak a a pan ua, tunung a field adia muantham makai a hong hihna ding un thumna ah phawk zel ni.
3. Sugnu, Wapokpi a semtute quarter kibawl lel atung khuh ding kisam hi. Zohsiangna ding haksa lai hi. Pathian kiang ah panpihtu ding ngen in thumsak ni.
4. Nambol Quarter bawlna pailel hi. Khuasiat ziak in nasep deih bang in kin thei kei mahleh nasep pailel, thumna ah phawk ni.
5. Thamnapokpi ah Quarter cum Conference Hall bawl sawm a panlak lel ahi. Buaina bangmah om lou a lamzang tak a bawl a hong hih theihna ding in thumna toh delhzui ni.
6. Field awlmohna ziak a EBCC Hiangtam Lamka in Workers’ Renewal camp a sponsor uh June 27 – 01 July 2017 sung EBCC Hiangtam Lamka Biakin mun ah nei uhi. Tua hun ah, “Go and bear fruits” Jn 15:16 thupi a nei in Rev S. Vung Minthang leh Rev K. Suresh Singh te’n thugenna hun zang uhi. Hiai camp hun sung in, kipiakthakna nei mi 12 a om ban uah kilatthakna nei tamtak om uhi. June 30, 2017 ni in Rev V. Nenglian DS/LSD in Church Administration sinsakna neihpih a, phatuam mahmah dia lamet ahi.

2. KIPAHTHU GENNA LEH THUMNA DINGTE :
1. Toupan gingthak leh thilpiak petute tamsem, semtute nasepna tungtawn a hon piakbeh a, tunung a field/saptuam kitoudelh a hong hihtheihna ding un thumpih ni.
2. MEBC Jiribam a gingtu Robindro kawng nuailam jeng wheel chair a tawlh a om, awlmohna liantak toh Upa M. Khangin-te nupa, Vengnuam a omte’n amau in pansan in a na enkol uhi. A kipiakzohna uh thupi in etton tham ching mahmah hi. Damlou pen leng ahong damkhiak theihna ding in thumna ah phawk chiat ni.
3. Counselling neihpih lel R.K Singh, Mani Singh leh Thoiba te counseling kichiantak neihpih ahih ua, hotdamna kichiantak a hon neih theihna ding un thumsak ni.
4. Sister Sarita, Delhi ah boxing kisakhawl ding in kha nih sung om ding. Asian games a tel sawm ahi. Anu L. Khomdombi in zingkal baihtaktak in biakin ah a makpa Thoiba ading in thumsak gige hi. Tua pansan in midangten leng zing devotion hawh ding ahih dan zilkhia uh chih ahi. Amah cancer a damlou ahi a thumpih ngai mahmah hi. Sarita lohchinna ding inleng thum ni, aman enghouna tampi leng tuak hi.
5. Khristiante douna leh soisakna hong uang semsem ding in kilang hi. Gingtu tamzawte tuailai ahi ua, nulepa, khotang in doudan tuamtuam in dou uhi. Ginna muanhuai tak nei a ze-etnate a hon thuak zohna ding un thumsak ni.
6. Pathian in khamangthang tamsem semtute tungtawn a hon piakna ding in thum ni. 